La'isasikhe 20

Paulus o Makedonia wageikhesik, piokthek o akhuni Yunani meke inaila wageikhe wene

1O kota Efesus inane kogat thagalhe lagoukha etnogo dek ageikhemo, at Paulus nen, it akhuni Yesus ane waganhukha meke waisalok nen inasuk wakhikhe. Inasuk warogo heagei warinabiluk nen, ebe o propinsi Makedonia wageikhe. 2O Makedonia etoma nekhe dogolik, wene kokhogon yogeisekhe dogolik, inetaiken ago watdisilik nekhe lageikhesik, o akhuni Yunani meke werekma wageikhe. 3Wageikhesik, thut henagan etoma welageikhe. Etoma welageikhesik nen, yabokane imake ku baga o propinsi Siria lagaluk karelhunem akhuni nen, men yogokhukha,

“It akhuni Yahudi meke nen hasuogoluk habok palhasik werek o,” iluk yogokhukhama asuk holhikhesik, suguluk apuke o propinsi Makedonia ke nen lagaluk hagakhikhe. 4Lagaluk hagakhunem, ap Sopater, Pirus a'but, ai o Berea meke inom, Aristarkhus, Sekundus ipisak inai o Tesalonika meke inom, Gayus ai Derbe meke inom, Timotius inom, Tikhikus Tropimus ipisak inai o propinsi Asia meke inom, inom lagoukha. 5It tak lagoukhasik nen, o Troas etoma thetnisik welagoukha. 6Itithogon thetnisik werek korlek, akhuni Yahudi meke pesta roti hikhidek meke etnogo nasukhama nen, nit o Filipi nen imake ku baga o Troas laga dogolik, noge niniki 5 nen iluk, it o Troas werekma hisa lagagusik, etoma dogolik noge niniki 7 baga isugu.

Paulus ilugun hurli baga akhuni o Troas meke 'birisilik laga dogolik hagakhikhe wene

7Nit o etoma dogolik, Allah hasik werlegat welagagusik nen, hibako hipiri roti meke ninagarlak lak ninerugi ninom nuogoluk natogotdiluk, at Paulus nen wene yoknisekhe lageikhe. Huben arat luogoluk nogo nen, wene uanat yoknisekhe dogolik, hibako motok eketurlemat yoknisekho motok welageikhe. 8O henaipu kok halekma natogokhugumo etoma, isagal lampu doalegat yibarlek welageikhe. 9Itithogon natogokhugusik nen, elege thue meke ageikhe etaga Eutikhus, jendela ape palekma hurek welageikhe. Hurek dogolik, Paulus wene uanat isi welageikhe iti nen, noge il ageikhesik nen, kunuk noge isikhe. Noge isinem, o henaipu hurli henagan thep hun-hun halekma ebe upu etoma nenat tunhogo usa'ageikhe. Usa'ageikhemo, akhuni 'bikha usa'agoukha nen, motogat watlageikhesik werekma waganhukha. 10Waganhukhama, Paulus ebe usa'ageikhesik nen, warek oba dekakhogon wilageikhesik nen iki obakha hurlukhogon hakhasikhesik nen,

“Watlagama iluk, hinakla wene munini ebekhup. Ebe iluk werek o,” iluk yogesasikhe. 11Itithogon yogeisalok yabokane apuke dageisikhesik nen, hipiri roti meke kusogo nasukhasik wene uanat yogeisekhe lageikhesik nen, o wi isikhemo Paulus ebe o werlekma dukhisikhe. 12Dukhisikhesikmo, elege thue meke etnogo ilugat aila 'bi lageik, iluk ageikhe meke iti hasik inakla arleken kogat akhigik, hagakhukha.

O Troas nen, o Miletus lagoukha wene

13At Paulus nen,

“Hit imake ku baga o Asos lani o. An holak oba wisigin,” iluk wene watnisasikhemo, nit tak ku baga o Asos etoma lalok, o etoma nen at ebe witluk ninom luogoluk, nit tak o Asos lagagu. 14Lagagusik nen, o etoma nen at ebe ninom abuk agasusik, ninom ku baga o Metilene lagagu. 15O Metilene nen, imake ku baga lagagusik, huben hak, i eken palekma o Khios iti thogotdiluk, aheke hak, i eken palekma o Samos iti nomokhogon thogotdiluk, uaheke hak o Melitus lagagu. 16At Paulus nen akla apekhe dogolik,

“Pesta Pentakosta hasik hagakhunem, an o Yerusalem erlok ligin halok he, an o propinsi Asia yi ai ti ai magakhe dogunogo iluk, o kota Efesus ukigidek piokhogonat ligin hano,” iluk akla apalok, ibat lagaluk hagakhikhe.

Paulus nen akhuni o Efesus meke inasuk warogo 'bisalok lageikhe wene

17At Paulus ebe o Melitus etoma dogolik, it ap Allah a'buri o Efesus meke therisik welagoukha meke inebe wisuagaluk wene la'isikhe. 18Wene la'isikhemo inebe wagoukhama, at Paulus nen, men yogeisasikhe,

“An ebekeram o propinsi Asia wagagi iti hurli nen, ninom motok dogolik hagakhe lagei meke hinilu o. 19It akhuni Yahudi meke nen nebe nasuogoluk nabok palhe dogolik weak hagatnakhe korlek, nekaerek nen nobabut thebekhogon, hogorakhigidegat, de apik aga dogolik, ninoe Etagapogot apma dogolik at hasik hagakhe lagei hiniluat o. 20Itithogon hagakhe dogolik nen, wene hit yokhisausak meke huk ageidek akhuni natogorlek werekma yakulhisigik, hinailake dopok yakulhisigik, hagakhe lagei etnogo hiniluat o. 21An nen akhuni Yahudi meke men, yunani meke men, hinasuk wakhe dogolik,

Weak hagakhe lagap meke thogotdisalok, hinobabut hebelatluk hinelokhe Allah wogotni o. Wogotluk nen, hinetaiken ninoe Etagapogot Yesus oba hakotdiluk dogobageik iluk yokhisekhe lagei iti. 22Meke re, yogotak Allah Agoreke nenat nakla kagalhemo, ane holiluk, o Yerusalem lagaluk hagakhe lagei yi. Etoma lalokma nen nikithogon hagatnabugun he. An nokodek o. 23Itithogon nokodek mekeat he, an o kota ageikhe nen ageikhe lageik hagakherek etoma tha'bokhogonat at Allah Agoreke nen,

Hiki herle wakhik, yi aik ti aik hoba 'bigik, hagasugun o, iluk yoknekherek iti anek nilu o. 24Itithogon mekeat he, an nebe niluk dogosak itiat kok iluk iti meke kogotdekhe lagei dek. Ninoe Etagapogot Yesus nen nayoko 'bekhe dogolik, at nen,

Allah obabut hano nen hagarinakherek wene hano wene itiat yogeisilik lano o, iluk nayoko 'bisikhe itiat ilugun oba kobokhogon hagasigiluk kogotdekhe lagei o.

25An hit nagarlak lak nerugi tha'bokhogonat wene Allah apma ukiluk dogogun iti wene yokhisilik nekhe lagei iti, hurli yogotak yi baga nen, hit nen yabokane nelokhoken hinileken neagun dek o, iluk an nilu. 26-27Itithogon Allah akla apasikhe wene iti, an nakla thogotdigidek motogat pakhogon yokhisigi iti nen, hit aperek yabokane weak agap halok he, wene an noba dek o, iluk yokhisigi. 28Domba therisik welageikharek iti hak, hit nen Allah a'buri therisik dogoagaluk, at Agoreke nen hinayoko 'bisikhemo, therisik dogolik, hinekaerek hinobabut hebelogo dogono o. Itithogon hinobabut hebelogo dogolik nen, Allah a'buri yoma, at ekaerek a'but amep oba woginakhikhemo inebe at ekaerek a'buri werek, iluk hanorogo therisik dogono o. 29Meke re, yeke helo yeke anini weak meke nen domba here'isigidek motok nekerek iti hak, an nebe lalokma nen, it aperek nen Allah a'buri hit nen therisik welagap meke iti weagarinabi ukisugun meke werek o, iluk an nilu. 30Itithogon weagarinakhe korlek, ap hit meke aperek melatluk nen, akhuni Yesus ane waganhukha meke lisogonat woginabuogoluk, wene korlo wene yakulisekhe dogogunat o. 31Hinobabut hebelogo dogono! An o mo dageigik usigik hagakhe korlek 3 tahun ninom dogolik, huk ageidek dikene nen, hibako nen, de aga dogolik, hinebe dopok hinasuk wakhe lagei etnogo, hinakla eberek dogono o.

32Yogo. Wene Allah obabut hano nen wokninakherek iti wene hiniki a'bethogon hago dogobageik iluk, yokhisigi. Yogotak nen, at Allah obatne werek meke nen, wene iti baga hinetaiken horlethinakhik, yi meke ti meke at ekaerek a'buri wogeisagaluk 'bisasikhe meke wokhisigik, erlok hagasusak meke iki baga 'binagagi o. 33An nakla nen, hit hinameke uang emas meke men, perak meke men, hinasu men, warlok iluk ageikhe nakla apigidek. 34At he, an men, ap an nagarumi noporlik nekharek meke men, yi meke ti meke dek nen, an nekaerek niki nen herago horlekhe lagei iti hinilu o. 35Wene ninoe Etagapogot Yesus ekaerek nen men yoknisasikhe iti,

It akhuni aperek nen wokhisugunem horlalok hinakla arleken akhausak erlok dek o. At he, hit hinekaerek nen it aperek wogeisekhe dogolik hinakla arleken akhausak o, iluk yoknisasikhe iti ninakla eberek dogolik, an nen it aperek inobatne dek meke yomageisekhe lagei iti, hit nen hutdaniluk an nobabut waganogo hiniki obatnerogon yomageisekhe dogobageik iluk yakulogo hagakhe lagei iti,” iluk yogeisasikhe.

36Itithogon yogeisasikhesik nen, itibagal yukukhogon nen, it tha'bokhogonat inom dogolik sembayan isikhe. 37Sembayan isikhemo nen, it tha'bokhogonat de aga dogolik Paulus ebe obakha hurlukhogon ha'iluk nen, inape tharluk heagei wakhe dogolik, heagei warogo la'isukha. 38Sembayan aban igidek dogolik, at Paulus nen,

“Hit nen an yabokane nelokhoken hinileken neagun dek o,” iluk yogeisasikhe meke etnogo inakla ebekhukhasik, inakla motok weak ageikhesik, ebe heagei warogo wolok, ku etnogo werekma lagoukha.

Currently Selected:

La'isasikhe 20: LAIDNT

Highlight

Copy