Matyu 28
28
Jisas watwi sauū kaupak yaklauna kidika
(Mk 16:1-8; Lk 24:1-12; Jn 20:1-10)
1Yakurupdinin mani bayakna mani kat, sandi wisam ma tatuna kawa kidika yakat, Mery Makdalen dawak Mery uk kidika karak sau ū yakat talna uina dai. 2Sirihni palni sau isihna dai, kat Dawan innisal as yaklakwi sauū yaihnit yakat kiwi kipala taihna sakdai kidika dulauwi minit yakat yalahna dai kidika yulni. 3Insal kidika laih sihm alwana yaringni lapwa kapat dai, dawak prakni kidika laih sihm mukus pihni kapat dai. 4Kalbauyang muihni balna kidika laih talwi yamaduwi diyukna dai dawak sihm muih dadauna kapat kakalna dai. 5Insal balna kidika yaklau muih yayal balna yakat diyulna:
—Manna yamaduduwinih. Yang nuyang manna laih Jisas pan prihni kau ilwi papana yakat waltamana kidika. 6Akat laih diski, kaunah watwi yaklauna, witing yaklau yulna dai kaput. Aiwa talnauh ahana dai pani kidika. 7Sirihni palni yawa disaipil balna yakat diyultanauh: ‘Watwi yaklau, dawak manna tamatna yakat kiwarang ki Galilea yakat; kidika yakat kaltalnama ki.’ Adika ki yang manayulnik dini dai kidika laih.
8Muih yayal balna kidika laih sirihni palni sau ū kaupak yamaduwinah dawak alasna karuk bik uina dai, dawak kiri uiwi yul kidika disaipil balna yakat diyuyulna dai. 9Kidika yakat Jisas laih muih yayal balna kidika muhnina yakat kalahwi diparasna dai. Muih yayal balna kidika laih Jisas yaihnit yakat uiwi kalni yakat wakaihwi ayangni tanit nuhni yayamna dai, 10dawak witing yaklau diyulna:
—Manna yamaduduwinih. Yawa yang wirahki ahal balna yakat diyultanang kat Galilea yakat uiwang, bahang kidika yakat yatatalwarang.
Kalbauyang muihni balna yuyulna kidika
11Muih yayal balna kidika laih uiwa bangkat, kalbauyang muihni balna maintalwa bangdai kidika kaupak buas tawan nuhni yakat uiwi sumalyang balna taninatuna balna yakat diyuyulna dai ais kalahna dai kidika bitik. 12Kidika tunan muihni balna kidika laih muihbararak balna karak yul bauwi talna uina dai. Dawak kalbauyang muihni balna yakat laih lalah mahni palni diayana dai, 13yul yuyulna muihni balna yakat:
—Manna laih pukta ama bangmana kat Jisas disainipil balna kidika aiwi Jisas muihni nuhni kidika mamalna tinama. 14Dawak adika dini kabamint muihni kidika dakawarang kat, yangna lawik kulnin laihtanaki ki, dawak manna yakat laih tamatna daktanaki ki.
15Kalbauyang muihni balna kidika laih lalah kidika duwi ais yamnin diyulna dai kat kaput yayamna dai. Dawak adika yulni kuduh warmani kat bik Ju muihni balna pasyakat awaihwa kidika.
Jisas yaklau disaipil balna yakatyamnin diyulna kidika
(Mk 16:14-18; Lk 24:36-49; Jn 20:19-23)
16Kaput bahang, disaipil balna 11 kidika laih Galilea yakat uina dai,#Mt 26:32; Mk 14:28. Jisas yaklau asang as kau uinin diyulna dai kidika yakat. 17Dawak Jisas yakat tatalna mani kat, ayangni tanit nuhni yayamna dai, buas balna kidika laih rahm kukulwas dai karang bik. 18Jisas laih witingna yaihnitna yakat kiwi aput diyulna:
—Papang yaklau parasni yana kisang yakat dawak sau akat bik. 19Bahang yawa nesan muihni balna bitik yakat yang disikipulo balna diyamtanauh;#Ap.w 1:8. Papang ayangni, Walanibis ayangni dawak Spirit Holi ayangni usnit kau bik was disitanauh, 20dawak manna yakat yamnin manayulnayang kidika bitik witingna yakat disumaltanang kat dakawi kaput yayamwang. Yang nikingkauh laih, ma bitik yakat manna karak awaki ki, ma witni mani kat.
Currently Selected:
Matyu 28: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
