MATÌÙT 26

Yesùt ebe wasuogolùk weim abok isukwa wene

(Mrk.14:1-2; Luk.22:1-2; Yoh.11:45-53)

1At Yesùt en wene atì obogat arat yogoisasikesik he, bobuk agoromì ane wanhì lagaukwa mene amanogo mel yogoisasike:

2“Nineki pìre logopik en pesta Paskah hagasugun atì hit hineluat o. Atì'nogo hagato kolek, an abat ta'lasi wagagi a'nogo, ap en yoko lìlìk, it aike nen e ba menhanìlìk noasuagalùk ineki ba hanugun o,” ìlùk yogoisasike. 3Atì sat he, it ap Ala esewerek mene inogogì kaintek mene mel, inalùgetek amanogo mel, at ap Ala esewerek mene inoe kain etage Kayapat a'nogo aua atogothìlìk he, 4Yesùt eil warogo hakhìlìk wasuogolùk weim abok ìkì lagaukwa. 5Weim abok ìkì logolìk he, mel isukwa:

“Pesta hùko isago nikenem atì re, wene wo'larìk elùgùn oba weak asinogo nen he, hakhìgì'lek logopik, o we like halok hakhouok o,” ìlùk weim abok isukwa.

He aike nen amusu obasi hano mene Yesùt ùkùl oba pelapike wene

(Mrk.14:3-9; Yoh.12:1-8)

6Atì'nogo isukwasik werek kolek, at Yesùt o Petania ap Simon oumo henako hake inayùk mene hageat ebenakwe welagaike mene atì aua atoma kìlìk were'ma, 7he aike amusu obasi hano oko apik mene oko palogo isoak helep etage pualam mene hagarek mene ba a'la hinagasogo wolok Yesùt sùpùrùk nikenem oba kìlìk he, ùkùl oba kesalogo pelapike. 8Atì'nogo pelapikomo, at Yesùt agoromì ane wanhì lagaukwa mene amanogo ineileken hasukwasik he,

“Amusu we tùlemat alemarogo kesalhe yì, nahalok,” ìlùk, ina'mage lagalìk he, he a'nogo wenagatì logolìk,

9“Amusu atì oko motok apik mene palogo re, it inagarok lek mene spùpùrisasak mene,” ìlùk isukwa. 10Atì'nogo isukwama re, at Yesùt en inoabùt enagat hùrìsasikesik he, mel yogoisasike:

“He yì nen hano haga'nape meneat he, nahalok wenagatì lagep. 11It apùnì inagarok lek mene atì hit hinom motok logogun meneat he, an enek he, hit ninom motok logogun lek o. 12At he yì nen amusu pelakhanhe atì re, an hobuk noatenem nebe wa'lasumo re, warek salnabuogolùk wathanu hagat arat wathani waga o. 13Nane eberogoat yogohisak. He yì eberek logouagalùk, apùnì wene hano wene a'nogo, o yì awì tì awì yogoisìlìk nìkì logolìk he,

He atì tì'nogo hagasike, ìlùk abok hano ìkì logogun o,” ìlùk yogoisasike.

Yùrat en Yesùt wasuagalùk yoko lagaike wene

(Mrk.14:10-11; Luk.22:3-6)

14At Yesùt en wene atì'nogo yogoisasikomo re, at agoromì ane wanhì lagaukwa mene inebe 12 amanogo mene, aike etage Yùrat Isikarìot a'nogo, it ap Ala esewerek mene inogogì kaintek amanogo inoba lagaikesik he,

15“An nen Yesùt atì wokhisìgì halok he, hit en oko nena mene wo'nesugun akegep,” ìlùk yogoisasikomo, it ap amanogo nen he,

“Oko uang perak mene 30 nen wokhesugun o,” ìlùk yogosukwasik he, ineki wenagasogo wogosukwa. 16Oko arat hesukwama re, at Yùrat Isikarìot a'nogo nen he,

“Yesùt ebe hanoasuak nìkì'nogo were'ma ineki ba hegein he,” ìlùk weim abok a'la logolìk wenesùgì ebetì lagaike.

Yesùt agoromì inom, pesta Paskah nasukwa wene

(Mrk.14:12-21; Luk.22:7-14,21-23; Yoh.13:21-30)

17Yùrat atì'nogo a'la ebeto kolek he, it apùnì Yahurì mene eken horotì hisuagalùk a'la pelaparek mene a'la pelapì'lek werago nekarek a'nogo mene nùogolùk lilu alebagìk nekarek mene nùogolùk ìkì logolìk, it Yesùt agoromì ane wanhì lagaukwa mene amanogo oba wagaukwasik he, mel yogosukwa:

“Noe. Hat wam topa pesta Paskah hesik nanok en he, nit en yì mene tì mene o koma tegelogo hei lasak walok akegen,” ìlùk oba hinok wanhukwama, 18at Yesùt en he,

“O kota a'nogo lìlìk he, ap aike a'naga wene mel yogo'no.

At ninoe wene yakùlnisikerek mene a'nogo nen he,

An hagasigin mene arat horok asi wagama re, an nagoromì nane wìlì'lùgì mene ninom, at aua atoma pesta Paskah werago nùok en he, yogosi lani o, ìlùk yogonisikomo yogohesi wago, ìlùk yogo'no,” ìlùk yogoisasikomo re, 19it amanogo, at en isike hagat lagaukwasik he, yì mene tì mene pesta Paskah a'nogo hesik motok tegelogo hesukwa. 20O arat hi isikomo re, at Yesùt agoromì ane wanhì lagaukwa mene aike inom lagaukwasik he, inebe 12 amanogo inom hù'larìk, 21pesta nìkì logolìk mel yogoisasike:

“Hit ap ya mene aike nen, an nebe noasuagalùk yoko legein o, ìlùk, eberogoat yogohisìgì,” ìlùk yogoisasike. 22Atì'nogo yogoisasikomo, it amanogo ina'la motok weak agaikesik mel yogosukwa:

“Noe! An he a? An lek akìgì,” ìlùk, inebe lopok en ìlìk lagaukwa. 23Atì'nogo ìlìk lagaukwama re, at Yesùt en he:

“Hat aike an neperak nineki apìnenerogo pirìng a'la pelabìk amusu magasogo noko mene atì nenat noasuagalùk yoko legein o. 24An abat ta'lasi wagagi a'nogo, hagasigin mene helal waganek werek higit hogoat hagasigin meneat he, at ap nebe noasuagalùk yoko legein mene atì nek he, eigo. Motok weagat asigin o. At ap atì ta'la'lep le'ma re, hanoat logoilep mene,” ìlùk yogoisasikomo, 25at Yùrat, Yesùt wasuagalùk yoko lagaike a'nogo nen he,

“Halok he, noe. An he a? An lek akìgì,” isikomo at Yesùt en he,

“Hat meneat ìkì lagen,” ìlùk yogosike.

Yesùt agoromì inom sùpùrùk mel, eken amusu mel, elùgùn oba nasukwa wene

(Mrk.14:22-26; Luk.22:15-20; 1Kor.11:23-25)

26At Yesùt en wene atì'nogo yogosikesik, sùpùrùk nìkì logolìk, sùpùrùk horotì mene ekimo wanhikesik he, Ala hai warogo, ebe kùrogo it amanogo sùpùrisìkì logolìk he, mel yogoisasike:

“Yì an nebeat o. Wìlìk he, nani o,” ìlùk yogoisasikesik, 27-28hobuk isoak eken amusu hinago mene ekim wanhikesik, Ala hai warogo it amanogo wogisìkì logolìk he, mel yogoisasike:

“Yì re, an namebat o. Ala nen wene warogo wokhinabigin isike a'nogo, an namep wulagasogo noasugun atì ba apùnì logolegat yì weak tì weak hagarì'lùgì mene sagalogo legetsegein atì ba ebe asigin o. Halok, hinebe obogat nani. 29Wene aike yì yogohisak. Anggur eken amusu yì nalùk he, an hobuk aike nìkì'lek logopik en, hùlì nopase nen awe a'ma hisegein atì hùlì hit ninom amusu ket mene nogoin o, ìlùk, eberogoat yogohisìgì,” ìlùk yogoisasike.

30Wene atì'nogo yogoisasikesik he, wùnì Ala awùnì aike wa'lùk wùlùpukwasik he, Saitun ùkùl oba lagasukwa.

“Hat en Yesùt nokot, ìlùk, labeligin o,” ìlùk, Peterùt yogosike wene

(Mrk.14:27-31; Luk.22:31-34; Yoh.13:36-38)

31 # Za.13:7 Tom Saitun oba lagasikesik, at Yesùt en he,

“At Ala nen,

At ap topa wam serogo welagarek mene atì ebe an nen watenem he, ako omakìma atogorek welagarek mene atì, hese pùgùlugun o,

ìlùk isikomo, helal waganogo hesukwama werek atì nen, yogotak hùako yì, hit obogat an herakhanìlùk hese pùgùlugun o. 32Meneat he, an noatenem Ala nen hobuk nelugu'napenem he, an tak o Kalilea lagalìk hinelokoma logogin,” ìlùk yogoisasikomo, 33at Peterùt en he,

“It obogat herakhagalùk pùgùlha halok he, an enek he, herakhagalùk hese wùlìbigin motok lek o,” ìlùk yogosikomo, 34at Yesùt en he,

“Yogotak hùako sùe ayam motok ane ìgì'lek werek kolek, hat en he,

Yesùt atì nokot, ìlùk, heki hìnagan oba labeligin a'naga o, ìlùk, eberogoat yogohetì,” ìlùk yogosikomo, 35at Peterùt en he,

“Lek o. An neperagat ninoasumo re, hanoat o. An nen,

Hat nokot o, ìlùk, labeligin lek o,” ìlùk ikenem he, it Yesùt agoromì ane wanhì lagaukwa mene amanogo he'nakìt obogat en he, atì'nogoat ìlìk lagaukwa.

Yesùt Ketsemani yabumo nen Ala ayoko hesike wene

(Mrk.14:32-42; Luk.22:39-46)

36Atì'nogo isukwasik he, at Yesùt ebe mel, agoromì ane wanhì lagaukwa mene amanogo mel, inom Ketsemani yabumo lagaukwasik agoromì mel yogoisasike:

“An horok ya lìlìk sapan iko kolek, hit yoma hùrek logoni o,” ìlùk yogoisasike. 37Atì'nogo yogoisalùk he, Peterùt mel, Sepeteùt againapùrì inebe pìre aremnogo mel, wogisek lagaikesik he, a'la weak arìk etaùken min agaikomo re, mel yogoisasike:

38“An netaùken motok huni agasik wa'lasusak hake haga'nabì'logo o. Halok, hit ya logolìk he, ninomat ninepe hebelogo logouok,” ìlùk yogoisalùk he, 39at alepma negen horogat lìlìk elokwe sogoum weinarìk he, Ala ayoko hìkì logolìk, mel yogosike:

“Nopase! An weaga'nabugun atì telnabusak halok he, telnabino,” ìlùk u hak,

“Amusu hinago noagalùk wo'nesugun atì, wokhasak halok he, wokhano. Nen, lek halok he, an na'la akìgì mene atì lek o. We, hat ha'la akegen mene atìat haga'nabino o,” ìlùk sapan isike. 40Sapan atì'nogo ìlùk agoromì amanogo inoba wagaike re, it nogo motok iko were'ma nen he, at Peterùt mel yogosike:

“Hit he, hùako yì satu jam omake hesik an ninom ninepe hebelogo logousak he, mea he a. 41Weak hagasuagalùk hina'la kagali wesinogo ìlùk, hinepe hebelogo logolìk he, sapanat ìkì logoni o. Hina'la nen elok hagasusak ìlùk akìkì lagep meneat he, hinebe nen atì'nogo hagasusak he, mea o,” ìlùk yogoisasikesik he, 42sapan ebalep isike hagat, hobuk lagak hogo lagaikesik he, mel isike:

“Nopase a! An weaga'nabugun yì re, telnabusak mea halok he, hat ha'la akegen atì higit hogoat haga'lasuak o,” ìlùk, sapan isike. 43Sapan ìlùk hobuk wagaike re, it agoromì amanogo nogo ineil agaikomo nogo iko were'ma isa wagaikesik, 44sapan ebalep eki pìre ba isikesik, hobuk aike inom igìlùk lagaikesik he, ebalep isike hagat isike. 45Arat ìlùk agoromì inoba wagaikesik he, mel yogoisasike:

“Hit set walogo nogo iko motok logogun a? Ap aike nen ap weak hagatarek mene nen an abat ta'lasi wagagi a'nogo noasuagalùk ineki ba hanigin atì arat hanigin yì lakhani! 46Halok, lùok en he, hit mel a'ni o. Ap an noasuagalùk yoko laga mene a'nogo re, arat horogat waga arì,” ìlùk yogoisasike.

Yesùt ebe hakhesukwa wene

(Mrk.14:43-50; Luk.22:47-53; Yoh.18:3-12)

47Yesùt en,

“Horogat waga arì,” ìlùk iko kolek aremnogoat he, at Yùrat, ebe Yesùt agoromì inebe 12 amanogo mene yoko lagaikomo, it ap Ala esewerek mene inogogì kaintek amanogo mel, inalùgetek amanogo mel en, it ap inebe esa logolek inayoko hìlìk laksa wagaukwama, karok mel, payùk mel, wolok inebe motok holhùlùk inom wagaukwa. 48At Yùrat Yesùt wasuagalùk yoko lagaike mene a'nogo nen, wene mel warisasikesik en wagaukwa:

“Ebe hùthoageip en he, an tak lìlìk hai nape saluk watì halok, hit en he,

Ì, ebe atìat hìgì, ìlùk, hakhei lano,” ìlùk wene arat warisasikesi'mo nogo nen he, ineluat were'ma, 49at tak Yesùt oba wagaikesik he,

“Noe hallabok,” ìlùk, hai ape saluk watenem he, 50at Yesùt en,

“Nagot yì! Hat nahalok wagen,” ìlùk yogosikomo, it ap amanogo Yesùt era'lu wagaukwasik he, ebe motok hakhesukwa. 51Hakhikenem he, ap aike Yesùt inom welagaukwa mene a'nogo nen karok awìka a'la oua'ma nen lisogo re, ap Ala esewerek inoe kain mene atitigeke aike wasigìlùk huguthasike re, esako nek sapuk hogo lakhesike. 52Atì'nogo lakhesikomo, at Yesùt en he,

“It ap karok oba inoatenem, oko karok obaat inoatarek enek atì nen, hakarok arì houa'ma obùlù'mo kelabin o. 53Yogotak an nebe elele wo'nabuagalùk he, nopase kìno yogosumo, at en it malaikat Ala nen pogot oba yoko pelaksa wagarek mene amanogo inebe esa 12 en hamùlùgat meneat he, esa motok apik inayoko houmo, holhùlùk telnabi wesusak mea akegen? 54Telnabi wesusak elok meneat he, telnabilepma re, Ala nen,

Atì'nogo haga'lasigin, ìlùk isikomo helal waganek werek a'nogo re, nìkì'nogo eperak higit a'lep akegen. Lek o. Higit asuagalùk atì'nogo yogotì'lek kamo ìgì atì,” ìlùk, yogosikesik he, 55it ap apik wagaukwa amanogo mel yogoisasike:

“Ap yogot wanhenem haksa wagaikarek atì hak, hit en atì'nogoat an hakhanuogolùk, karok mel, payùk mel, motok wolok wagep yì rì! An ninhùp-nanhùp Ala awì wùrì'mo hùrek logolìk wene yakùlisikenem, hit en an yì'nogo hakhanhì'lek welagasibat he, 56it ap Ala ane yogoisìkì lagaukwa mene nen helal wanhukwa a'nogo eperak higit asuagalùk haga'napep o,” ìlùk, yogoisasikomo re, it ap at ane wanhì lagaukwa mene amanogo, at ebe hebùlùk hese motok pùgùlhukwa.

Yesùt wasuogolùk ùkùm oba hesukwa wene

(Mrk.14:53-65; Luk.22:54-55,63-71; Yoh.18:13-14,19-24)

57Hese atì'nogo pùgùlhukwama re, at Yesùt ebe hakhesukwasik he, ap Ala esewerek mene inoe kain Kayapat oba wolok lagaukwa. Lagaukwa re, atoma it ap Ala ane helal waganek esewerek mene mel, inalùlgetek mel, atogorek were'ma lagaukwa. 58Yesùt atì'nogo wolok laga kolek, at Peterùt a'nogo hobuk inopolik hek-hek laga lagaikesik he, ap kain Kayapat a'nogo awululu kisikesik,

“Yesùt nìkì'nogo hagasugun,” ìlùk eileken isagalùk he, at Kayapat agoromì Ala awì wùrìk serogo welagaikarek mene aike inekele'ma hù'lagaike.

59Hùrek werek kolek, it ap Ala esewerek inogogì kaintek mel, wene Ala hesik ero pìlìngìtarek mene obogat mel en, at Yesùt wasuogolùk, mel isukwa:

“Apùnì at weak hagatenem ineileken haga mene uak en heraginabini,” ìlùk, inapeliak enat ùkùm oba houagalùk heraginapukwa mene re, 60inebe logolegat inapeliak en ùkùm oba houogolùk wagaukwa meneat he, lek agaikomo, hobuk ap inebe pìre mene wagaukwasik he,

61“At yì nenat,

Ala awì atì mesalogo lakhìlìk he, obùlù'mo, hobuk neki pìre ba wùtì logopik en, aike ba arat elùgùn warogo wusigin o, ìlùk isike mene,” isukwama re, 62at ap Ala esewerek mene inoe kain a'nogo melagaikesik he,

“It ap yoma wene apik yogohìrì'lùgì yoma, hat en oko aike yogoisegein lek a? Oko yogoisamo re,” ìlùk yogosike meneat he, 63at Yesùt ane ìgì'lek kamo isikomo re, at ap kain Ala esewerek mene a'nogo nen he,

“Ala aput Karìsùt lakhei wesigin isukwa a'nogo, ebe hat halok he, yogonisanok ìlùk, at Ala eluk motok welagarek mene etage hopuk palogo yogohetì o,” ìlùk yogosikomo, 64#Dan.7:13 at Yesùt en he,

“Hat en egen atìat o. Mene, wene yì an nen hit obogat yogohisak. Hùlì yogotak en he, an abat ta'lasi wagagi a'nogo, at Ala omame apik yì mene tì mene hagasusak enak a'nogo neperak era'lu eki ebekwe kainat logopik he, hobuk pogot oba atoma nen ohena a'la pi waganem hineileken neogoin o, ìlùk yogohisìgì,” ìlùk yogosikomo, 65it ap Ala esewerek inoe kain a'nogo asu lìbìlogo laksìkì logolìk he, mel yogoisasike:

“Ala a'la meathìlìk etage weagathike atì hegep a? Apem nen at weak hagatenem ineileken haga mene wene sekek hogo uagaluk nahalok yerisek logogun. At en Ala a'la meathìlìk etage weagathike atì arat hinasuk holhep. 66Halok he, hit nìkì'nogo akìkì lagep,” ìlùk yogoisasikomo, it en he,

“Ebe motogat wasusak o,” ìlùk yogosukwa. 67Atì'nogo yogosukwasik he, wesi oba hìgìk, tùgì watìk, ineki ìkìlogo tung-tang hogo watìk, ìkì logolik he,

68“Karìsùt! Sa nen hoate nogo. Yogonisan ta,” ìlùk, yogotì lagaukwa.

Peterùt en, “Yesùt nokot,” ìlùk labelhike wene

(Mrk.14:66-72; Luk.22:56-62; Yoh.18:15-18,25-27)

69Atì'nogo yogoto kolek, at Peterùt a'nogo olilu o hokole'ma hùrek were'ma, helekerek inatitigeke mene aike oba wagaikesik he, mel yogosike:

“Hat hogo re, Yesùt Kalilea mene atì hinom negesep mene akìgì,” ìlùk yogosikomo, 70at Peterùt en apùnì apik ineilhanemat he, mel yogosike:

“Hat egen atì an nokot o,” ìlùk, 71kwe hùko ape pale'ma wùlùparek oba wùlìbi wesigìlùk ikenem he, at helekerek aike inatitigeke hùnogoat mene eileken lakhìlìk, apùnì apik amanogo mel yogoisasike:

“Ap yì Yesùt Nasaret mene a'nogo inom negarek meneat o,” ìlùk yogoisasikomo, 72at Peterùt en alep isike hagat hobuk Ala etage hopuk palhì logolìk he,

“Ap atì an nokot o,” ìlùk, yogoisasikesik, 73aremnogoat were'ma, it apùnì apik amanogo Peterùt oba wagaukwasik he, mel yogosukwa:

“Hat hebe eberogoat it meneat o. Hane enagat hùthìkì lago,” ìlùk yogosukwama, 74at Peterùt en he,

“Ap atì ebe an nokot o, nopase Ala oak! Napeliagat ìgì halok, at en noasuak o,” ìlùk, hopuk palho kolek aremnogoat sùe ayam ane arat isike. 75Sùe ayam ane arat isikomo, at Peterùt en he,

“Ì. Yesùt en an yogonetì logolìk,

Sùe ayam ane ìgì'lek werek kolek, hat en he,

Yesùt nokot o, ìlùk heki hinagan oba labeligin, ìlùk yogonete a'nogo ebe arat labelhì yì hìgì,” ìlùk, a'la ebethùlùk wùlìpikesik he, le motok apik etawi hit-hit le agaike.

Currently Selected:

MATÌÙT 26: LAIDNI

Highlight

Copy