MAREKÙT 7
7
“Hinapu hinopalak hagatì lagaukwa higit hogo hagatì lagep,” ìlùk yogoisasike wene
(Mat.15:1-9)
1Hobuk ho, it ap Parisi mene mel, it Ala ane helal waganek esewerek mene aike mel, o Yerusalem en Yesùt oba atogosi lagai wagaukwa. 2Lagai wagaukwasik logolìk, it Yesùt agoromì ane wanhì lagaukwa mene amanogo aike, apùnì ineki bakwe inerabùl horatarek atì hak horatì'lek sùpùrùk yùgùnat nikenem he, ineileken isasukwa. 3Ineileken atì'nogo isasukwa atì re, apùnì Parisi mene inomat, Yahuri mene aike inomat, inebe obogat he, inapu inopalak inawene hesogo logolìk, ineki bakwe horatì'lek sùpùrùk nasak motok lek ìlùk ìkì logolìk ineileken isasukwa atì. 4Wene atì'nogo hesogo logolìk, yì mene tì mene oko palogo wolok wagaikaresik he, inoba horatì'lek sùpùrùk nekarek motok lek. Aike re, wene hageat mene atì hesogo logolìk he, isoak hamùlùk mene oba horatìk, huko mene oba horatìk, sogoloak oba horatìk, egarek atì. 5Atì'nogo egarek atì nen he, it Parisi mene mel, Ala ane helal waganek esewerek mene mel, inom en, Yesùt mel yogosukwa:
“Yesùt It ap hat hagoromì hane wìlì'lùgì mene yoma nen, ninapu ninopalak hagatì lagaukwa higit hogo hagatì'lek yùgùnat hagatì logolìk ineki bakwe horatì'lek sùpùrùk yùgùnat nìlì'lùgì atì nahalok,” ìlùk yogosukwa. 6#Yes.29:13 Atì'nogo yogosukwama, at en he, mel yogoisasike:
“Hit hinogat oba nek hano salek, hinetaùken pìre logolìk hagatesep atì hesik he, at Yesaya nen Ala ane yogoisìkì logolìk, wene mel isike atì, hit hesik higit hogo isike hìgì:
Ala nen he,
It apùnì yoma re, we, inape ba nen an
hogo'napì logolìk, inetaùken an noba ebetì'lek
wele'ma ebesi lìlì'lùgì.
7Wene apùnì inane meneat he, an nen isigi mene negen yakùlisìlì'lùgì atì nen he, we tùlemat an hogo'nabì'lùgì o,
ìlùk isikomo Yesaya nen helal waganogo hesikomo werek atì, hit hesigat isike o. 8Wene atì'nogo isike hagat, Wena Ala nen ninasuk wasike wene a'nogo sagalogo hebisalùk he, apùnì inawene ning hogo hesogo welagep o,” ìlùk isike. 9Atì'nogo yogoisìlìk, wene aike mel yogoisasike:
“Hit hinetaùken motok kagalek yì nayùk e! Hinapu hinopalak hagatì lagaukwa mene atì ning hogo hesogo logouogolùk he, wene Ala nen ninasuk wasike wene atì sagalogo heraksìkì lagep atì hano hìgì,” ìlùk inekalì wasike. 10#Kel.20:12, 21:17; Im.20:9 Inekalii wasikesik he, wene aike yogoisìkì logolìk, mel isike:
“At Musa nen he:
Hinopase hinagosalak agaugerinapì logoino o,
ìlùk isikesik he, aike mel isike:
Sa nen opase agosa abok weak palhe halok he, at atì ebe motogat wasusak o,
ìlùk ninasuk wasike meneat he, 11hit en he, mel yogoisìkì lagep:
At aike nen opase he a, agosa he a, yogotì logolìk:
An mene yì mene tì mene hat wokhesusak mene at he, Ala hesik hisìgìrì'mo ìlùk u hak, Iberani ninane ba, korban ìlùk yogoisìkì logouagalùk yakùlisìkì lagep atì re, 12hobuk inopase inagosalak wogisasak mene wogisasak lek ìlùk wene palu hagat ìkì lagep o. 13Ati'nogo ìkì lagep atì ba, hinapu hinopalak hagatì lagaukwa wene wanhigisip he, Ala ane sagalogo heraksìkì lagep atì. Ati hak, wene aike apigat hagatì lagep mene weregat o,” ìlùk yogoisasike.
“Apùnì wene ina'la nen kagalogo lagai waganem egarek atì, weagarinaperek ebe atìat,” ìlùk yogoisasike wene
(Mat.15:10-20)
14At Yesùt en, wene atì'nogo yogoisasikesik he, hobuk apùnì logolek amanogo waisasikomo wagaukwama, aike mel yogoisasike:
“An wene igin yì, hit obogat hùthoageip en he, hinasuk hanorogo holini o. 15Apùnì re, yì mene tì mene inapema nen ina'la pelaparek mene atì nen, weagarinabusak lek enek o. Weagarinaperek atì re, wene ina'la nen kagalogo lagai waganem egarek atì nek he, weagarinaperek o. 16Hinasuk holusak halok he, hanorogo holhì logoni o,” ìlùk yogoisasikesik, 17apùnì logolek amanogo eta'ma hisalùk, at Yesùt ouma kisikomo re, at agoromì ane wanhì lagaukwa mene amanogo nen he, mel isukwa:
“Wene oba lìrogo yogonisegen atì, ebe kì mene hesik yogonisegen,” ìlùk oba hinok wanhukwa. 18Hinok wanhukwama re, at en he, mel yogoisasike:
“Hit hogo re, it hinom higirat wene atì hùthìgì'lek welagep a? Yì mene tì mene inapelekwe kelabìk ina'la pelapenem weagarinabusak lek o, ìlùk hùthìgì'legat welagep hìgì. 19Nekarek mene atì re, inetaùkenma kikerek lek. We, pìkìt inalabut a'la pìlìk he, inamise pìkìt wusi lagaikarek o,” ìlùk isike atì, yì mene tì mene yùgùnat nìkì logousak. Wesa lek o, ìlùk isike atì. 20-22Wene atì'nogo yogoisìkì logolìk, aike mel yogoisasike:
“Wene ina'la nen kagalogo lagai waganem wulaparek atì nenat inebe weagarinaperek o. Atì'nogo ina'la nen weak mene ebetì logolìk hagatarek he, yì: hìlìmìkìrugì pailak haksìgìk, yogot wanhìk, apùnì inoatìk, ap inagagwi mene pailak haksìgìk, ina'la nen,
Apùnì aike inagarok mene an mene nek logoilep, ìlùk akìgìk, yì weak tì weak aike hagatìk, lalinapik, inekalì lek hagatìk, ua palhìk, inabok wiik-weak palhìk, inokawerek en hogorakìgìk, inetaùken lek hagatìk, egarek atì. 23Yì weak tì weak atì, obogat ina'la nen kagalogo lagai waganem wulaparek atì nenat inebe weagarinaperek o,” ìlùk yogoisasike.
He Siro-Penisia mene etaùken Yesùt oba hìpìrethesike wene
(Mat.15:21-28)
24At Yesùt en wene atì'nogo yogoisalùk o atoma nen he, o Tìrùt lagai wagaikesik ouma kìlìk, apùnì mel yogoisasike:
“It aike inokot logouak eh he,
At wagasik, ebe o atoma werek, ìlùk yogoisagùp o. An nabìt,” ìlùk wene palhike meneat he, ebe nìkì'nogo hinago logou heat haga'lagaike. 25-26Atì'nogo haga'lagaikomo were'ma, at he aike eak mokareke oabùt weak mene a'la kìlìk were'ma, Yesùt abok aremnogoat asuk holìlùk, oba wagaike. He atì re, ebe Yahuri mene lek, we awì ero Siro-Penisia atoma mene, Yesùt awe a'ma eitep awì yagasogo hù'lasi wagaikesik he, mel yogosike:
“An neak mokareke oabùt weak mene a'la kìlìk werek en, hat en henogo wulaksanogolùk hayoko wagì o,” ìlùk yogosike. 27Ayoko hesikomo at Yesùt en he, mel yogosike:
“Sùpùrùk he, yekerùgì tak inalabut ning hogo nasak. Yekerùgì inapùrùk mene wìlìk he, yeke noagalùk lagasusak mea o,” ìlùk yogosike. 28Atì'nogo yogosikomo, at he a'nogo nen he, mel yogosike:
“Ì noe. Eberogoat egen. Mene re, yekerùgì nen sùpùrùk e meja talek oba nìkì logolìk eken weagarogo nen pelapenem he, yeke meja a'ma logolìk nikeregat o,” ìlùk isikomo re, 29at Yesùt en he, mel yogosike:
“Hane higit egen atì ba nen, mokareke oabùt weak mene heak a'la nen he, arat henogo wùlùpomo werek atì. Halok haua lan o,” ìlùk yogosike. 30Atì'nogo yogosikomo, at he a'nogo aua lagaikesik kisike re, mokareke oabùt weak mene eak a'la nen henogo wùlìpikesi'mo re, nogo ikerek oba weitek hano were'ma ha lagaika.
Yesùt en ap aike esako togùm mene hano hagasike wene
31Atì'nogo haga'lùk, hobuk he, at Yesùt o Tìrùt atoma nen lagak hogo o Siron kwe wagaikesik he, o atoma nen o etage kota 10 nen wùrìk ìlìkwe lakhìgìk, yìkwe lakhìgìk, tùlemkwe nen i Kalilea yekele'ma pisike. 32Pisikomo re, it apùnì atoma mene nen he, ap aike esako togùm ane kut lùgùlùgì mene oba wolok wagaukwasik eki hakoagalùk inane inelageik ane Yesùt yogosukwa. 33Yogosukwama re, apùnì logolek atem hisalùk ap esako togùm a'nogo alepma wolok lagaike. Wolok lìlìk he, at Yesùt eki tùm ap a'nogo esako elema te'methìlìk he, wesi eki ba yùgùlogo lakhìlìk, ap a'nogo ameli ba hesike. 34Atì'nogo hìlìk eileken pogot oba lìakhìlìk he, ane agaukwak a'marogo isikesik he, nit ninane ba:
“Huak in,” u hak, it inane ba:
“Epata,” ìlùk yogosike. 35Atì'nogo yogoto kolek aremnogoat, esako a'nogo huak ìgìk, ane kut lùgùlùgì a'nogo higit agìk, isikesik he, ane hano isike. 36Ane hano agaikomo re, at Yesùt en apùnì amanogo yogoisìkì logolìk he:
“Hit en apùnì aike motok yogoisagùp o,” ìlùk inasuk hobugalep wato kolegat he, it en hobuk inane ebenageik hùkorogo yogoisìkì lagaukwa. 37Atì'nogo yogoisikenem he, it en apik hogoratì logolìk he, mel ìkì lagaukwa:
“At en, yì mene tì mene hano nek hagatì logolìk, apùnì hagarinapenem he, inesako togùm mene huak ìlìk inasuk holhìk, inane lek mene inane hano agìk, ìlì'lùgì atì nayùk e!” ìlùk apik hogorasukwa.
Currently Selected:
MAREKÙT 7: LAIDNI
Highlight
Share
Copy

Want to have your highlights saved across all your devices? Sign up or sign in