Yohanes 15

At Yesus nen, “O anggur erlo an nebeat o,” yiluk yogisasike wene

1At Yesus nen wene esigit diluk yogisasikesik nen, yabunggane wene omanggi men yogisasike,

“O anggur erlo an nebeat o. Nen, ebe Indewerek eti an Nombaeat o. 2O inggiloʼbak dombok, an noba kunik dogolik enggen yikidek kalok, mbalogo laʼbigin mende, inggiloʼbak ebe dombok enggen yiko kalok, amberek inom dogalegat yiko dogowagaluk engga mbalogo yorla yebeligin o. 3Nen, kit, an nen wene yokisiligogo eti paga, kinengga negen mbalogo yorla yebelogo ʼbinagisikemo werek o. 4Esigit diluk kinengga negen mbalek werek eti, kit an ninom kunik, nen, an kit ninom kunik, doguwok o. O inggiloʼbak eti o erlo paga kunik dek kalok, enggen yisusak mondok erlok dek o. O ebe paga kunik kalok, enggen yirigogo eti kak, kit an ninom kunik dogogun dek kalok, pano mende kagasusak erlok dek o. An nebe paga kunik kalogat, pano kagasusak o. 5O ebe anat o. Nen, inggiloʼbak kirat o. Kit an ninom kunik dek, we denggeksek dogolik, yi mende ndi mende omanggi kagasusak mondok erlok dek eti paga, at ta nen an nimbisak kunik, nen, an at nimbisak kunik, dogogun kalok, at eti enggen dogalegat yisu kak, pano mende nggokogo kagasigin o. 6Nen, o inggiloʼbak mbalogo laʼbiyiligogi mende mbuk agonem, akoni nen nomologo ʼbiluk kindumo mbo laʼbiyasinem kali niligogo eti kak, ap ta nen an nimbisak kunik dek, denggeksek werek kalok, esigit dilugat mbalogo laʼbumo kali nigin o. 7Kit an ninom kunik dogolik nane kinakla werek kalok, nena mende kit warlok mende an nggino yoknisumo wokisamo korlagunat o. 8Kit kinenggen dogalegat yisu kak pano mende nggokogo kagasugun kalok, akoni nen an Nombae pogorasugun o. Kit kinebe ebe nagoromi nane waganigogi mende dogolik, esigit dilugat kagako dogogun o,” yiluk yogisasike.

9At Yesus nen wene esigit diluk yogisasikesik nen omanggi men yogisasike,

“Nombae nen an endainggen kunik werek eti kak, an nen kit nendainggen kunik werek o. Esigit diluk kit nendainggen kunik dogik nen, an ninom kunigat dogono o. 10Nen, an Nombae nen,

Yigit diluk kagatno, ndigit diluk kagatno, yiluk nasuk warogo yoknikike mende eti, an nen at ane kologo kagakonem, at nen an endainggen kunik werek eti kak, kit esigit dilugat, an nen kit kinasuk warogo,

Yigit diluk kagatno, ndigit diluk kagatno, yiluk yokisaligogo mende eti, kit nen an nane kologo kagako dogogun kalok, an nen kit nendainggen kunik dogogin o. 11Nen, an nakla arlenggen kiligogo kak, kit kinakla arlenggen kasi dogolik, yabunggane kinakla arlenggen mondok nggogat kasi dogobagik nen yiluk, wene eti taʼbokogonat yokisigi o. 12Kit nen kagako dogobagik nen yiluk, wene ebe yiat kinasuk warogo yokisak,

An nen kit kinaʼbuwa werek eti kak, kit nen esigit dilugat kit-kit naʼbuwa-kaʼbuwarogo dogobagik nen yiluk yokisigi o. 13It amberek inagarlagi inom inendainggen kunik dek negen mende, ap omanggi agarlagi inom endainggen kunik nen, it inake watlasigin etiat, mondok nggogat o. 14Nen, an nen, kinasuk warogo,

Yigit diluk kagatno, ndigit diluk kagatno, yiluk yokisaligogo mende eti, nane kologo kagako dogogun kalok, kit an nagarlagiat o. 15It akoni inanduwanengge mende eti ineugi kagarigogi mende inonggodek eti paga, an nen kurli yogondak yi paga nen,

Kit an nanduwanengge, yiluk yokisagin dek o. Yi wene ndi wene Nombae nen yoknikike mende taʼbokogonat yokisaligogo eti paga,

Nagarlagi, yiluk yokisaligogo o. 16Kit nen an miknakigip ʼbuk. Dek o. An nen kit mikinakigi eti o enggen yirigogo kak, mondok dogogin mende kagasi lobagik nen yiluk, kinebe mikinakigisik mendinagagi. Eti paga, nena mende, kit warlok mende an nendaga mbalogo Nombae nggino yogosugun kalok, at nen wokisaginat o. 17Nen, an nen wene kinasuk warogo yokisigi eti, ebe nggok,

Kit-kit naʼbuwa-kaʼbuwarogo dogono o, yiluk yokisigi etiat o,” yiluk yogisasike.

Yesus nen, “Akoni agat oba mende nen inaʼit mondok kagat kinako dogogun,” yiluk yogisasike wene

18At Yesus nen wene esigit diluk yogisasikesik nen, yabunggane omanggi men yogisasike,

“It akoni agat oba mende nen inaʼit mondok kagat kinako kalok, alebagik an ndak inaʼit mondok kagat nakuka etnogo kinakla ebetno o. 19Kit kinebe akoni agat oba mende dogolepma, it akoni agat oba mende nen,

It nit ninagoromi, yiluk inendainggen kunik kagat kinabilep mende, kit kinebe it akoni agat oba mende werekma mikinakigisik nen wokinakigisikmo kinebe it mende werek ʼbuk. Eti paga, inaʼit mondok kagat kinabigogi o. 20Nen, ap nggok omanggi inapma negen werek nggorlek, at anduwanengge mende nggok negen dogoligogo dek o, yiluk yokisasigi etnogo kinakla ebetni o. It nen an weyagat nako kalok, kit esigit dilugat weyagat kinabugunat o. Nen, it nen an nane kologo kagako kalok, kit kinane kologo kagasugunat o. 21Esigit diluk mende, it nen, at an laʼbani wagike mende etnogo ebe inonggodek eti paga,

It yi at agoromi, yiluk, wene yokisigi eti taʼbokogonat kagat kinabugun o. 22An wagagisik, wene taʼbokogonat eti it yogisigidek dogolepma, it weyak yiluk wene inoba ʼbiluk dogolep dek ambigi o. Mende, yogondak, wene yogisa wagi eti paga, it nen

An weyak kagakidek, yiluk, wene inoba mende nggosusak erlok degat aga o. 23At ta nen an mondok aʼiret dangge kalok, an Nombaeat ebeat aʼiret deke o. 24It akoni amberek nen kagarigogi mondok dek mende, yi wene ndi wene inil oba kagako lagagi etnogo kagako dogolep dekma,

It weyak, yiluk yilep dek o. Esigit diluk mende, an nen wene eti taʼbokogonat kagakonem inilenggen niyasukasik nen, an Nombae nimbisak inaʼit mondok kagat ninabigogi o.

25Esigit diluk mende, Allah nen,

Yigit diluk kagatno, ndigit diluk kagatno, yiluk inasuk

wakike mende eti paga, yigit diluk kolal mbalek werek,

Wene erlo dekma, it nen an mondok inaʼiret dangguka, (Mzm. 35:19; 69:4=TB 69:5)

yiluk yisikemo, kolal mbalogo ʼbisuka mende eti ebeat asuwagaluk esigit dilugat kagarigogi o.

26Kit yamakiyasi dogowagaluk Allah Agurengge ebe wene yogisawagaluk wirigogo mende eti an Nombae werekma nen kit kinoba laʼbi wisumo, at nen an nabok ʼbukakogo yokisasi dogogin o. 27At nen, an nabok esigit diluk yisi nggorlek, kit nen, an kit ninom ibibirat nen welagagusikmo eti paga, kit nen an nabok ʼbukakogo yogisasi dogogun o,” yiluk yogisasike.

Currently Selected:

Yohanes 15: DNA

Highlight

Copy