Salmos 102
102
Kulnin bukna muihni as minit yulna
Kulnin bukna as Papang muhni yakat minit yulna dutni dakawa kidika yulni.
1Dawan, mikityultayang adika dakah,
¡datangkat yang sarahtayang kidika man yakat kiwikawang!
2Man muhma kidika yangkaupak malwinih
kulnik kaida mani balna yakat;
¡tapama yuta yadakah!,
¡sirihni nangkitlatah, mayultingkat!
3Yang sangkika adika danhkalwi sihm wayau kapat,
yang wakalki balna adika buswi sihm kuh tuturni kapat,
4yang kulnik kidika bukna
sihm dibasta kapat kusulawi;
¡di bik kaskih yawaski!
5Ukitak kidika wakalki yakat birki
uba aidayang kidika yulni.
6Yang laih sihm kauhmak wanilang kubamhni kapatyang,
kaput bik pa daukalna paskau kubamh kapatyang.
7Amasyang.
Yang laih sihm ū makau uhubin alas sīkkidika kapatyang.
8Waihkila balna kidika yauhuswi laihwatwas palni
dawak ayangni kidika duwi dutni yayuyulwi.
9Di kasnik pāni yakat, wan manah uktayang;
yang dinik balna kidika laih mikwas karak bānawi,
10man kulnam daukalna kidika yulni,
yadulaunaman, usnit dawak yarumhlaknam yulni.
11Yang maki balna kidika bayakwi kiwi,
sihm masanni bayakwi kiwa kapat;#Job 8:9; 14:2; Sal 39:5-6; 109:23.
kusulatik yawayang sihm dibasta kapat.
12Kaunah Dawan man laih, ban kaput atnin yakat king āwaman;
¡man ayangma kidika laih ban isningnakatna karang!
13Lawah, dawak Sayan yakat minikun talah,
kat mani balna kidika uman laihwi bayakna;
¡mani kaina witing dutni kidika datang disna atnin!
14Man dima yamyang balna kidika kimapala balna yakat dalani tatalwi,
¡daukalna balna kidika yulni kulninna dalani kukulwi!
15Nisan balna bitik dawak sau kingni balna bitik
Dawan ayangni nuhni yayamna karang
16witing yaklauwi Sayan kidika watwi laihwi dulauwi yamwak
witing alasnina yaksihni yakat watwi kalahwarangkat;
17rumhwidana muihni minit yulwa yakat kaldakawarang mani balna yakat
witing kalni dinit yakat bukwi yulwa kidika yakat dakawas-awas karang mani yakat.
18Adika dini ulwi dana karang
sulani aiwarang balna kidika dinina,
kaput laih Dawan yakat ayangni nuhni yayamwarang
batatanhwarang muihni balna kidika.
19Dawan kidika talna sau yakat, makau kisang kaupak,
mayakaupak,
20silak muihni balna kakaida kidika dakana yamna atnin
dawak daunin yayakna muihni balna kidika dilaihwi yakna atnin;
21kaput laih Sayan Jerusalén yakat
kaput laih Dawan ayangni kidika yulwi dawak nuhni bik yamna karang
22nesān balna bitik
kal-ududuhwarang mani yakat ayangni nuhni yamna atnin.
23Witing yaklauwi paraski yadakyakna tapasyakat;
dawak sangkika adika parahni yamna.
24Yang kalyultayang: “Yang Papangki,
baisa sangkika adika papusbahkat yaduwi kiwinih.”
¡Man kurihma balna laih sarandiski!
25Tatuna kaupak sau adika pāni pamni kalanaman;
makau kisang kidika bik man yamnaman.
26Kidika balna bitik laih bayakwi kiwarang,
kaunah man laih ban awama.
Kidika balna bitik witwarang, sihm asna kapat;
¡man lawa satuk yamma, dawak satuk karang,
muih as asnina satuk āwa kapat!
27Kauna man laih banman;
man kurihma balna kidika danhkalwas ki.#Hib 1:10-12.
28Diana karang rahm dutnidis kidika,
dini yamyang sulani balna yakat;
man muhma tani yakat dina awama pānina.
Currently Selected:
Salmos 102: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
