MATÌÙT 13

“Ap aike awì heik lakhìlìk lagaike,” ìlùk oba lìrogo yogoisasike wene

(Mrk.4:1-9; Luk.8:4-8)

1O atì sat he, at Yesùt ouma nen wùlìbi wagaikesik he, i Kalilea yekelek a'nogo esakoma hùrek were'ma, 2apùnì apik esa logolegat Yesùt oba wagaukwama re, it inebe i esakoma metek werek kolek hisalùk he, at ebe i so ba hù'lasi kisike. 3Hù'lasi kisikesik, yì mene tì mene ba lìthìgìk wene apik yogoisìkì lagaike. Aike mel yogoisasike:

“Ap aike yabu waganogo awì yaterek mene awì heik lakheigìlùk wùlìpike. 4Wùlìpikesik, heik lakhìlìk laganem he, eken aike kwe ebekalem pìlìk lagaike. Pikenem he, sùe wìrìk heleleng hogo motok nasike. 5Nen, eken aike re, helep oba kweang hamùlùgatma pìlìk lagaike mene, kweang hamùlùgatma nogo nen he, hageat hulelhike. 6Meneat he, o mo lakhei wagaikomo, omaken yasu lek en, sawet arìk pùk agaike. 7Nen, eken aike re, pakì were'ma pìlìk lagaike mene re, pakì atì mene hùko aga logolìk he, awì hano mene yago a'nogo palogo pelapikomo kakil agaike. 8Nen, eken aike re, kweang hanoma pìlìk lagaike mene re, hulelhikesik ebe hùko agaikesik eken apik isike. Ero aike eken 100 nen isike. Ero aike eken 60 nen isike. Nen, ero aike eken 30 nen isike. 9Hit hinasuk holusak halok he, hanorogo holini o,” ìlùk yogoisasike.

Yesùt en he, “Wene oba lìthìgìk yogohisìgìrek atì, ebe tì hesik,” ìlùk yogoisasike wene

(Mrk.4:10-12; Luk.8:9-10)

10At Yesùt en atì'nogo yogoisasikomo re, at agoromì ane wanhì lagaukwa mene amanogo oba wagaukwasik he, mel yogosukwa:

“Hat en apùnì yoma wene yì mene tì mene ba lìthìgìk yogoisegen a'nogo nenahalok,” ìlùk yogosukwama re, 11at Yesùt en he,

“Ala nen awe a'ma hisikerek wene atì, at a'la hinago welagaike mene, hit enek he, hinelu asuageip ìlùk, pak hogo yogohisasak akasike meneat he, it apùnì aike atì nek he, pak hogo yogoisasak lek akasike. 12Sa nen agarok werek mene atì, Ala nen hobuk oba louk hogo wogosumo re, at ekimo apik asigin o. Nen, sa nen agarok lek halok he, hamùlùgat enek logogin mene atì, Ala nen apotkwe telogo helamo re, elageik asigin o. 13Atì'nogo hagasigin atì nen he, an wene oba lìrogo it atì yogoisìgì o. It apùnì atì re, ineileken hìlì'lùgì meneat he, tùkùm hogo hìgì'lek. Nen, inasuk holì'lùgì meneat he, tùkùm hogo hùthìlì'lùgì legat. 14#Yes.6:9-10 It apùnì inoabùt atìgìnìk mene atì hesik he, at Yesaya nen mel isike:

Hinasuk holek logogun meneat he, tùkùm hogo hùthìkì logogun lek o. Nen, hineileken hirogo logogun meneat he, tùkùm hogo hìkì logogun legat o.

15It apùnì yì ineileken hìgìk, inasuk holhìk, ina'la ebetìk, ìlìk en, inepe hebelumo hobuk an nen hanorìnabinogo ìlùk he, it en ina'la pùk agìk, inasuk togùm-togùm hagatìk, ineileken pùk uagalùk, ineram enat pùk-pùk hagatìk, hagasukwa o,

ìlùk Ala nen isikomo Yesaya nen helal waganogo hesike atì higit asuagalùk yogoisìkì lagi o. 16Meneat he, hit enek he, hineileken hìgìk, hinasuk holhìk, egesep atì nen he, hina'la hai hakìkì logoni o. 17Hit hineileken hìkì lagep mene atì re, it ap Ala ane yogoisìkì lagaukwa mene mel, inoabùt higit mene mel, inebe logolegat en he,

Eigo! Nineileken helo e, ìkì lagaukwa meneat he, ineileken hìgì'legat welagaukwa. Nen, hinasuk holhì lagep mene atì, it atì nen,

Ninasuk holilo e, ìkì lngnukwa meneat he, inasuk holhì'logat welagaukwa, ìlùk eberogoat yogohisìgì o,” ìlùk yogoisasike.

At Yesùt en, “Ap aike eken heik lakhìlìk lagaike, ìlùk yogohisìgì a'nogo re, ebe yì'nogo,” ìlùk yogoisasike wene

(Mrk.4:13-20; Luk.8:11-15)

18Atì'nogo yogoisasikesik, aike mel yogoisasike:

“Wene ap aike heik lakhìlìk lagaike, ìlùk oba lìrogo yogohisìgì a'nogo, ebe yogohisegein yì hùtheni o. 19Awì heik aike ebekalem lakhesike atì ebe re, it apùnì aike Ala awe a'ma hisikerek wene atì inasuk holharesigat he, ebe tùkùm hogo hùthìgì'lek halok, at oabùt weak mene a'nogo wagaresik he, wene inetaùkenma awì yago mene atì henogo helalùk lagarek atìat o. 20Nen, awì heik aike helep oba lakhesike atì ebe re, it apùnì aike Ala ane atì inasuk holharesik he, ina'la hai hakìkì logolìk hepogat wanharesik enat he, 21wene atì inetaùkenma omaken yatì'lek en he, hamùlùgat were'ma nen, apùnì aike nen Ala ane atì hesik yì aik tì aik inoba hìgìk, weagarìnapik, ikenem he, ina'la hageat pak agaresik, wene atì heraksalùk wùlùparek atìat o. 22Nen, awì heik aike pakì api'mo lakhesike atì ebe re, it apùnì aike Ala ane atì inasuk holharesik enat he, ina'la nen,

Yogotak ya hesik nìkì'nogo hagasigin he, ìlùk, wenesùgì ebetìk,

Nagarok apik logoilep e, ìlùk ina'la eberìk inokawerek en lalìgìk, egarek atì nen he, wene atì ero kakil arìk he, eken ìterek lek atìat o. 23Nen, awì heik aike kweang hanoma heik lakhesike atì ebe re, it apùnì aike Ala ane atì inasuk holharesik he, ebe tùkùm hogo hùthikenem, wene atì eken ìterek o. Ero aike nen eken 100 ìtìk, ero aike nen eken 60 ìtìk, ero aike nen eken 30 ìtìk, ìterek atìat o,” ìlùk yogoisasike.

“Awì weak mene mel, hano mene mel, omakìkwe hulelhike,” ìlùk oba lìrogo yogoisasike wene

24At Yesùt en wene atì'nogo yogoisasikesik he, wene aike oba lìrogo mel yogoisasike:

“Ala nen awe a'ma hisikere'ma atì ebe re, ap aike awì hano mene yasike atì hakeat o. 25Atì'nogo yasike meneat he, it apùnì nogo iko kolek he, ap aike ap awì yasike mene atì eperak weak mene wagaikesik he, gandum awì hano mene yasike a'nogo ekele'ma awì weak mene yakhùlùk lagaike. 26Atì'nogo yakhùlùk lagaikomo, gandum awì a'nogo hulelhikesik he, eken ìto kolek, weak mene awì a'nogo hulelogo eka weinamat agaike. 27Weinam agaikomo re, at ap eyabuwerek a'nogo atitigeke amanogo oba wagaukwasik he, mel yogosukwa:

Noe. Hat heyabumo amanogo awì hano mene yaten akìgì. Ì nogo a? Eka weak mene atoma ka nen wagasik hulelhe, ìlùk yogosukwama re, 28at en he,

Lek o. Atì, at ap neperak weak mene a'nogo nen yatomo hìgì o, ìlùk yogoisasikomo re, it atitigeke mene amanogo nen he,

Halok he, henogo omakìma hìlìk wulaksa lasak akegen a? ìlùk yogosukwama re, 29at en he,

Lek o. Eka weak mene atì henetenem he, gandum hano mene atì inomat hene'lasi nogo nen he, henesi lagùp o.

30 Gandum eken oan palhì'le'ma re, inom atì'nogo sabarogo lagakì logouak o. Nen, eken palusak higit aga halok he, an nen it ap eken palharek mene yogoisìkì logolìk he,

Eka weak mene atì etu lolisùok en he, atì tak henogo hele homagasogo hìlìk en, hano mene atì atogorogo hìgìrek oba atoma heni o, ìlùk yogoisegein, ìlùk atitigeke mene amanogo yogoisasike,” ìlùk Yesùt en yogoisasike.

Kìbì-kìbì eken oba lìrogo yogoisasike wene

(Mrk.4:30-32; Luk.13:18-19)

31-32At Yesùt en atì'nogo yogoisasikesik he, hobuk wene aike oba lìrogo mel yogoisasike:

“At Ala nen awe a'ma hisikerek atì ebe re, kìbì-kìbì eken hake o. Ap aike nen kìbì-kìbì eyabumo heik lakhesike. Yì mene tì mene awì atì hamùlùtegat meneat he, kìbì-kìbì awì atì nek motok hamùlùtegat o. Mene re, kìbì, wùtat mel, aike mene mel, hulelheresik he, oake hamùlùgat negen lagaikerek. Meneat he, kìbì-kìbì awì atì nek he, motok hùkoat lagaikeresik, e hake haga'laganem he, sùe purogo nikerek mene wìrìk he, kìbì-kìbì atì eki bakwe awì wusi wagarek atì hùkeat o,” ìlùk yogoisasike.

Eken horotì hìtùkwe mene oba lìrogo yogoisasike wene

(Luk.13:20-21)

33Atì'nogo yogoisasikesik he, wene aike oba lìrogo mel yogoisasike:

“Ala nen awe a'ma hisikerek atì ebe re, eken sùpùrùk horotì mene a'la hikenem hìterek atì hakeat o. He aike nen gandum sagalek tepung wul hake mene 40 liter yalelogo wìlìk, eken horotì hisuagalùk a'la pelakhìlìk ìpìkwe-apìkwe hagasikomo re, ebe obogat motok hisike atì hakeat o,” ìlùk yogoisasike.

“Yesùt en nahalok wene oba lìthìgìk yogoisìkì lagaike,” ìlùk yogoisasike wene

(Mrk.4:33-34)

34Apùnì apik amanogo yogoisìkì logolìk he, wene aike Pak hogo yogoisìkì lagaike lek. We, oba lìthìgìk enek yogoisìkì lagaike. 35#Mzm.78:2 Atì'nogo hagatì lagaike atì re, ap aike Ala ane yogoisìkì lagaike mene nen ìkì logolìk he:

“An wene yogoisìkì logolìk he, oba lìrogo nek yogoisìkì logogin o. Ala nen kweang yì elalhike hùlì nen wene hinago motok welagaike mene pak hogo yogoisegein o,”

ìlùk isike atì higit hogoat, Yesùt en atì'nogo yogoisìkì lagaike atì.

Awì weak mene oba lìrogo yogoisasike a'nogo, ebe pìlìngìrogo yogoisasike wene

36Atì'nogo yogoisalùk he, apùnì apik amanogo atoma werek kolek, at Yesùt ebe ouma kisikomo re, at agoromì ane wanhì lagaukwa mene amanogo oba kisukwasik he, mel yogosukwa:

“Awì weak mene yabumo hulelhike ìlùk oba lìrogo yogonisegen a'nogo ebe pìlìngìrogo yogonisan o,” ìlùk yogosukwa. 37Atì'nogo yogosukwama, at Yesùt en he:

“Ap aike nen awì hano mene yasike ìgì a'nogo ebe re, an abat ta'lasi wagagi a'nogo nebe yìat o. 38Nen, yabu atì ebe re, o kweangma yì awì tì awi obogat atìat o. Nen, awì hano mene atì ebe re, apùnì Ala awe a'ma welagaikarek mene inebe atìat o. Nen, awì weak mene atì ebe re, at ap oabùt motok weak mene againapùrì atìat o. 39At ap yabu esewerek eperak weak logolìk, awì weak mene yasike atì ebe re, at Ibilit atìat o. Eken palusak higit atì ebe re, o wùrep oba hesigat o. Nen, it ap eken palharek mene atì ebe re, it malaikat Ala nen pogot oba nen yoko pelaksa wagarek mene atìat o. 40Nen, it apùnì nen eka weak mene atogorogo hìlìk etu lolharek atì hak, o wùrep oba atì'nogoat hagasigin o. 41An abat ta'lasi wagagi a'nogo nen nagoromì malaikat yoko laksa waganem, it en he, Ala awe a'ma hisikere'ma atoma nen, yì mene tì mene apùnì nen weak hagasuagalùk hagarìnaparek mene mel, yì apùnì tì apùnì weak hagatarek mene mel, atogorogo hisìlìk, 42obogat etumo laksamo logolìk, inaik hunogo lì ago le ago motok logogun o. 43Nen, it Ala a'la akikerek mene higit hogo hagatarek mene atì nek he, inebe o mo lìarogo yaterek hak, inopase Ala awe a'ma logogun o, ìlùk hinasuk holusak halok, hanorogo holini o,” ìlùk yogoisasike.

“Ap aike nen oko apik mene hinago were'ma herasike,” ìlùk oba lìrogo yogoisasike wene

44Atì'nogo yogoisasikesik he, aike mel yogoisasike:

“At Ala nen awe a'ma hisikerek atì ebe re, mel hake. Hano mene oko apik mene yabumo kweangma salek hinago were'ma re, ap aike nen herakìlìk he, a'la hai hakìlìk apotkwe kweang salogo hinakhùlùk aua lìlìk, agarok yì mene tì mene it aike inoba oko abarogo wolok, hano mene atì helagalùk apotkwe wagaikesik yabu atì oko hesike atì hakeat o,” ìlùk yogoisasike.

“Ap aike nen saleken hake hano mene herasike,” ìlùk oba lìrogo yogoisasike wene

45Atì'nogo yogoisasikesik, aike mel yogoisasike:

“At Ala nen awe a'ma hisikerek atì ebe re, mel hake. Ap aike yì mene tì mene oko palherek mene nen mutiara saleken hake hano mene herarìk nìkì logolìk he, 46ebe oko hùko mene aike hera'lùk en, aua lìlìk agarok yì mene tì mene it aike inoba oko abarogo wolok he, hobuk mutiara saleken hake hano mene atì wanhìke atì hakeat o,” ìlùk yogoisasike.

Su yoge su ikan wanharek mene oba lìrogo yogoisasike wene

47Atì'nogo yogoisasikesik he, aike mel yogoisasike:

“At Ala nen awe a'ma hisikerek atì ebe re, mel hake. Ikan wanuogolùk su yoge su i laut hùko atì yekele'ma a'la pelapenem yì ikan tì ikan ùkùl etage lopok motok a'la kalaga halok, 48su yoge su atì a'la peserogo apem hesok ikenem, i aik oba wùlìbi wìrìk hùrek logolìk he, ikan hano mene halok tegelogo sogoloak a'la kalìkì logolìk he, weak mene halok po laksagarek atì hak, 49o wùrep oba atì'nogo haga'lasigin o. It malaikat Ala nen pogot oba nen yoko pelaksa wagarek mene amanogo wìrìk he, apùnì inoabùt weak mene amanogo it apùnì Ala a'la akikerek mene higit hogo nek hagatarek mene inom omakìkwe were'ma inekele'ma nen kìgìlogo wulaksìlìk, 50etu ai'mo laksamo inaik hùnogo lì ago le ago motok logogun o,” ìlùk yogoisasike.

“Ap kain mene agarok ket mene, alep mene, wulabi wagarek,” ìlùk yogoisasike wene

51Atì'nogo yogoisasikesik he, aike mel yogoisasike:

“Wene atì arat hùthegep a? Lek a,” ìlùk yogoisasikomo re, it en he,

“Ì o. Hùthogoat o,” ìlùk yogosukwa. 52Atì'nogo yogosukwama, at Yesùt en he,

“Halok he, it ap Ala ane helal waganek esewerek mene amanogo nen, Ala nen awe a'ma hisikerek a'nogo wene yakùlho halok he, atì mel hake usak. Ap kain mene agarok etaùken hutìk mene hakikerek oba nen, ket mene wulabi wagìk, hageat mene wulabi wagìk, hobugalep wulabi wagarek hagat o,” ìlùk yogoisasike.

Apùnì o Nasaret mene nen, Yesùt ina'la meathesukwa wene

(Mrk.6:1-6; Luk.4:16-30)

53At Yesùt en wene oba lìrogo arat yogoisasikesik he, o atoma hebùlùk he, 54at okawerek aua ero ba lagaikesik, o apùnì Yahurì mene sapan egarek oba kìlìk wene yakùlisikenem, it apùnì inasuk holhukwa mene nen he, mel isukwa:

“Egi! Nayùk e. Ap yì a'la motok kagalek atì, wene ka nen yakùlìlùk waga. Nen, yì mene tì mene elalinat hagarìk niko atì, koma nen yakùlhesik hagarìk niko. 55Ap yì re, ap o wùterek mene a'nogo aput lek? Nen, agosa etage Marìa a'nogo lek? Nen, agoromì opolik mene re, Yakobùt mel, Yùsùp mel, Simon mel, Yùrat mel, amanogo lek? 56Nen, at erùgì re, nit ninom obogat welago yoma lek? Wene atì ka nen wolok wagasik ìlì'logo,” ìlùk ina'la meathesukwa. 57Meathesukwama re, at Yesùt en he, mel yogoisasike:

“It ap Ala ane yogoisagarek mene atì re, o yì awì tì awì laganem, apùnì aike nen motok agauk hogo hogorinaparek meneat he, inokawerek inaua eroma laganem inogogi inagoromì inom omakìma welagaikarek mene nen enek he, agauk hogo yogoisagarek lek o,” ìlùk yogoisasike. 58Atì'nogo yogoisasike atì, it apùnì o Nasaret mene atoma nen, inetaùken Yesùt oba hìpìrethìgì'lek, ina'la meathìlìk welagaukwa atì nen he, at o atoma logolìk hagasusak lek mene elalinat hùkorogo hagatì'lek, we, hamùlùgat enek hagasike atì.

Currently Selected:

MATÌÙT 13: LAIDNI

Highlight

Copy