Josué 11
11
Josué yaklauwi Jabín dawak aslah kalalahna balna minitna bayakna
1Hazar kingni Jabín, kidika balna bitik dakana, witing yul as sihna Jobab Madón kingni yak dawak Simrón dawak Acsaf kingni balna karak aslah kalpakna atnin yulni; 2dawak bik asang pas tingpal nining kingni balna bitik kau dawak Jordán sauni langni Cineret lakunni wadah nining yak, walang yak dawak Dor yaihnit kau makawa nining kau yakat bik, 3cananeo ma kilwa nining yakat dawak makawa yakat bik, amorreo balna karak, hitita balna, ferezeo balna, jebuseo asang pas kau bang kidika balna dawak Hermón asangni kau heveo balna, Mizpa sauni pīsni yakat. 4Kidika kingni balna bitik kau wārni kalbauyang balna karak kalpakwi dawak aras mahni kau dawak war trukni karak kalahwi uina. Wārni kalbauyang balna mahni palni dai kulnin bik sip awas dai, sihm sat kuma kung kau kauhnimak kapat dai. 5Witingna bitik kau aslah kalalahna dai dawak witingna Merom wasni yaihnit yak watwi bang atna, Israel balna yakat di kalbauna atnin yulni.
6Kaunah Dawan yaklauwi Josué yak kalyulna: “Man yamaduwinih, kat yahan mani sihm awarni adika sat kat kalating manna muhmana tani yak dauwi bubukna karang. Dawak man laih aninaras kalni bahta kuh kau bustanauh.”
7Kaput dawak Josué dawi kalbauyang balna bitik kau aiwi Merón wasni yaihnit yakat walwi yakwi di kalbabauna, 8dawak Dawan yaklauwi Israel balna yak diana minit bayakna atnin, kaput dawak kalbauwak kikirana uiwi uina, Sidón dawak Misrefot-maim kat dawak ma kilwa nining Mizpa wanilang kat uina. Muih as bik sangka didawas dadana. 9Josué witing yamna Dawan yaklauwi adar diana yakat, waihnila balna aninaras kalni bahwi, dawak war trukni balna bitik kau busna.
10Kidika usnit yak kaiwi Hazor tawanni yak kawi duna kidika kuduh aslah kalana pāni kidi papus kat dai, dawak kingnina bik ihiwadai, 11dawak kidika tawanni yak yalalahwa balna bitik kau, imukwi dawak tawanni kidika buspapamna. 12Sihm kaput yamwa dai tawan nunuhni ūk balna dai bik witingna karak aslah kalpapakna dai kidika kawi duwi kingni balna ina, dawak bitik palni daukalmumukna, kat Dawan warkni yamyang Moses yaklauwi sihna dai kaput. 13Kaput kaunah Israel balna yaklauwi asang tuna kau tawan balna bang dai kidika as bik buswas dadana, Hazor yakat bangdai kamanah. 14Isparah kau manah ihiwadai kidika tawanni yak yalahwa balna kidika, as bik sangka dadawas dai dawak tinglau balna bangdai kidika, dawak, di balna bangdai kidika bitik daukalmumukna.
Moses anidar dai kidika Josué yakat yamna
15Dawan yaklauwi Moses yakat anidar bitik kalana dai, dawak Moses yaklauwi Josué yak kalana witing yaklauwi bitik rahm yamwi saran laihna as bik dawi bayakwas dai. 16Josué adika sauni pīsni bitik duna, yuldarang kat asangpas sak yakat, Néguev bitik, Gosén sauni bitik, walang dawak Jordán wakahrni, langni bitik yakat dawak asang pas bitik kau dawak Israel wanilang balna yak bik. 17Halac asangni kaupak, yaklauwi Seir dawak Baal-gad niningyakat, kidika kuduh Líbano wanilang yakat bangkidika, Hermón asangni saryakat, Josué yaklauwi kingni balna bitik laihwi ina, 18kidika balna niningna yakat ma mahni kalbauwi. 19Tawan aslah Israel balna karak pramis yayamna kidika kuduh heveo Gabaón balna, ūk balna kidika laih kawi duna dai witing parasni kau, 20bahang Dawan yaklauwi yamna dai waihla balna kidika sip awas dana atnin dawak Israel balna kau parasni duna atnin. Kidika karak Israel balna yaklauwi bitik palni daukalpamna atnin, as bik pātnina dawak diswas, amput Dawan yaklau Moses yakat yamnin kalyulna dai kidika kaput.#Dt 7:16.
21Sihm kidika mani balna yakat Josué yaklauwi anaquita balna tawannina bitik daukalmukna dai Hebrón asangni yakat, Debir yakat, Anab yakat dawak Judá dawi Israel asangni balna bitik yakat yalalahwadai kidika,#Jue 1:10-11. 22kaput laih Anac sulani muih nunuhni balna dai kidika as bik watwasdai, Israel sauni bitik yakat. Gaza, Gat dawak Asdod yakat manah muih nunuhni Anac sulani balna kidika wawatna dai.
23Kaput laih, Josué sau kidika bitik kalbauwi dakyakna, Dawan yaklauwi Moses yakat kalyulna dai kaput. Usnit kat Israel balna yak sahyakwi diana, witingna dinina atnin. Kidika bayakna usnit kat, kidika pāni yakat kulnin aslah lani sakdai.
Currently Selected:
Josué 11: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
