MATÌÙT 5

YESÙT ÙKÙL OBA LAGALÌK YAKÙLISASIKE WENE

Ina'la hai hakasak wene

(Luk.6:20-23)

1Apùnì apik waganem, Yesùt eileken yerisìlìk he, ùkùl oba lagalìk hùrek were'ma, it at ane wanhì lagaukwa mene oba wagaukwa. 2Wagaukwama re, wene it inom yakùlisìkì logolìk he:

3“Apùnì ina'la nen he,

An he, Ala eilhanem, ebe mene hesik nelageik welagì, ìlùk akagarek mene atì, Ala awe a'ma hisikere'ma atoma esewerek irat atì nen he, ina'la hai hakìkì logousak o. 4Nen, apùnì ina'la wiik-weak hogo welagaikarek mene atì, Ala nen inetaùken sebeligin atì nen he, ina'la hai hakìkì logousak o. 5Nen, apùnì inoabùt enago mene atì, Ala nen o abok yogonisasike atì, irat ese asugun atì nen he, ina'la hai hakìkì logousak o. 6Nen, apùnì sùpùrùk mel, i mel, nele agaikarek hak, Ala a'la akikerek mene esinethìlìk hagasu walok akagarek mene atì, sùpùrùk inalabut ning hogo nekarek hak, hobuk Ala nen ina'la hanorogo ebe mene wogisegein atì nen he, ina'la hai hakìkì logousak o. 7Nen, apùnì inebe inetawìrogo welagaikarek mene atì, ninopase nen it etawìrinabigin atì nen he, ina'la hai hakìkì logousak o. 8Nen, apùnì inetaùken omakeat tegelek welagaikarek mene atì, hobuk Ala ebe ineileken hogoin atì nen he, ina'la hai hakìkì logousak o. 9Nen, apùnì inom weagat were'ma, it aike nen lapuk hogo hisagarek mene an, at Ala nen he,

Yì an nagainapùrì o, ìlùk yogoisegein atì nen he, ina'la hai hakìkì logousak o. 10Nen, apùnì nen Ala a'la akikerek mene esinethagarek mene hesik it aike nen weagarinapenem, Ala awe a'ma hisikere'ma atoma esewerek irat asugun atì nen he, ina'la hai hakìkì logousak o. 11-12Hit oan werek kolek, hageat it ap Ala ane yogoisìkì lagaukwa mene weagarinapì lagaukwa hagat, hit an nebe hesik, it apùnì aike nen wenakhisìgìk, weagathinapìk, inapeliak enat hinabok ìkì logolìk, yì weak tì weak hinoba hìgìk, iko halok he, hina'la hai hakìkì logousak o.

Hobuk ninopase pogot oba mene nen hùko mene wo'nisegein ìlùk, hina'la hano agìk, hai hakìgìk, hùkorogo ìkì logoino,” ìlùk yogoisasike.

Mayu hesik mel, o lìa hesik mel, yogoisasike wene

(Mrk.9:50; Luk.14:34-35)

13Atì'nogo yogoisasikesik he,

“Apùnì yoma obogat hesik, mayu hake hirat welagep o. Mene re, mayu atì aik lek aga halok he, nena mene ba aik weregerasusak akegep. Lek o. Aik weregerasusak motok lek en he, kesalogo laksìlìk apùnì inesok en lìlìbùk warogo laksagarek o.

14Nen, apùnì kweangma lìarinapùkwe re, hirat welagep o. O kota punu ebe ba wùrìk mene hinakhousak he, mea o. 15Nen, esage kìalogo sogoloak en sebelogo hagarek legat. We, esok telik oba hikenem apùnì ouma welagaikarek mene inebe obogat lìarinaperek. 16Atì hak he, hit hano hagatenem, it aike nen he,

It hano hagarì'lùgì, ìlùk hinopase pogot oba mene a'nogo hogorasuak en he, hit apùnì ineilhanem atì hakeat lìarogo logoino o,” ìlùk yogoisasike.

Ala nen ninasuk wasike wene a'nogo hesik yogoisasike wene

17Atì'nogo yogoisasikesik he, aike mel yogoisasike:

“An wagagi atì re, Ala ane ninasuk wasike wene a'nogo mel, it ap Ala ane yogoisìkì lagaukwa mene inane atì mel, inane sagaligìlùk wagagi lek o. We, eberogoat haga'lasuagalùk esinetheìgìlùk wagagi o. 18An nane eberogoat yogohisak. Pogot mel, kweang mel, oan lek agì'lek werek kolek ya re, wene Ala nen ninasuk wasike mene atì, helal hamùlùgat sobon al hake mel, inesiken omakeat hake mel, lek agì'lek motok heleleng hogo eberogoat haga'lasigin o. 19Halok he, sa nen Ala nen isike wene hamùlùk mene omakeat halok sebelogo hìlìk, it aike nen atì'nogo hagatì logouagalùk yakùlisike halok he, Ala awe a'ma hisikere'ma atoma, at atì etage yekerùgì negen ina'la meathìkì logogun o. Mene re, sa nen Ala ane atì higit hogo hagatì logolìk, it apùnì aike nen atì'nogoat hagatì logouagalùk yakùlisìkì logogin halok he, Ala awe a'ma hisikere'ma atoma, at atì etage weregat were'ma esinethìkì logogun o. 20Ala a'la akikerek mene higit hogo hagasuogolùk he, it apùnì nen Ala ane helal waganek esewerek mene amanogo mel, ap Parìsi mene mel, inoabùt hagarì'lùgì atì hagat hagatì logogun halok he, Ala awe a'ma hisikere'ma atoma kugun lek o. Eberogoat Ala a'la akikerek mene higit hogo hagatì logogun mene halok kugun o,” ìlùk yogoisasike.

Ina'mage lagaikerek atì hesik yogoisasike wene

(Luk.12:57-59)

21 # Kel.20:13 Atì'nogo yogoisasikesik he, aike mel yogoisasike:

“Wene Ala nen nit ninapu ninopalak yogoisìkì logolìk he,

Apùnì inoasusak lek,

ìlùk isikomo,

Inoatep halok he, ùkùm hinoba hegein werek o, ìlùk isukwa a'nogo hinasuk holhì lagebat o. 22Mene re, an nen wene aike yì yogohisak. Hat sa nen hagaiyak hesik ha'mage lagaiko halok he, wene aike hoba hegein werek o. Nen, hat sa nen hagaiyak aike yogotì logolìk he,

Hat he, hebe kepù yì rì! ìlùk iko halok he, it ap wene ero pìlìngìtare'ma atoma wokharek lìlìk, ùkùm hoba hogoinat o. Nen, hat sa nen,

Hat he, hetaùken motok lek yì rì! ìlùk iko halok he, wene hoba hìlìk etu aik api'mo lakhagagin o. 23Halok he, hat sa nen hagarok hano mene wolok Ala awe a'ma hei laga logolìk, ha'la nen he,

Nagaiyak a'nogo nen he,

At weak hagatomo, ìlùk ùkùm noba hìlì'logo, ìlùk hokawerek en hetaùken ebe'lasi waga halok he, 24wolok legein mene atì Ala hesik hisagarek oba atoma welegat halùk, hobuk sùgùlogo hapotkwe hagaiyak a'nogo oba wìrìk, wene sagalogo legethousak o. Nen, wene arat sagalhep halok he, hobuk lìlìk Ala awe a'ma a'nogo housak o. 25Nen, ap aike heperak weak mene nen hat wokharek ap wene ero pìlìngìtare'ma laganem he, it ap atoma nen hobuk wokharek polisi inoba laganem he, it polisi lak en hobuk wokharek he, ineki hele warogo hisagare'ma lanogo ìlùk, heperak weak mene atì re, ebekwe oan laga logolìk atemat wene sagalogo heanerasusak o. 26Atì'nogo heaneratì'lek halok he, heki hele warogo hagoumo, ap atì agarok palegeke hat hoba werek mene atì oko katok hogo oan wogotì'lek werek kolek, wùlìbi wesigin motok lek o, ìlùk eberogoat yogohisìgì,” ìlùk yogoisasike.

“Pailak haksasak lek,” ìlùk yogoisasike wene

27 # Kel.20:14; Ul.5:18 Atì'nogo yogoisasikesik, aike mel yogoisasike:

“At Ala nen ìkì logolìk he,

Hìmì pailak haksasak lek o,

ìlùk isike atì, hinasuk holhì lagebat o. 28Meneat he, an nen wene yì yogohisak. Ap sa nen, he aike eileken lakhìlìk he, a'la nen he,

Eige. An he atì pailak hakheile e, ìlùk akike halok, a'la nen pailak eberogoat arat hakhike o. 29Halok he, heileken ebekwe nen weagathabusak haga'laga halok he, hemelogo laksano. Hebe abireke etu ai'mo po lakhageinogo nen he, hemelogo laksìlìk o'moko nek were'ma hano. 30Nen, heki ebekwe nen weagathabusak haga'laga halok he, heki ebekwe atì tek hogo laksano. Hebe abireke etu ai'mo po lakhageinogo nen, tek hogo laksìlìk o'moko nek were'ma hano,” ìlùk yogoisasike.

“Hìmì lologo heraksasak lek,” ìlùk yogoisasike wene

(Mat.19:9; Mrk.10:11-12; Luk.16:18)

31 # Ul.24:1-4 Atì'nogo yogoisasikesik, aike mel yogoisasike:

“Nen, wene aike hageat yogoisìkì logolìk he,

Ap aike agwe lologo heraksagalùk halok he,

An he yì heraksìgì o, ìlùk, sùesika palogo re, he atì wogosusagat o,

ìlùk isukwaat. 32Atì'nogo meneat he, an nen wene aike yì yogohisak. Ap aike agwe waganek mene, it ap aike nen pailak hakhìgì'le'maat he, lologo heraksike halok, he atì pailak hagasuagalùk heraksike o. Nen, at ap aike nen, he lologo hegein mene atì wanhe halok, pailagat wanigin o,” ìlùk yogoisasike.

“Hopuk palusak lek,” ìlùk yogoisasike wene

33 # Im.19:12 Atì'nogo yogoisasikesik, aike mel yogoisasike:

“Nen, wene aike yì, Ala nen ninapu ninopalak amanogo yogoisìkì logolìk he,

Hit hinapeliagat an Ala netage hopuk palhùp o.

An yì'nogo hagasigin o, ìlùk an netage hopuk

palhep halok he, hinopase Netagepogot

neilhanem egen hagat haga'no,

ìlùk isike wene hinasuk holhì lagebat o. 34Meneat he, an nen aike yì yogohisak. Hit en he, at aike yogotì logolìk,

Yì mene tì mene etage hopuk palogo yogohetì o, ìlùk, yogosusak motok lek o. Ala ebe pogot atì ba hìpìrìk logolìk wene higirethikerek. Halok he, pogot atì etage hopuk palusak motok lek o. 35Nen, ninopase Ala esok kweang yì ba hìpìrìk welagarek. Halok he, kweang yì etage hopuk palogo yogoisasak motok mea o. Nen, o kota Yerusalem atì an hinopase Netagepogot mene aroma welagìrek. Halok he, o atì etage hopuk palusak legat o. 36Nen, yogotak he, nesi mola asusak ìgìk, yogotak he, nesi muli asusak ìgìk, ikenem hinane hologo mola agìk, muli agìk, ikerek motok lek o. Halok he, hinùkùloak atì etage palogo hopuk palusak legat o. 37Hit en,

Ì o, uogolùk halok,

Ì oat unuk. Nen,

Lek o, uogolùk halok he,

Legat usak. Wene hùnogoat mene aike mangorasi lagep halok he, Ibilit oabùt weak mene a'nogo nen hina'la kagalho kolek ugun o,” ìlùk yogoisasike.

“Hit weagathinapo halok oko housak lek,” ìlùk yogoisasike wene

(Luk.6:29-30)

38 # Kel.21:24 Atì'nogo yogoisasikesik, wene aike mel yogoisasike:

“Hageat wene aike mel isukwa:

Hineileken hemelho halok he, oko ineilekenat hemelusak. Nen, hinaik lakùlho halok he, oko inaigat lakùlusak,

ìlùk isukwa mene atì hinasuk holhì lagep o. 39Atì'nogo meneat he, an nen wene aike yì yogohisak. Weagathinapa halok oko hùgùp o. Hinelokoken ebekwe lapuk hogo hinoato halok he, peikkwe inomat hoasuagalùk, ìnùgisasagat o. 40Nen, it apùnì aike nen, it ap wene ero pìlìngìtarek mene amanogo inoba wokhisek lìlìk,

Hasu eilemkwe laberek mene wo'nom, ìlùk iko halok he, atì mel, hasu sogoi su etakwe laberek mene atì inomat sabarogo wogisasak o. 41Nen, ap aike nen ane keirogoat ìkì logolìk he,

Sukwe yì horok atem hani lan o, iko halok he, hit en tagan hogo negenat hisa lasak o. 42Nen, at ap aike nen,

Hagarok atì an wo'nom, ìlùk kìno iko halok he, hinabìt isìgì'legat wogosusak o. Nen, at aike nen,

Hat mene atì hobuk wokhesik en, elama hesik wo'nom, ìlùk iko halok he,

Nabìt, ìgì'lek wogosusagat o,” ìlùk yogoisasike.

“Apùnì hinom weak mene hinetawìrogo logousak,” ìlùk yogoisasike wene

(Luk.6:27-28,32-36)

43 # Im.19:18 Atì'nogo yogoisasikesik he, aike mel yogoisasike:

“Hageat it aike nen wene mel yogoisasukwa:

Hit en apùnì hinom welagasep mene hinetaùken hutìk logolìk he,

it aike hinom weak mene halok he, hinapsirìrinabusak o, ìlùk isukwa mene atì hinasuk holhì lagep o. 44-45Atì'nogo meneat he, an nen wene aike yì yogohisak. At ninopase Ala pogot oba mene mo esewerek logolìk kweangma lìarogo apùnì inoabùt weak mene lek, hano mene lek, obogat hesigat yarisìgìk, nen, moso pelakhei wagarek atì re, it higit hagarì'lùgì mene lek, kolo hagarì'lùgì mene lek, obogat hesik pelaksa wagìk, ikerek atì hak, hit hinopase Ala pogot oba mene againapùrìat asuageip ìlùk, apùnì hinom weak mene atì hinetawìrinapì logolìk he, it weagathinabì'lùgì mene atì, Ala nen hanorinabuagalùk, it hesik sapan ìkì logoino. 46Nen, it apùnì aike nen, hit inetawìthinaparek mene atì nek hit en hinetawìrinapì lagep halok he, Ala nen oko wokhisegein nogo? Lek o. Atì hak he, it ap pemerìntah mene hesik uang kìno ìlìk atogotarek mene nen inoabùt atì'nogoat hagatarek o. 47Nen, hinerùgì hinagaiya'lak halok enek hai warinapì lagep halok he, hit enek hinoabùt atì'nogo hagatì lagep hùk. It apùnì etakwe mene inoabùt atì'nogoat hagatarek lek nogo? Atì'nogoat hagatarek o. 48Halok he, ninopase Ala pogot oba mene oabùt hano motok katoksek logolìk etawìrinaperek hùk, hit atì'nogoat hinetawìrinapì logoino o,” ìlùk yogoisasike.

Currently Selected:

MATÌÙT 5: LAIDNI

Highlight

Copy