MATÌÙT 4

Ibilit en Yesùt a'la kagaligìlùk oba waga lagaike wene

(Mrk.1:12-13; Luk.4:1-13)

1Ima pelakhesikomo re, Yesùt Ibilit en a'la kagaluagalùk he, Ala Areagùn nen wolok o leimo apùnì le'ma atoma lagaike. 2Atoma hei lagaikomo logolìk he, o hi ìgìk, we ìgìk, iko kolek eki 40 ba sùpùrùk welegat welagaike atì nen he, sùpùrùk nele agaike. 3Atì'nogo nele were'ma re, at Ibilit ina'la kagalìk nikerek mene a'nogo oba wìrìk he,

“Hat eberogoat Ala aput halok he, helep aroma sùpùrùk horoti mene haga'lasuak en yogosin o,” ìlùk, yogosikomo re, 4#Ul.8:3 at Yesùt en he,

“Ala nen,

Apùnì sùpùrùk enek nìkì logolìk ineluk motok welagaikarek lek o. An nane ìgìrek mene atì obogat wanho halok, ineluk motok logogun o,

ìlùk isikomo helal waganogo hesukwama werek o,” ìlùk yogosike. 5Yogosikomo re, hobuk at Ibilit en Yesùt wolok, o kota Ala okawerek awì sili lìlìk he, o Ala awì o tùm uanaban wùrì'mo oba wolok lagalìk, 6#Mzm.91:11-12 mel yogosike:

“At Ala nen:

Hat hesok helep oba temuk hogo waranogo ìlùk he, an nagoromì malaikat pogot oba nen yoko pelaksa wagìrek mono amanogo nen ineki talek oba wokhabuak en yogoisegein,

ìlùk isikomo helal waganek werek atì, hat eberogoat Ala aput halok, pok harogo maroma pin,” ìlùk yogosike.

7 # Ul.6:16 Yogosikomo, at Yesùt en he,

“Ala nen ìkì logolìk,

Hit en he, an hinopase Ala Netagepogot nanini werek a? Lek a, ìlùk noabùt palusak motok lek o,

ìlùk isikomo helal waganogo hesukwama weregat o,” ìlùk yogosike. 8Atì'nogo yogosikomo re, hobuk at Ibilit en Yesùt wolok tom hùko uan mene ùkùl oba lagalìk he, o kweangma yì awì tì awì ap kaintek inetagepogot en hagisek welagaikarek obakwe lopok obogat, yì mene tì mene apik were'ma eileken lakhoagalùk yakùletì logolìk he,

9“Yesùt. Hat heitep awì yagasogo nawe a'ma ki wìrìk hogo'nabigin halok, heileken lakhegen mene aroma obogat heleleng hogo hat wokhesigin o,” ìlùk yogosikomo re, 10#Ul.6:13 at Yesùt en he,

“Hat Ibilit yì lan o. Ala nen ìkì logolìk he,

Hit en he, hinopase Ala Netagepogot anat

hineitep awì yagasogo nawe a'ma ki wìrìk

hogo'napì logolìk he, an hesik enek hagatì

logoino o,

isikomo helal waganogo hesukwama werek o,” ìlùk yogosike. 11Atì'nogo yogosikomo re, Ibilit a'nogo Yesùt heraksalùk wo'lakasikomo re, malaikat pogot oba nen Yesùt oba pi wìrìk he, serogo welagankwa.

At Yesùt o Kalilea lagai wìrìk hagatì lagaike wene

(Mrk.1:14-15; Luk.4:14-15)

12“At Yohanet a'nogo eki hele watama,” ìlùk isukwama, at Yesùt esuk holhìkesik he, o Kalilea tokwe lagai wagaike. 13Lagai wagaikesik, a kota Nasaret a'nogo hebùlùk he, o kota Kaperenagùm i Kalilea yekelek esakoma, it ap inùkùl etage Sepulon mene ho, Naptali mene ho, inaua atoma logoigìlùk lagai wagaike. 14Lagai wagaike atì re, at Yesaya Ala ane yogoisìkì lagaike mene a'nogo nen helal wanhì a logolìk he,

15 # Yes.9:1-2 “Hit ap hinùkùl etage Sepulon mene ho, Naptali mene ho, hinaua i Yoretan aik ìlì bakwe wùrìk mene inom, i laut hùko yekele'ma pagarekkwe wùrìk mene inom, hinaua o Kalilea tokwe aroma re, it ap etakwe mene nen sebelek werek yoma sanì.

16O mùmmo welagasep mene atì, o lìathinabigin mene hùko mene aike hegep o. Hit o atoma wa'lasuogolùk hinoba mùm arì'mo, lìathinabigin mene aike waga atì o,”

isike a'nogo higit hogo haga'lasuagalùk Yesùt atoma lagai wagaike atì. 17Lagai wagaikesik logolìk, hùlì atì hùlì nen, apùnì atoma yogoisìkì logolìk he,

“Kain pogot oba mene nen awe a'ma hikegein a'nogo yogotak arat awe a'ma hikegein o. Halok he, weak hagatì lagep mene heraksìlìk hinoabùt hebela'ni o,” ìlùk yogoisìlìk nìkì lagaike.

Yesùt en agoromì emakum inayoko hesike wene

(Mrk.1:16-20; Luk.5:1-11)

18At Yesùt i Kalilea yekele'ma esakokwe laga logolìk he, ap inebe pìre, Simon etage aike Peterùt ìkì lago a'nogo agot Atereat eperak ninhùp-nanhùp ikanat wanharesi'mo nogo nen he, atì sapùl ikan wanuogolùk, su yoge su ima pelapenem eileken lagisasike. 19Lagisìlìk he,

“Ikan wanhesep atì hak, apùnì atì'nogoat woginabìk nìkì logouageip en he, yakùlhisak en nopolik we'ni o,” ìlùk yogoisasikomo re, 20aremnogoat inasu yoge su atoma heraksalùk at opolik lagaukwa. 21Lagaukwama, at Yesùt eileken lakhasike hak, ap inebe pìre Sepeteùt againapùrì Yakobùt agot Yohanet eperak inopase inom, so a'la logolìk, su yoge su ikan wanharek mene hìkìn katenem lagisìlìk he, waisasike. 22Waisasikomo re, so a'nogo inom, inopase Sepeteùt a'nogo inom, aremnogoat hisalùk, it Yesùt opoligat lagaukwa.

At Yesùt en wene yakùlisìgìk, ou weak mene hagarìnapik, ìkì lagaike wene

(Luk.6:17-19)

23Lagaukwama re, at Yesùt o Kalilea tokwe o lopok atoma nìkì logolìk, apùnì Yahurì mene sapan egarek obakwe kìlìk he, wene hano wene hobuk ninopase Etagepogot awe a'ma hinegein a'nogo wene yogoisìgìk, yì ou tì ou hagarìnapik, ìkì lagaike. 24Atì'nogo hagarìnabìk nikenem, abok o Sirìa atoma motok sak isikomo re, yì ou tì ou, yì hat tì hat inoba werek mene inom, mokareke oabùt weak mene ina'la kìlìk inepe lùgùlùgì palharek mene inom, wa'lagìk ineluk agìk egarek mene inom, ineki inesok wùt warek mene inom, oba wogisek waganem hagarìnapi lagaike. 25Atì'nogo hagarìnapo kolek he, apùnì obogat o Kalilea nen, o kota 10 atoma nen, Yerusalem en, Yurea nen, i Yoretan aik ìlì bakwe atoma nen, inebe motok apik wìrìk he, Yesùt opolik nìkì lagaukwa.

Currently Selected:

MATÌÙT 4: LAIDNI

Highlight

Copy