Matyu 27

Jisas laih Pailat tingni yakat ahana

(Mk 15:1; Lk 23:1-2; Jn 18:28-32)

1Ma payahlawa kat sumalyang balna taninatuna balna kidika bitik dawak Ju muihnibararak balna kidika karak kalpakwi yulbauwi tatalna dai Jisas kidika īna atnin. 2Sitwi Roma kabamintni kayang Pailat tingni yakat uiwi kalalana dai.

Judas dauna kidika

3Judas, Jisas yakat malni kau pāt yakat āna dai kidika muihni, witing īnin yayakna kidika amanglana mani kat, dalanai dakana dai dawak lalah dadasni 30 dai kidika watwi sumalyang balna taninatuna balna dawak muihbararak balna yakat nawatwi diana dai,#Ap.w 1:18-19. 4aput diyulwinah:

—Dutni yamnayang muih al as di as talwas kat īnin tingni yakat anayang kidika.

Kaunah witingna yaklau nangnitlalana:

—¿Dawak ais kidika yangna yulnikna diniyah? ¡Kidika laih man silp patma!

5Bahang Judas laih lalah dadasni balna kidika makat yulnin ūni yakat ruhm lakwi kiwi dinimak yakat wah karwi dauna dai.

6Sumalyang balna taninatuna balna kidika laih lalah dadasni balna kidika dulauwi aput yuyulna:

—Adika lalahni laih a kahna; bahang minit dis lalahni baksni yakat anin sip awas ki.

7Bahang witingna laih kalpakwi yulbauwi tatalna dai kidika lalahni kau sau as bakanna atnin, sauni ayangni laih Sau Suba Yamnin Pani, kidika sauni yakat sau uk muihni balna dadauwa kat nuna atnin. 8Kidika bahang, kidika sauni ayangni kidika warmani kat bik a sauni atwi. 9Kaput kalahna dai prapit Jeremías yulna dai kidika: “Lalah dadasni 30 dai kidika duduna dai, Israel muihni balna yaklau minit ahana dai kidika, 10dawak kidika lalahni kau sau suba yamnin pani kidika bakakanna dai, Papang yaklau yamnin yayulna dai kidika kaput.”#Zac 11:12-13.

Jisas Pailat muhni yakat

(Mk 15:2-5; Lk 23:3-5; Jn 18:33-38)

11Jisas laih kabamint kayang muhni yakat duwi kiuna, dawak kalyulwi dakana:

—¿Manyah Ju muihni balna kingnina?

Jisas yaklau nangnitlana:

—Man lawa yulta man kaputki.

12Sumalyang balna taninatuna balna dawak muihbararak balna kauna kalpakwi yulni yayakwak bik, Jisas laih di as bik nangnitnalawas dai. 13Kidika bahang Pailat yaklau kalyulwi dakana:

—¿Man namangkauh manah yuyulwa kidika dakasmahn?

14Kaunah Jisas laih yul as kat bik biriwi nangnitlawas dai; bahang kabamint kayang muihni kidika laih di as bik amanglawas dana dai.

Jisas laih daunin lani yakat ahana

(Mk 15:6-20; Lk 23:13-25; Jn 18:38—19:16)

15Kabamint kayang muihni kidika laih alasna mani yakat silak muihni as pri kaldawa dai, muih balna yaklau walwi yayakwa muihni kidika. 16Bahang kidika yakat silak muihni ayangni makau dulauna alni as tusdai ayangni laih Jisas Barrabás;#27.16 Jisas Barrabás: tingkau ulna as as yakat laih yulwi aput mānah Barrabás. 17dawak witingna karak aslah bangkat diyulwi dakana:

—¿Manna wais kidika kauh dukih manawih pri kaldana atnik: Jisas Barrabas kidika, kidik awas kat Jisas Mesías kalatwa kidika kauh?

18Kat witing tingni yakat Jisas ahana kidika laih tumnin lani duwi yayamna kidika amanglana dai.

19Pailat laih la yayamwa pani yakat yalahna sakkat yalni yaklau sihwa kat kalyulna: “Man kidika alni la kat kidika karak laih kawinih, kat pukta amana dutni as talyang witing yulni.”

20Kaunah sumalyang balna taninatuna balna dawak muihbararak balna karak kalpakwi muih mahni yakat kulninna lalaihana dai Barrabas yakat pri lani kalana atnin yulni kidika yulna atnin dawak Jisas kidika laih īna atnin. 21Kabamint kayang muihni kidika yaklau watwi diyulwi dakana:

—¿Bu kidika kaupak angdika kauh pri lani kalana atninik dukih manawih?

Witingna yaklau yuyulna:

—¡Barrabas kidika kauh!

22Pailat yaklau diyulwi dakana:

—¿Dawak Jisas, Mesías kalatwa kidika yakat laih ais kalyamkiyah?

Bitik yaklau nangnitlalana:

—¡Pan prihni yakat ilta patah!

23Pailat yaklau diyulna:

—Bahang ¿ais dutni yamnayah?

Kaunah witingna laih watwi sarahwi yuyulna:

—¡Pan prihni yakat ilta patah!

24Pailat laih witing talwa kat kidika alni kaupak dutni as as bik yakwas dai, kaunah muih balna kidika laih baisa pini sararahwa dai, bahang was yulwa kat duiwa kat muih balna bitik muhnina yakat aput yulwi tingni suhna dai:#Dt 21:6-9.

—Adika alni dauwarang kidika laih yang patki awas ki; kidika laih manna patmana.

25Muih balna bitik yaklau nangnitlalana:

—¡Witing dauwarang kidika laih yangna dawak walakinabis balna kauna tunakina yakat bukwarangki!

26Bahang Pailat laih Barrabas yakat pri lani kalana dai; usnit kat dipakwa kat Jisas yakat wiwisna dawak pan prihni yakat ilwi panin diyulna dai.

27Kabamint kayang alni yaihnit kau soldados balna duwa kidika laih Jisas kidika laihwi king ūni yakat duwi uina dai dawak witing yaihnit yakat kalbauyang muihni balna kidika bitik kalududuhna dai. 28Prakni balna kidika yakwi dawi kalmuknin dini pauni as kau mumukna dai 29dawak tunan yakat laih wakal kraunni as ihilna dawak tingnipal yakat laih pan as kalalana dai. Usnit kat witing muhni yakat limbabahwi sarahni kalyulwi aput kalyuyulna:

—¡Ju balna kingnina laih sangka ki!

30Susuihwas kaltutuhwa dai dawak sihm panani yakauna bik tunani yakat wiwiswa dai. 31Kaput sarahni kalyamwa dawi kalmuknin dini pauni kidika yakwi, witing silp prakni balna kidika awi dawi pan prihni yakat ilwi pana atnin duwi uina dai.

Jisas laih pan prihni yakat ilwi papana

(Mk 15:21-32; Lk 23:26-43; Jn 19:17-27)

32Kidika kaupak kalalahna kat, Cirene kaupak muih al as ayangni Saiman kalta kidika kalpapakna dai, kidika alni yakat taihwi kalyayamna dai Jisas panan prihni kidika turukna atnin.

33Golgota pani yakat uiwi kakana mani kat, (yuldarang kat, “Muih matunaki wakalni pani”), 34wain wasni dawak sika wasni tapahlni karak banawi kalalana dai dina atnin; kaunah Jisas laih diwi dakawi diwas dana dai.

35Pan prihni yakat uman ilwi papana kat, kalbauyang muihni balna kidika laih suerte ruruhmna dai Jisas prakni kidika biswi duna atnin yulni.#Sal 22:18. 36Usnit kat kidika pani yakat yalahwi maintatalna dai. 37Dawak tunan minit yakat yul uhulna dai, ais yulni dauna kidika yulni uhulna dai. Yul uhulna kidika laih aput yulwa dai: “Adika laih Jisas, Ju balna Kingnina.”

38Muih dudutni bu bik witing karak ilwi papana dai, as kidika laih tingnipal niningyakat dawak uk kidika laih wadahni niningyakat. 39Muih balna bayayakwa kidika laih tunani yakat isihwi dutni kalyuyulwa dai#Sal 22:7; 109:25. 40aput kalyuyulwa dai:

—¡Man makat yulnin ūni tuklakta ma bas kat laihta dulauta yamtanam kidika,#Mt 26:61; Jn 2:19. man alas kallaihta yaktah! ¡Rahm man kidika Papang Walanibis man kat, alas kallaihta yaktah dawak pan prihni kidika kaupak lakwah!

41Sihm kaput dutni kalyuyulwa dai sumalyang balna taninatuna balna, lā sumalniyang balna dawak muihbararak balna kidika kauna kalpakwi. Aput yuyulwa dai:

42—Muih uk balna yakat laih dilaihwi yakna, kaunah witing alas laih sip kallaihwi yakwas ki. Witing laih Israel kingni: ¡bahang pan prihni kidika kaupak yaklakwang, dawak mayang laih witing yakat rahm kalkuldarang! 43Witing kulnin kidika laih Papang yakat awi duwi: ¡bahang waralaih Papang yaklau kallaihwi yakwang, rahm palni witing yakat kalkulwa kat!#Sal 22:8. ¿Witing Papang Walanibis kidika maiyulwasyah?

44Dawak muih dudutni balna bu witing karak ilwi papana dai kidika bik witing yakat dutni kalyuyulwa dai.

Jisas dauna kidika

(Mk 15:33-41; Lk 23:44-49; Jn 19:28-30)

45Ma tunak kaupak ma ualah kat kidika, sau bitik laih puksani lakna dai. 46Kidika awarni yakat, Jisas laih parasni sarahna dai: “Elí, Elí, ¿lema sabactani?” (yuldarang kat: “Yang Papangki, yang Papangki, ¿ais yulni yaruhmta danamahn?”)#Sal 22:1.

47Kidika yakat muih buas bangdai kidika laih dakakana dai, dawak aput yuyulna:

—Adika alni laih prapit Elías yakat kainin kalyulwi.

48Kidika minitni yakat, witingna kaupak as kalahwi asna yudutni walwi kiuna dai, dawak wain sapahni kau suihwi pan as kau sitwi yaihnit yakat duwi kiuna dai bayahna atnin.#Sal 69:21. 49Kaunah uk balna kidika laih aput yuyulna dai:

—Datang kat taldang, rahm Elías kaiwi kallaihwi yakwarangpa.

50Jisas laih watwi parasni sarahwi dauna dai. 51Kidika minitni yakat makat yulnin ūni asnina#Ex 26:31-33; 2 Cr 3:14. kidika laih papuswayah biswi kalahna dai, ma yakaupak sau yakauh. Sau kidika isihna, kipala balna kidika sahwi kalalahna 52dawak sau ū balna kidika bik apapahna; dawak holi muihni balna mahni palni dadauna dai kidika bik watwi sangka kakalna dai. 53Bahang witingna saunina ū kaupak kalalahna dai, Jisas watwi yaklauna usnit kat, dawak witingna laih Jerusalén sauni holi yakat kakawa kat muih mahni palni ditatalna dai.

54Kalbauyang balna taninatuna witingna Jisas yakat maintalwa bangdai kidika sau isihwa kat dawak di uk balna bik kalahwa kat tatalna mani kat, uba palni yamaduwi aput yuyulna:

—¡Rahm palni adika laih Papang Walanibis dai!

55Kidika pani yakat nai kaupak talwa bangdai, Galilea kaupak muih yayal mahni Jisas usnit uiwi ilp kalalana balna dai kidika. 56Kidika pasyakat bangdai Mery Makdalen, Jems dawak José karak nanangnina Mery, dawak Sebedy walanibis balna nanangnina kauna.#Lc 8:2-3.

Jisas laih sau ū kau nununa kidika

(Mk 15:42-47; Lk 23:50-56; Jn 19:38-42)

57Uman puklana yakat Arimatea kaupak di duyang alni as kiwi kana dai ayangni laih José, witing bik sihm Jisas usnit uiyang kalna dai. 58José laih Pailat yakat kaltalna kiuna dawak Jisas muihni nuhni kidika kalana atnin kalyulna dai. Pilato laih kalana atninna diyulna dai, 59dawak José laih Jisas muihni nuhni kidika duwi linin asnina klin as kat duwi tulna 60dawak witing sauni ū wisam as kipala yakat kuhrna dai kidika pasyakat ana dai. Sau ū pani kungmak kidika laih kipala nuhni as kau duwi putsakwi kiuna dai. 61Kaunah Mery Makdalen dawak Mery uk kidika karak laih sau ū kidika muhnit yakat watwi yalalahna dai.

Jisas sauni ū muhnit yakatmaintalyang muihni balna maintatalwa kidika

62Kidika payahwa kat, yuldarang kat yakurupdinin mani#27.62 Yakurupdinin mani: kidika laih satadi. kidika yakat, sumalyang balna taninatuna balna dawak parisi muihni balna karak kalpakwi Pailat yakat kaltalna uina dai, 63dawak aput kalyuyulna:

—Dawan, yangna iskingna aitayangna kidika alas yulyang muihni witing sangka dai mani yakat yulna dai witing laih dauwarang kaupak ma bas kat watwi yaklauwarang ki atna dai.#Mt 16:21; 17:23; 20:19; Mk 8:31; 9:31; 10:33-34; Lc 9:22; 18:31-33. 64Kidika bahang, man lawa muih sihtang kat sau ū kidika maintatalwang ma bas kidika kat, disainipil balna kidika aiwi Jisas muihni nuhni kidika malwi muih balna yakat Jisas laih yaklauna atwi diyuyulwas tanitkauh. Bahang kaput laih alas witni kidika laih baisa dutni karang ki alas tatuna kidika karak dawakat.

65Pailat yaklau diyulna:

—Kidika yakat manna maintalnin muihni dutamana. Manna yawanauh dawak sau ū kidika yamni palni maintalnauh amput sipmana kat.

66Bahang witingna uina, dawak sau ū minit kau kipala taihna sakdai kidika minit yakat tamp as taihwi yamni palni maintatalna dai; dawak kidika yakat maintalnin muihni balna kidika dadana dai.

Currently Selected:

Matyu 27: SUMU

Highlight

Copy