LUKAT 13
13
“Hinepe hebelagì'lek halok he, wa'larìk nong asugun,” ìlùk yogoisasike wene
1Atì sapùl he, it apùnì aike nen Yesùt mel yogosukwa:
“Apùnì Kalilea mene Ala ako waretenem, at Pilatùt en it inamep inom, Ala ako wareta mene amep inom, apìkwe wulagasogo inoate o,” ìlùk yogosi wagaukwa. 2Atì'nogo yogosi wagaukwama, at Yesùt en he, mel yogoisasike:
“Hit hina'la nen he,
It ap o Kalilea mene he'nakìt obogat he, weak hamùlùgat negen hagato kolek, it atì'nogo inoate atì nek he, weak hùkorogo hagatì lagaikama, inoabùt en inoate, ìlùk akìkì lagep a? 3Lek o. An nen hit yogohisak. Hit weak hagatì lagep mene atì heraksìlìk hinoabùt hebelagì'lek halok he, it wa'lagaika hagat, hit atì'nogoat wa'larìk nong asugun o. 4Nen, hit hina'la nen he,
O Yerusalem poge habuli'mo etage Siloam atoma o helep mene uanat wusukwa mene were'ma, sinuk hogo pi waga logolìk, inebe 18 oba al lebelogo sebelinapike a'nogo re, it apùnì he'nakìt obogat o Yerusalem welagaikarek mene atì re, weak hamùlùgat negen hagato kolek, it al lebelogo sebelinapike atì nek he, weak hùkorogo hagatì lagaukwama inoabùt en sebelinapike akegep a? 5Lek o. An nen hit yogohisak. Hit weak hagatì lagep mene atì, heraksìlìk hinoabùt hebelagì'lek halok he, it wa'lagaika hagat, hit atì'nogoat wa'larìk nong asugun o,” ìlùk yogoisasike.
E ara eken ìtì'lek mene oba lìrogo yogoisasike wene
6Atì'nogo yogoisasikesik he, wene aike oba lìrogo mel yogoisasike:
“Ap aike eyabumo e ara awì yago welagaike. Were'ma re,
Eken ìtomo a? Lek a, ìlùk eileken koli lagaike mene re, ebe ìtì'le'ma. 7Ìtì'le'ma lìlìk he, atitigeke mene eyabu serogo welagaike mene aike mel yogosike:
E ara yì eken aike ìtomo a? Lek a, ìlùk 3 tahun oba koli waga lagì mene re, ebe motok ìtì'lek. Halok he, kweang alemarogo yago logousak atì re, mùkogo laksan o, ìlùk yogosikomo, 8at atitigeke mene a'nogo nen he, mel yogosike:
Noe! Tahun yì ba mùtì'lek hebùok o. Atì'nogo werek kolek, an nen wusa yogolhìk, mogot palhìk, ìkì logogin o. 9Atì'nogo ìkì logoumo, tahun hobuk mene ba ebe ìte halok he, hano. Nen ìtì'lek halok he, hat en,
Mùkogo laksano o, ìlùk yogone'nok o, ìlùk yogosike,” ìlùk Yesùt en yogoisasike.
Yesùt en ineki aike Ala hesik welegat logolik, he aike ou hagasike wene
10Atì'nogo yogoisìlìk logolìk, ineki sabìt oba aike Ala hesik welegat logolìk, at Yesùt o apùnì Yahuri mene sapan egarek oba aike kìlìk wene yakùlisiko were'ma re, 11he aike mokareke oabùt weak mene a'la kìlìk logolìk aporoak motok nagauk ìlìk, higit hogo melasusak motok mea werek kolek, 18 tahun haga'lagaike mene aike atoma welagaike. 12Atoma were'ma, at Yesùt en, he a'nogo eileken lakhìlìk he, ane hakhasikomo wagaikomo re, mel yogosike:
“Nerei e! Hat hoba ou en arat hano asigin. Hele hake homago welagen a'nogo, arat hikalame o,” ìlùk atì'nogo yogorìk he, 13eki sebelho kolek aremnogoat he, he a'nogo aporoak higit agaikomo, melagaikesik he, Ala hogorasike. 14Atì'nogo hagasikomo re, ap aike sapan egarek oba atoma inoe kain welagaike mene atì nen mel isike:
“Yesùt atì nineki sabìt oba Ala hesik welegat werek kolek, he atì ou hagate atì nahalok,” ìlùk a'mage nen he, apùnì apik amanogo mel yogoisasike:
“Yì hagatìk, tì hagatìk, ìkì logousak atì re, ineki paigoak Oba atì baat hagatì logousak o. Halok he, hineki atì baat ou hinoba mene hagathinabuagalùk waga logoino. Mene re, Ala hesik welegat logolìk wesusak lek o,” ìlùk atì'nogo yogoisasikomo, 15at ninoe Etagepogot en he, ap a'nogo mel yogosike:
“Hit hinogat oba nek hano salek logolìk, hinetaùken pìre mene yì rì! Hit hinebe obogat nineki Ala hesik welegat logolìk meneat he, hinako wam sapi a, keledai a, awì wùrì'mo nen, kwe hùrogo hele hikalogo wulakhìlìk he, i noagalùk wogisek lagasep lek nogo? Wogisek lagasebat o. 16Atì hake, he Aberaham en tagokwe mene yì Ibilit en hele homagasogo hesogo werek kolek, 18 tahun haga'laga mene yì, nineki Ala hesik welegat logolìk hele hikalogo housak lek nogo? Hikalogo housagat o,” ìlùk wene atì'nogo yogosikomo, 17it he'nakit Yesùt inabìt welagaukwa mene amanogo obogat inekalì agaukwa. Meneat he, it apùnì aike inebe apik amanogo obogat en he, at Yesùt hagatì lagaike atì obogat hesik he, ina'la hai apik hakìkì lagaukwa.
Kìbì-kìbì eken oba lìrogo yogoisasike wene
(Mat.13:31-32; Mrk.4:30-32)
18Atì'nogo akasukwama, at Yesùt en he, mel yogoisasike:
“Ala nen awe a'ma hisikerek atì, nena hake. An nen nena mene oba lìrogo yogohisak,” ìlùk yogoisasikesik he, aike mel yogoisasike:
19“Ala nen awe a'ma hisikerek atì ebe re, kìbì-kìbì eken hake o. Ap aike nen kìbì-kìbì awì aike waganogo eyabumo heik lakhesikomo re, hulelhikesik he, ero e hake hùkoat haga'lagaikomo, sùe purogo nikerek mene nen eki tùalek oba awì wusi wagaike atì hakeat o,” ìlùk yogoisasike.
Eken horoti hìtùkwe mene oba lìrogo yogoisasike wene
(Mat.13:33)
20Atì'nogo yogoisasikesik he, hobuk aike mel yogoisasike:
“Ala awe a'mn hisikerek atì ebe re, nena mene oba lìrogo yogohisak. 21Atì re, eken sùpùrùk horoti mene hisuagalùk a'la pelaparek mene atì hakeat o. He aike nen gandum sagalek tepung wul hake a'nogo mene 40 liter yalelogo wìlìk, eken horoti hisuagalùk a'la pelaparek mene atì a'la pelakhìlìk ìpìkwe-apìkwe hagasikomo re, ebe motok hisike atì hakeat o,” ìlùk yogoisasike.
“Kwe hamùlùkkwe kuageip en hinomamerogo hagatì logoni,” ìlùk yogoisasike wene
(Mat.7:13-14,21-23)
22Atì'nogo yogoisalùk he, hobuk at Yesùt o Yerusalem pìkì logolìk, o sili hùkoma kìgìk, hamùlù'mo kìgìk, wene yakùlisìlìk pisike. 23Atì'nogo yakùlisìlìk pikenem he, ap aike nen, mel yogosike:
“Noe. Ala nen telinabigin atì re, inebe hùkoat a? Hamùlùgat a,” ìlùk isikomo, at Yesùt en it apùnì atoma welagaukwa mene amanogo mel yogoisasike:
24“It apùnì apigat, kwe hamùlùkkwe kuogolùk walhogoin meneat he, mea asigin atì nen he, hit kwe hamùlùkkwe atì ba kuageip en he, hinomamerogo hagatì logoiho, ìlùk yogohisìkì lagì. 25Nen, o atoma ap awì esewerek mene atì melarìk, kwe te'mek hogo yagatì logoumo re, hit eta'ma metek logolìk, kwe papagathìkì logolìk he,
Noe! Nit kwe hù'nisan, ìlùk yogosugun meneat he, at en he,
Hit hinebe an nokot o. Koma nen wagep, ìlùk yogohisikenem, 26hit en yogotì logolìk,
Ninawì sili lopok nìkì logolìk, sùpùrùk ninom isago nìkìk, wene yakùlnisìgìk, ìkì lagagin mene a'nogo, ìlùk yogosugun meneat he, 27at en he,
Hit o koma nen wagep. Hinebe an nokot o. Hit weak hagatesep mene noba ki wagùp. Atem enat pìkìt lani o, ìlùk yogohisegein werek o. 28Atì'nogo yogohisamo, hit eta'ma logolìk, ap Aberaham mel, Yakùp mel, Isak mel, ap he'nakìt Ala ane yogoisìkì lagaukwa mene amanogo mel, Ala awe a'ma hanoma atoma were'ma, hineileken kelagisogoin o. Nen, hit enek he, kwe yagarogo wulakhikamo eta'ma atoma logolìk, hinaik hùnogo lì ago le ago iko motok logogun o. 29Nen, it apùnì poloma nen, maloma nen, ìlìkwe yìkwe nen, Ala awe a'ma hisikere'ma atoma isago nùogolùk atogosi wesugun o. 30Mene re, lakhani! It apùnì o yogotak inetagewerek mene atì, hobuk inetage lek asigin o. Nen, it aike yogotak inetage lek werek mene atì hobuk inetagewerek asigin o,” ìlùk yogoisasike.
At Yesùt en apùnì o Yerusalem mene etawìrinapike wene
(Mat.23:37-39)
31Wene atì'nogo oan yogoisikenem, it ap Parisi mene aike Yesùt oba wìrìk he, mel yogosukwa:
“Ap Herotet en hoasigìlùk ìlì'logo atì re, o yoma logousak lek. Hese o wele'ma wo'lakan,” ìlùk yogosukwama, 32at Yesùt en he, mel yogoisasike:
“Ap oabùt yeke lo yeke oabùt hake atì, wene yì hepok yogosi lani o. An he, o yogotak mel, hùen mel, mokareke oabùt weak mene apùnì ina'la kìlìk were'ma henogo wulaksìgìk, ou warek mene halok, hagarinapìk, ìkì logopik he, neki aike nen he, an hagasigin ìlùk wagagi mene arat eil hotologo kopok hogo hagasigin o. 33Atì'nogo hagasigin meneat he, ap Ala ane yogoisagarek mene atì, wele'ma inoasusak lek o. Yerusalem atomaat inoasusak atì nen he, an yogotak mel, hùen mel, ageke mel, atoma laga logousak higit hìgì o.
34“Eigo! Hit apùnì o Yerusalem mene yì netawìlak e! Hit en ap Ala ane yogoisagarek mene inebe inoatìk, ap Ala nen inayoko hìlìk hinoba laksa wagarek mene helep en tamuk-tamak hogo inoatìk, egesep atì netawìlak e! Sùe ayam eagwì ogolabì a'ma atogorogo hisikerek atì hak, an ninhùp-nanhùbat hit a yoma welagasep mene obogat atì'nogoat atogorogo hikagalùk akìgìrek meneat he, hit en,
Ninabìt, egesep atì netawìlak e! 35#Mzm.118:26 Atì nen he, Ala nen hit hinebe herakhikamo, hinawì wùrìk atì somongat logogin o. Hùlì yogotak en hit en he, an nebe hineileken nììgì'lek logopik en, hobuk hit en he,
Ninopase Etagepogot Ala nen lakhagei wagama wagen yì, at enat hanothabuak o,
ìlùk yogonesugun atì hùlì hineileken neogoin o,” ìlùk yogoisasike.
Currently Selected:
LUKAT 13: LAIDNI
Highlight
Share
Copy
Want to have your highlights saved across all your devices? Sign up or sign in
