Matiyut 6

Aakumi inabuwa mba'nuk, wogorogo logorak wone

1 # Mat. 5:16; 23:5 Yorage nagagerik, Yetut nen wone ambinom yorage logonet, “Aakumi nen inigen niyaawak o, yinuk, inenggaanom paga aakumi obeelom eeppiinet nugwi kiyo, liippogo logonip o. Togop eerumonggotak kenok, kinogoba mbogut paga mendek nen onggo wokkiraagin lek o.

2It aap iniki laakot logonet, eekwi nogo ti, Aakumi nen, Nit iya, ninombaruwak o, yinuk, tamban eeko menggam inom, tu paga inom, Togop eekoorak o, yinuk, yoranet nugu menggaarak me, kinamendek aakumi ineenggi lek mendek wogorogo logonet, it eeko mengga kwak, kit togop eerugup o. It aap togop eekwi paga aakumi nen wiirogwe nogo onggo ti aret kologo menggaarak o, yinuk, abet aret yokkiragi o. 3Kit perak, kinamendek aakumi ineenggi lek mendek wogorogo logonet, An nageerok aakumi ndogop wogoragarak o, yinuk, it kinom wonogwe nogo mbininogo yoraagup o. 4Ata, aakumi inenggaanom lek me, kumaarogo wogorogo logonip o. Ndi, kote kumaarogo wogorogwe kiinok, kinogoba kote eekwi enegen kage menggerak nogo nen onggo wokkiraagin aret o, yinuk, yokkiragi o,” yoragagerak.

Tamban eeko logorak wone

(Luk. 11:2-4)

5 # Mrk. 11:25; Luk. 18:10-14 Wone ambinom yorage logonet, “It aap iniki laakot logonet, eekwi nogo nen, Aakumi inigen niyaawak o, yinuk, tamban eeko me-nggam inom, tu nggwok nandogon-kandogon paga inom, taati mi'ndak logonet, tamban eeriyak inikilom mbako mengga kwak, kit tamban togop eeko logogup o. It aap togop eekwi paga aakumi nen wiirogwe nogo, onggo ti aret kologo menggaarak o, yinuk, abet aret yokkiragi o. 6Kit nen tamban eeriyak mbakwi kiinok, kiname unggwogo logomonggotik, tu nappunuk, kinogoba nobara'me menggerak nogo nggino yogo logonip o. Ndi, nggino yogwi kiinok, at kote eekwi enegen kage menggerak nogo nen onggo wokkiraagin o.

7It aap endekem konenggulik mendek nen, Ninoone nggorek yogwi paga aruk konenigin, mba'nuk, inoone nambi-namberak yogo mengga kwak, kit tamban eeko logonet togop eeko logogup o. 8Kit kinamendek lek kenok uugwe mbakwi nogo ti, awo nggino yoga'lek kiigak, kinogoba muk eenu me, it aap ti yogo mengga kwak, kit togop yorugup o. 9#Yer. 3:19; Mal. 2:10; 1Pet. 1:17 Ata, kit tamban yogop aret eeko logonip o.

Ninogoba mbogut paga mendek ao.

Kat kendage abu abe alik leenak menggendak me, tiyappagago ogoorik o.

10Nit kat kabu'me logowok nduk, eeppinani mok o.

Mbogut paga kat kiniki mbake menggendak eeko mengga kwak,

Nit nggween paga yime togop aret eeko logowok nduk, eeppinanu o.

11Yogondak ninambi noorak ndak-ndak wo'niret o.

12Ndi, it aap nit maluk eerogo pinanugwi nogo, ninami eerogo piigo monggo kwak,

Kat nen nit ninomaluk lek eerogo pinanu o.

13Ninabut mbanuwak nduk, pinani nagun o.

Ndi, at abu maluk mendek nogo nen maluk ee'ninake kero, ninagap ndaru o.

(Kabu'me piinok menggenom arum wonage,

Komaawi ambik lombok wonage,

Kat mondok tiyanak wonage,

Eerak menggendak me,

Yogondak inom, peebi inom, lek arigin lek mondok-mondok aret logogin o. Amin.)

yinuk, yogo logonip o.

14 # Mrk. 11:25; Epe. 4:32; Kol. 3:13 Kit nen aakumi inomaluk kinami eerogo piigwi kiinok, kinogoba mbogut paga mendek kunduk, kit kinomaluk abu lek eerogo pinagagin o. 15Ndi, kit nen aakumi inomaluk kinami eerogo piigwi lek kiinok perak, kinogoba nen kit kinomaluk lek eerogo pinagagin mondok lek o,” yinuk, yoragagerak.

Inambe mage negen logonet, tamban eeko logorak wone

16 # Unde 16:19; Lin. 29:7; Yet. 58:5 Yetut nen wone ambinom yorage logonet, “Kit mbi nengga'lek kinambe mage negen logonet, tamban eekwi kiinok ti, it aap iniki laakot logonet, eekwi nogo nen, Nit mbi nengga'lek ninambe mage negen logonet, tamban eekwi niyaawak o, yinuk, inete ogum warak eekkologo mengga kwak, kit togop logonet, tamban eeko logogup o. It aap togop eekwi paga aakumi wiirogwe nogo, it onggo ti aret kologo menggaarak o, yinuk, abet aret yokkiragi o.

17-18Kit perak, mbi nengga'lek kinambe mage negen logonet, tamban eeriyak mbakwi kiinok, aakumi inigen kiiga'lek kinogoba nobara'me menggerak mban enegen kiyaawak nduk, ngguu'mo wakwi, kineeruwak mbininggwi, eeppunuk, tamban eeko logonip o. Ti eekwi kiinok, kinogoba kote eekwi enegen kage menggerak nogo nen onggo wokkiraagin o,” yinuk, yoragagerak.

Inamendek kuwak eerogo mbogut paga patiyak wone

(Luk. 12:33-34)

19 # Yak. 5:2-3 #Luk. 12:33-34 Wone ambinom yorage logonet, “Nggween paga yime kit kinamendek yininuwo nibingge, yi'mbaani kungge, it aap yogoot wagangga nen tu kuurogo kinamendek wa unggwogwe, eeko menggam yime kinamendek kuwak eerogo pako logogup o. 20Ata, yininuwo nibingge, yi'mbaani kungge, it aap yogoot wagangga nen tu kuurogo kinamendek wa unggwogwe, eekulik menggim mbogut paga time kinamendek kuwak eerogo nappako logonip o. 21Kinamendek kuwak eerak wonage me, kiniki kunduk time aret logogin o,” yinuk, yoragagerak.

Kineebe o eya eekkinake logorak wone

(Luk. 11:34-36)

22 # Luk. 11:34-36 Yorage nagagerik, ambinom yorage logonet, “Kineebe ndi wuninik pogom eya ti, kinigen aret o. Ndi, kit kinigen obeelom wonage kenok, kineebe abok aret eya aago logomunggup kwe, 23kinigen maluk wonage kenok perak, kineebe abok aret o apit aago pogom logomunggup o. Ti kenok, eya kinikime wonage nogo lek age logonet, o apit age kenok ti, kineebe mondok iya tit yumaak aago logorak me, liippinip o,” yinuk, yoragagerak.

Aap mbere ayeloman a'nuk eeriyak meek wone

(Luk. 12:22-31; 16:13)

24 # Luk. 16:13 Yorage nagagerik, ambinom yorage logonet, “Aap ambi nen ogobamini mbere inayeloman a'nuk, inake eeke logorak meek o. Imbirak inake eerit nage kenok, ambi eebi ombake logonet, ambi iniki kunik ombake, ndi, ambi nen eeriyak yoge nogo, yanggorogon eeke logonet, ambi nen eeriyak yoge nogo eebi ombake, eerigin o. Kit nen Ala inom, nggween paga mendek kineenggi warak eekkologwe nogo inom, imbirak lambumbunuk, mugurok noorak ti meek o.

25Ti kenok, kit nen, Nineenik logorak nduk, ninagi-ninambi nano namun? Ndi, nineebe op logorak nduk, ninayum nano yikkolamun? yinuk, kiniki koonggo logonet, kiniki piirik logogup o, yinuk, yokkiragi o. Nonggo monggotak ti iya, ndi, kineenik logorak ti, meek mbakop? Ndi, yikkologo monggotak ti iya, ndi, kineebe op logorak ti, meek, mbako logonet, kiniki piirik ogotik? Lek o.

26Towe mbogut paga nugu menggaarak ti, pegiyaanip o. It nen awi yakkologwe, ndi, anggen mbanogo wolombakwi, eekulik kwe, kit kinogoba mbogut paga mendek nen aret inambi wogorage menggerak kit kineenggo'lek me, yogo ogotik? Towe ti, iniki kundugu lek negen kagak, wogorage menggerak kwe, kit perak, iniki kundugu lombok logonet, wokkiraagin lek nduk yogo ogotik? 27Kit ambi kambuurak eyom panggoni wagaarak kagak, we kiniki koonit nugwi paga, Neenik ambinom logonuk kambikit, mbarumonggotak ndak-ndak age kaamunggup mbakop?

28-29 # 1End. 10:4-7; 2Mbin. 9:3-6 Togop lek kagak, nonggop nduk kinagabolo paga yikkoloorak mendek mban kiniki piirik ogotik? Waambi anggen karume lagangge menggerak nogo liippinip o. At Talomo aap nggwok abu abe mban kenok, aakumi, Wi, ugo nogogwaarak nogo kwe, at ti meek o. Waambi ti perak, yabu wagangge, ligi laangge, eekeelik kwe, Ala nen unde wake kagak, anggen mondok abe kigirikwe yege menggerak me nduk yokkiragi o.

30Iri'ngga-kale'ngga endekem mendek yogondak ki lagangge, ndi, ko'lu tekkani pugwi iinok, nengge, eeke menggerak kwe, at Ala nen enete abe eerogo pege menggerak me, at nen iri'ngga nogo mbuuluk eeppege, ndi, kit aap kiniki Ala liirogon abet ombaka'lek mendek yi, mondok iya negen eeppinagage, eerigin lek mbakop? 31Lek o. Eerigin aret me, kiniki piirik logonet, Ninagi-ninambi nano namun? Ndi, ninayum nano yikkolamun? yinuk, ti mban kiniki koonit nugwi ti mage o. 32It aakumi endekem mendek nogo nen ti mendek abok aret kwaarit nugu menggaarak kwe, Nit ti mendek lek o, yinuk, uugwe mbakwi nogo kit kinogoba mbogut paga mendek eenu menggerak o. 33Kit aa'nduk kinogoba abu'me pinagarak, Ao, mbakwi, ndi, at obeelom lombok eeke logorak mbake nogo, kit ndak-ndak eeko logorak miikwi, eeko logonip o. Togop eekwi kiinok, kit nen, Ti mendek lek me, uugwe mbakwi nogo inom abok aret oba lunogo wokkirage kaamunggup o. 34Ko'lu eeriyak kagak, yogondak kiniki piirik logogup o. Ko'lu eeriyak mendek nogo ti, ko'lu aret kiniki kooniyak o. Yogondak eeriyak kiniki kooniyak nogo ti, aaninggin mondok iya me, ko'lu eeriyak inom kiniki aberiyak ti mage o,” yinuk, yoragagerak.

Currently Selected:

Matiyut 6: LAIDNW

Highlight

Copy