Josué 8
8
Israel balna kidi Hai tawanni duduna
1Dawan yaklauwi Josué yak kalyulna: “Yamaduwinih dawak kulnam bik bukwinin awaski. Kalbauyang muihni balna dutaman kidika bitik karak yawah Hai tawanni nuhni niningyakat, yang lawik maki minitbayaknin kidika Hai kingni dawak muihni balna minitna yakat. Witing tawanni nunuhni balna dawak sauni kidika man dima karang, 2dawak man yamna awama Hai dawak kingni bitik kau ais Jericó kau yamna man dai kaput dawak kingni bik, adika yakat laih manna sip awanama minit bayakta dini balna kidika duna atnamna tingnilau balna bitik kau. Tawan kidika dangnit munah awa dinitkahni laihtanama.”
3Josué mahka ridi kalwadai, kalbauyang balna bitik karak Hai niningyak kawi kiuna atnin. Kidika yakat war kalbauyang balna tausin 30 walwi yakna dai, kidika balna kidi pukta sihwadai. 4Adika anidar karak: “Yamni dakanauh: manna yawanauh tawan dangnit munah, yaihnit yak yawa waltanauh dawak ridi bang awanauh kalbaunin manah. 5Muih mahni ūk balna kidika laih yang karak tawan niningyak āwik yawanaki, dawak tawan muihni balna yangna yak kalbaunin kalahwi aiwak, yangna alahwik iranaki sihm muhnilau dai kapat. 6Witingna yana uiwarang tawan kaupak iriningkat, dawak witingna kukulwarang watdi maīrana mayang. 7Bahang manna yakmaldana bang kauna alahwanama dawak tawan yak awa dutanama, kaput laih Dawan Papangmana yaklauwi tingmana kat awarang. 8Manna mahka awa dutanama mani, bustanauh, Dawan yaklauwi yulna kaput, kaput anidar ana.”
9Bahang Josué yaklauwi adar diyawadai mahka alah uina atnin, dawak witingna uiwi yakmamaldana Betel dawi Hai walsah yakat, Hai kaupak makawa nining yakat, minit yak Josué laih ban payahwa dai ū labanni balna yakat. 10Payahwa kat, Josué mapiris yaklauna dawak witing muihni balna bitik kulwi talna. Usnityak witing tunanina duna, Israel muihni barak balna karak kalpakwi, dawak Hai yak kalbaunin ridi kakalna. 11Ahal kidika bitik tawan nuhni yaihnit yakat uina, muhnit tani munah, dawak tingpal niningyakauh uiwi panina duduna, dawak sau langni, tawan nuhni kidika bik papus yakat ahana dai. 12Josué ahal tausin singka malbangwadai Betel dawi Hai karak walsah yak, tawan kaupak ma kawa nining yak. 13witing wārni kalbauyang dakwi bu sahwi yakna yulni, as kidika tawan ma kawa nining yak yakmaldana bangki, dawak ūk kidika ū labanni kaupak tingpal nining yakat. Kidika puknita Josué tanit yak kiuna kidika langni papus praisni.
14Hai kingni mahka trabil kidika talwi, sirihni yaklauwi wārni kalbauyang balna kalpakwi dawak Jordán langni yak kalbauna kalahwi uina Israel balna niningna yak, witing amanglawas dai Israel balna ūk tawan dangnit yak yakmaldana bang dai kidika. 15Josué dawak muihni surniyal balna karak kalpakwi mahka kalahwi kikirana Hai kiwak talwi kauhmak wanilang yakat. 16Bahang Hai wārni kalbauyang balna adar as duduna usnit uina atnin, dawak Josué yaklauwi talwi tawan kaupak dawi nai kau kalalahna. 17Hai surniyal balna manah awasdai dawak Betel asbik dis watwas dai Israel balna dangnit yak uiwi kiuna atnin; kaunah usnit witing adar diawak yulni dakawi tawan tanit daknin dis dadana. 18Bahang Dawan yaklauwi Josué yak kalyulna: “Mahka Hai tawanni yak kalbauna atnin sainni kalatah, yang lawik tingma yakat āki.”
19Bahang muih balna yakmaldana bangdai kidika sirihni palni yakmaldinin pāni kaupak kalalahna, tawan nining yakat awawaihwadai dawak kawi duduna minitni yak kuh kau bubusna.
20Hai surniyal ahal balna kidika dangnitna yak wiryaklawi tatalna yak, tawannina kaupak wayau kidika ma kau kisang dawa yakat kilwa sakdai. Kiri yak lanin pāni as bik disdai, kat Israel balna tanit mani yak di talwi kikira dai, waralaih kalbaunin ridi kakalna dai. 21Rahm palni Josué talwak, Israel balna yakmaldana bangdai dawi bubusna usnit yak wiryaklawi aiwi Hai surniyal balna yak kalbabauna. 22Usnit yak, tawan kau kawi duduna dai kalalahna, yuldarang kat Hai balna niningna yakat Israel balna dakni bu kau yaklalauna, kidika balna Hai nining yakat kalbabauna bitik iwi dahn yayamna kat. 23Dis Hai kingni manah sangka dawi laihwi duwi uina Josué muhni tani yakat.
24Hai balna yak usnit uiwi uina balna bitik isparah baini kau ihina usnit yakat Israel Hai yakat nawatwi aina dawak baisa watna bang dai kidika balna yak ihina. 25Kidika mani balna yakat Hai muihni balna tausin 12 dadauna dai, Hai muihni balna yayal ahal karak, 26dawakat Josué kulnin yak adar kidi ban sakdai tawan kidi kawi kalbauna atnin, dawi dahn daukalpapamna tawanni nuhni kidika bitik. 27Israel balna witingna kau di balna bangdai kidika, tinglau balna dai kidika duduna, Dawan yaklauwi Josué yak kalyulna dai kapat, 28dawak Josué yaklauwi Hai buspamna dawak ban atnin daukalna yakat duna kidika warmani ban taldi. 29Hai kingni dai kidika Josué yaklauwi pan as kau sitwi mur'ilna masan kat, kidika kiwak uluhwi lakna atnin sihna dawak dauna kidika tawan yakat duaiwi apamna atnin sihna, dawak minit yak kipala balna ilna dai kidika banki warmani.
Ebal asangni yak Josué la kidi yulwi talwi
30Kaput dawak Josué Ebal asangni yak Dawan Israel Papangni kau sakripais buswi kalanin pāni as yamwi, 31sihm Moses yaklauna Dawan dini yamyang yaklau, Israel balna yak di yulna dai kapat, Moses lani wauhnitaya yak ais ulna tuskapat: “Sakripais busnin pāni kipala sahwas kau yamnin.”#Ex 20:25. Kaput dawak Israel balna kidika sakripais buswi kulnin yamnin walapni kidi yayamwadai kidi watwi kalpapakna kulnin lani kau yayamwadai. 32Kidika usnit yak Israel balna bangkat, Josué yaklauwi Moses la diawadai kidika, sakripais yamwa pāni kinipala yak ulna dai.#Dt 27:2-8. 33Kaput dawak tawan kidika bitik palni, dawi Israel sulani balna dawak pa ūk kaupak muihni balna dawi muih bararak, tunan muihni balna, dawi wihta balna bitik kau palni Dawan pranimis baksni yaihnit yak, yaklalauwa dai, libait sumalniyang balna salahnina yakat ilwi duwi uiwadai muhnityak. Israel tawanni kidika blisin duna atnin yulni, witingna papuswayah kidika Gerizim asangni niningyakat bangdai dawak papuswayah ūk kidika laih Ebal asangni niningyakat bangdai, tatuna kau Moses yaklau ais di yulna dai kaput Dawan dini yamyang muihni.
34Kidika usnit Josué yulwi talwa dai la wauhnitaya ulna kidi aslah bani kau, dawak yamnin yulni, kaput bik dutni ban dai kidi. 35Yul as bik yulwas awasdai Moses yaklauwi pakna dai kidika yamna atnin, Josué yaklauwi yulwi talnin, Israel tawanni bitik muhni yak, sihm kaput bik yayal dawak walabis bik, dawak pa ūk muihni balna Israel pasyakat yalalahwadai kidika balna bik.#Dt 11:29; 27:11-14.
Currently Selected:
Josué 8: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
