La'isasikhe 3

Petrus nen ap isok weak meke hano hagakhikhe wene

1Iniki ageikhe, jam 3 baga, mulikin korok i lagaluk hagakhe korlek, Petrus Yohanes ipisak, akhuni Allah ai halekma sembayan ekhe lagoukha hak uogoluk hagakhunem, inoba dageisukha. 2Dageisinem, ap ageikhe agosa akla nen isok weak itaklageikhesik welageikhe meke, holagape palekma etaga Ilhapuk iluk ekhe lagoukha baga etoma 'bi agoukhama werekma hasukha. Akhuni nen ap iti iniki ageikhe huk ageidek hibiku-yogokuat akhuni aperek Allah ai halekma ukisinem, yi meke ti meke ape kino weak yogeisekhe dogoagaluk, holagape palekma etoma yerogo 'bi aga lagoukha. 3O itinem 'bisukhama hurek werekma, Petrus Yohanes ipisak Allah ai halekma ukuogoluk hagakhunem ileken hisalok nen, it nen yi meke ti meke ageikhe wogosuagaluk kino yogeisasikhe. 4Kino yogeisasikhemo, it ipisak nen inileken tek-tek hekhe dogolik, ap Petrus nen,

“Hileken laknisan o,” iluk yogokhikhe. 5Yogokhikhemo, at ap iti akla nen,

“It nen yi meke ti meke ageikhe woknesugun he a,” iluk ileken inoba welageikhe. 6Ileken inoba werekma, at Petrus nen men yogokhikhe,

“Uang emas men, perak men, an nikimo motok dek o. Meke re, an werek meke ageikhe wokhesigin. Iti re, hebe melatluk nen holak laga dogonogoluk, Yesus Kristus ai Nazaret meke etaga palogo yikhikhi,” iluk yogokhikhe. 7Itithogon yogokhikhesik nen, iki ebeke hago nen meldisikhe. Meldisinem, ap etnogo isok weak werekma, isok ukut inom, akulim oak inom, eranogoat obatne ageikhe. 8Obatne ageikhesik, metokhogon melatluk nen, holak nekhe lageikhesik, Petrus Yohanes ipisak inom Allah ai halekma ukisukha. Ukisi dogolik, ap etnogo nen Allah hogorakhe dogolik, ya hologothigik, ta hologothigik, ukisikhe. 9Itithogon ukisinem akhuni tha'bokhogonat inileken hasukha. 10Inileken hasukhasik, at ebe ekagat hutdisukhasik nen,

“Allah ai halekma holagape etaga Ilhapuk holagape palekma okutlu eta hurek dogolik, yi meke ti meke wogokhe dogoagaluk kino ekherek meke etnogo ebe yi. Eiye! Nikithogon nen hano aga. Nayuk o,” iluk hogorakhukha.

Petrus nen inasuk wakhikhe wene

11Ap etnogo Petrus Yohanes ipisak iniki hak-hak Allah ai halekma nen dukhi agoukhasik, misohulak etaga Salomo thalekma iluk ekhe lagoukha baga iti dukhi agunem, akhuni tha'bokhogonat nen hogorarik pirlirli inoba natogokhukha. 12Natogokhukhama nen, at Petrus ileken hisalok nen, men yogeisasikhe,

“Hit akhuni Israel meke yirani! Ap yi holak liliogo yi, nit ninekaerek ninobatne baga hagakhik, ninobabut hano Allah ane hologo hagakhe lago baga, hagakhik, hagakho thalek, hit hogorakhigik, hinileken tek-tek nisigik, hagakhe lagap yoma nenaluk. 13Ninopase Allah iti, Abraham nen hogorakhik, Ishak nen hogorakhik, Yakub nen hogorakhik, ninopa lak aperek nen hogorakhik, hagakhe lagoukha meke etnogo nenat, a'but Yesus kogotdekhe iti. Meke re, hit nen, it aperek nen wasuagaluk inikimo 'begepma re, at Pilatus nen iki herle hisalogo ula'igiluk hagakhe mekeat he, hit nen,

Ap iti nina'it o, iluk egep etnogo. 14At he, Allah nen la'i ageikhemo obabut mothogon hagakhe laga mekeat he, hit nen Pilatus yogokhe dogolik,

Ap iti ebe nina'it o. Ap ageikhe akhuni inakherek mekeat, hit nen ap ithiat iki herle hisalogo woknisan o, iluk kino yogokhep apigi. 15Ninilugutninakherek meke erlo ebe at mekeat he, hit nen wakhepma Allah nen, ebe warek meke ilugutdekhemo, nit ninileken eberogonat hogosik nen yokhisekhe lago. 16Ap isok weak welaga meke yi nen,

Yesus iti eberogonat, iluk etaga palogo, etaiken at oba hakotdekhe iti baga, ap yi hinileken hekhe lagap meke, ebe hinilu meke etnogoat obatne aga yi. Etaiken itithogon Yesus oba hakotdekhe iti baga, hit hinil obaat motok hanotdekhemo yi. 17Meke re, nagarlak lak nerugi. Hit hinougi ap koktek hinom Yesus hasik hagakhep iti, hinokodek dogolik hagakhepma iti, an nilu o. 18Haganeat Allah nen,

An nen tilhinabigin meke Kristus hinoba la'isigin iti, ebe yi aik ti aik oba 'biluk wasugunat o, iluk abok isikhe meke iti, ebe it ap at ane yogeisekhe lagoukha meke emenogo inebe tha'bokhogonat nen ekhe lagoukha iti hagat, hagatlasuagaluk hagatlaga iti. 19-20Iti nen hit weak hagakhe lagap meke iti, ninopase Etagapogot Allah nen thagalogo degetdiluk, hinetaiken hasik hinil ekathogon hagathinabi ageik, at nen,

Kristus hinebe tilhinakherek meke hinoba la'isigin, iluk abok yogeisasikhe etnogo ebe Yesus itiat hinoba yabokane la'i ageik, hagasuak nen, hinobabut hebelatluk hinelokhe Allah wogotno o. 21Yogotak ya re, Yesus ebe pogot oba dogosak obaat dogogin o. Dogoluk nen, hurli Allah nen yi meke ti meke tha'bokhogonat ket hagarogo hagasigin iti hurliat usa'isigin o, iluk haganeat it ap Allah hasik dogolik at ane yogeisekhe lagoukha meke emenogo nen isukha hagat, hagatlasigin o. 22At Musa nen, men yogeisasikhe,

Ninopase Etagapogot Allah ane yokhisekhe dogoagaluk, ap hit meke ageikhe an meldanhikhe iti hak,

yabokane meldigin etnaga.

Meldumo nen, at nen yi wene ti wene yokhisagein meke itiat

hinasuk motok hanorogo holhe dogosak o.

23 # Ulangan 18:15, 18-19 Tha nen wene at nen yokhisagein meke iti,

asuk holhidek meke halok he,

at Allah nen, at a'buri inakla nen hulogo ula'isalok weagatdigin o,

iluk yogeisasikhe. 24It ap alebat Allah ane yogeisekhe lagoukha meke emenogo, hurli at Samuel iti hurli nen, it yabokane Allah ane yogeisekhe lagoukha meke inomat, inebe tha'bokhogonat nen, wene nit o yogotak welago ya dogolik hagakhe lago meke hasik ekhe lagoukha. 25#Kejadian 22:18 Allah nen wene abok yoknisasikhe meke it ap alep at ane yogeisekhe lagoukha meke emenogo nen yogeisekhe lagoukha iti, hit hinobasigat o. Nen, Allah nen nit ninopa lak wene warogo woginakhikhe iti, hit hinobasigat o. At Allah nen Abraham yogokhe dogolik,

Hat nen itago meke iti baga akhuni agat oba meke yoma yi akhuni ti akhuni inukul etaga tomok hanorinabigin o,

iluk wene warikhikhe. 26Allah nen, wene iti warikhikhe hak, hit weak hagakhe lagap meke hinebe tomok hinoporlike here'isoagaluk a'but ebe hanothinabigin meke hit tak hinoba usa'i ageikhe iti,” iluk inasuk wakhikhe.

Currently Selected:

La'isasikhe 3: LAIDNT

Highlight

Copy