Matius 4
4
Iblis nen Yesus akla nggagaligiluk oba wago lagike wene
(Markus 1:12-13; Lukas 4:1-13)
1Ima wusa ĘĽbisikemo, Yesus Iblis nen akla nggagaluwagaluk, Allah Agurengge nen wolok o limo akoni dekma etoma lagike. 2Etoma ĘĽbi lagikemo dogolik, o ki digik, wi digik, kagako nggorlek inggi 40 hari kimbiri ninggidek welagike eti paga kimbiri abu mondok agike. 3Esigit diluk kimbiri abu mondok werekma, at Iblis inakla nggagalik liligogo mende etnogo oba wagikesik nen,
“Kat Allah aʼbut eberogonat kalok, nggit etoma kimbiri roti mende kagat lasuwak nen yogosin o,” yiluk yogokikemo, 4at Yesus nen,
“Allah nen,
Akoni kimbiri dombok nonggo dogolik iniluk mondok dogoligogi dek o. An nane yigi mende eti taĘĽbokogonat waganggo kalok, iniluk mondok dogogun o, (Ul. 8:3)
yiluk yisikemo kolal mbalogo ʼbisukama werek o,” yiluk yogokike. 5Yogokikemo, yabunggane at Iblis nen Yesus wolok, o Allah enggaerek ago unggul nggokma lagikesik nen, Yesus ebe o Allah ago palekma uwanat ombo amun kisinggen obaat wolok dagisikesik nen, 6men yogokike,
“At Allah nen,
Kat kiyok nggit oba ndamukogo waraunogo yiluk, an nagoromi malaikat yomenogo nen ininggi ndalek oba wokabuwak nen yogisagin, (Mzm. 91:11-12)
yiluk yisikemo kolal mbalek werek eti, kat eberogonat Allah aʼbut kalok, mbok wema etoma wusan nda,” yiluk yogokike. 7Yogokikemo, at Yesus nen,
“Allah nen yisi dogolik,
Kit nen, an nake kinombae Allah Nendaganggok anini werek a? Dek a, yiluk, naren mbalusak mondok dek o, (Ul. 6:16)
yiluk yisikemo kolal mbalogo ʼbisukama weregat o,” yiluk yogokike. 8Esigit diluk yogokikemo, yabunggane at Iblis nen Yesus wolok ndom nggok uwanat mende unggul oba dagiluk, o agat oba yi ai ndi ai ap inendaganggok nen pagisek dogoligogomangge dombok taʼbokogonat, yi mende ndi mende dogalegat werekma ilenggen lakowagaluk yangguloko dogolik,
9“Yesus. Kat kindibagal yunggulogo napma unggi witluk pogot nabigin kalok, kilenggen lakegen mende etoma taʼbokogonat kat wokisigin o,” yiluk yogokikemo, 10at Yesus nen,
“Kat Iblis yi lan o. Allah nen yisi dogolik,
Kit nen, kinombae Allah Nendaganggok anat kinindibagal yunggulogo napma unggi witluk pogot nako dogolik, an nake kagako dogono o, (Ul. 6:13)
yiluk yisikemo kolal mbalogo ʼbisukama werek o,” yiluk yogokike. 11Esigit diluk yogokikemo Iblis etnogo Yesus togot diluk lagikemo, malaikat mbogot oba nen Yesus oba wusa wagukasik anggorlem welaguka.
At Yesus o Galilea dogolik kagako lagike wene
(Markus 1:14-15; Lukas 4:14-15)
12“At Yohanes etnogo inggi kerle wakama,” yiluk yisukama, at Yesus asuk kolkikesik nen, o Galilea etoma dagi wagike. 13Dagi wagikesik, o unggul Nazaret etnogo togot diluk nen, o unggul Kapernaum i Galilea yenggelek aik obangge etoma, it ap inunggulowak endaga Zebulon mende inom, Naftali mende inom, inaguma etoma dogigiluk dagi wagike. 14Dagi wagike eti, at Yesaya Allah wene yogisasi lagike mende etnogo nen kolal mbalko dogolik,
15“Kit ap kinunggulowak endaga Zebulon mende inom, Naftali mende inom, kinago i Yordan aik ilibagangge palek mende inom, i laut nggok yenggelekma wusaligogoma palek mende inom, kinaguma o Galilea agum etoma, it ap sikmangge mende nen sebelek werek yoma kani.
16O amummo dogoligogi mende eti, o liyat kinabigin mende nggok mende omanggi kegep o. Kit o etoma watlasuwogoluk kinoba amumat agasikmo, liyarinabigin mende omanggi waga o,” (Yes. 9:1-2)
yisike etnogo ndak-ndagat kagat lasuwagaluk Yesus etoma dagi wagike o. 17Dagi wagikesik dogolik, kurli eti kurli nen, akoni etoma yogisasi dogolik,
“At nggok mbogot oba mende nen apma ʼbiyagin etnogo yogondak arat apma ʼbiyagin o. Eti paga, weyak kagako lagap mende togot diyalok kinobabut kwalatni o,” yiluk yogisilik noko lagike.
Yesus nen agoromi alebagik inayonggo ĘĽbisike wene
(Markus 1:16-20; Lukas 5:1-11)
18At Yesus i Galilea yenggelekma aik obangge lago dogolik, ap inebe mbere, Simon endaga omanggi Petrus yisi lago etnogo agot Andreas imbisak kibitngge-yogongge ikanat waganigogoma nogo nen, etinem ikan waganuwogoluk, su yoge mende ima wasukonem ilenggen lagiyasike. 19Lagiyasikesik nen,
“Ikan waganggo lagap eti kak, akoni esigit dilugat woginabik noko dogobagik nen yiluk, yanggul kisak nen nomborlik witni o,” yiluk yogisasikemo, 20su yoge ikan waganggo laguka mende etnogo togot diyalok eranogoat at omborlik laguka. 21Lagukama, at Yesus ilenggen lagiyasike mende, ap inebe mbere Zebedeus aʼburi Yakobus agot Yohanes imbisak inombae inom, nggu akla dogolik, su yoge ikan waganggo laguka mende etnogo ʼbugunggakonem lagiyalok nen, waisasike. 22Waisasikemo, nggu etnogo inom, inombae Zebedeus etnogo inom, eranogoat togot diyalok, it Yesus omborligat laguka.
At Yesus nen wene yanggul isigik, u warek mende pano kagarinakik, kagako lagike wene
(Lukas 6:17-19)
23Lagukama, at Yesus o Galilea agum o dombok etoma noko dogolik, akoni Yahudi mende sembayan yiligogoma unggisikesik, wene pano wene yabunggane ninombae Endaganggok apma ĘĽbinanigin wene etnogo yogisigik, yi u ndi u pano kagarinakik, kagako lagike. 24Esigit diluk pano kagarinabik lagonem, o Siria etoma abok mondok wikak yisikemo, yi u ndi u, kenet pakalok wako laguka mende inom, kugi inobabut weyak mende inakla unggiluk inobabut kunu-gunu arigogo mende inom, watlagik iniluk agik kagarigogo mende inom, ininggi iniyok ut warek mende inom, inebe dogalegat wogisek at oba wagonem taĘĽbokogonat pano kagarinako lagike. 25Esigit diluk pano kagarinako nggorlek, akoni taĘĽbokogonat o Galilea nen, o kota 10 etoma nen, o Yerusalem nen, Yudea nen, i Yordan aik ilibagangge etoma nen, inebe mondok dogalegat wagukasik Yesus omborlik noko laguka.
YESUS NDOM OBA DAGISIKESIK YANGGUL ISASIKE WENE
Currently Selected:
Matius 4: DNA
Highlight
Share
Copy
Want to have your highlights saved across all your devices? Sign up or sign in
