Matiyut 5
5
Yetut puurom paga logonet, mamuniragagerak wone
1Aakumi ambik inom nogwe nogo Yetut enegen iinok, puurom paga lagangge nagagerik, kwi'na'nuk wonage me, it at oone wagangga nogo owagam nogogwaarak.
Iniki ale'nggen logorak wone
(Luk. 6:20-23)
2Nogo mbareegwa, wone mamunirage logonet,
3“It aakumi iniki tebenak menggaarak nogo ti,
At mbogut paga mendek abu'me piyoorak it aret me,
Iniki ale'nggen aret mbako logowak o.
4 #
Yet. 61:2
It aakumi iniki puru aago menggaarak nogo ti,
Ala nen iniki eyak wappiyaagin me,
Iniki ale'nggen aret mbako logowak o.
5 #
Nda. 37:11
It aakumi iniki yanggonak menggaarak nogo ti,
Ineyate Ala nen, Wokkiraagin o, yinuk, abok yoragagerak nogo aret kolaagun me,
Iniki ale'nggen aret mbako logowak o.
6 #
Yet. 55:1-2
It aakumi inagi-inambi abu aganake menggerak nogo pogom obeelom lombok eeko logorak uugwe mbako menggaarak nogo ti,
It iniki mbakwi ndak-ndak a'me aret arit nage kogo logogun me,
Iniki ale'nggen aret mbako logowak o.
7It aakumi inoreewi inabuwa nen eeppiigo menggaarak nogo ti,
Ala nen it kunduk inabuwa nen eeppiyaagin me,
Iniki ale'nggen aret mbako logowak o.
8 #
Nda. 17:15; 24:3-4; 42:2; 73:1; Ibr. 12:14; Wayu 22:4 It aakumi iniki kikak naka'lek obeelom mban menggaarak nogo ti,
Ala inigen kaagun aret me,
Iniki ale'nggen aret mbako logowak o.
9It aakumi inom ogoorak me, lambumbiigo menggaarak nogo ti,
At Ala nen, Kit an napuri aret o, yoraagin me,
Iniki ale'nggen aret mbako logowak o.
10 #
1Pet. 3:14
It obeelom lombok eekwi iinok, aakumi nen piyak-payak aganako menggaarak nogo ti,
At mbogut paga mendek abu'me piyoorak it aret me,
Iniki ale'nggen aret mbako logowak o.
11-12 #
1Pet. 4:14
#2Mbin. 36:16; Nap. 7:52 Kit awo lek kiigak, it aa'nduk Ala nen yorage kagak yoraga nogo piyak-payak aganako nogogwaarak pogom, kit togon, an wo'nakotak paga aakumi nen miyuk-meya eerogo pinagagwi, piyak-payak eekkinakwi, inoone pilit lombok kinoba pinagagwi, eekwi iinok, kiniki ale'nggen aret mbako logonu o. Kinake aago mbogut paga ambik wonage me, kiniki ale'nggen logonet, keyage wako logonip o,” yinuk, yoragagerak.
Mayu inom, o eya inom, yoragagerak wone
(Mrk. 9:50; Luk. 14:34-35)
13 #
Mrk. 9:50; Luk. 14:34-35 Wone ambinom yorage logonet, “O nggween paga yime mayu andi warak wurik pogom ti, kit aret kwe, mayu andi lek wurik kenok, nonggop agago andi warak eerogo puurak mbakop? Andi wonage nen, ambi eeriyak op aret kwe, andi lek kenok, mbo pegaatak me, aakumi inigen kogo nagaatik, Yi abe lek me, yinuk, iniyok paga pelenogo nappit nogo menggaarak aret o.
14 #
Ya. 8:12; 9:5 It o nggween paga menggaarak inenggela'me eya eeginako monggotak kit aret o. Ndi, o kota puurom paga wonage kenok ti, kumaarak wonageelik o. 15#Mrk. 4:21; Luk. 8:16; 11:33 Aakumi nen ndi wuninogo punuk, togolowak abu'me kiraappugulik mban. Ata, wuninogo punuk, tiyarogon tena'me aret pegaatak me, it oome wonogwe nogo abok eya paga menggaarak o. 16It aakumi nen kit obeelom eekwi inigen kiigo logomenggaarik, kinogoba mbogut paga mendek wogoppuwak nduk, kit nen togop aret aakumi inenggaanom paga ndi pogom eya aago logonip o,” yinuk, yoragagerak.
Ala wone yugu nogo alom paganogo yoragagerak wone
17Wone ambinom yorage logonet, “An nogo Ala wone yugu Muta liiru mbaneegerak inom, it aap Ala nen yorage kagak yoraga inoone inom, taganikit nduk wagagirak mbarugup o. An it inoone ti, taganikit nduk, woroolik. Ata, a'me lik yuwak nduk, aret wagagirak o. 18#Luk. 16:17 Mbogut-nggween awo lek aga'lek kagak, Ala wone yugu Muta liiru mbaneegerak ando mbuuriluk ambi awo a'me lik yega'lek kagak, lek arigin lek o. Ata, mondok ndak-ndak aret arigin o, yinuk, abet aret yokkiragi o. 19Ala nen, Yogop ee'nu, ndogop ee'nu, yereegerak wone nogo, aap ambi nen, Yi mbuuluk me, iya lek o, yinuk, taganogo punuk, wone alik mamunirage kenok, aap ti, at mbogut paga mendek abu'me piige menggim at endage abu lek tebenak aret logogin o. Ndi, aap ambi nen wone ti, woppunuk, liirogon eerit nage, ndi, liirogon mamunirage, eeke kenok perak, at mbogut paga mendek abu'me piige menggim endage warak mondok tiyanak aret logogin o. 20It Ala wone liiru mbanak unde inom, aap Pariti mendek inom, obeelom eeko menggaarak ti, kit togop ndak-ndak mban eekwi kiinok, at mbogut paga mendek abu'me piige menggim unggwi namunggup lek o. Ata, it mbuuluk negen eeko menggaarak kagak, kit nggwok togon eekwi kiinok perak, unggwi noorak op aret yokkiragi o,” yoragagerak.
Inanini mbakwi iyo, yoragagerak wone
21 #
Wund. 20:13; Pel. 5:17 #Luk. 12:57-59 “Ala nen yoge kagak Muta nen it ninombomini o maan wonogogwaarak nogo yorage logonet, Aap wariyak mage o. Ndi, ta nen aap ambi wake kenok, owak loonogo, Onggo pu o, yinuk, yoriyak aret o, yinuk, yoragagerak nogo, muk koneneegutak kwe, 22yogondak an nen yokkirage logonet, Kit kinoreewi kinanini mban inoba piigwi kiinok perak, kinowak loonogo, Maluk eekotak onggo pinip o, yokkirogwe iyaamunggup o, yinuk, yokkiragi o. Kit ambi nen kinore ambi yogo logonet, Kat abu meek keegi o, yinuk, alom lek kagak yogwi kiinok ti, maluk aret yumunggup me, kinowak loonuwak nduk, it aap wone amburu mbanggo menggaarak wonogwe me, wokkiren nagun aret o. Kat abu wi yunduurak aret o, yogwi kiinok ti, kani omoonuk wunuk mban ari menggim time mambinagagun aret o.
23Ti kenok, kit nen Ala wogoriyak mendek wonok Ala ake pogo menggam pi nawok nduk, eeko logonet, kinore ambi nen maluk eeppinagage kiniki abe'nage kenok, 24Ala wogoriyak mendek nogo awo wogoga'lek Ala ake pogo menggam taati punuk, aa'nduk kinore nogo kinom lambuni nanuk, wogo logomonggotik, at Ala wogoriyak mendek nogo at ake puurak op o.
25Aap kinom ogoorak wonage nogo nen aap owak loongga owagam pinagi nage, ti'nuk, aap owak loongga nen aap ineegin warak inowagam pinagi nage, ti'nuk, aap ineegin warak nogo nen aap keele maarogo mambiigo menggam mambinagagwi, eekwi iyo, kit aap kinom ogoorak wonage nogo, tu paga awo kinom nogo logonet, mbet-mbet paganogo kinom kiniki lambunenu o. 26Keele maarogo piigo menggam mambinagagwi iinok, at kinom ogoorak wonage nogo nen, Onggo ndogop puurak o, yinuk, yokkiramenggerak nogo abu tigitogon pega'lek kagak, time nen wumbinagagin mondok lek aret o, yinuk, abet aret yokkiragi,” yoragagerak.
Kumi we ugun wurinakwi iyo yoragagerak wone
27 #
Wund. 20:14; Pel. 5:18 Wone ambinom yorage logonet, “Ala yoge kagak Muta nen yorage logonet, Mbabi eeriyak mage o, yinuk, yoragagerak nogo muk kinaruk koneneegutak kwe, 28an nen perak, Yi aap ndi aap kumi inigen pegiigo nagaatik, iniki nengge kenok ti, muk inikime nen wukaarak aret, yokkiragi o. 29#Mat. 18:9; Mrk. 9:47 Kineebe abeenok lek age kenok ti, op negen kwe, kineebe apit aret kani omoonuk wunuk mban ari menggim mbo nappinagarak ti, maluk me, kinigen peenok abe'nggan maluk eeriyak eekkinake kenok, kilirogo mbo nappuurak o. 30#Mat. 18:8; Mrk. 9:43 Kineebe abeenok lek age kenok ti, op negen kwe, kineebe apit kagak kani omoonuk wunuk mban ari menggim unggwi noorak ti maluk me, kineenggi peenok abe'nggan maluk eeriyak eekkinake kenok, mbanogo mbo nappuurak o,” yinuk, yoragagerak.
Inakuwi mbo piigwi iyo, yoragagerak wone
(Mat. 19:9; Mrk. 10:11-12; Luk. 16:18)
31 #
Pel. 24:1-4; Mat. 19:7; Mrk. 10:4 Wone ambinom yorage logonet, “Aap ambi akwe mbo pege kenok, Kwe yi mbo pigirak o, yinuk, liiru mbanogo kwe nogo wogoriyak aret o, yinuk, yereegwaarak kwe, 32#Mat. 19:9; Mrk. 10:11-12; Luk. 16:18; 1Kor. 7:10-11 an nen perak, Aap ambi akwe aap alik nen wuka'lek kagak mbo pege kenok, kwe nogo aap alik ambi nen kundugume wuruwak nduk eeppege me, maluk eeke ti aret o. Ndi, aap ambi nen kwe mbo pegetak nogo wagangge kenok ti, kwe kundugume kagak aret wagangge me, maluk eeke ti aret o,” yinuk, yoragagerak.
“Yi mendek ndi mendek inendage kumbunuk yoroorak mage,” yoragagerak wone
33 #
Unde 19:12; Lin. 30:2; Pel. 23:21 Wone ambinom yorage logonet, “Ala endage kumbunuk, kinoone pilit-pilit yoroorak mage o. At enggaanom paga, Ndogop eerugun o, yinuk, Ala endage kumbunuk yogotak nogo ndak-ndak aret eeko logonip o, yinuk, o maan aakumi yorogo nogogwaarak kit muk kinaruk koneneegutak kwe, 34#Yak. 5:12; Mat. 23:22; 1Kor. 7:10-11 an nen perak, Kit kinoone yogo logonet, Yi mendek ndi mendek endage kumbunuk, yokkiragi o, yinuk, yoroorak ti abu mage o. Mbogut ti, Ala wone lengganogo yorage menggim me, mbogut endage kumbunuk, yorogwe, 35#Yet. 66:1; Nda. 48:3 ndi, nggween yi, Ala iyok pege menggim me, nggween endage kumbunuk yorogwe, ndi, o Yerutalem ti, aap nggwok endagembogut wonage menggim me, kota Yerutalem endage kumbunuk, yorogwe, eeriyak mage o, yinuk, yokkiragi o. 36Kit kineeruwak mili age, laambu age, eeke nogo ti, at Ala nen mban eeke menggerak me, kinanobak endage kumbunuk yoroorak ti kunduk mage mban. 37Eeriyak mbakwi kenok, Eeruwok o, yogwe, ndi, eeriyak lek mbakwi kenok, Eeriyak nineebi o, yogwe, eeko logonip o. Ambi inom nabenogo yuurak eekkinake nogo ti, at maluk eeke menggerak nogo nen aret yuurak, yokkirage me, yugup o, yinuk, yokkiragi o,” yoragagerak.
“Kinookwi iinok, onggo inooriyak lek,” wone
(Luk. 6:29-30)
38 #
Wund. 21:24; Unde 24:20; Pel. 19:21 Wone ambinom yorage logonet, “Kinigen ndaganogo pinagagwi iinok, onggo it inigen aret ndaganogo piigwi, ndi, kineyak langgunogo pinagagwi iinok, onggo it ineyak aret langgunogo piigwi, eeko logonip o, yinuk, yogo nogogwaarak nogo kit muk kinaruk koneneegutak kwe, 39an nen perak, Maluk eeppinagagwi iinok, onggo inooriyak mage o. Kinagandin peenok abe'nggan kinookwi iinok, peenok inom kinooruwak nduk, wogoraanip o. 40Kit ambi eerumonggotak paga kinowak loombunuk, Onggo kinayum agi yirika abe ti, wogoraanip o, yokkirogwe iinok, kinarogwiyum inom aret wogoraamunggup o. 41Aap ambi nen oone omaawi paga, Tu koorok taati pani nanip o, yokkirage kenok, kit nen tu nda aret nappi nanu o. 42Aap ambi nen, Ti mendek wo'ninip o, yokkirage kenok, aret wogo'nip o. Ndi, Kina mendek luulu ambi wo'ninip o, yokkirage kenok, kineebi nen kina nomo yugup o, yinuk, yokkiragi o,” yoragagerak.
It kinom ogoorak kiniki kunik eeginako logorak wone
(Luk. 6:27-28, 32-36)
43 #
Unde 19:18
Yetut nen wone ambinom yorage logonet, “It kinom monggotak kiniki kunik eeginakwi, ndi, kinom ogoorak monggotak kenok ti, kinanini agaket eeppiigwi, eeko logonip o, yinuk, yogo nogogwaarak nogo kit muk kinaruk koneneegutak kwe, 44-45kinogoba mbogut paga mendek nogo nen oonegen unde logonet, it aakumi abu maluk mendek inom, obeelom mendek inom, iniki koonak menggaarak inom, iniki koonak lek menggaarak inom, abok aret inabuwa nen obeelom eeppiige logonet, inambi op aruwak nduk, o kibi wogorage, o mayu wogorage, eeke menggerak me, kinogoba mbogut paga mendek apuri arubagip nduk, it kinom ogoorak monggotak nogo kiniki kunik eeginakwi, ndi, it piyak-payak eekkinako menggaarak nogo, inake tamban eekwi, eeko logonip o, yinuk, yokkiragi o. 46It aap iniki kunik eekkinakwi nogo mban kiniki kunik eeginakwi kiinok, ti paga onggo ambi koloorak mbakop? It o unde inake wu kuwak eeko menggaarak nogo nen eeko menggaarak nogo mendek mban eekwi me, kit onggo koloorak lek aret mbako logonip o.
47Ndi, kit kinoreewi mban keyage warogo wogonakwi kiinok, it aakumi endekem konenggulik mendek inom, yi aakumi ndi aakumi inom, abok aret it mendek mban inom kunik eeko menggaarak nogo ndak-ndak eekwi me, Nit iya, mbariyak lek o. 48#Unde 19:2; Pel. 18:13; 1Pet. 1:16 Kit kinogoba mbogut paga mendek abu obeelom lombok menggerak nogo ndak-ndak, kit abu obeelom togop aret logonip o,” yinuk, yoragagerak.
Currently Selected:
Matiyut 5: LAIDNW
Highlight
Share
Copy
Want to have your highlights saved across all your devices? Sign up or sign in
