Matiyut 12

It Yakuri tamban eekwi paga nonggop eeko logorak wone

(Mrk. 2:23-28; Luk. 6:1-5)

1 # Pel. 23:25 O ti eyom paga Yetut at oone waganggwi inom, it Yakuri tamban eekwi paga gandum awi yarak me nogo logonet, at oone waganggwi nogo mbi abu eeginake mbareegi, gandum anggen mbanogo nenet nogogwaarak. 2Nenet nogwe it aap Pariti mendek nen inigen iigo nogogwaarik, Yetut yogo logonet, “Tamban eekwi paga yi eekak ndi eekak eeriyak mage yugu kagak, it kat koone waganggwi mendek nen ugun eekwi yi iyet o.”

3 # 1Tam. 21:1-6 Yogo mbareegwa, Yetut nen, “At Ndawut inom nogwe nogo mbi abu aganake mbareegi, eereegwaarak nogo, Ala wone liiru mbanak paga pekkaga'lek ogotik? 4#Unde 24:5-9 At Ndawut nogo nen Ala awi wurik me unggwage nagagerik, roti Ala ake pugu nogo, at kunduk, at inom nogogwaarak nogo kunduk, Noorak lek, Ala unde inalik mban nonggo logorak yugu kagak aret nunggugwaarak o. 5#Lin. 28:9-10 Ndi, Tamban eekwi paga puk logorak, yugu kagak, it Ala unde nogo nen tamban eekwi paga Ala awi wurik me yabu eeko menggaarak kwe, Ala nen, Kit maluk o, yinuk, yoraga'lek we teppiige nogo, Ala wone yugu liiru mbanak malenggo logonet, pekkaga'lek ogotik? 6Ala awi wurik nogo ti, meek negen, ndi, ambi yime kinom wonage nogo ti, abu iya aret kwe, kit liippega'lek kiinok, yokkiragi o. 7#Ote. 6:6; Mat. 9:13 Ala nen ari logonet, Kambin-ndomba warogo nake panegak mban eekwi nogo ti, an uugwe lek o. Ata, aakumi inabuwa nen obeelom eeppiigak yuurak ti perak, Ao, lombok mbake minggirak o, yinuk, yereegerak wone nogo alom kit kineenu a'netak en, it ugun wonogwe nogo, Maluk eekaarak o, yinuk, kinoone inoba piyanetak lek o. 8It Yakuri tamban eekwi paga eerit nogo logorak unde nogo ti, aap aret nda'nagagirak an aret o,” yinuk, yoragagerak.

Aap eenggi peenok kambak obeelom eereegerak wone

(Mrk. 3:1-6; Luk. 6:6-11)

9At Yetut time nen nage nagagerik, it Yakuri tamban eeko menggam unggwi nage mbareegi, 10aap ambi eenggi peenok kambak time aret wonage me, it aap inoone Yetut oba puwok nduk, eegwa'me waganggo logonet, “Tamban eekwi paga aakumi andi obeelom aganaburak op aret mbaken a?”

11 # Luk. 14:5 Yogo mbareegwa, at Yetut nen, “Kinandomba ambiret me, tamban eekwi paga nggween kabunik me, wangge kenok, piyanogo nippi woroorak lek mbakop? 12Ndomba ti iya, ndi, aap ti, meek me nduk yogo ogotik? Lek o. Aakumi ti, iya lombok me, tamban eekwi paga obeelom eeginaburak ti, op aret o!”

13Yorage nagagerik, aap nogo yoge logonet, “Keenggi nggingget o,” yoge mbareegi, ngginggage nagagerik, eenggi nogo peenok ndak-ndak obeelom aret agagerak. 14Obeelom age mbareegi, it Pariti mendek nogo nen wundi nogo nogogwaarik, “Nonggop eerogo waruwok o?” yinuk, wone mbaneegwaarak.

Ala ayeloman leenogo pereegerak wone

15At Yetut nogo nen it wone mbanggwi yelok iige nagagerik, o time teppunuk, nage mbareegi, aakumi ambik inom nogogwaarak me, it kugi andi abok aret obeelom eeginake nagagerik, yorage logonet, 16“Aap yi nen eekerak, aakumi yoraagup o,” yinuk, inaruk wareegerak. 17Ti eereegerak nogo ti, Ala nen yoge kagak yoraga Yetaya nen yorage logonet,

18 # Yet. 42:1-4 “An nen leenogo pateegirak nayeloman niniki kunik nale'nggen ee'nake yi kaanip o.

An Naberiniki at oba pege neenok,

At nen yi aakumi ndi aakumi wone yugu nogo a'me nggelok eeko logowak nduk, yoranet nege logogin o.

19Yoranet nage logonet, aakumi inom wone warit nage,

Oone nggwok paga mappiinet nage,

Tu nggwok paga nage logonet, oone omaawi paga yoranet nage,

Eeke logogin lek o.

20Op eekwi, maluk eekwi, onggo a'me nggelok eeppiinet nage nogo,

Nggwok aruwak nduk, awo eeka'lek logonet,

Nggawi owak taganak nogo at nen kalenogo pege,

Ndi, keele kani kuru aago kagak wunuk ari nogo,

At nen nogonogo mbo pege,

Eerigin lek mban.

21It aakumi inanebunu lombok nen at paga iniki lunik aret logogun o,”

yinuk, yoragagerak wone nogo a'me lik yuwak nduk aret eereegerak o.

Yetut kugi Mbeletebut imbirak ogoorak menggaarak wone

(Mrk. 3:20-30; Luk. 11:14-23)

22Ti'nuk, aap ambi kugi inikime unggwagagerak enegen mbuk oone lek me, Yetut owagam wonok wogo mbareegwa, Yetut nen obeelom eeke mbareegi, aap oone lek mendek nogo oone warak age, enegen kage, eereegerak. 23Eereegerak nogo it aakumi kuwak aago abok aret nen inigen kogo nogogwaarik, “Wi!” yinuk, pi wako logonet, “Aap yi, Ndawut ombooluk aret ilik, lek a?” yinuk, yereegwaarak.

24 # Mat. 9:34; 10:25 Yogwe nogo ti aap Pariti mendek nen inaruk konenggo nogogwaarik, “Ia! Aap yi, kugi iyagalo Mbeletebut nogo nen yoreegerak paga mban kugi nggiginogo wumbiige menggerak kogo o,” yinuk, 25mbakwi at Yetut nen yelok iige nagagerik, it yorage logonet, “Aap inowe ambi at abu'me menggaarak inom it-it ogookko'nok ma'nogwe iigak, at abu'me piige menggim omaawi lek aret arigin o. Ndi, o kota ambi a, kunu ambi a, it-it aret ogooppunuk, mbaganggwi iinok ti, inawi ti wuum lu agan nage logogin o. 26At Ibilit nen Ibilit aret nggiginogo wumbege kenok, at aret ogookkolage me, at abu'me piige menggim nonggop togon op logorak mbakop? 27Ndi, an kugi Mbeletebut yo'nege paga kugi nggiginogo wumbiige neenok, kit kinapuri ta nen yorage paga kugi nggiginogo wumbiigwi mbakop? Kit kinapuri eeko menggaarak kagak yogwe me, it nen aret kinenggali wappinagagun o. 28Ndi, an nen Ala Aberiniki nogo paga kugi nggiginogo wumbiige neenok perak, Ala abu'me pinagarak muk kinowagam aret wagaarak, mbako logonip o.

29Aap anini warak ambi awo keele maaka'lek kagak, nonggop togon at ame unggunuk, amendek ndinggo'nok wundi noorak mbakop? Keele aa'nduk maappunuk perak, amendek ndinggola ungguurak op aret o.

30 # Mrk. 9:40 An ninom lambunik wonogwe lek iinok ti, ninom ogoorak aret wonogwe o. Ndi, an ninom kuwak eekulik nogo nen it ninom kuwak eeke minggirak nogo mappiigo menggaarak aret o. 31Ti kenok, aakumi nen maluk eekwi inom, Ala miyuk-meya eerogo pugwi inom, inomaluk ti, Ala nen lek eerogo piyoorak op aret kwe, inoone maluk Aberiniki miyuk-meya eerogo pugwi iinok perak, inomaluk ti, Ala nen lek eerogo piyaagin mondok lek o, yinuk, yokkiragi o. 32#Luk. 12:10 Kit an aap aret nda'nagagirak nogo, kinoone miyuk-meya eerogo panugwi kiinok, kinomaluk ti, Ala nen lek eerogo pinagarak kwe, Aberiniki miyuk-meya eerogo pugwi kiinok perak, Ala nen o yogondak inom, peebi inom, kinomaluk ti, lek eerogo pinagagin lek o. Mondok itok kunik aret logogin o,” yinuk, yoragagerak.

Eyo anggen yi'nage menggerak wone

(Luk. 6:43-45)

33 # Mat. 7:16, 20; Luk. 6:43-44 Yetut nen wone ambinom yorage logonet, “Eyo anggen obeelom yugu kogwe kenok ti, Ero obeelom paga aret yegerak, mbakwi, ndi, eyo anggen maluk yugu kogwe kenok ti, Ero maluk paga aret yegerak, mbakwi, eeko logonip o. Eyo ti, anggen yi'nage nogo paga kineenu arumunggup o. 34#Mat. 3:7; 15:18; 23:33; Luk. 3:7; 6:45 Waalo aakumi inooka kuwak eerak pogom kit aret o. Ninikime uum kilu-kilu wungge logonet, ninambe paga yogo monggoorak me, kit abu maluk logonet, kinoone paga nonggop togon wone obeelom yuurak? Meek o. 35Aap obeelom mendek nogo ti, inikime obeelom mendek yugu paga obeelom aret eeke menggerak. Ndi, aap maluk mendek nogo ti, inikime maluk mendek yugu paga maluk aret eeke menggerak. 36Aakumi inoone liippaka'lek logonet, agan nugu menggaarak nogo abok aret peebi inowak looninaburak eyom paga wone onggo paganogo yorugun aret me, 37Ala nen kinowak loongge logonet, Kat obeelom o. Kat maluk o, yokkiraagin nogo ti, kinoone yumonggotak paga mban eerigin o,” yinuk, yoragagerak.

“Nineenu ariyak mendek eeke keyaawi,” yoreegwaarak wone

(Mrk. 8:11-12; Luk. 11:29-32)

38 # Mat. 16:1; Mrk. 8:11-12; Luk. 11:16; Ya. 2:18; 6:30; 1Kor. 1:22 Yorage mbareegi, it aap Ala wone liiru mbanak unde ando inom, aap Pariti mendek ando inom, nen Yetut yogo logonet, “Ngguru wae. Nit nineenu ariyak mendek ambi eeke keyaawi o.”

39 # Mat. 16:4; Mrk. 8:12 Yogo mbareegwa, at Yetut nen it yorage logonet, “Kit aakumi yogondak wonogwe yi, Ala mbo pogo nogogutik, maluk lombok eerit nugu logonet, Nineenu ariyak mendek eeke keyaawi o, yinuk, yo'nugwi kwe, an nen alik ambi eeke neyaamunggup lek o. Ata, at Ala yoge kagak yoraga Yunut nogo nen ineenu ariyak mendek eereegerak nogo mban eeke neyaamunggup o. 40#Yun. 1:17; Mat. 8:20; 16:21 At Yunut nogo, ikan nggwok inikime yonggolak kagak, nogo mbere yinuk, ko'lu kilirogo wumbereegerak nogo kokwak, an aap aret nda'nagagirak yi, nggween abu'na wonage logominggirik, nogo mbere yippunuk, ko'lu neenik a'nuk, mi'narigin o. 41#Yun. 1:2; 3:5 At Yunut ti, aap mbuuluk negen logonet, it aakumi Niniwe mendek wone yorage mbareegi, iniki koombunuk, inomaluk mbo pereegwaarak kwe, at ambi yime wonage yi perak, aap abu nggwok aret me, wone yokkirage nogo konembunuk, kinomaluk mbo puurak op aret kagak, kinogogumbuk wonogwe me, peebi aakumi inowak looniyak eyom paga it aap o Niniwe mendek nogo nen mi'na'nuk, kit yogondak wonogwe yi, Kinenggali o, yinuk, yokkirogwe iyaamunggup o. 42#1End. 10:1-10; 2Mbin. 9:1-12 Kwe nggwok o ame pa'nggwe nen at Talomo iniki warak logonet, wone koongge menggerak nogo, aruk konenikit nduk wagagerak kwe, at Talomo ti, aap mbuuluk negen. Ndi, at ambi yime wonage yi perak, abu nggwok aret kagak, kit at oone konengga'lek wonogwe me, peebi aakumi inowak looniyak eyom paga at kwe nggwok nogo nen mi'na'nuk, kit yogondak wonogwe yi, Kinenggali o, yinuk, yokkirage kaamunggup o,” yinuk, yoragagerak.

Kugi ogole warak mendek iyokan wage menggerak wone

(Luk. 11:24-26)

43Wone ambinom yorage logonet, “Kugi ogole warak mendek aap inikime nen wungge nagaatik, Nggeeme yonggonggola? yinuk, niyo ero lek me kwaarit negetak-negetak yonggonggolaawam lek kenok, 44Name wundi nagagim nogome niyokan yungguninuk unggwi naakit o, yinuk, unggwi wage nagaatik, awi wuum nogome liirubu koorak ndigik-ndegek aago kenok, 45wundi nage nagaatik, at maluk aret kwe, kugi mondok maluk mendek ineebe 7 kuwak eeppiinok, wogoret iyok paga unggwi wage nagaatik, nogome inom aret menggerak me, aap nogo aa'nduk kugi ambiret inikime wonage me mbuuluk op wonagagerak kwe, peebi apit yagabit arit unggwogwe iinok, aap nogo abu maluk aret logogin o, yinuk, kit aap yogondak wonogwe maluk lombok eerit nugwi yi, togop aret eekkinake kaamunggup o,” yinuk, yoragagerak.

Yetut agalo inom, awurilogwe inom, wogogwaarak wone

(Mrk. 3:31-35; Luk. 8:19-21)

46At Yetut nen it aakumi kuwak aago nogo, wone awo yorage wonage me, at agalo inom, awurilogwe inom, wogo nogogwaarik, at inom wone mbanuwok nduk, endekem wonogogwaarak. 47Wonogo mbareegwa, aap ambi nen, “Ngguru wae. Kagalo-kawurilogwe kinom wone mbanenok nduk, wagaarak endekem wonogo agaarik o.”

48Yoge mbareegi, at Yetut nen, “An nagalo-nawurilogwe ti, taani mbaken o?” 49Yoge nagagerik, it at oone waganggwi nogo eenggi titik irage logonet, “Lek o. An nagalo-nawurilogwe ti, it yi aret o. 50Yi aap ndi aap an nogoba mbogut paga mendek iniki mbake ndak-ndak eeko menggaarak kenok ti, nagalo-nawurilogwe it aret o,” yinuk, yoragagerak.

Currently Selected:

Matiyut 12: LAIDNW

Highlight

Copy