La'isasikhe 22

1At nen yogeisekhe dogolik, men yogeisasikhe,

“Nougi nagarumi. Wene yi an noba dekma o, iluk nekaerek nebe nirlirlirogo yokhisagein yi hinasuk hanorogon holino,” iluk isinem, 2it nen he,

“Nit akhuni Ibrani meke ninane baga yoknisiliogo,” iluk inane motok dik-dek agoukha. Inane dik-dek agoukhama, at nen men yogeisasikhe,

3“An he, ap Yahudi meke, nebe o propinsi Kilikia o kota Tarsus itaklagagi meke re, o Yerusalem yoma nen kogotnakhukhama narlue agagi. Narlue agagimo, ap kok Gamaliel nen wene Allah nen ninopa lak inasuk wakhikhe meke etnogo hutukhogon yakulnekhe lageikhe. Yakulnukhunem, an nen hit yogotak Allah hasik hinbatnerogon hagakhe lagap iti hagat, hagakhe lagagi. 4Hagakhe dogolik, akhuni Yesus ane waganhukhasik oporlik yigithogon laga lagoukha meke inasigiluk mugusik laga dogolik aperek inakhigiat. It aperek humi dek, ap dek, iniki herle warogo wogosik, o iniki herle warek 'bisegarekma 'bisekhe lagagiat. 5Itithogon hagakhe lagagi iti, ap Allah iteerek meke inoe kok ebe men, inarluetek men, inom tha'bokhogonat nen surat waganogo ninagarlak lak Yahudi meke o Damsyik meke inoba wolok loagaluk woknikhukha. Woknikhukhama, it akhuni Yesus ane waganhukhasik oporlik laga lagoukha meke o etoma werekma iniki herle warogo wogosik, o Yerusalem yoma 'bisa agunem, wene inoba 'bigik,inebe inakhik, hagasuagaluk la'anhukhasikmo nogo nen, it inilu. Halok he, it nenat yokhisausak werek o,” iluk yogeisasikhe.

At Paulus nen, “Yesus nen itithogon wanikhikhemo nobabut hebelagagi,” iluk yogeisasikhe wene

6“An o Damsyik horogat dikene ligin apasigi, opaki hasigat pogot oba nen a'bi'bal weak meke an naliluke liarogon yasi usageikhe. 7Lia motok yasi usa'agunem, an nebe agat oba tunhogo wara usasigi. Wara usasigimo, at ageikhe nen ane yoknekhe dogolik,

Saulus. Saulus. Anat yi aik ti aik hagatnabigiluk muknarik nekhe lagan iti nenaluk, iluk yoknikhikhe. 8Itithogon yoknikhikhemo, an nen,

Eiye. Noe. Hat tha, iluk yogokhigimo, at nen,

An Yesus, nai Nazaret meke, yi aik ti aik hagatnabigiluk muknarik nekhe lagan meke etnogoat o, iluk yoknikhikhe. 9Yoknikhunem, it ap an ninom lagagu meke nen, lia iti inileken hasukha meke re, ane an yoknikhikhe iti, inasuk holhidek. 10Inasuk itithogon holhidek werek korlek, an nen,

Noe. An nikithogon hagasik, iluk yogokhunem, at nen,

Hebe melatluk nen, o Damsyik ukino. Ukiluk werekma, hat nen Allah warlok meke tha'bokhogonat hagasigin meke hasik ap ageikhe nen yokhesigin etnaga o, iluk yoknikhikhe. 11Itithogon yoknikhikhemo, o lia etnogo nen nileken sirluk-pabuk iluk puk ageikhe. Puk ageikhemo, it ap ninom lagagu meke emenogo nen niki hak-hak o Damsyik woknarek ukisukha.

12Ukisukhama, o Damsyik etoma ap ageikhe etaga Anania. Wene Allah nen ninasuk wakhikhe wene etnogo hago dogolik mothogon hagakhunem, it akhuni Yahudi meke o Damsyik meke tha'bokhogonat nen alon halhe lagoukha. 13At ebe an noba wageikhesik, nalilu metek dogolik,

Saulus nagarlak. Hileken 'bekelasin o, iluk yoknekhunem, eranogoat an nileken 'bekelatluk, at ebe hutukhogon hasigi. 14Hasinem, at nen,

At Allah ninopa lak nen ebe hogorakhe lagoukha meke etnogo nen, at akla apekherek meke hilu ageik, at a'but obabut mot meke Yesus iti hileken higik, at ane ape baga nen isinem hasuk holhik, hagatnok nen iluk, hebe wenakhekhesik hayoko 'bekhe iti. 15Halok, hileken higik, hasuk holhik, hagakhen meke iti, akhuni tha'bokhogonat pakhogon yogeisekhe dogono. 16Meke re, hat yogotak ya ageikhe inom therogo dogosak dek. Hebe melatluk nen, hat weak hagakhe lagan meke Allah nen thobalhakhik, it aperek nen ima usa'agagik, hagasuak nen, Yesus etaga palogo Allah ayoko 'bino, iluk yoknikhikhe,” iluk yogeisasikhe.

At Paulus nen, “Yesus nen Allah ane akhuni itikmanke meke yogeisa loagaluk, nayoko 'bisikhe,” iluk yogeisasikhe wene

17Itithogon yogeisasikhesik, ageikhe men yogeisasikhe,

“Itithogon yoknikhikhemo, an yabokane o Yerusalem wagagisik nen, Allah ai halekma sembayan isinem, Allah Agoreke nakla ukisikhemo na'bikaka hasigi. 18Na'bikaka oba, ninoe Etagapogot nen,

Hat nen, hileken an neegen meke iti men, hasuk holhen meke iti men, akhuni o yoma meke pakhogon yogeisugunem, hane inasuk holugun motok dek o. Halok he, o Yerusalem yoma nen ibat dukhino, iluk yoknikhikhemo, na 'bikaka oba hasigi. 19Itithogon yoknikhikhemo, an nen,

Noe. An o sembayan egarekmake ya ukigik, ta ukigik, laga dogolik, akhuni inetaiken hat hoba hakotdiluk welagoukha meke, iniki herle wakhik, tugi inakhik, hagarik nekhe lagagi etnogo, it motok inilu o. 20At Stefanus, wene hat hasik pakhogon akhuni yogeisekhe lageikhe meke etnogo ebe wakhunem, an nebe etoma metek dogolik,

Hein! Hano wakha, iluk, it ap wakhukha meke inasu nokorlek therogo welagagi iti, it iniluat o, iluk yogokhigi. 21Itithogon yogokhunem, ninoe Etagapogot nen,

It akhuni itikmanke meke walegat etoma inoba la'agagin iti nen, lan o, iluk yoknikhikhe,” iluk yogeisasikhe.

22Paulus nen itithogon yogeisilik wagunem, it emenogo inasuk hano holek welagoukhasigat, hurli eta hurli baga isinem inane kokhogonat men isukha,

“Ap obabut yigirlik, agat oba iluk dogosak dek. Wasuok o! iluk” 23inekaerek inasu nokorlogo la'isigik, agat abubuleke yalelogo lia'igik, hagakhukha. 24Itithogon hagakhunem ap tentara doalhe lagoukha meke inoe kok etnogo nen, agarumi yogeisekhe dogolik,

“Paulus ebe o obatneak halekma ithi wolok ukiluk, akhuni Yahudi meke nen inane kokhogon wene oba 'biliogei iti, wene erlo nikithogon hagakhemo nen iluk tugi warogo wene erlo heratno,” iluk yogeisasikhe. 25Itithogon yogeisasikhemo, it nen ebe tugi wasuogoluk herle warogo 'bisukhama, at Paulus nen, ap tentara meke kok ageikhe etoma metek werekma men yogokhikhe,

“Hit nen, ap ageikhe o Roma aierek mekeat, ukum oba 'bigidekma tugi tak wasusak nogo?” iluk yogokhikhe. 26Yogokhunem, kok etnogo nen yoko ap tentara doalhe lagoukha meke inoe kok etnogo oba lageikhesik nen,

“Hat nikithogon hagasigiluk egen meke nogo. Ap yi ebe o Roma aierek mekeat o,” iluk yogokhikhe. 27Yogokhikhemo, ap tentara kok etnogo Paulus oba wageikhesik nen,

“Hat hebe o Roma haierek meke a? Yoknom,” iluk yogokhikhemo, at nen,

“Nen, an naierek mekeat o,” iluk yogokhikhe. 28Itithogon yogokhikhemo, ap tentara meke inoe kok etnogo nen,

“An oko kogat palogo nen naierek agagisik welagei,” iluk yogokhikhemo, at Paulus nen,

“An o Roma naieregat itaklagagi mekeat o,” iluk yogokhikhe. 29Itithogon yogokhikhemo it at tugi wasuogoluk hagakhukha meke emenogo nen ibat hekhogon here'isasukha. Itithogon here'isasukhama, ap kok etnogo akla nen,

“Paulus ebe o Roma aierek meke werek korlegat, iki herle wakhima yi nayuk e,” iluk ayuk weak ageikhe.

Paulus ebe it ap Yahudi meke wene erlo pilinekhe lagoukha meke inoba wolok lageikhemo yogeisasikhe wene

30Hubenke, it ap tentara opaki doalhe lagoukha meke inoe kok etnogo nen,

“It akhuni Yahudi meke nen ap yi ukum nikithogon meke oba 'biliogei. Wene hutukhogon nilu asusak meke,” iluk wene erlo herasuogoluk, it ap Allah iteerek inougi koktek emenogo men, ap Yahudi Allha hasik wene erlo pilinekhe lagoukha meke emenogo men, natogosuagaluk inayoko 'bisikhemo natogokhukhama nen, Paulus iki herle hisalogo 'biluk it inoba wolok lageikhesik nen, inelokhoma meldisikhe.

Currently Selected:

La'isasikhe 22: LAIDNT

Highlight

Copy