MATÌÙT 14
14
Yohanet ima pelaginapì lagaike mene a'nogo ebe wasukwa wene
(Mrk.6:14-29; Luk.9:7-9)
1O atem higit he, at Herotet o Kalilea tokwe kain 14 etagepogot welagaike mene atì, Yesùt en hagatì lagaike mene abok holhikesik he, 2at agoromì mel yogoisasike:
“Yohanet ima pegalinapì lagaike mene ebe watìma wa'laga a'nogo hobuk eluk agasik atì nen he, hagasusak lek mene elalinat hagarìk niko atì,” ìlùk ebe Yesùt hagatì lagaike meneat isike atì. 3-5At Herotet en Yohanet hageat wasike atì re, wene yì'nogo. At kain Herotet en he, agot Pilipùt agwe Herotìa atì telogo wanhike atì nen, at Yohanet en he, Herotet mel yogosike:
“He Herotìa wanusak le'ma wanhen atì, waganek logousak mea o,” ìlùk yogosike atì nen he, Yohanet ebe eki hele warogo re, o eki hele warogo hisagarek oba kelakhesikesik wasigìlùk isike meneat he, it apùnì nen he,
“Yohanet atì Ala ane yogoisikerek mene,” ìlùk egaresi'mo re, wasu ayùk agaike.
6Meneat he, o at Herotet atì ebe ta'lagaike ha higit asi wagaikomo re, pesta hagatì logolìk, at he Herotìa eak salisik mene atì, apùnì apik inekele'ma nen etawì ouak sogop holok hogo lagagìk pìgìk watenem he, at kain Herotet atì a'la hai hakasike. 7A'la hai hakìlìk Ala etage hopuk palogo, helekerek a'nogo yogotì logolìk he,
“Hat en nena mene kìno yogoneten halok, wokhesiginat o. Halok he, aike kìno yogonom o,” ìlùk yogosike. 8Atì'nogo yogosikomo, helekerek atì agosa nen asuk arat wasikesi'mo nogo nen he, mel yogosike:
“Nopase, at Yohanet ima pelaginaperek mene a'nogo ùkùloak palogo re, sang oba earogo wo'ne'nok o,” ìlùk yogosike. 9Atì'nogo yogosikomo, at kain Herotet a'nogo a'la weak agaike meneat he,
“An nen Ala etage hopuk palogo abok yogotenem apùnì apik pesta isago nùogolùk atogosi wagaika mene yoma arat inasuk holhasi'mo,” ìlùk, agoromì nen helekerek a'nogo nen isike higit hogoat hagarogo wogosi loagalùk yogoisasike. 10Atì'nogo yogoisasikomo lagaukwasik he, Yohanet a'nogo apùnì ineki hele warogo hisagarek oba were'ma kìlìk he, alokop tek hogo wasukwa. 11Alokop tek hogo warogo, ùkùloak palek sang oba earogo hele salisik a'nogo wogosi wagaukwama re, at en he, agosa wogosi lagaike. 12Atì'nogo hagasukwama re, at Yohanet agoromì wagaukwasik he, ebe warek a'nogo kweangma salhùlùk he, abok Yesùt yogosi lagaukwa.
Atì'nogo hagasukwasik logolìk, at Herotet en Yesùt abok holhikesik,
“Yohanet eluk agasik niko hìgì,” ìlùk isike atì.
Yesùt en apùnì inebe 5.000 mene sùpùrùk seik-peik hogo wogisasike wene
(Mrk.6:30-44; Luk.9:10-17; Yoh.6:1-14)
13Apùnì aike nen he,
“Herotet en Yohanet wate,” ìlùk isukwama Yesùt asuk holhikesik, o atoma hebùlùk he, i so warogo aligat kek hago o apùnì inareng le'ma atoma lagaikomo, apùnì inebe motok apik inasuk holìlùk he, inawì sili lopok en i aik obakwe nen opolik lagaukwa. 14It alebagìk lagaukwasik were'ma, at Yesùt i so warogo laga lagaikesik, so a'la nen inoba wùlìpikesik, eileken lagisìlìk etawìrinabìk he, it aike ou weak mene hùgì hagarinapike. 15Atì'nogo hagarinapo kolek, o arat hi isikomo re, at ane wanhì lagaukwa mene amanogo Yesùt oba wagaukwasik he, mel yogosukwa:
“Nit o yoma apùnì inareng le'ma were'ma, o arat lìok ike yoma re, apùnì apik yoma inapùrùk oko paloak en he, o yoma esakokwe o sili hamùlùkkwe laksan o,” ìlùk yogosukwama, 16at Yesùt en he,
“It atì lasak lek o. Hit enat melagisani o,” ìlùk yogoisasike. 17Atì'nogo yogoisasikomo, it en he,
“Nit he, sùpùrùk horoti mene 5 nen. Nen, ikan he, pìre. We, atem enek hesogo welago o,” ìlùk yogosukwa. 18Atì'nogo yogosukwama, at Yesùt en he,
“Atemat wo'nesi we'ni o,” ìlùk yogoisasike. 19Yogoisasikomo re, wogosi wagaukwama, at Yesùt en apùnì apik amanogo mel yogoisasike:
“Pipuk obakwe aroma hù'larìk lani o,” ìlùk yogoisasikomo hù'larìk lagaukwama re, sùpùrùk horoti mene 5 nen aremnogo mel, ikan pìre aremnogo mel, ekim wanhikesik he, eileken pogot oba lìakhìlìk, Ala hai warogo kùrogo re, agoromì ane wanhì lagaukwa mene amanogo nen sùpùrisoagalùk he, wogisasikomo sùpùrisasukwa. 20Sùpùrisasukwama, it inebe obogat inalabut ning hogoat nasukwasik titelogo re, mùl ugu 12 nen apem hesogothìgìk kalogo hesukwa. 21Apùnì inebe obogat nasukwa mene atì, yekerùgì mel, hìmì mel, ineki wenaginapì'lek. We, ap inalùgetek enek he, inebe 5.000 nen wenaginapukwa,
Yesùt esok i agùm obakwe hìlìk wagaike wene
(Mrk.6:45-52; Yoh.6:16-21)
22Atì'nogo arat nasukwama nen he, at Yesùt en at agoromì ane wanhì lagaukwa mene amanogo mel yogoisasike:
“An apùnì logolegat yoma laksak en he, hit tak i so a'la kìlìk he, i aik ìlì bakwe wùlìpi logoni o,” ìlùk ane keirogo yogoisasike. 23Atì'nogo yogoisasikomo, wùlìbi waga kolek, at Yesùt en apùnì logolek amanogo arat laksalùk he, at aligat enek punu ba sapan igìlùk lagalìk iko were'ma o hi isikomo re, aligat atoma welagaike. 24Werek kolek, agoromì amanogo i so warogo walegat i eken tùlem asi wagaukwasi'mo nen, sogoi aninirogo inelokokwe nen hunha wagaikomo, i ha'labu hunalogo apik lagakì logolìk, i so a'nogo abel eten-haten hogo hagatì lagaike. 25Atì'nogo hagato kolek, o we igìlùk etawì wekelho kolek, at Yesùt esok i agùm obakwe hìlìk inoba wagaike. 26Atì'nogo esok i agùm obakwe hìlìk waganem, it agoromì ane wanhì lagaukwa mene amanogo ineileken lakhìlìk he, ina'maken apik lagaikesik, inayùk en he,
“Eige! Mokat waga arì,” ìlùk, inane ngai-wai isukwa.
27Atì'nogo ikenem aremnogoat at Yesùt en he,
“Nagoromì, hinagùt a'ma. An nebeat waga lagì. Halok, hinayùk agùp o,” ìlùk yogoisasikomo re, 28at Peterùt en he,
“Noe. Hat hebeat halok he, an hoba i agùm obakwe wesik en he,
Eme o, ìlùk yogonom,” ìlùk yogosikomo re, 29at Yesùt en he,
“Eme o,” ìlùk yogosikomo, at Peterùt a'nogo so a'la nen wùlìpikesik he, i agùm obakwe Yesùt oba lagaike.
30Laganem he, sogoi hunha wagaikomo, eileken hìlìk ayùk agaikesik, i a'la nalemùk hogo pigin nen he, ane ngai ìkì logolìk,
“Eige! Noe! Telnabi me o,” ikenem aremnogoat he,
31Yesùt en eki hagasogo menhìkì logolìk he,
“Hat hetaùken noba hìpìrìk logohùk yì rì! Hetaùken pìre welagen atì nahalok,” ìlùk yogosikesik he, 32it eperak so a'la kisukwama re, sogoi a'nogo palagaike. 33Palagaikomo re, it so a'la welagaukwa mene amanogo nen Yesùt hogoratì logolìk he,
“Hat eberogoat Ala aput heogo o,” ìlùk yogosukwa.
Yesùt en apùnì o Kenesaret mene ou hagarinapike wene
(Mrk.6:53-56)
34Atì'nogo haga'lùk, so warogo wùlìbi waga lagaukwasik he, o Kenesaret atem higit asi wagaukwa. 35Waganem he, it apùnì atoma mene nen Yesùt ebe arat hùthasukwasik he, at abok o sili lopok yogoisìlìk lagaukwa. Yogoisìlìk lagaukwama re, apùnì ou warek mene obogat wogisek Yesùt oba wagaukwama re, 36it en he,
“Yesùt, hasu we elùgùn enek nineki hakù a?” ìlùk inane inelageik ane yogosukwasik, it at asu ineki hakasukwa mene hùgì inoba hano agaukwa.
Currently Selected:
MATÌÙT 14: LAIDNI
Highlight
Share
Copy
Want to have your highlights saved across all your devices? Sign up or sign in
