Yohanes 14
14
Yesus nen, “An o kit dogogunmo nggareli ligin o,” yiluk yogisasike wene
1At Yesus nen wene esigit diluk yogisasikesik nen, yabunggane men yogisasike,
“Nagoromi. Kit kinakla nen, Iya, yiluk kinendainggen pisik dogogup o. Kinendainggen Allah oba panggot digik, an noba panggot digik, kagako dogono o. 2An Nombae aguma etoma, o kit dogumo obalik dogalegat salek werek o. Esigit diluk dek dogolepma, an o kit dogogunmo etoma nggareli ligin, yiluk yokiselep dek o. 3An o etoma arat lalok kit kinaguma arat nggarelogo ʼbiluk nen, an dogoginmo etoma ninom doguwok nen yiluk, suguluk wokinabi wisigin o. 4Nen, o an liginmo eti kolak ebe kit kiniluat o,” yiluk yogisasikemo, 5at Tomas nen, men yogokike,
“Newe. O kat liginmo eti ninonggodekma, kolak eti ninggit diluk nen ninilu asusak o,” yiluk yogokikemo 6at Yesus nen, men yogokike,
“Kolak inom, ebe wene inom, inilugurinabigogo mende inom, eti an nebeat o. At ta nen an noba wagidek kalok, Nombae werekma unggusak mondok erlok dek o,” yiluk yogokikesik, 7it taʼbokogonat yogisasi dogolik,
“Kit an nebe kinilu agap kalok, an Nombae kinilu asugunat o. Kinilu asugun eti kurli yogondak kurli nen, at ebe kinilu agik, kinilenggen kigik, arat kiligogi o,” yiluk yogisasikemo, 8at Filipus nen, men yogokike,
“Newe. Ninilenggen kalok ninendainggen dirlukogo dogowagaluk, kat kombae eti ebe yanggul nisan o,” yiluk yogokikemo, 9at Yesus nen, men yogokike,
“Filipus nagot o. An o pagane nenat ninom welago mende, kat nen an nebe didanggidek welaganma kigi. At ta nen an ilenggen niyasi kalok, an Nombaeat ilenggen kiligogo o. Esigit diluk mende, kat nen,
Kombae eti yanggul nisan o, yiluk yegen eti ninggit diluk nen yegen. 10An nen Nombae nimbisak kunik, nen Nombae nen an nimbisak kunik, werek eti kat didiligogon dek a?” yiluk yogokikesik it taʼbokogonat yogisasi dogolik,
“An nen wene yokisiligogo eti an nakla nen nggagalogo yokisiligogo ʼbuk. Dek o. An Nombae nimbisak kunik dogolik, an nane paga nen yigik, ninggi paga nen kagakik, kagarigogo mende eti at enggaerek nenat kagarigogo o. 11An nenat Nombae nimbisak kunik, nen, Nombae nen an nimbisak kunik, werek yigi eti eberogonat yiluk, kit nen didini o. Eti didusak erlok dek kalok, an kagako lagi mende eti kinilenggen kalok, didanini o. 12Ta nen endainggen an noba panggot disi kalok, an kagarigogo mende eti at nen kagako dogoginat o. An kagarigogo eti ʼbugurlagat mende, an Nombae oba ligin eti paga, at ta nen endainggen an noba panggot diluk werek mende eti nen mondok nggokogonat kagako dogogin o, yiluk nane eberogonat yokisigi o. 13Nen, at ta nen, yi mende ndi mende an nendaga mbalogo Allah nggino yogoko kalok, an aʼbut nen kagakonem, it akoni nen Nombae pogorasuwagaluk, an nenat kagasigin o. 14Esigit diluk kagasigin eti paga, ki nen yi mende ndi mende an nendaga mbalogo nggino yoknoko dogono. Esigit diluk nggino yoknoko kalok, an nen kagasigin o,” yiluk wene yogisasike.
Yesus nen, “Allah Agurengge wokisagin,” yiluk abok yogisasike wene
15At Yesus nen wene esigit diluk yogisasikesik nen, wene omanggi men yogisasike,
“Kit an kinendainggen kunik kalok, an nen kit yigit diluk kagako dogono, ndigit diluk kagako dogono, yiluk yokisaligogo mende eti kagako dogogun o. 16-17Esigit diluk kagakonem, kit yamakiyasi dogolik, kinom mondok dogobagik nen yiluk, an nen Nombae nggino yogosumo, at nen omanggi wusakisa wisigin o. At eti ebe Allah Agurengge ebe wene yokisasi dogogin mende. Esigit diluk kinoba wusakisa wisumo, it akoni agat oba mende nen, at eti ebe inonggodegat. Nen, ebe inilenggen kugun degat, eti paga ebe waganusak erlok degat o. Esigit diluk mende, kit kinarligat, at ebe kinom dogolik, kinakla mondok dogogin eti paga, at ebe kinilu dogogun o. 18An, kit kinebe elege irlaganggot mende negen togot dinagaluk ligin dek o. Yabunggane suguluk ʼbikiya wisiginat o. 19Ninggi ʼbugurlagat dogoluk nen, akoni agat oba mende inilenggen niyagun mondok dek mende, an nilugat dogogin eti paga, kit yabunggane kinilugat dogogun o. Kirat kinilenggen niyagun o. 20Esigit diluk kinilenggen niyagun etinem, an Nombae nimbisak kunik werek, nen, kit an ninom kunik, nen, an kit ninom kunik welago mende eti kinilu asugun o. 21At ta nen, an nen, yigit diluk kagako dogono, ndigit diluk kagako dogono, yiluk yokisigi mende eti nane kologo kagarigogo kalok, an nebe endainggen kunik mende at etiat o. Nen, Nombae nen at eti endainggen kunigat o. Nen, an nen at eti nendainggen kunigat dogolik, nebe didanuwagaluk yanggul isigin o,” yiluk yogisasikemo, 22ap Yudas Iskariot etnogo ʼbuk. At Yudas ninat mende omanggi nen, men yogokike,
“Newe. Kat kebe didaguwagaluk, akoni taʼbokogonat yanggul isigidek, nirat yanggul nisagin eti nenaluk nen,” yiluk yogokikemo, 23at Yesus nen, men yogisasike,
“At ta nen, an nebe endainggen kunik kalok, nane kologo kagako dogogin o. Nane kologo kagako kalok, Nombae nen at eti endainggen kunik dogogin o. Esigit diluk dogolik, an Nombae nimbisak ap eti oba witluk, at ninom mondok dogogun o. 24Nen, at ta nen, an endainggen kunik dek kalok, an nane kologo kagakidek etiat o. An nane kit koligogi eti, an nane mende ʼbuk. An Nombae laʼbani wagike mende etnogo aneat o.
25-26Wene eti an nebe kit ninom dogolik, yokisasi lagi. Mende, an Nombae nen at Agurengge kit yamakiyasi dogowagaluk, an nendaga paga wusakisa wisumo, at nen yi wene ndi wene taĘĽbokogonat yanggul kisigik, an nen yokisasi lagi mende eti taĘĽbokogonat kinakla ebet lagik, kagako dogogin o. 27Kit kinendainggen dirlukogo dogowagaluk an nendainggen dirluksek werek mende wokisalok ligin o. Eti akoni agat oba mende nen wogisiligogi eti kak wokisagin dek eti paga, kinendainggen pisik dogolik kinayuk agup o. 28An ligin mende, yabunggane suguluk kinoba wisigin o, yiluk yokisigi etnogo arat kinasuk kolkep ambigi. An nebe kinendainggen kunik dogolepma, an Nombae ebe nggogat, nen, an nebe erlok dek eti paga, an Nombae oba ligin eti pasik kinakla arlenggen kelep o. 29Wene taĘĽbokogonat yokisigi eti ebe kagat lago kalok, kit nen,
Wene yoknisasike etnogo arat kagat laga yi, yiluk didiluk, kinendainggen an noba panggot dubagik nen yiluk, wene eti ebe awan kagat lagidek werek nggorlek, abok ndak yokisigi o. 30Akoni agat oba mende inewe nggok etnogo ebe wirigogo eti paga, an wene dogalegat yokisagin dek o. At eti wisigin mende, an at inggi paga welagidek o. 31Esigit diluk mende, an Nombae nendainggen kunik werek eti akoni agat oba mende inilu asuwagaluk, an Nombae nen nasuk warogo yokneke mendeat kagako lagi o,” yiluk yogisasikesik nen,
“Nagoromi. Luwok nen melatni o,” yiluk yogisasike.
Currently Selected:
Yohanes 14: DNA
Highlight
Share
Copy
Want to have your highlights saved across all your devices? Sign up or sign in
