LUKAT 17
17
Inasuk wasike wene
(Mat.18:6-7,21-22; Mrk.9:42)
1At Yesùt en atì'nogo yogoisasikesik he, at agoromì ane wanhì lagaukwa mene amanogo wene aike mel yogoisasike:
“Apùnì nen an kopologo herakhanuagalùk it aike nen ina'la kagalugun mene weregat o. Meneat he, at sa nen ina'la kagalhe werek atì Ala nen ebe weagathegein o. 2At atì nen it apùnì maben mene yì omakeat aike an kopologo herakhanuagalùk a'la kagalumo, an kopologo herakhanhe halok, at a'la kagalhe werek atì helep hùko mene alokopma hele kelogo re, i laut yekele'ma po pelakselepma hano o. 3Halok he, hinebe elelerogo re, hinepe hebelogo logoino o. Hit hinerùgì hinagaiya'lak aike weak hagato halok he, asuk wa'no o. Asuk watì logoumo, oabùt hebelhe halok he, weak hagate mene atì sagalogo legetsano. 4Ap atì nen ineki omake sat he, eki 7 nen hobugalep weak hagathabìk he, ninhùp-nanhùp eki 7 nenat hoba wìrìk,
Weagathapì mene atì noabùt hebelaga o, ìlùk yogohesi waga halok he, sagalogo legetsìkì logoino,” ìlùk yogoisasike.
“Inetaùken Ala ba hìpìrethìlìk hagatì logousak,” ìlùk, yogoisasike wene
5Atì'nogo isikomo, it agoromì laksasike mene amanogo nen he,
“Noe e! Ninetaùken Ala oba hipìrethogo mene a'nogo wurik asuagalùk aike inom ninomame'ninabin,” ìlùk yogosukwama, 6at ninoe Etagepogot en he:
“Kibi-kìbì magakelak mene heik lakhagarek atì hak, hinetaùken an noba hamùlùgat enek hìpìrethìlìk he, hit en,
E yì yoma nen he'nok hogo re, i laut hùko yekele'ma a'loma ya'lasi lan o, ìlùk yogosugun halok he, hinane asuk holiginat o,” ìlùk yogoisasike.
Oe nen atitigeke mene yogoterek wene
7Atì'nogo yogoisìlìk he, hobuk wene aike inom mel yogoisasike:
“Hit aike hinatitigeke mene hineyabu wanhì logopik a? Hinako konhì logopik a, oan ki waga kolegat he,
Hapùrùk hepok name o, ìlùk yogosusak akegep? Lek o. 8We, yì'nogo egesep akìgì:
An napùrùk tak isagasogo hìlìk, sùpùrùk sùpùrisìkì logolìk su labetarek mene a'nogo laberogo re, an tak noagalùk wo'netenem en, an arat nìkì halok he, hat nasak o, ìlùk egesep a'nogo lek? 9Oe a'nogo nen atitigeke mene a'nogo,
Yì'nogo haga'no, tì'nogo haga'no, ìlùk yogosigin mene a'nogo nek hagate halok he, oe nen hai wasigin nogo? Lek o. 10Hit atì hakeat o.
Yì'nogo haga'no, tì'nogo haga'no, ìlùk yogohisamo atì arat hagathìlìk he, mel ìkì logoino:
Lek o. Nit oba louk hogo hagasumo hai wa'ninabusak mene hagatì'lek. We, hatitigeke mene logolìk hagasusak mene nek hagato, ìlùk ìkì logoino,” ìlùk yogoisasike.
Ap inebe 10 nen inoumo henako hake mene hagarinapike wene
11Hobuk ineki aike sapùl he, at Yesùt o Yerusalem pìkì logolìk, o Samaria pelakhìgìk, o Kalilea lìakhìgìk, tùlemkwe pisike. 12Pìkì logolìk he, o sili aike ki laganem he, ap inebe 10 nen inoumo henako hake inebenakwe welagaike mene nen ineileken Yesùt lakhasukwasik he, inebe walegat atem melasi wagaukwasik logolìk he, mel yogosukwa,
13“Yesùt noe e! Hetawì nisan o,” ìlùk inane hùkorogo isukwa. 14Atì'nogo isukwama, at Yesùt en eileken lagisìlìk he, mel yogoisasike:
“Hit he, ap Ala esewerek mene amanogo nen hinebenakwe ineileken hisoak en he, ìnùgisa lani o,” ìlùk yogoisasike. Atì'nogo yogoisasikomo, it amanogo ebekwe laga kolegat, inoumo henako hake amanogo lek agaike. 15Atì'nogo lek agaikomo re, ap amanogo mene aike omakeat enek eileken ogat oba pelakhasike hak he, oumo amanogo arat lek agaikomo nen he, apotkwe sùgùlogo waga logolìk, ane hùkorogoat, Ala hogorarìk wagaike. 16Wagaikesik, Yesùt awe a'ma eitep awì yagasogo ot lupuk hai wasike. Ap atì awì o Samaria mene. 17Atì'nogo hai wasikomo, at Yesùt en he, mel yogosike:
“Ap inebe 10 nen amanogo inoba hano agaika meneat he, inebe 9 nen koma lagaikama. 18It ap inebe Yahuri mene inapotkwe wagì'lek kamo iko kolegat he, ap inapik mene yì nek he, Ala hogorasigìlùk apotkwe sùgùlogo waga yì,” ìlùk yogoisìlìk he, 19at ap wagaike a'nogo mel yogosike,
“Eberogoat haga'nabigin, ìlùk hetaùken noba hipìrethegen atì ba arat hano hagathapì o. Halok, hebe mela'lùlk haua lan o,” ìlùk lakhesike.
Ala awe a'ma hisikerek wene
(Mat.24:23-28,37-41)
20Atì'nogo lakhesikomo hobuk he, it ap Parisi mene nen, mel isukwa:
“At Ala nen o mera nen awe a'ma hina wesigin,” ìlùk hinok wanhukwama, at Yesùt an he, mel yogoisasike:
“At Ala awe a'ma hikagalùk wesigin atì re, apùnì nen aike hùthoagalùk elalin mene aike ineil oba hagatì'lek werek kolegat wesigin o. 21At Ala nen awe a'ma hikegein atì, arat hinekele'ma asi waga atì nen he, it apùnì nen,
At ebe eberogoat yoma werek yì ha we'ni! ìgìk,
Atoma werek a'lì ha lani! ìgìk, oan ìgì'lek werek kolegat wesigin o,” ìlùk yogoisasike. 22Atì'nogo yogoisìlìk, at agoromì ane wanhì lagaukwa mene amanogo mel yogoisasike:
“An abat ta'lasi wagagi a'nogo ninhùp-nanhùp hobuk ninom motok logogun mene re, oan werek kolek, hit hina'la nen he,
Nineki omake hesik nineileken helo e, ìlùk atì'nogo akogoin meneat he, hineileken nììgì'lek logogun oba weregat o. 23It apùnì nen he,
At a'nogo ebe yoma werek. Hìtha we'ni, ìgìk,
Atoma werek a'naga hìtha lani, ìgìk, iko halok he, hina'la nen he,
Eberogoat, akalùk hineileken hìtha lagìk, inopolik lagìk, ùgùp o. 24An abat ta'lasi wagagi a'nogo wesigin he, o eilabùt yegelhìkì logolìk pogot erokwe-erokwe a'loma motok lìa arìk lagarek atì hak, wesigin o. 25Nen, atì'nogo hagasigin meneat he, atì oan haga'lagì'lek werek kolek he, apùnì yogotak werek mene yoma nen wo'napì'lek herakhanìlìk he, yì aik tì aik haga'nabugun o. 26It apùnì ap Nu werek oba atem hagatì lagaukwa higirat he, an abat ta'lasi wagagi a'nogo hobuk atì'nogoat hagatenem wesigin o. 27Nu werek kolek, it apùnì atoma inapùrùk nìkìk, eken amusu nìkìk, ap en hìmì ìkìgik, it aike ìgisìgìk, iko kolek, ap Nu a'nogo so a'la kisikomo, i nap-hap ìkì logolìk, it apùnì amanogo heleleng hogo inoasike. 28Atì hak he, ap Lot werek kolek hagatì lagaukwa atì hak hagasugun o. Atem higit he, it apùnì atoma inapùrùk nìkìk, eken amusu nìkìk, yì mene tì mene oko palhìk, wanhìk, ineyabu helìgìk, inawì wùrìgìk, iko kolek, 29ap Lot a'nogo o Sorom heraksalùk wùlìbi lagaikomo re, Ala pogot oba nen moso etu mene mel, belerang obasi weak mene mel, pelakhei wagaikomo re, it apùnì amanogo inebe heleleng hogo inoasike. 30Atì hak he, an abat ta'lasi wagagi a'nogo hobuk weinam hogo wesigin atì sat he, atì'nogoat haga'lasigin o. 31Atem higit he, an waganem, sa nen agarok ouma hùlùk he, ebe o tùm oba lagalìk were'ma, ebe pi wìrìk agarok ouma werek mene atì wani kusak mea o. Pìkìrat loak. Nen, sa nen ebe yabumo were'ma an waganem hobuk apotkwe ouma wesusak meaat o. Pìkìrat loak. 32Ap Lot agwe haga'lagaike atì hina'la ebe'ni! 33Sa nen okawerek ebe elele helegein halok, hobuk ebe nong asigin o. Meneat he, sa nen ebe elele helìgì'lek nong asigin halok he, ebe telegein o. 34Atì sat he, ap inebe pìre hùako hùlùpo nogo apìma ikenem he, aike wanhìk, aike heraksìgìk, ìgìn o. 35Nen, hìmì inebe pìre sùpùrùk werasuogolùk gandum eken sagalhenem aike wanhìk, aike heraksìgìk, iginat o. 36[Nen, ap inebe pìre yabumo were'ma, aike wanhìk, aike heraksìgìk, iginat o, ìlùk yogohisìgì,]” ìlùk ìkì lagaikomo, 37at agoromì ane wanhì lagaukwa mene amanogo nen he, mel yogosukwa:
“Noe! Hat egen atì o koma hagasugun mene egen,” ìlùk yogosukwama, at Yesùt en he, mel yogoisasike:
“Warek werek halok he, sùe warek nikerek mene atì atoma atogosi lagarek o,” ìlùk yogoisasike.
Currently Selected:
LUKAT 17: LAIDNI
Highlight
Share
Copy
Want to have your highlights saved across all your devices? Sign up or sign in
