Josué 4
4
Jordán kaupak kipala 12 duna kidika
1Jordán wasni kidika yakat bitik dakyaklalana usnit kat, Dawan yaklau Josué yakat kalyulna: 2“Tawan kaupak muih ahal 12 walta yaktah, sulani balna kaupak as as, 3dawak diyultang kat Jordán wasni papus kaupak kipala 12 yayakwang, sumalyang balna yaklauna bangkidika kaupak, dawak duwi uiwi lalakwang adika puknita watwi ūnina labanni papakwarang kidika pāni yakat.”
4Bahang Josué yaklau muih ahal 12 walwi yakna dai yakat diyulwakat uina dai, 5dawak aput diyulna: “Dawan, manna Papangmana lani baksni kidika muhnit yakat Jordán wasni kidika papus yakat awa muihmana kat kat kipala as as yaktanauh, Israel sulani balna kat kat as as, bitik kat 12 atnin. 6Kidika balna laih sain as karang manna tamatna yakat, walamanabis balna yaklau manayulwi dakakawarang mani kat: ‘¿Ais tanka yah adika kinipala balna adika?’, 7manna lawa nangnitnalatanama: ‘Aslah kalahnin lani baksni Dawan dini kidika Jordán wasni yakat dakyaklana kat, was kidika dakni bu dakwi kalahna dai la baksni kidika muhnit yakat. Adika kinipala balna laih akat ais kalahna kidika Israel muihni balna ban kaput isningnakatna atnin bangki.’ ”
8Witingna laih Josué ais yamnin diyulna kidika kat yayamna dai. Jordán wasni kaupak kipala 12 duduna dai, Israel sulani balna kat kat as as, dawak ūnina labanni kat duwi uiwi lalakna dai, Dawan yaklau Josué yakat amput kalyulna dai kat kaput. 9Baisa kidika minityakat Josué yaklau kipala 12 ūk lakna dai aslah kalahnin lani baksni sumalyang balna duwi yaklalauna dai kidika pāni yakat. Kidika kinipala balna warakat bik ban bangki.
10La baksni, sumalyang balna duwi uiwa dai kidika laih Jordán wasni papus yakat wawatna dai, dawak Israel muihni balna laih di balna bitik yayamna dai Dawan yaklau Josué munah pakwak tilahwi diyulna dai kidika bitik yayamna. Moses yaklauwi Josué munah pakwak yulna kidika bitik yayamna. Dawak muih balna kidika bitik sirihni dakyaklalana dai, 11dawak bitik dakyaklalana usnit kat, sumalyang balna kidika dakyaklalana dai Dawan lani baksni kidika duwi, dawak tawan muihni balna bitik tanitna yakat yaklalana dai. 12Rubén sulani kalbauyang balna, Gad sulani balna dawak Manasés sulani balna papuswayah kidika bik was kidika dakyaklalana dai. Kalbaunin dini karuk duwi dakyaklalana dai, dawak Israel muihni ūk balna kidika tanitna yakat lapapakwa dai, Moses yaklau yamnin diyulna dai kaput. 13Muih ahal 40,000 kuihnin manah kalbaunin dini karuk dawak kalbauna atnin ridi Dawan muhni yakat kalpaparna, dawak Jericó sauni langni balna kidika niningyakat uina dai. 14Kidika mani yakat Dawan yaklau Josué yakat kalyamwakat Israel muihni balna bitik alasna dawak rispik kalyayamna dai, Moses sangnika bitik yakat kalyamna dai kaput.
15Bahang Dawan yaklau Josué yakat kalyulna: 16“Sumalyang balna aslah kalahnin lani baksni duwi uiwa kidika yakat diyultang kat, Jordán wasni kaupak kalalahwang.”
17Josué yaklau kalahninna diyulna dai, 18dawak sumalyang balna sirihni palni Jordán kaupak kalahwi sau buhni yakat atatakna kat, was kidika watwi pāni duna dai dawak murwi bahng'ilna dai muhnilau dai kapat.
19Israel muihni balna laih waiku tatuna ma salap kidika yakat Jordán kaupak kalalahna dai, dawak Gilgal yakat uiwi ūnina labanni papakna dai, Jericó kaupak ma kilwa niningyakat. 20Kidika pāni yakat Josué yaklau lakna dai Jordán kaupak kipala 12 duahaina dai kidika, 21dawak Israel muihni balna yakat diyulna: “Manna tamatna yakat, walamanabis balna yaklau manayulwi dakakawarang kat: ‘¿Ais tanka yah adika kinipala balna adika?’, 22diyultanauh amput Israel muihni balna Jordán wasni buhni manah kat dadakna kidika, 23dawak Dawan manna Papangmana yaklau amput Jordán wasni buhni manah yamwakat daklawanamana kidika, sihm muhnilau kau kuma pauni buhni manah yamwakat yangna danayangna dai kapat. 24Kaput laih sau akat tawan balna bitik kidika amanglalawarang Dawan laih parasni nuhni ampus duwa kidika, dawak manna laih Dawan Papangmana yakat rispik kalatanama ban kaput atnin.”
Currently Selected:
Josué 4: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
