LUKAT 14

Yesùt en ap aike eki esok hìrìk mene hagasike wene

1Atì'nogo yogoisasikesik he, ineki sabìt oba aike, Ala hesik welegat logolìk he, Yesùt ap Parisi mene inogogì kaintek omakeat aike aua sùpùrùk eperak nùogolùk lagaikesik were'ma, apùnì nen, at Yesùt ineil tùkùm hogo wanhì lagaukwa. 2Atì'nogo ineileken werek kolek he, ap aike eki esok hìrìk logolìk ou yìtùgat welagaike mene Yesùt elokoma higit aremnogo wagaikesik welagaike; 3Were'ma, at Yesùt en ap Ala ane helal waganek esewerek mene mel, ap Parisi mene mel, amanogo mel yogoisasike:

“Wene Ala nen ninasuk wasike mene atì ba, at en ìkì logolìk he,

Ineki sabìt oba an hesik welegat logolìk apùnì ou warek mene elok hagarinabusak, isike a? Lek a,” ìlùk atì'nogo yogoisasikomo re, 4it amanoga wene oko ìgì'lek inane legat kamo isukwama, at Yesùt en ap a'nogo eki hakìlìk ou hagasikesik he,

“Lan o,” ìlùk lakhesike. 5Lakhesikomo, ap a'nogo laga kolek he, at Yesùt en it amanogo mel yogoisasike:

“Ala hesik welegat logolìk meneat he, hit aike hinaput a? Hinako sapi a, i poge habuli'mo pile pike halok, hepokhepogat hineki hagasogo lìabusak lek nogo? Lìabusagat o,” ìlùk yogoisasikomo re, 6it ap amanogo nen wene oko yogosusak he, mea agaikomo inane motok ìgì'lek kamo isukwa.

“Isago nùogolùk tì'nogo hù'lasusak,” ìlùk yogoisasike wene

7Ap kain mene aike nen apùnì inom sùpùrùk omakìma nùogolùk inayoko hesike mene, ap kaintek mene hù'lagaikarek oba nek hù'lagaukwasik werek en he, at Yesùt eileken yerisìlìk he, wene oba lìrogo mel yogoisasike:

8-9“Ap aike agwe ìgìtì logolìk, pesta isago nùogolùk, hat aike hayoko hike halok he, hat hebe yekerek hake meneat he, ap aike kain mene heperagat hinayoko hegein atì nen, ap kaintek mene hù'lagaikarek oba hù'lasi lagun o. Atì'nogo hù'lasi lìlìk were'ma, ap kain mene heperak hinayoko hegein mene a'nogo wago halok he, at ap hinayoko hegein mene a'nogo nen yogohetì logolìk,

Nagot yì. Ap yì hat hobùlù'mo hù'lasuak en he, hat hebe, ìlùk yogoheto halok he, hat hekalì arìk ap welek mene hù'lagaikarek oba hù'lasi lanogo nen he, ap kaintek mene hù'lagaikarek oba atì pìkìt hù'lasi lagun o. 10-11Ap sa nen okawerek etaùken hesagathakegein halok he, Ala nen sebelogo hegein o. Nen, sa nen okawerek etaùken sebethakegein halok he, hobuk Ala nen hesagathegein atì nen he, hat atì'nogo hayoko hiko halok he, ap welek mene hù'lagaikarek oba hù'lasi lasak o. Atoma hù'lasi lìlìk were'ma, ap hayoko hegein mene a'nogo wesipik he,

Nagaiyak e. Hat he, ap kaintek mene hù'lagaikarek oba yoma hù'lasi me o, ìlùk iko halok he, it apùnì obogat pesta isago hinom nùogolùk atogosugun mene amanogo ineilhanemat yogohetenem, it en he,

Ap yì kain mene hìgì, ìlùk ineileken enagat yetheogoin o. Halok he, ap welek mene hù'lagaikarek oba atomaat hù'lasusak o,” ìlùk yogoisasike.

12Atì'nogo yogoisìlìk he, at Yesùt en ap awì esewerek inayoko hesike mene a'nogo yogotì logolìk,

“Likene a? Hìmaganekokwe a, hat en apùnì hinom sùpùrùk omakìma isago nùogolùk halok he, hinom hutik mene inom, hagaiya'lak mene inom, hogogì hagaikùgì mene inom, kaintek ineilmo wùlalhak hinom welagasep mene atoma inom, inayoko hùgùn o. Atì'nogo hagaten halok he, hobuk it aike isatì logolìk hat hayoko houmo, oko wùt asinogo. 13-14Mene re, hat atì'nogo isatì logolìk halok he, ineilmo lek inelageik mene atì inom, inouak sagalek mene inom, ineitep holu mene inom, ineileken mùm mene inom, it atì'nogo mene hùgì inayoko hìkì logoino. Atì'nogo inayoko hikenem, it en hat hayoko housak lek atì nenat, hat ha'la hai apik hakegein o. It atì nen oko wokhesusak le'ma atì, apùnì inetaùken higit mene wa'larì'mo, Ala nen inelugurinabigin atì sat he, hat hagatì logogin mene oko, at Ala nenat wokhesigin o,” ìlùk yogoisasike.

“Ap aike nen he ìtì logolìk, pesta isago na wesuagalùk inayoko hesike,” ìlùk oba lìrogo yogoisasike wene

(Mat.22:1-10)

15At Yesùt en atì'nogo yogoisasikomo, apùnì sùpùrùk nùogolùk hùrek welagaukwa mene amanogo, ap aike nen asuk holhikesik he, Yesùt mel yogosike:

“It apùnì aike Ala nen awe a'ma hisikere'ma logolìk sùpùrùk nogoin mene atì, ina la hai hakìkì logogun o,” ìlùk yogosikomo, 16at Yesùt en he, mel yogosike:

“Ap aike pesta hùko isasigin ìlùk abok palìk he, apùnì motok apigat inayoko hesike. 17Inayoko hesikesik, ebe arat isakhìlìk he, atitigeke mene aike yogotì logolìk,

Pesta isago yì arat nasak higit aga. Halok he, apùnì inayoko hìgì mene amanogo wesuak en he, woginabi lan o, ìlùk lakhesike. 18Lakhesikomo, yogoisìlìk laganem be, it apùnì amanogo obogat inabìt en inane lagak hogo ìkì logolìk, at aike nen he,

Nagaiyak e. An yabu aike oko palhìrìk en he, neileken hìtha lagalùk. Halok, isago nogoin atì re, an wesigin lek o, ìlùk yogosike. 19Nen, at aike nen he,

Nagaiyak e. An wam sapi oualì waganek mene 10 nen pìretek wùrethìgìk oko palhì mene neileken hìtha lagalùk. Halok he, isago nogoin atì re, an wesigin lek o, ìlùk yogosike. 20Nen, at aike nen he,

Nagaiyak e. An nagwe ket ìkìgìrì'mo nogo nen he, isago nogoin atì, an na wesusak he, mea o, ìlùk yogosike. 21Inane atì'nogo ìlìk lagaukwama re, at atitigeke mene a'nogo nen oe a'nogo yogosi wagaike. Atì'nogo yogosi wagaikomo, at oe esewerek a'nogo a'mage apik lagalìk, mel yogosike:

O kota hùko yì, kwe ebela hùkokwe mel, hamùlùkkwe mel, laga logolìk, apùnì inelageik mene mel, inouak sagalek mene mel, ineileken mùm mene mel, inesok wùt warek mene mel, wogisek we'no o, ìlùk yogosike. 22Atì'nogo yogosikomo re, at ap a'nogo lìlìk wagaikesik he, oe a'nogo mel yogosike:

Noe. Yogoneten a'nogo wogisek wagì meneat he, o heta motok selek werek o, ìlùk yogosike. 23-24Atì'nogo yogosikomo, oe a'nogo nen atitigeke a'nogo yogotì logolìk, mel yogosike:

Halok he, pesta isakìgì mene yì, it apùnì ebalep inayoko hìgì mene atì na wesusak motok lek o, ìlùk yogohetì o. Halok he, apùnì o kota yì etakwe mene, kwe hùkokwe, hamùlùkwe, yùgùnat nùgì atì an naua yoma o peserogo ki wesuak en he, hane omamerogoat woginabi lìlìk hisa ki we'no o, ìlùk yogosike,” ìlùk Yesùt en yogosike.

“Yì mene tì mene heraksalùk he, an nopolìk wesusak o,” ìlùk yogoisasike wene

(Mat.10:37-38)

25Apùnì motok apigat Yesùt opolik lop hutik laga lagaukwama re, at Yeeut elokwe hebek hogo it apùnì amanogo wogisìlìk he,

26“Hit hinopasa hinagosalak mel, hinagagwì hinagainapùrì mel, hinogogì hinagoromì mel, hinebe hinokawerek atì mel, obogat,

Motok nabìt o, ìlùk, akìgì'lek logolìk, an nagoromì asuogolùk nawe a'ma ki wesusak mea o. 27E menhìlìk inoatarek mene a'nogo hinageiyo lopok wolok he, an nopolik wesugun lek halok he, an nagoromì asuogolùk nawe a'ma ki wesusak meaat o. 28Hit aike nen kwe lel helep mene pelarogo laleka wusuogolùk abok palìk he, o ebe kopok hogo wususak mene uang elok a? Mea a, ìlùk hineki wenatì'lek, we, hinoake yùgùn aike wùtesep nogo? Lek o. 29-30Oko hesik atì hineki wenatì'lek wùto halok he, o tik talhìlìk meneat he, o ebe kopok hogo wususak mea aga halok, it apùnì aike ineileken hìlìk he,

Ap atì o tik talhe meneat he, kopok hogo wususak mea agama hebike o, ìlùk hinaeto apik ngik-ngek hogo asinogo.

31“Ati hak aike, ap kain etagepogot aike nen weim abok wulakhìlìk ap kain aike inom yabi lùogolùk he, ebe tak yamuk hogo hù'larìk en,

An nagoromì inebe 10 ribu ya re, at ap kain a'lì agoromì inebe 20 ribu atì inom elok yabusak he a? Mea he a, ìlùk a'la ebetì'lek, we, pìkìt yabi lagaikarek nogo? 32Lek o. Ina'la ebetì logolìk,

Yabusak mea, ìlùk akiko halok, it selei mene amanogo oan walegat en wago kolek he,

Weim yabusak lek o, ìlùk,

Ninom lapuluok en he, oko nena mene wokhisasak, ìlùk yoko laksikerek akìgì. 33Ati hak he, hit aike hinagarok yì mene tì mene hebisìgì'lek logolìk an nagoromì asuogolùk awe a'ma ki wesusak mea o,” ìlùk yogoisasike.

“Mayu aik lek aga halok heraksagarek,” ìlùk yogoisasike wene

(Mat.5:13; Mrk.9:50)

34Atì'nogo yogoisasikesik he, aike mel yogoisasike:

“Mayu atì hano o. Meneat he, aik lek aga halok he, nena mene ba aik weregerasusak akegep. 35Lek o. Mayu aik lek mene atì re, awì yagoma hìgìk, kweang muli asuagalùk yabu esap watìk, usak motok lek en he, po laksagarek o, ìlùk yogohisìgì mene atì hinasuk holusak halok, hanorogo holini o,” ìlùk yogoisasike.

Currently Selected:

LUKAT 14: LAIDNI

Highlight

Copy