Matiyut 11

Yetut kin waawak nduk, Yiime Wuppiiga Yaya nen awuri nappiyareegerak wone

(Luk. 7:18-35)

1At Yetut nen it at oone waganggwi 12 nogo, “Ndogop eeko logonip o,” yoraanuk, o time nen aakumi inawi kota-kota lombok wone mamunirage, aakumi obeelom wone yorage, eerit nagagerak.

2At Yiime Wuppiiga Yaya nogo keele maarogo piigo menggam logonet, Keritut eerit nage nogo aruk konengge nagagerik, at oone waganggwi mendek nen Yetut kin waawak nduk, owagam nappiyareegerak 3Yetut owagam nogo nogogwaarik, yogo logonet, “At woroorak yugu nogo kat aret wagandak ilik, peebi aap alik ambi woraagin nduk, tokkogo logomun a?”

4 # Nda. 146:7-8 Yogo mbareegwa, Yetut nen, “Agan nugwi kinaruk konenggwi yi inom, kinigen kogwe yi inom, Yaya yori nanip o. 5#Yet. 35:5-6; 61:1 Inigen mbuk mendek inigen obeelom ogwe, inendop maluk mendek tu op nogwe, inawin aaga'ne kunik mendek lek ogwe, inaruk logu mendek inaruk konenggwi, kanggaatak ineenik agago mippiige, ndi, inamendek lek nogo obeelom wone yorage, eeke kogotak yi, yori nanip o. 6Ndi, kit an eeke minggirak paga kineebi nombakulik kiinok ti, kiniki ale'nggen aret logomunggup o,” yinuk, yoragagerak.

7Yorage mbareegi, it nogo iniyok paga wogwe iigak, Yetut nen it aakumi kuwak aago nogo Yaya eeke abok yorage logonet, “Kit nano mendek kaawok nduk, karume aakumi lek me nogotak? Piinde nogo o wiya nen nage-wage eeke kaawok nduk, nogotak ya? 8Nano mendek kaawok nduk nogotak? Aap ambi yum kigirikwe yirik kaawok nduk, nogotak ya? Wologwe! Yum kigirikwe mban yikwi ti, aap inendagembogut iname time mban yiko menggaarak o. 9Ndi, nonggop nduk nogotak? Aap Ala nen yorage kagak yoraga mendek ambi kaawok nduk, nogotak mbakop? Wologwe! Kit kogotak nogo ti, Ala nen yorage kagak yoraga mendek aret kwe, it ti, tebenak iigak, at ti perak, mondok tiyanak lombok aret kogotak o, yinuk, yokkiragi o. 10#Mal. 3:1 Ala nen ari logonet,

Kat noorak tu yarogo pagawak nduk, an nen nayonggo aa'nduk nappege neyaamunggun o,

yinuk, yo'nereegerak liiru mbanak nogo ti, at Yaya aret nduk yereegerak o.

11At Yiime Wuppiiga Yaya endage warak lombok nda'nagagerak kokwak, it kumi inaagalogwe togop ti, ambi ndaganakulik kwe, at mbogut paga mendek abu'me piige menggim inendage lek abu tebenak wonogwe nogo ti, Yaya tiyanak kagak at irimbaga lombok aret logogun o, yinuk, abet aret yokkiragi o. 12#Luk. 16:16 At Yiime Wuppiiga Yaya nogo nen wone yokkirage nagagerak eyom paga nen nok, yogondak kuli, at mbogut paga mendek abu'me piige menggim tebenogo pugwi, ndi, aakumi inoone omaawi paga nen unde eekkolaawok nduk, wakkogwe, eeko menggaarak o. 13Yaya awo waga'lek kagak, Ala wone yugu liiru mbanak nogo pekkenok, ineenu ogwe, it Ala yorage kagak yoraga nen yorogwe, eeko nogogwaarak paga o peebi eeriyak lombok wone pagak yereegerak nogo 14#Mal. 4:5; Mat. 17:10-13; Mrk. 9:11-13 kinikime woorak mbakwi kiinok, at Eliya woroorak nogo ti, eebe Yaya aret kaamunggup o. 15Kinaruk wonage kenok ti, liirogon aret konenggo logonip o.

16Ndi, it aakumi o yogondak wonogwe yi, nano paga wakka o. Lek o! It wologwe-mbuulogwe aakumi kuwak eeko menggam yine kunit it mban-mban wone onggo-onggo agan nugu logonet,

17Nit ndawi tiyanggirogoorak kwe, kit eebe wakwi lek.

Ndi, leendawi tiyanggirogoorak kwe, kit le yogwe lek,

agan nugwi nogo pogom kit togop aret agan nugwi kiigi o.

18At Yaya nogo nen mbi inom, anggur amburu inom, nenggeelik wagagerak me, kit nen, Kugi inikime unggwegerak o, yinuk, yogo monggotak. 19Ndi, an aap aret nda'nagagirak nogo, mbi inom, anggur amburu inom, nenet wagarak me, kit nen yogo logonet, At mbi inom, anggur amburu inom, ugun lagap mban agan nege, it o unde inake wu kuwak eeka inom, it aap maluk eeka inom, iniki kunik eeginake, eeke yi, kaanip o, yinuk, yo'nogo monggotak kwe, Ala iniki warak nen koonit nage nogo ti, it eeko menggaarak abok aret eekwi paga obeelom aret kogo logogun o,” yinuk, yoragagerak.

Yi o ndi o abet mbaka'lek iinok yoragagerak wone

(Luk. 10:13-15)

20Yorage nagagerik, at nen eerubok mendek apit aret eerit nage nagagim wonogo menggaarak nogo nen it iniki koombunuk, inomaluk mbo puulik me, Yetut nen it mberirage logonet, 21#Yet. 23:1-18; Yeti. 26:1; 28:26; Yow. 3:4-8; Kini 1:9-10; Tak. 9:2-4 “Kit aakumi Koratim mendek yi, kinabuwa o. Kit Mbetayira mendek kunduk, kinabuwa o. Eerubok mendek kit kiname time eeke kogotak nogo, o Tut Tiron time eeke logonetak en, it aakumi time mendek maan togon inayum maluk yikkologwe, purok inagabolo paga yikut eerogo pakwi, eeko logonet, inomaluk muk mbo penetak o.

22Peebi kinowak looniyak eyom paga it aakumi o Tut Tiron mendek nogo, aaninggin mbuuluk negen eeppiige logonet, kit perak, aani-nggin mondok nggwok lombok eep-pinagagin me, kinabuwa o, yinuk, yokkiragi o. 23#Wak. 19:24-28; Yet. 14:13-15 Ndi, kit aakumi Kaperenawum mendek yi, Nit mbogut paga nagawan me, tiyappinanigin o, yinuk, yogo ogotik? Mondok lek o. Eerubok mendek kit kiname eeke kogotak nogo, o Torom time eeke logonetak en, o eebe nogo lek eeppega'lek, o yogondak kuli yi paga logonetak kwe, eeke inigen kaga'lek me, inomaluk mbo pega'lek wonogo mbareegwa, Ala nen lek eerogo piyareegerak nogo ndak-ndak, kit kunduk lek eerogo pinagagin lek nduk yogo ogotik? Lek o. Ala nen it aap kambunuk nogo menggam time aret mondok wuppinanigin, mbako logonip o. 24#Mat. 10:15; Luk. 10:12 Peebi kinowak looniyak eyom paga it o Torom wonogogwaarak nogo aaninggin mbuuluk negen eeppiige logonet, kit perak, aaninggin mondok nggwok lombok aret eeppinagagin o, yinuk, yokkiragi o,” yoragagerak.

Iniki yanggoninaburak yoragagerak wone

25O ti eyom paga Yetut nen at ogoba yoge logonet, “Mbogut-nggween unde nogoba wa! Kat eeriyak yi nogo, it aap iniki warak inom, iniki ngget inom, ineenu ogwe iyo, nobappunuk, it elege-aabologwe kwak mban paganogo yoragagindak me, wa! 26Yi eereegindak nogo ti, kinikilom mba'nuk eereegindak me, kat nogoba wa, yokkigi o.”

27 # Ya. 1:18; 3:35; 10:15 Yoge nagagerik, ambinom yora-ge logonet, “An nogoba nen yi mendek ndi mendek abok aret an unde logokit nduk, eeppaneegerak. Ndi, Ala aput yi ti, it aakumi mondok ineenggo'lek nogoba alik mban eenu menggerak. Ndi, nogoba ti, aakumi mondok ineenggo'lek at aput an nalik mban neenu minggirak. Ala aput an lombok nen, It aakumi nogoba ineenu aruwak nduk, paganogo yoraakit, mba'nuk, yorage neenok mban ineenu ogo menggaarak.

28Kit wone yugu eerit nugwi paga kiniki aaninggin wonage, anggon-panggon eekkinake, eeke yi, an nen kiniki yanggongginabikit nduk, nowagam wa'nip o. 29-30#Yer. 6:16 An nayum yonggolak kinomba langgumbinagage, ndi, luurik-maarak eerogo kinoba pinagage, eeke ti, aaninggin lek teeluk aret me, an nayum yonggolak kinomba ko'nok, noba yanggonak niniki tebenak logonet, eeke minggirak nogo mamunggolaanip o. Aaninggin kagak mamunggologwe kiinok, eerit nogo logonet, Niniki yanggo yigi, yinuk, yogo logomunggup o,” yoragagerak.

Currently Selected:

Matiyut 11: LAIDNW

Highlight

Copy