LUKAS 22
22
Iboudo Jesus Wagiine Mana Wegai
1Goti ejajawii beu naago kodo, kou ko, wadouga etigajake petii tita ga-tou naago ebatita kodo kapa keega.
2Imam iboudo ma, kapogeije epi bagee ma Jesus kawe danite wagimakija dimi ubai. Okei meido kede weda egai kouja.
Judas Jesus Eekegajawiine Dimi
3Tijake Teege kidi Judas duba amoujo kai, eka ki Iskariot eebatita kidi, wija ma gaati kede ka idaana kidi.
4Okai uwijake imam iboudo ma, serdado iboudo ma enaimo mana oowegai, Jesus okeepa eekegajawiine mana kodo.
5Okei eepajake mege kaniitage kojoka etii.
6Judas enaa etijake eekegajawiine tijake enaa wagi ubai, me beuda gaa.
Goti Nota Uno
7Tijake goti ejajawii beu naago kidoke, wadouga etigajake petii tita ga-tou naago, domba joka wagija naago kodo.
8Tijake Jesus kidaa Peterus ma, Jahja ma ebadikumijake, eteete mana, „Ikai auwijake ibo naago naine kodo epeepi neetimakai,” etii.
9Tijake okejai aeteete mana, „Kaija ide naineida epeepi katijawii ko?” aetai.
10Tijake wo eteete mana, „Aajuwidowei, ikai makiida wadoujo aakijake uwo nogo-taipagi me ma akado aataipiga. Wadoujo kaipagi owaa duba aepei.
11Tijake owaa ipuwe me kidiipa kii dani aetai, ’Kuduuja kateegi, Kawo kugu kouja anija etope-tai ma enaimo ibo naago kodo inii naipage? kateegi,’ aanaetai.
12Tijake wadouto ka ibo tigi atita kugu kimuwakaipagi. Okai kouda kodaa epeepi neetimakai,” etii.
13Tijake okejai auwijake okaija etita danite aadomakai; tijake wadouga etigajake petii tita ga-tou naago epeepi aatimakai.
14Kou wagi kodaa kijake Jesus animakai, daana eti-awitaido okai ma enaimo.
15Tijake eteete mana, „Ani umina ide gajake kii wadouga etigajake petii tita ga-tou naago kodo ikii ma enaimo nai, ani didi gaduwai beu gaa.
16Ani kitii kouja, ani kigeena ma te naita, Ugatameja jakimakita makiida kodaa boko duwadoke taitaida to,” etii.
17Okai uwaawe motijake nigajaweege eti-menijake, eteete mana, „Kii ke motijake wudiwei.
18Ani kitii kouja, ito kiija make wado ani utaadijo te naita, Ugatameja jakimakita makiida meitaida to,” etii.
19Tijake Jesus goti kodo motijake nigajaweege eti-menii. Okai utijake meneete mana, „Kii ke anija má kodo, ikii maida make kijaekegajawita. Kou dani naga-toote kei tigoo to tai,” etii.
20Okai kou dani maija nojawijake uwaawe kodo motijake eteete mana, „Kii uwaawe kii ke ija kijatogijawita mana kodo anija emo duba, ikii maida make kijatuumijawita.
21Kodeja dodowei! Naekegajawiipagi me ka gane inii wa enaimo nooteida topi kiija.
22Me Joka maida boko jaduwajawita danite uwii. Kodeja eekegajawiipagi me kidi peu kugouto dokidoke no!” etii.
23Tijake okei kede akagaado go-motii, okei jupi kawi me ki kei taipagi mana kodo.
Etope-taido Akaije Mana: Meime Ibo
24Okei jupi akaije mana potu tidoke, okei jupi kawi ki ibo eebatija mana kodo.
25Tijake Jesus eteete mana, „Ojaa bagee ejakimake-tai bagee kedaa bida peu etimakai, daana okeija ka iboudo kede jowee me eebatija.
26Kodeja ikii ke kou dani ko beu. Kodeja ikii jupi ka ibo kidi, mijo dani kai. Daana etimake-tai kidi, kijakei te-tai me dani kai.
27Kawi ki ibo, naine animakita me kidi, mee? eedade-tai me kidi. Beu mee? naine animakita me kidi no. Kodeja ani ki ikii jupi kijakei te-tai danite.
28Ikii ke anija nagaado tita gaa bida peu kidi neetou to.
29Daana Naitai kidaa jakimakita makiida natogijawita danite, ani maija kijatogijawii,
30anija jakimakita makiida ani ma enaimo no-tita. Daana ibo animakaida animakijake Israil epa wija ma gaati boko japetai.
Peterus Beu Puga Etai Mana Douja Dojawita
31Ei, Simon, Simon! Teege ikii utoma umina bida peu gandum dani mapagi kitaine
32kodeja ani sembahjang kajakimakeega, akija maakodo gai dimi kodo bego te te-tita. Daana aki ki wouga kijake akoogeima boko ooduwajawii,” etii.
33Tijake Peterus eteete mana, „Ei, Tuhan, aki ma enaimo wanee owaa duba uwii na enaa, bokai na enaa,” etii.
34Tijake Jesus eteete mana, „Ei, Peterus, ani katii, ito naago ajam mana te taipiga, aki nadouge mana kigi wido beu puga nataipageida to,” etii.
35Tijake Jesus etope-taidoopa eteete mana, „Potó ma, agija ma, bado awii ma tagu kibadikumeetega gaa, ikii tumaana agijo beu keemega, mee?” Etijake „Beu” etii.
36Tijake eteete mana, „Kodeja ito kou, meija poto awipi dokii to, daana agija maija. Daana meija kataana beu kipi, kagaba kaa tijake kataana edai.
37Ani kitii kouja, ani maida make kapogeije ko kobadoke taipiga, kou ko: Okai peu bagee ma enaimo egakita mana kodo. Ani maida make ebijamakita mana kodo boko duwadoke tija,” etii.
38Tijake okei eteete mana, „Dodou, Tuhan, kataana wija topai,” etijake Jesusja „Tiki no,” etii.
Getsemani Taida
39Jesus podomijake kei teigi danite Zaitun Dimiidaapa uwii. Etope-taido maija eepei.
40Kouda kodaa dakii tijake Jesus eteete mana, „Ikii gaado tapa te ke-tijake sembahjang tiwei,” etii.
41Mogo wagi-toojogo anija daniida wo gaa kijake bado donimakijake sembahjang,
42eteete mana, „Ei, Naitai, aki enaa gape ko, kii uwaawe kidi aneepa make napipikajawii. Kodeja anija dimi ko beu, akija dimi to kei tai,” etii.
43Jaetigo-tai bagee epaawado make ewaida kijake bida eewii.
44Totome umina kodo duba sembahjang umina tai, tijake awaata kodo emo dani maki maida totopo tidaa.
45Okai sembahjang titaidaapa make joonidoke tijake etope-taidoopa uwijake, okei gaagaa ka uno umi-toojogo edomakai.
46Tijake eteete mana, „Magijo ka ikii uno umeete? Anigojake sembahjang tiwei, ikii gaado tapa te ke-tijake,” etii.
Jesus Ejakimakita
47Okai mana wegaatigo gaa me kotoona mei. Daana me kidi eka ki Judas, kii ko wija ma gaati ka kede me idaana kidaa migougu oomakii. Okai Jesus unu ejumidoune mei.
48Kodeja Jesus eteete mana, „Ei, Judas, unu ejumidojake me Joka eekegajawiine, mee?” etii.
49Jesus watija ka bagee kede potu taipiga mana dojake eteete mana, „Ei, Tuhan, inii kataana ka wagii, mee?”
50Etijake okei jupi ka me idaana kidi Ibo Imam jakei te-tai me wagijake etikaato gapa jaduwajawii.
51Kodeja Jesus wo eteete mana, „Kii kidi to nijaikei.” Etijake gapa kodo jajakidojake titaaki jatijawii.
52Tijake Jesus kidaa imam iboudo ma, Ugatameja owaa douto-tai bagee ma, iboudo ma, ejakimakaine meta bagee kedeepa eteete mana, „Ikii moonaa te-tai me akaije ootaine jaijo kataana ma kopa ma dokijake meega, mee?
53Agapi gakita ani Ugatameja owaa duba keetou to teiga, tijake ikii najakimakai beu. Kodeja ito kou ikiija ka wagi, daana bunita ka bida bokouto kodo,” etii.
Peterus Beu Puga Etita
54Okei Jesus ejakimakijake ouwii, Ibo Imam owaapa kodaa. Peterus poto make eepei.
55Okei owaa juwouda bodija dagumijake animakai. Peterus maija okei ma enaida animakai.
56Bodija wii tapa api idaana epeepite peka edootaa timakijake eteete mana, „Kii me ki maija okai ma enaimo me kidi,” etii.
57Kodeja okai beu puga eteete mana, „Ei, jagamo, ani edou beu me,” etii.
58Ibopo tou beu gaa me idaana edomakijake eteete mana, „Aki na kei kede idaana.” Etijake Peterus wo eteete mana, „Kowaa ke, ani ki beu,” etii.
59Tota dani gaa kidaa me idaana ma bida peu eteete mana, „Beu maa kou, kii me kidi okai ma enaimo. Okai Galilea ka me kiija,” etii.
60Kodeja Peterus eteete mana, „Kowaa ke, akaa eneege mana ko ani gai beu,” etii. Okai kou gaa kodo okai mana wegaatigo gaa, ajam mana tai.
61Jesus wouga kijake Peterus edomakai; tijake Peterus kidi Jesusja etipi mana kodo gadoke, kou ko, „Ito naago ajam mana tai beu gaa aki kigi wido beu puga nataipage,” etipi mana kodo.
62Okai podomijake jege kodiinakii tai.
63Jesus ejakimakita bagee kede ewidogijake wagigoo.
64Okaija peka eepumijake egaado eete mana, „Douja nidodou, meija kageegi?” etii.
65Okei mana wedaba ewidogeete godajake tai.
Jesus Pika-tai Jumaapa
66Abata digii meido ka iboudo kede kotuu timakai, kou ko imam iboudo ma, kapogeije epi bagee ma. Okeija ka pika-taida ouwijake eteete mana,
67„Aki Keristus keetigo ko enidodou.” Etijake Jesus wo eteete mana, „Ani kitipa ko ikii maakodo te nagaipiga.
68Daana kigaado tipa ko ikii joko te eniipiga.
69Kodeja ito kiija make wado me Joka kidi Ugatameja bida bokouto etikaato gebo animaki-toutagi,” etii.
70Tijake okei utoma eteete mana, „Keetigo ko aki Ugatame Joka, mee?” Etijake wo eteete mana, „Ikii eneega danite, ani okai kii kidi,” etii.
71Tijake okei eteete mana, „Magijo taine inii mana abuma wegai? Okai kidaa ebeida make mana inii ejuweege,” etii.
Currently Selected:
LUKAS 22: EKG
Highlight
Share
Copy
Want to have your highlights saved across all your devices? Sign up or sign in
