LUKAT 16

Ap aike atitigeke mene nen eilmasirogo hagatì lagaike wene

1Atì'nogo yogoisasikesik he, hobuk, at Yesùt agoromì ane wanhì lagaukwa mene amanogo mel yogoisasike:

“Ap kain aike atitigeke mene nen oe agarok yì mene tì mene hesogo were'ma re, it apùnì aike nen he, at oe a'nogo yogotì logolìk,

Hat hatitigeko mene atì nen he, hagarok amanogo motok yùgùnat sùpùrìk-saparìk hagarì'logo, ìlùk yogosukwa. 2Atì'nogo yogosukwama, at kain a'nogo nen atitigeke mene a'nogo waesikomo wagaikomo re, mel yogosike:

Hat hagatì lagen mene nasuk holhì atì re, nìkì'nogo hagatì lagen. Yogotak hat an naua yoma logolìk an nagarok heeogo logogin legat ma re, hesogo logolìk hagatì lagen mene helal waganek mene atì pìlìngìrogo yogonerìk he, wo'nom o, ìlùk yogosike. 3Atì'nogo yogosikomo, at atitigeke a'nogo a'la nen he,

Noe nen,

An naua logolìk nagarok hesogo logogin lek. Wulakhagagin, ike atì, an kì'nogo hagasigin. Wulakhanhe halok, an yabu helìkì logousak he, neki maben. Nen, nape kìno weak yogoisìlìk nìkì logousak he, nekalì. 4Atì'nogo eta'ma wulakhanhe halok he, apùnì nen an it inaua atoma wo'nabuagalùk, an hagasusak na'la ebetì o, ìlùk a'la akìlìk, 5it apùnì, at oe a'nogo agarok nomat inoba palek welagaike mene amanogo inebe lopok waisasikomo aike emakumagìk wagaike mene yogotì logolìk he,

An noe agarok mìren nomat hat hoba palek werek nogo, ìlùk isikomo, 6at ap a'nogo nen he,

Minyak goreng sogoloak hùkotek mene ebe 100 nen hinago nomat noba werek o, ìlùk yogosikomo, at en he, mel yogosike:

Nomat hoba atì hesik, helal waganek yì wìlìk he, hobuk helal ket mene aike wanhì logolìk he, 50 nen hinago mene nomat noba werek, ìlùk helal hepok wanin o, ìlùk atì'nogo yogorìk he, 7opolik ap aike yogotì logolìk,

Hat he, nomat mìren hoba werek, ìlùk yogosikomo, at ap a'nogo nen he, mel yogosike:

Gandum eken palek su hùkotek mene ebe 1.000 nen kalek mene nomat noba werek o, ìlùk yogosikomo, at en he,

Nomat hoba werek atì hesik, helal waganek yì wìlìk he, hobuk helal ket mene aike wanhì logolìk he, 800 nen nomat noba werek, ìlùk helal wanin o, ìlùk yogosike. 8Atì'nogo hagasike mene atì, at abok oe a'nogo asuk holhìkesik he, mel isike:

Egi! A'la motok kagalek atì nayùk e, ìlùk atitigeke mene kolo hagatì lagaike mene a'nogo hogorasike.

“Atì'nogo hogorasike atì re, it apùnì kweangma yoma mene inoabùt he, it mene hagasuogolùk ina'la motok kagalek meneat he, it Ala againapùrì ina'la lìa hagarogo hisasike mene atì, inoabùt he, it hake lek atì nen he, atì'nogo isike atì. 9Atì halok he, an wene aike yogohisak. Hinagarok yì mene tì mene kweangma mene, ineilmasirogo kolo hagatarek mene atì lek aga halok, hinawì hano motok logousak oba wokhinabuagalùk he, yogotak ya hinagarok atì ba hinagaiya'lak hinom ekaberakìkì logoino o,” ìlùk yogoisasike.

10Atì'nogo yogoisasikesik mel isike:

“Sa nen hamùlùgat mene hesogo logouagalùk wogotenem higit hogo hagate halok he, hùko mene wogosumo, higit hogoat hagatì logogin o. Nen, sa nen hamùlùk mene hesogo logouagalùk wogotenem, higit hogo hagatì'lek halok he, hùko mene wogosumo higit hogo hagasigin legat o. 11Atì hak, hit hinagarok yì mene tì mene kweangma mene ineilmasirogo hagatarek mene atì wokhisamo hesogo logolìk, higit hogo welagì'lek halok he, ebe hano mene atì ese logouageip ìlùk sa nen wokhisegein. 12Hit en ap aike agarok higit hogo hesogo welagì'lek halok he, hit hogo, hinokawerek hinagarok mene atì ese logouageip ìlùk sa nen wokhisegein akegep. 13Ap omakeat mene ap kaintek inebe pìre mene inatitigeke logolìk ineyabu hagatì logousak motok mea o. Atì'nogo logogin halok he, inatitigeke atì nen,

Nopase aike yì hano, netawì. Nen, aike atì weak, nabìt, ìlùk ìkì logolìk he, etawì mene atì eperak lopok hogo logolìk he, aike abìt mene atì, aberalìthìkì logousak o. Atì hake, hit he, Ala atitigeke logolìk, uang atitigeke logousak mea o,” ìlùk yogoisasike.

Inasuk wasike wene

(Mat.11:12-13, 5:31-32; Mrk.10:11-12)

14Atì'nogo yogoisasikomo re, it ap Parisi mene amanogo uang motok inetaùken hutik welagaukwasi'mo nogo nen he, Yesùt en wene atì'nogo ikenem inasuk holhukwasik he, inane lì'nù tìng-taung hogo agato agaukwa. 15Atì'nogo isukwama re, at Yesùt en it yogoisìkì logolìk he:

“An higit hagatì lagì, ìlùk apùnì ineilhanem hinoabùt higit mene hake hagatì lagep. Meneat he, Ala nen hinetaùken motok elu o. Yì mene tì mene it apùnì nen hano ìlùk esinetsagarek mene atì re, at Ala motok apsìrì o.

16“At Yohanet ima pelaginapì lagaike mene a'nogo oan wagì'lek werek kolek, wene Ala nen ninasuk wasike wene a'nogo mel, it Ala ane yogoisìkì lagaukwa wene a'nogo mel, wene atìat esin welagaike. Mene re, at Yohanet wagaike atì hùlì nen he, hano wene Ala nen awe a'ma hisikerek wene a'nogo yogoisìlìk nikenem, apùnì obogat en wene wanuogolùk inomamerogo makhìlìk-hìlìk ki wìrì'lùgì. 17Atì'nogo ki wìrì'lùgì mene re, pogot inom, kweang inom, lek asigin meneat he, wene Ala nen ninasuk wasike mene atì elùgùn hamùlùgat aike lek asigin motok lek o.

18“Ap sa nen agwe waganek mene lologo heraksìlìk he, hobuk he hunigat mene aike wanhe halok he, pailagat hagasigin a. Nen, ap sa nen, he agùn nen lologo hebisegein mene wanhe halok he, pailagat wanigin o,” ìlùk yogoisasike.

“Ap kain agarok apik mene ho, Lasarùt ho, tì'nogo hagasukwa,” ìlùk oba lìrogo yogoisasike wene

19Atì'nogo yogoisìlìk he, hobuk at Yesùt en wene aike mel yogoisasike:

“Ap aike kain agarok motok apik logolìk he, asu oko apik hano mene nek laberìlìk, yì mene tì mene hanoma a'la heak hogo logolìk, ninhùp-nanhùp a'la motok hai hakìkì lagaike. 20Meneat he, ap aike eilmo lek mene etage Lasarùt. Ebenakwe oumo motok apik welagaike mene, ap kain agarok motok apik mene a'nogo aua kwe ba atoma hei waga lagaukwa. 21Hei waganem weitek logolìk, a'la nen he,

Ap kain mene a'nogo apùrùk nikenem eken hilalogo o hùlùmo pikenem atogorogo nalabut ning hogo nìkì logoile e, ìlùk akiko were'ma, yeke wìrìk he, oumo ebena amanogo ameli nen melangathìgìk nìkì lagaike.

22“Atì'nogo niko were'ma, at Lasarùt eilmo lek mene a'nogo wa'lagaike. Wa'lagaikomo re, it malaikat pogot oba Ala nen yoko pelaksa wagarek mene amanogo aike wagaukwasik, ebe wolok he, ap Aberaham era'lu hei lagaukwa. Hei lagaukwama nen he, hobuk ap kain agarok apik mene a'nogo wara'lagaike. Wa'lagaikomo re, kweangma salhukwa. 23Nen, ebe re, wa'la'lùk lagaikare'ma a'loma lagaikesik motok weagat logolìk he, elokwe hebek hogo lìakhasike re, Lasarùt Aberaham era'lu were'ma eileken lìagisasike. 24Eileken lìagisìlìk, ane hùkorogo mel yogosike:

Aberaham nopase e! An etu aik api'mo yoma heinet apik watì lagì yoma hetawì nean o. Lasarut en eki tùm ima pelakhìlìk en, i magasogo re, nameli ba sako uagalùk, hei wesuagalùk yogoom o, ìlùk yogosikomo, 25at Aberaham en he, mel yogosike:

Naput e. Hat heluk logolìk he, hano mene nek nìkìk, wanhìk, iko kolek, Lasarùt yì nek he, weagat welagaike mene a'nogo ha'la ebe'sin! Nen, yogotak he, at Lasarùt yì yoma wagasik a'la hano agasik werek kolegat he, hat enek he, heinet apik warìkì lagen atì. 26Nen, aike re, apùnì nit were'ma yoma nen hat were'ma aroma hoba wagìk, nen, hit aroma nen nit ninoba wagìk, inogo ìlùk tùlem aroma kat uan mene waganogo hesikomo werek o, ìlùk isike. 27-28Atì'nogo yogosikomo, at ap kain agarok apik mene a'nogo nen he, mel yogosike:

Halok he, nopane e! An naua a'lama noe nagot inebe 5 nen werek atì re, heinet watara'ma yoma wesinogo nen he, at Lasarùt arì hùsipi yogoisa loagalùk yogohetì lagì o, nopase, ìlùk yogosikomo re, 29at en he, mel yogosike:

It atì Musa wene atì inom, ap Ala ane yogoisìkì lagaukwa mene amanogo inane atì inom, hesogo weregat o. Halok, wene atìat holhì logousak o, ìlùk yogosikomo, 30ap a'nogo nen he, mel yogosike:

Atì'nogo egen meneat he, ap aike wa'la'lùk lagaikare'ma nen eluk a'lùk isa lamo nek he, inoabùt hebelasusak o, nopase e, ìlùk yogosikomo, 31at Aberaham en he, mel yogosike:

It hoe hagot atoma Musa wene inom, it ap Ala ane yogoisìkì lagaukwa mene inane atì inom, inasuk holhì'lek halok he, ap aike wa'la'lùk lagaikare'ma nen eluk a'lùk yogoisa lamo, it atì ina'la nen he, eberogoat akìlìk inasuk holusak meaat o, ìlùk yogosike,” ìlùk Yesùt en yogoisasike.

Currently Selected:

LUKAT 16: LAIDNI

Highlight

Copy