Matius 14

Yohanes ima wusa ʼbiyasi lagike mende etnogo ebe wakuka wene

(Markus 6:14-29; Lukas 9:7-9)

1O eta amot, at Herodes o Galilea agum nggokma endaganggok welagike mende eti, Yesus nen kagako lagike mende asuk kolkikesik nen, 2at agoromi men yogisasike,

“Yohanes ima wusa ʼbiyasi lagike mende ebe wakima watlaga etnogo yabunggane iluk agasik nen, kagasusak dek mende elalinat kagarik liligogo eti kigi,” yiluk ebe Yesus kagako lagike mendeat yisike o. 3At nggok Herodes nen agot Filipus age kwe Herodias eti ndilogo waganggike eti paga Yohanes inggi kerle warogo ininggi kerle warogo ʼbiyiligogoma nggola ʼbisike. 4Nggola ʼbisike eti, alebagik at Yohanes nen Herodes etnogo yogoko dogolik,

“Kwe Herodias waganusak dekmaat waganggendikmo eti, kimbisak dogusak erlok dek o,” 5yiluk yogokikemo, at Herodes nen Yohanes eti wasigin yiluk akla ambasikemo it akoni amberek nen,

“Yohanes eti Allah wene yogisiligogo mende,” yiluk yisi lagukama, wasusak ayuk agike.

6Mende, o at nggok Herodes eti ebe endak lagike paga ndak-ndak asi wagikemo nen, pesta kagako dogolik, at kwe Herodias eyak sarlisik mende eti, akoni dogalegat inelokoma nen endai uwak saʼbik uwak saʼbok wakonem, at nggok Herodes eti akla arlenggen kasike. 7Akla arlenggen kasikesik Allah endaga kumbuk mbalogo korlak etnogo yogoko dogolik,

“Kat nen nena mende nggino yoknoko kalok, wokisiginat o. Eti paga, omanggi nggino yoknisin o,” yiluk yogokike. 8Esigit diluk yogokikemo korlak eti agoya nen asuk arat wat disikemo nogo nen, men yogokike,

“Nombae, at Yohanes ima wusa ʼbiyiligogo mende etnogo unggulowak mbalogo, piring sabak oba ndemerogo woknitnok nen o,” yiluk yogokike. 9Esigit diluk yogokikemo, at nggok Herodes etnogo akla weyak agike mende, Allah endaga kumbuk mbalkonem akoni dogalegat pesta iyago nuwogoluk nandorli waguka mende yomenogo arat inasuk kolkukasikmo yiluk, agoromi nen korlak etnogo nen yisike ndak-ndagat kagarogo wogosi lowagaluk yogisasike. 10Esigit diluk yogisasikemo lagukasik nen, Yohanes etnogo akoni ininggi kerle warogo ʼbiyiligogoma werekma unggisukasik nen, arlonggop ade ʼbogokogo wakuka. 11Arlonggop ade ʼbogokogo warogo, unggulowak mbalek piring sabak paga ndemerogo wolok wagikesik korlak sarlisik etnogo wogokike. Wogokikemo, korlak etnogo nen, agoya wogosi lagike. 12Esigit diluk kagakukama, at Yohanes agoromi wagukasik nen, ebe warek etnogo agatma sal diluk nen, Yesus yogosi laguka. Esigit diluk kagakukasik dogolik, at Herodes nen Yesus abok kolkikesik,

“Yohanes iluk agasik kagarigogo kigi,” yiluk yisike o.

Yesus nen akoni inebe 5.000 paga kimbiri melagisasike wene

(Markus 6:30-44; Lukas 9:10-17; Yohanes 6:1-14)

13Akoni amberek nen,

“Herodes nen Yohanes wake,” yiluk yisukama, Yesus asuk kolkikesik nen, o etoma togot diluk, imangge nggu warogo arligat ʼbogokogo o akoni inaren dekma etoma lagikemo, akoni inebe mondok dogalegat inasuk kol diluk, inaguma unggul dombok nen i aik obangge nen omborlik laguka. 14It alebagik lagukasik werekma, at Yesus imangge nggu warogo lago lagikesik, nggu akla nen inoba dukisikesik, akoni dogalegat yomenogo ilenggen lagiyalok inaʼbuwa kasikesik nen, it u warek mende yomenogo pano kagarinakike. 15Esigit diluk u pano kagarinako nggorlek, o arat liyok yisikemo nen, at ane waganggo laguka mende yomenogo Yesus oba wagukasik, men yogokuka,

“Nit o yoma akoni inaren dekma werekma, o arat liyok yi laga yoma, akoni dogalegat yoma inambiri inenggaerek nen onggo mbalawak nen, o yoma eragalilungge o unggul ʼbugurlagatmangge laʼbiyan o,” yiluk yogokukama, 16at Yesus nen,

“It yoma nen lausak dek o. Inambiri nausak mende kit nenat melagisani o,” yiluk yogisasike. 17Esigit diluk yogisasikemo, it nen,

“Nit, kimbiri roti mende 5. Nen, ikan, mbere. Etaat werek o,” yiluk yogokuka. 18Esigit diluk yogokukama, at Yesus nen,

“Etaat woknisi witni o,” yiluk yogisasike.

19Yogisasikemo, wogosi wagukama, at Yesus nen akoni dogalegat yomenogo men yogisasike,

“Kelaben enggamangge etoma korek larik lani o,” yiluk yogisasikemo korek larik lagukama nen, roti 5 eranogo inom, ikan mbere eranogo inom, inggimo waganggikesik nen, ilenggen mbogot oba liyakasikesik, Allah keyagi warogo nen, roti nggusogo agoromi ane waganggo laguka mende yomenogo nen sumburisawagaluk wogisasikemo it nen sumburisasuka. 20Sumburisasukama, it inebe taʼbokogonat kimbiri inaʼitogo nasukasik ndindu agikemo, mul yago 12 oba ambem kerokogo yukarlogo ʼbisuka. 21Akoni inebe taʼbokogonat nasuka mende eti elegerlak inom, kumi inom, ininggi wenaginakidek. Ap inarluwendek dombok, inebe 5.000 wenaginakuka.

Yesus iyok i agum obangge ʼbilik wagike wene

(Markus 6:45-52; Yohanes 6:16-21)

22Esigit diluk arak nasukama nen, at Yesus nen at agoromi ane waganggo laguka mende yomenogo men yogisasike,

“An akoni dogalegat yoma laʼbiyak nen, kit ndak nggu akla unggiluk i aik ilibagangge wundalko dogoni o,” yiluk ane obatnerogo yogisasike. 23Esigit diluk yogisasikemo nen, wundali wago nggorlek, at Yesus nen akoni yomenogo inagumongge dombok laʼbiyasikesik nen, at arligat ndom oba sembayan yigiluk dagisikesik werekma o ki agikemo, arligat etoma welagike. 24Werek nggorlek, agoromi yomenogo imangge nggu warogo walegat i ndumo kisogo asi wagukasikmo, kwiyakne obatnerogo inelokomangge nen pulka wagikemo, i kokdabu mondok pulkasi dogolik, nggu etnogo abel denggak-penggakogo kagako lagike. 25Esigit diluk kagakonem, o wisigiluk kagako nggorlek at Yesus inoba wisigiluk, i agum obangge iyok ʼbilik wagike. 26Esigit diluk iyok i agum obangge ʼbilik wagonem, it agoromi ane waganggo laguka mende yomenogo inilenggen lakasukasik nen, inagut lagukasik, inayuk nen,

“Iya! Monggat waga,” yiluk, inane naik-waik yisuka. 27Esigit diluk yisukama, at Yesus nen,

“Kinagurakma. Nagoromi. An nebeat wirigogo. Kit kinayuk agup o,” yiluk yogisasike. 28Yogisasikemo at Petrus nen,

“Newe. Kat kebeat kalok, an koba i agum obangge wisik nen,

Eme o, yiluk yoknisin,” yiluk yogokikemo 29at Yesus nen,

“Eme o,” yiluk yogokike. Yogokikemo, at Petrus etnogo nggu akla nen dukisikesik nen, i agum obangge Yesus oba lagike. 30Lagonem, kwiyakne obatnerogo pulka wagikemo, ilenggen kalok ayuk agikesik ima naʼbukogo wusagin salek, ane naik yisi dogolik,

“Iya! Newe! Ndil nabi me o,” yisinem eranogoat, 31Yesus nen inggi pagogo mendisi dogolik,

“Kat kendainggen noba panggot digidek, kendainggen mbere welaganma eti nenaluk,” yiluk yogokikesik, 32it imbisak nggu akla unggisuka kak, kwiyakne etnogo dek agike. 33Deka agikemo, it nggu akla welaguka mende yomenogo nen Yesus pogorako dogolik,

“Kat eberogonat Allah aʼbut kiyogo o,” yiluk yogokuka.

Yesus nen akoni o Genesaret mende u pano kagarinakike wene

(Markus 6:53-56)

34Esigit diluk kagatluk, etoma nen nggu warogo wundali wago lagukasik nen, o Genesaret eta mot-mot asi waguka. 35Wagonem nen, it akoni etoma mende nen Yesus ebe arat didisukasik nen, at abok o unggul dombok yogisilik laguka. Yogisilik lagukama, akoni u warek mende taʼbokogonat wogisek Yesus oba wagukama, 36it nen Yesus iyom ilugun ininggi pakawogoluk nggino yiluk iyom etnogo ininggi pakasuka mende inoba pano aguka.

Currently Selected:

Matius 14: DNA

Highlight

Copy