YOHANET 20

Yesùt ebe eluk agaike wene

(Mat.28:1-8; Mrk.16:1-8; Luk.24:1-12)

1Warek atì'nogo hesukwasi'mo nen, o hari Minggu ba, at he Maria aua o Maktala mene a'nogo o mùm werek kolek hùp siak hogo warek omoulama hesukwa ba a'nogo wagaikesik eileken hìthasike hak he, kwe helep mene laberogo hesukwa mene a'nogo, wokhasukwama kwe hùrìk were'ma hasike. 2Atì'nogo werek en eileken halùk he, humusek motok ap Simon etage aike Peterùt egarek a'nogo mel, Yesùt agoromì ane wanhì lagaukwa mene aike at etaùken hutik mene a'nogo mel, inoba lagaikesik he, mel yogoisasike:

“Apùnì nen ninoe Etagepogot warek omoulama nen wolok wùlùpasik koma hei lagaika heat ma re, nit ninoake palaga o, nerùgì,” ìlùk yogoisasikomo, 3at Peterùt mel, Yesùt agot aike a'nogo mel, eperak warek omoulama hesukwa ba a'nogo wagaukwa. 4Atì'nogo eperak omakìkwe humusek wagaukwa meneat he, at Yesùt agot aike a'nogo nen, at Peterùt hobugutsalùk he, at etak hepok warek omoulama hesukwa ba a'nogo wagaike. 5Atì'nogo arat wagaikesik, omoula warek hesukwa ba a'nogo ot soma ìlìk eileken so-so kelakhasike hak he, su kut mene a'nogo nek nokolek kweangma were'ma eileken hasikesigat he, ebe omoula a'la kìgì'lek kamo isike. 6Atì'nogo kìgì'lek were'ma, at Simon etage aike Peterùt egarek a'nogo hobuk at opolik waga lagaikesik pìkìrat warek hesukwa ba a'la kisikesik eileken hìthasike re, su kut mene a'nogo nek nokolek kweangma were'ma, hasike. 7Atì'nogo meneat he, su Yesùt ùkùloak yelik mene nokolek enek he, su kut mene nokolek welagaikomo atemnogo inom omakìma lek. We, alepma hek hogo negen ìkìlìk were'ma eileken hasike. 8Atì'nogo hasikesi'mo nen, at Yesùt ane wanhì lagaukwa mene aike alebagìk warek hesukwa ba wagaike mene a'nogo hobuk a'la kisikesik eileken hìthasike hak he, atì'nogo were'ma eileken hasikesik, eberogoat ìlùk hùthasike. 9At atì'nogo eileken hìgì'le'ma re, alebat it aike nen Ala ane helal waganogo hìkì logolìk he,

“At ebe wa'larìk en hobuk eluk asiginat o,” ìlùk isukwama helal waganek werek mene atì it hùthìgì'lek welagaukwasik en, atì sat at eileken hasikesik en hùthasike atì. 10Atì'nogo hùthasikesik en, it Yesùt agoromì ane wanhì lagaukwa mene eperak a'nogo inapotkwe ouma lagaukwa.

At Yesùt ebe he Maria aua o Maktala mene a'nogo eileken hoagalùk elokoma melagaike wene

(Mat.28:9-10; Mrk.16:9-11)

11It atì'nogo lagaukwa meneat he, at he Maria nek he, hobuk wagaikesik warek hesukwa ba a'nogo era'lu metek logolìk eileken kelabek le ago welagaike. 12Atì'nogo le aga logolìk, eileken kelakhasike hak he, Yesùt warek hesukwa ba a'nogo malaikat inebe pìre inasu kut mene laberek, at aike Yesùt warek hesukwa ba ùkùlkwe higit, nen, at aike alakokwe higit, hùrek were'ma eileken isasike. 13Atì'nogo isasikomo, it en he, mel yogosukwa:

“He yì nerei e. Hat nenahalok le aga lagen,” ìlùk isukwama, at en he, mel yogoisasike:

“An noe Etagepogot warek apùnì nen wolok o koma hei lagaikama heat ma re, an nokot en le aga lagì o, nerùgì,” ìlùk yogoisasikesik, 14eileken apotkwe hebek hogo lakhasike hak he, at Yesùt ebe metek were'ma eileken hasike meneat he,

“Atì Yesùt ebeat,” ìlùk hùthìgì'lek. 15Hùthìgì'lek were'ma, at Yesùt en he, mel yogosike:

“He yì nerei e. Hat nenahalok le aga lagen. Nen, hat sa heratì lagen,” ìlùk yogosikomo, at a'la nen he,

“Ap yì yabu serogo welagarek mene hìgì,” ìlùk akasike. Atì'nogo akasikesik he, mel yogosike:

“Noe. At ebe warek hat wanhetik wolok wele'ma hei lagenma halok he, ebe o koma hei lagenma. An wani lak en he, yogonom o,” ìlùk yogosikomo, 16at Yesùt en yogotì logolìk he,

“He Maria,” ìlùk yogotenem, Maria elokwe hebek hogo Yesùt wogorìk he, nit ninane ba,

“Guru noe,” u hak he, it Iberani mene inane ba re,

“Rabuni,” ìlùk hai wasike. 17Atì'nogo hai wasikomo re, at Yesùt en he, mel yogosike:

“An nebe nopase oba lagagì'lek oan welagì atì nen he, heki abìak hogo ha'narek logogùn o. An nagoromì wene mel ìlùk yogoisa lan o:

An mel, hit mel, ninopase Ala oba hìpìrìk welagorek mene a'nogo oba lagaigìlùk ìkì lagì, ike ìlùk nagoromì yogoisa lan o,” ìlùk yogosikomo, 18at he Maria a'nogo Yesùt agoromì ane wanhì lagaukwa mene amanogo inoba lagaikesik he, mel yogoisasike:

“Yì sanì! Ninoe Etagepogot an neileken arat halùk wagì o,” ìlùk, yogoisìkì logolìk wene yogosike mene a'nogo pìlìngìrogo yogoisa lagaike.

At Yesùt ebe agoromì ane wanhì lagaukwa mene amanogo ineileken hoagalùk inelokoma melagaike wene

(Mat.28:16-20; Mrk.16:14-18; Luk.24:36-49)

19Atì'nogo yogoisa wagaikesi'mo nen, o hari Minggu welagaukwa atì sat hùako at Yesùt agoromì ane wanhì lagaukwa mene amanogo, it ap Yahuri mene inayùk en he, o aikema omakìma kwe obogat kelok yagarogo kisukwasik welagaukwa. Atì'nogo were'ma, at Yesùt lagaikesik ina'la melagaikesik he, mel yogoisasike:

“Nagoromì. Hinagùt a'ma,” ìlùk atì'nogo yogoisasikesik, 20eki mel, abeleken mel, wasukwa mene a'nogo agapùt ìnùgisasike. Atì'nogo ìnùgisasikomo ineileken hasukwasik he,

“Ninoe ebeat o,” ìlùk ina'la hai apik hakasukwa. 21Atì'nogo hai hakasukwama, at Yesùt en wene aike inom hobuk mel yogoisasike:

“Nagoromì. Hinagùt a'ma. An nopase nen lakhani wagaike atì hak, an nen hit atì'nogoat lakhikegein o,” ìlùk yogoisasike. 22Atì'nogo yogoisasikesik he, eleage inoba hurogo lakhìkì logolìk he, mel yogoisasike:

“Ala Areagùn helani o. 23Nen, hit en apùnì weak hagatarek mene sagalogo legetsegep halok he, at Ala nen sagalogo legetsegeinat o. Nen, it apùnì aike weak hagatarek mene, hit an sagalogo legetsegep lek halok he, at Ala nen sagalogo legetsegein legat o,” ìlùk yogoisasike.

Yesùt en ebe wasukwa mene sìge akwe ap Tomat ìnùkhasike wene

24At Yesùt ebe agoromì inelokoma melagaike atì sat he, inebe 12 nen amanogo mene it he'nakìt enek were'ma. Nen, at Tomat etage aike Hùlìpmìo mene egarek a'nogo ebe inom le'ma wagaike. 25Atì'nogo ebe le'ma nogo nen he, it Yesùt agoromì he'nakìt en he, mel yogosukwa:

“Tomat nagaiyak. Nit ninoe Etagepogot a'nogo arat nineileken hogo,” ìlùk yogosukwa meneat he, at en he, mel yogoisasike:

“An nen at eki ba posie omaken wata mene akwe neileken tùkùm hogo hìgì'lek, nen agapùt neki hakìgì'lek, abelekenma sìge akokwe neki tùm kelakhìgì'lek halok he, eberogoat ìlùk akegein motok lek o,” ìlùk yogoisasike. 26Atì'nogo yogoisasikesik oba nen he, ineki 7 nen welagaukwasik en aike ba it Yesùt agoromì ane wanhì lagaukwa mene amanogo Tomat inomat, o a'nogoat atogosukwasik, kwe obogat kelok yagathìlìk welagaukwa meneat he, at Yesùt wagaikesik ina'la melagaikesik he, mel yogoisasike:

“Nagoromì. Hinagùt a'ma”, ìlùk yogoisasikesik, 27hobuk At tomat mel yogosike:

“Hat ha'la nen eberogoat ìlùk hetaùken noba hìpìrethìgì'lek welagwen atì'nogo logogun. Eberogoat ìlùk akanok en he, heki ha'nììlìk, neki ba heileken nììgìk, nabeleken sìge akwe heki tùm kelakhìgìk, ìlìk he, hetaùken noba hìpìretheino o,” ìlùk yogosike. 28Atì'nogo yogosikomo, at Tomat en he,

“Egi! Noe, hebe Hetagepogot Ala at hììgì o,” ìlùk yogosikomo, 29at Yesùt en he, mel yogosike:

“Hat he, heileken arat neegetik en eberogoat ìlùk hetaùken noba hìpìrethegen. Atì'nogo meneat he, it apùnì aike ineileken nììgì'lek meneat he, inetaùken noba hìpìrethogoin halok he, ina'la hai hakogoin o, ìlùk eberogoat yogohetì,” ìlùk yogosike.

Buku yì ebe yì'nogo hesik ìlùk helal wanhike wene

30At Yesùt en it agoromì ane wanhì lagaukwa mene nen at ebe hùthoagalùk ineilhanem elalin hagatì lagaike mene he'nakìt apigat hagasike meneat he, buku yì ba helal wanhì'lek. 31Atì'nogo meneat he, helal waganek werek yì obogat he, hit en he,

Yesùt atì Ala aput, nit apùnì telninabuagalùk wenagasogo lakhei wagaike a'nogo eberogoat, ìlùk hùthìlìk hinetaùken at oba hìpìrethìlìk, at etage palhenem hineluk logouageip ìlùk, helal waganogo hìgì o.

Currently Selected:

YOHANET 20: LAIDNI

Highlight

Copy