LUKAS 9
9
Etope-tai Wija ma Gaati Ebadikumita
1Jesus etope-tai wija ma gaati manaa-tijake enija maida make bida boko jaduwajawii, daana didi tuma tumaija beu jaawe-tijake maija.
2Ugatameja jakimakita makiida mana wudii ma, didi beu jaawii ma te-tita ebadikumii.
3Daana eteete mana, „Ita maida tumaana ma te dokii; bado kopa juwa, agija juwa, goti juwa, mege juwa, kagaba wija na te makii.
4Ikii owaanaapa wadoujo kijake kouda tojake kouda kodaa make uwii.
5Tijake ti kijakimakai daniija ikii kou makijoopa make podomija gaa kodo, bado maida ka maki puugee kigi atidokii, okei dimi ga-tijake,” etii.
6Okei uwijake maki gakita uwina tai. Kiida kouda ajii mana wudeete ma, didi bagee beu jaaweete ma tina.
Baptis Tei Tita Me Jahja Kidi Wagita
7Wiijago kabuuda maki jakimake-tai me Herodes kidi kei manaido utoma juwii. Okai gaagaa umina, me ino ka Jahja bokata bagee jupi make anigota mana wegai kouja.
8Daana me ino ka wegai ko, Elias ewaida keegi. Daana me ino ka wegai ko, tikauwa ka mana wudei tita bagee ka me idaana anigopi.
9Tijake Herodes wegaate mana, „Jahja ani ogo eduwaatega, kodeja kii ke meime? okai maida make kei manaido juweete kodo.” Tijake edoune dimi ubai.
Me Ida Lima Ribu Naija Agijo Jawudita
10Eti-awitaido Jesuspa joko mejake okeija kei tita mana kodo eti-menii. Jesus ebukijake okeiniinii maki katouda eka ko Baitsaida ouwii.
11Me wedaba kou mana kodo epi kijake eepei. Jesus meido kodo manaa-tijake Ugatameja jakimakita makiida mana oowegai, daana gai peu bageido didi beu jaawii.
12Kou naago uwaataa kijake etope-tai ida wija ma gaati kede Jesuspa mejake eteete mana, „Meido kede uwei neetii, maki okogoudoopa uno umii ma, naija agijo ubai ma te-tita. Inii jakai me beuda kouja,” etii.
13Kodeja Jesus etope-taidoopa eteete mana, „Ikii ke naija agijo menii.” Etijake etope-taido eteete mana, „Ineepa goti kemo idibi ma, binei ida wija ma wado beu; kei meido wedaba inii kedaa naija agijo jaeda-uwipe to,” etii.
14Kei meido jame to ko muto muto to ko muto kouja, kou wado maija.#9:14 lima ribu) Tijake etope-taidoopa Jesus eteete mana, „Okei animake-tai etei. Kotoona gaatibeu, kotoona gaatibeu etijake tei,” etii.
15Tijake etope-taido kou kodo dani tijake meido utoma animake tai etii.
16Goti kemo idibi ma, binei ida wija ma Jesus motijake epa maida wado dojake mobu ediimai. Utijake etope-taido meidoopa jawude-tijake menii.
17Okei utoma nojake mobu kai. Utita abu kitaija kodo momotijake edu tapuja wija ma gaati awimakai.
Peterus Jawegata Mana
18Jesus okai kidi to sembahjang teetigo etope-taido okai ma enaimo toojogo. Tijake Jesus egaado teete mana, „Me ka wegai ko ani ki meime?”
19Etijake wo eteete mana, „Baptis tei tita me Jahja kidi; kodeja me ino ka wegai ko Elias; daana me ino ka ko, tikauwa ka gokobaki tijawiidaiga wegai tita me idaana anigota wegaigai,” etii.
20Tijake Jesus wo eteete mana, „Kodeja ikiija ka ko, ani ki meime?” Etijake Peterus wo eteete mana, „Keristus Ugatameepa make kidi,” etii.
21Tijake okai umina bida peu kidi me idaana ma te ete-tijake etimakai.
22Eteete mana, „Me Joka gaduwai umina beu kai peu, daana iboudo ma, imam iboudo ma, kapogeije epi bagee ma ka ekonijake wagimakai, tijake widaago naago anigou,” etii.
23Tijake okei utoma kedeepa eteete mana, „Me idaana naapeine gapi, okai akaato dimi te gajake naago gakita okaija pija boko dokijake naapei.
24Meija okai akaato muniine gapi, okai akaato igajawiitagi. Kodeja meija ani maida make okai akaato igajawipi, okai akaato madagajawii.
25Kawo ko enaa kija, kou danite me idaana makiida ka aagijo taagijo okai ipuwe awi-toojogo kodeja, okai akaato igajawii juwa, peu kai juwa kou ko.
26Meija ani ma anija mana ma ego nagapi, me Joka maija ego egaitagi, ajiipiidaiga meitagiida, Nakameja ka, daana jimubeu jaetigo-tai ka ajiipiidaiga meitagi gaa kodo.
27Beu maa kou ani kitii, jakai me ida wija wido jooni-topai, okei Ugatameja jakimakita makiida dou beu gaa te bokaitai,” etii.
Bagouda Jesus Iginikiniki Tita
28Kou mana etijake uno waguwo dani umijake Peterus ma, Jahja ma, Jakub ma ouwijake, bagouda sembahjang taine wado uwii.
29Okai sembahjang teetigo ebepeka iginikiniki tidoke tai, daana okaija kagaba umina wakijo ataati tidoke tai.
30Okai kou gaa kodo maija me ida wija, kei ke Musa ma, Elias ma, okai ma mana oojawegai.
31Okejai ajiipiidaiga ewaa aakidaa tijake Jesusja bokaitagi mana Jerusalim makiida tiki atiineegi kodo mana oowegai.
32Peterus ma, okai ma enaimo bagee ma uno kogi umina kodeja gootoki tijake Jesusja ajiipi agijo kodo dou, daana okai ma enaimo aajoonidaa wija kede maija.
33Me wija kede aigaine jato Peterusja Jesuspa eteete mana, „Kuduu, inii jakai tope ko enaa no. Inii owaajokaa wido kijamigiipage, ena ki aki ipuwe, ena ki Musa ipuwe, ena ki Elias ipuwe.” Kodeja okai wegaate mana kodo okai ewo.
34Okai kou dani mana wegaatigo jabai kapagu ka eepumimakai. Jabai duba kijake okei weda gata.
35Tijake jabai duba make mana wuu eteete mana, „Kii ke ani Joka didé, anija ewitokita kidi. Okai ejuwai to tai,” etii.
36Mana wuu kodo wegajawijake Jesus kidi to edomakai. Okei gabo tojake edota mana kodo kou naagoudo kodo me idaana ma oowegai beu.
Enija Beu Jaawita
37Aweetaa naago okei bagouda make mijo mejake me wedaba ma akado.
38Me wedaba jupi make me idaana emeeme teete mana, „Ei, Kuduu, ani kadiimai ani joka naaedomakidou, anija enaago joka kidaa.
39Enija ejakimakeigi kouja, tijake okai kou gaa kodo okai emeeme tai. Tijake enija ka juma duwajake etijake ebeida ukouko edidaa, daana gaagaa ma ejaikai.
40Akija etope-taido jaemigimakai ediimipa kodeja, okei kaga,” etii.
41Tijake Jesus wo eteete mana, „Kowaa kei, maakodo te gajake akaije te-tai tuma! Uno magoo keetojake kojáá kidoutouta? Aki joka kidi aneepa oomei,” etii.
42Ita meetigo gaa enija kodaa makiida nakuu etijawijake juma eduwajake-tai, kodeja Jesus kidaa enija kodo emoge etijake joka kidi beu jaawii, tijake nakameepa amo jajaikai.
Jesus Bokaitagi Mana Eti-menita
43Me utoma kede Ugatameja bida agijo kodo ego takuu-takuu timakai. Meido utoma okaija kei teete manaido maida make ego takuu-takuu umina teetigo, Jesus etope-taidoopa eteete mana.
44„Kii mana kii ke ikiija gapa duba amoujo awii. Me Joka kidi me ka ganeida eekegajawiitai kouja,” etii.
45Kodeja kou mana kodo okei gai beu, okeepa make boonidoke kouja, ewaa tapa te ke-tijake. Daana kou mana kodo egaado tai weda gai.
Etope-taido Akaije Tita
46Okeija kegepa duba akaije mana ewaa kidaa tai; kou ko, okei jupi meime ibo mana kodo.
47Okeija kegepa duba dimi kodo Jesus epi kijake, joka idaana ebukijake okai watija ejoonijawii.
48Tijake eteete mana, „Meija joka kidi aneeka dubaiga ejakimakipi, okai najakimakai. Daana meija najakimakipi, nabadikumita me maija ejakimakai. Ikii jupi ka mijo daba kidi ki umina ibo kouja,” etii.
49Tijake Jahja wo eteete mana, „Ei, Kuduu, me idaana akeeka ma enija emigimakeetigo inii edoomege. Daana inii beu etii, inii ma enaimo kaapei beu kouja.”
50Kodeja Jesus eteete mana, „Ikii beu te etii. Akaije ti kitai bagee ikoogei kouja,” etii.
Samaria Bagee Ekonai
51Jesus epaawado ebukai putu duwaineega Jerusalim uwiine juma doodoo. Etigo-tai bagee tiga okaapa make ebadikumii.
52Okei uwijake Samaria ka maki katouda woujo kijake unoona dani umidokiine tijake epeepi jatimakaine.
53Kodeja meido kede ebukai beu, okai Jerusalim to juma doodoo kouja.
54Etope-tai wija Jakub ma, Jahja ma kou kodo aadojake aeteete mana, „Ei, Tuhan, ide, mee? inii bodija epaawadoopa make mijouwaawijake kei bagee wei kogi etijawii,” aetai.
55Kodeja Jesus wouga kijake okejai ewidogai.
56Tijake okei maki katouda uwii.
Eepeine Bagee Wido
57Okei ita jaweetigo me idaana ka eteete mana, „Aki uwiitageida kaapeita,” etii.
58Tijake Jesus eteete mana, „Jina mugu topai, daana bedo maija geka topai, kodeja me Joka migo wo makiiaida ma beu,” etii.
59Me idaanaapa Jesusja „Naapei” etii. Kodeja me kidi eteete mana, „Najaikai, naitai oka emake-uwii tiga taine kadiimai,” etii.
60Kodeja Jesus eteete mana, „Bokata bagee kodaa bokata bagee emake-tita jajaikai. Kodeja aki kidaa Ugatameja jakimakita makiida ka mana wudikume-uwii,” etii.
61Me idaana ma eteete mana, „Ani kaapeine kodeja anija uguwoopa kojáá tou ete-uwii tiga taine kojoka najaikai,” etii.
62Kodeja Jesus eteete mana, „Meija maki utii agijo jakimakijake matokaato dopi ko, Ugatameja jakimakita makiida maida edou peu,” etii.
Currently Selected:
LUKAS 9: EKG
Highlight
Share
Copy
Want to have your highlights saved across all your devices? Sign up or sign in
