LUKAS 23
23
Jesus Pilatus Jumaapa
1Okei utoma joonidaa tijake Jesus Pilatus jumaapa ouwii.
2Okei utoma ijeije eteete go-motii, eteete mana, „Kii me kidi inii tuma monoo nitei teetegi edomakeemege, daana Kaisar mege menii mana beu nitei teetegi, daana okai kidi Keristus, jakimake-tai idaana tei teetegi,” etii.
3Tijake Pilatus egaado teete mana, „Aki ki Jahudi ejakimaketai me kidi, mee?” Etijake wo eteete mana, „Akija eneege dani,” etii.
4Tijake Pilatus kidaa imam iboudo ma, me wedaba ma kedeepa eteete mana, „Ani kii me ki maida peu tumaana ma jadomakai beu keega,” etii.
5Kodeja okei bida peu kidi eteete mana, „Okai meido tetepepe etei teetegi, Judea dokoo utoma, Galilea make go-motijake jakai dakii teetegi,” etii.
Jesus Herodes Jumaapa
6Pilatus kou mana juwijake egaado tai, me kidi Galilea ka me, mee? tijake.
7Okai Herodes douto-taida ka me kidi mana epi kijake, Herodespa ouwii etii. Okai kou gaa kodo okai Jerusalim toojogo.
8Herodes Jesus edojake ideide tai, okai tika kodaa make edoune gata kouja, mana wedaba okai maida make juwijake. Daana dou beu agijo kei tai edoune tijake.
9Okai kouja okai mana wedaba egaado tai, kodeja Jesus mana mutoona ma wo etii beu.
10Imam iboudo ma, kapogeije epi bagee ma ijeije umina eteete joonidaa ti-toojogo.
11Herodes kidi serdado ma enaimo peepu etijake ewidogai. Tijake diiti kagaba jamakijake, Pilatuspa joko ebadikumii.
12Okai kou naago kodo Herodes ma, Pilatus ma akooge akooge aatai, tika kodaa be akaga te-tai kodeja.
13Tijake Pilatusja imam iboudo ma, pika-tai bagee ma, meido ma manaa-tijake
14eteete mana, „Kii me kidi meido monoo ete-tai me danite aneepa oomeega, daana kiija ikii pekaida ani igi ejakimakijake peu agijo ena ma okai maida jadou beu keega, ikiija ka ijeije etipa danite
15Herodes maija beu, ineepa joko nijaebadikumipi kouja. Juwidou, ebokajawii mana okai maida beu.
16Okai kouja ani godijai etijake ejaikaipiga,” etii.
17Ibo naago kodo Pilatus kidaa egadimimakita me idaana jajaikija kouja.
18Kodeja okei utoma enaimo kidi emeeme teete mana, „Kii me kidi niwagimigei! Barabbas nijajaiki!” etii.
19Barabbas kii ke wanee owaa duba amo eewita, ibo makiida tetepepe ewaa awita kouja, daana me wagimakita kouja.
20Tijake kigeena ma Pilatus mana oowegai, okai Jesus ejaikaine gajake.
21Kodeja okei emeeme to teete mana, „Pija boko maida edajawii. Pija boko maida edajawii,” to tigoo.
22Tijake kigi widaago Pilatus egaado teete mana, „Má peu agijo kei tijake ka? Wagiine kou ko ani peu tumaana ma jadomakai beu keega. Okai kouja ani godijai etijawijake ejaikaipiga,” etii.
23Kodeja okei wage-tita tijake umina maa kou kuutakaa emeeme tai. Tijake okeija ka mana petee kita.
24Tijake okeija ka ediimita mana kodo Pilatus boko jaduwajawii.
25Tijake tetepepe duba me wage-tai mana maida make wanee owaa duba amo eewita me kidi jajaikai, okeija ka ediimita kodo danite. Kodeja okeija ka gata danite Jesus jaekegajawii.
Jesus Pija Boko Maida Edajawita
26Okei Jesus ouweetigo gaa Kireni ka me idaana eka ki Simon ejakimakai, mudeida make meetigo gaa. Tijake okaija kodeida pija boko kodo jadokijawii, Jesus nemoutouga dokijake eepe-tita.
27Me umina wedaba eepei, daana jagamoudo jiijii ma jege ma eteetigoo.
28Kodeja Jesus okeepa wouga kijake eteete mana, „Ei, Jerusalim ka jagamo jokaido, ani jege te natai, kodeja ikii akaato ma, ikii jokaane ma jege etai.
29Juwidou, putu duwaita gaa okei wegaitai mana, ’Pijaakita bagee ideide no! Daana modo dokii beu tijake ama menii beu bagee.’
30Okai kou gaa kodo me ka bagoudaapa mana go-motiitai, eteete mana, ’Inii maida nitagimidou!’ Daana keboudaapa etii ko, ’Neepumidodou.’
31Ija pija maida kou kei tipai, gee pija maida kawe dani kei taitai?” etii.
32Peu me wija maija okai ma enaimo wagiine ouwii.
33Eka ki Dagi Mitoo Kotuuda dakii tijake, okai kouda kodaa pija boko maida edajawii. Daana peu bagee maija me idaana etikaato, me idaana akaato etijawii.
34Tijake Jesus sembahjang teete mana, „Ei, Naitai, ipa ejaikai, okei ewoudaiga kei teete kouja,” etii. Okei tipa po momogo tija dani kei tijake okaija kagaba wudijawii.
35Meido kede pege ati-toojogo. Iboudo kede ewidogai, wegaate mana, „Okai joko ka bagee petii etijawita. Ito kou okai akaato petii ti-ati, okai kou danite Ugatameja Keristus, ewitokita kidi keetigo ko,” etii.
36Serdado maija mejake ewidogai, daana enege utaadijo menidou,
37eteete mana, „Aki Jahudi ejakimake-tai kidi keetigo ko, aki akaato petii tidodou,” etii.
38Okai wadouto kou dani ebijamakita: Kii ke Jahudi ejakimake-tai me.
Peu Me Wija Kei
39Peu ka edajawita kede ka idaana ewidogeete mana, „Beu mee? aki ki Keristus. Aki kidi ma inii ma petii neetijawidou,” etii.
40Kodeja joko ka kidaa ewidogijake wo eteete mana, „Aki Ugatame weda egai beu, mee? Okai kii kidi danite aki peu kaawegai kouja.
41Daana inai ke maakidi peu neeweegai, inaija ka aakei tita danite abu nijapaagai kouja. Kodeja kii me kidi peu agijo ena ma kei tai beu,” etii.
42Tijake eteete mana, „Ei, Jesus, ani maija nagai, akija jakimakita makiida dakii taitage gaa ko,” etii.
43Tijake Jesus eteete mana, „Beu maa kou ani katii, ito kii naago kidi pĂpoga makiida ani ma enaimo aakaipage,” etii.
Jesus Bokata Mana
44Okai kou gaa kodo dagi epouda gaa kodaa, kou maki utoma wanee kijake meuka amouwe dagiida to.
45Meuka tani pa maija igadoke tai, daana Ugatameja owaa bede duwajawita kagaba petaago wija kidoke tai.
46Tijake Jesus kuutakaa emeeme teete mana, „Ei, Naitai, aki ganeida anija dimi mana wado kajaikai!” Etijake ebeejo wo motidoke.
47Serdado migougu me idaana kidi kei tidoke mana kodo dojake okai Ugatame muta etuwai, wegaate mana, „Beu maa kou me kidi enaa me,” wegai.
48Kou agijo doune tijake pege atita bageido kede kei tidoke tita mana kodo dojake kegepa tagi atijake metaato uwii.
49Okai ma bagee utoma daana Galilea make eepeta jagamoudo ma poto make joonidaa tijake kei manaido doutou.
Jesus Me Oka Emakita
50Me idaana eka ki Jusuf, mana pika-tai ka idaana, okai dimi mana jikoo me;
51okeija kepajawita mana ma, kei tita agijo ma okai ena dimi kepajawii beu. Okai Arimatea ka me, Jahudi dokoo ka maki enaida. Okai kii kidi ki Ugatameja jakimakita makiida douto-tai.
52Kii me kidi Pilatus jumaapa Jesusja má jato ediime-uwii.
53Tijake má jato mijouwe eewijake enaa kagaba ka etonijake mogo duwimakita me oka duba emakijawii, me idaana ma emakai beuda kodaa.
54Kou ko epeepi tijawii naago kodo, tijake Sabbat naago kaineega.
55Jesus ma enaimo Galilea make meta jagamoudo utoma eepejake me oka dou, daana emakita mana kodo dou.
56Okei metaato uwijake unu enaa agijoudo epeepi timakai. Sabbat naago dijo douja mana epeepe gabo tou.
Currently Selected:
LUKAS 23: EKG
Highlight
Share
Copy
Want to have your highlights saved across all your devices? Sign up or sign in
