LUKAS 10
10
Etope-tai Gaati ka Wija Ebadikumita
1Wadoutouga Tuhan me ino me ida gaati ka wija epaapa etijawijake okaapa make me wijaija ebadikumii, maki gakita okai kidaa jawiineida.
2Daana okeepa eteete mana, „Duwai agijo maa kou wedaba kodeja duwai bagee wija to. Okai kouja uta ipuwe me kidi ediimiwei, duwai bagee duwa-taida ebadikume-tita tijake.
3Ikii uwii to tai! Dodowei! Ego jago jina jupi domba joka dani bukaa kibadikumii.
4PotĂł te dokii, agija na beu, bado awii na beu. Ita maida me idaana ma mana te oowegai.
5Ikii wadoujo kai owaapa edoga kidi etii ko: Kojáá bokouto kii uguwo maida kidou!
6Kojáá dimi gata me topi ki, ikiija kojáá mana okai maida kaita, kodeja beu topi ko ikeepa joko meita.
7Kou owaapa tojake kijamakita agijo nai to. Kei te-tai me kidi ageja motija kouja. Owaanaapa make owaanaapa te tai.
8Maki enaapa woujo kijake meido ka mei kitipai kijamakita agijo nai.
9Kouda ka didi bagee beu jaawii, daana kii dani etii: Ugatameja jakimakita makiida kapa keega.
10Kodeja ikii maki katouda woujo kijake me ka mei ti kitipai, ita maida podomijake etii ko:
11Ikiija makijo ka maki puugee kodo maija iniija bado maida topi tita kodo, inii ikeepa kigi kijatijawii. Kodeja ikii gai: Ugatameja jakimakita makiida kapa keega!
12Ani kitii, okai kou naago kodo kou makiida ka peu kai kodo ma ko, Sodom ka peu kai kodo egaida.
Tedemai Beu Makijoudo Ewidogita
13Aki peu kaineege no, ei, Chorazin! Aki peu kaineege no, ei, Baitsaida! Kou danite Sur ma Sidon ma duba ego takuu-takuu agijoudo ewaa awii naako, ikii duba ewaa awita dani bukaa, okei tika kodaa make tedemi-toja, me peuda kagaba makijake gako duba animakijake ko.
14Kodeja boko petai naago ikii ma ko Sur ma Sidon ma peu kai kodo egaida.
15Daana aki ki, ei, Kapernaum, aki epa maida wado ti-taitage, mee? Aki ki bokawouda mijouwe kaitage.
16Meija kijuwipi ani kidi najuwai, daana meija kikonipi, ani kidi nakonai, daana meija nakonipi, nabadikumita me kidi ekonai.”
17Okei gaati ka wija kede ideide ma joko mei, eteete mana, „Ei, Tuhan, akeeka duba enija maija nijuweemegai,” etii.
18Tijake Jesus eteete mana, „Teege wakibego danite epa maida make gootai edoomega.
19Juwidou, ani bida agijo kinii, ugenija ma, puga ka nokogetai jina#10:19 kaladjengking ma daime-tita tijake, daana jape ka bida agijo utoma maida ko. Tumaana agijo ma peu te keewiita.
20Kodeja okai kou maida kodo ideide te tai, enijaido kijuwai mana kouja, kodeja ikiija eka epaawado ebijamakita kodo ideide tai.”
Sembahjang Duba Ugatame Muta Etuwata Mana
21Okai kou gaa kodo maija Rohulkudus duba ideide timakijake wegaate mana, „Ei, Naitai, nagajaweege, epa ma maki ma boko duwajawita me, aki kei manaido dimi boko jago bagee ma, dimi epi bagee ma keipa make boonijake, jokaidoopa ewaa tapa jaawita. Ei, Naitai, kou dani aki ide gata kouja.
22Utoma agijo utoma Naitaija naaekegajawita. Daana meena ma Joka kidi edou beu, kodeja Nakame to. Daana meena ma Nakame edou beu, kodeja Jokame to, daana Joka kidaa gajake ewaa tapa jaawiine bagee to.”
23Jesus wouga kijake etope-taido kedeepa to eteete mana, „Ikii ke ideide no! ikii doote manaido kodo ikiija ka peka kodaa dou kouja.
24Ani kitii kouja, tikauwa ka gokobaki tijawiidaiga wegai tita bagee wedaba ma, maki jakimake-tai bagee wedaba ma ikii do-tai manaido doune tijake didi gai, kodeja dou beu; daana ikii juwe-tai manaido juwiine tijake, kodeja juwii beu,” etii.
Ipa Dimi Jago Samaria ka Me
25Kapogeije epi me idaana egaado taine tijake joonidoke tai, eteete mana, „Ei, Kuduu, ani magijo kei tai, ajii taine no?” etii.
26Tijake Jesus wo eteete mana, „Dijo douja manaida magijo ebijamakita? Kawe dani ebatai?” etii.
27Tijake wo eteete mana, „Akija Tuhan Ugatame kidi kegepa puki ka ei egai, daana dimi mana puki ka ma, daana bida puki ka ma, daana dimi puki ka ma, daana aki watija ka bagee aki akaato danite,” etii.
28Tijake Jesus eteete mana, „Akaa eneege kou ko maakodo. Kou kei tijake ajii taitage,” etii.
29Kodeja me kidi akaato maa awiine tijake Jesuspa eteete mana, „Meime ani watija ka bagee?”
30Etijake Jesus wo eteete mana, „Me idaana Jerusalim make Jericho jamo uweetigo. Okai oma bagee gane duba kijake okaija kagaba jabejajake wagii, tijake bokaine dani ejaikidokijake uwii.
31Imam idaana kou itaiga ewoudaiga jamo jawii. Edojake kotuwa-motidokijake jamokaato kai.
32Kou danite maija Lewi epauto me idaana, kouda kodaa dakii tijake edou. Ekotuwa-motidokijake jamokaato kai.
33Kodeja Samaria ka me idaana ita jaweetigo okai pakutitaida kodaa mei. Edojake okai ipa egai.
34Okaapa uwijake jati jatonijawii, jeboo ma, utaadijo ma jatuumijake. Tijake okai kidaa keledai maida wadouwe eewijake ita jawe owaapa ouwijake eedadai.
35Aweetaa naago mege wija gidijake ita jawe owaa douto-tai meepa menijake eteete mana, ’Naaedadai, aki abuma jamapugatoutage ageja ani wado mejake kaniita,’ etii.
36Okei wido jupi kawi ka ki, akija gai ko, oma bagee ejakimakita me kidi maida okai watija ka bagee keegi?” etii.
37Tijake wo eteete mana, „Ipa egata me kidi ki.” Etijake Jesus wo eteete mana, „Aki uwijake okai kou kei tai maija,” etii.
Marjam ma Marta ma
38Jesus ita jaweetigo maki katouda dakii. Jagamo idaana eka ko Marta okaija owaapa mei etii.
39Marta kodo kenekame eka ko Marjam. Okai Jesus badoopa animakijake okaija mana ejuwai.
40Kodeja Marta kodo jakei teete umina gaagaa, tijake Jesuspa uwijake eteete mana, „Ei, Tuhan, ani nagai beu, mee? ani keneka najaikeega kou ko ani meena kei teete kodo. Eedade-uwii naaetii,” etii.
41Tijake Tuhan wo eteete mana, „Ei, Marta, Marta, aki agijo wedaba maida gaagaa umina.
42Kodeja ena to gai peu. Marjam enaa agijo kodo witokijake okaapa make te jamotija,” etii.
Currently Selected:
LUKAS 10: EKG
Highlight
Share
Copy
Want to have your highlights saved across all your devices? Sign up or sign in
