Josué 10
10
Amorreo balna minitna bayayakna kidika
1-2Jerusalén kingni Adonisedec kasak palni yamaduna witing dakawak Josué yaklau Hai yakat kawi bahna kidika, kaput yamna dai tawanni dawak kingni yakat bik, sihm Jericó yak yamna dai kapat, dawak gabaon muihni balna yaklauwi kulnin aslah yayamna Israel balna karak, bahang waralaih witingna pasningna yakat yalalahwi. Adika witni pīsni yak di kalahna kidik uba palni yamaduna dai, kat Gabaón kidika kuduh tawan as nuhni kulna lani kidi sakdai dawak bik Hai karak bik adika kauh nuhni dai, dawak bik gabaonita balna kidika kulninna dadasni dai kaunah kaput diyamna dai kidika yulni. 3Kidika yulni kat Adonisedec aput yul sihwadai Hebrón kingni Hohan yakat, Jarmut kingni Piram yakat, Laquis kingni Jafía yakat, dawak Eglón kingni Debir yakat bik: 4“Akat aiwanauh dawak ilp yatang kat Gabaón balna nining yak kalbaunin, kat Josué karak pramis yayamna dawak Israel balna yak bik.” 5Kaput laih amorreo kingni balna singka kidika, yuldarang kat Jerusalén, Hebrón, Jarmut, Laquis dawak Eglón kingni balna karak kalpakwi dawak kalahwi uina wārni kalbauyang balna kauna Gabaón nining yak kalbauna atnin.
6Gabaón kau yalalahwa balna kidika yaklauwi aput yul kalsisihna Josué yakat, witing laih Gilgal kau ū labanni balna yakat sakdai: “Manna dima yamyang balna kau ilp dianin kidika yulwas laih atnam awaski. Sirihni aiwa nakitna daktah, asangpas kau king balna bangkidika bitik laih aslah kalalahna nikingna kauh kalbaunin.” 7Kaput laih Josué mahka kalahwi kiuna kalbauyang balna kulninna parasni duyang balna karak, 8dawak Dawan yaklauwi kalyulna: “Man yamaduwinih, yang lawik tingma yak āki ki, dawak witingna asbik man namang yak sip yaklauwas karang.”
9Josué mahka Gilgal kaupak kalahwi kiuna dawak, pukta madah kawi kiuna dawak amorreo balna pini bangkat kawi di lalaihwadai. 10Dawan yaklauwi yamna Israel balna niningna yakat yamaduna atnin dawak kaput Josué kasak palni di ina Gabaón yakat. Usnit yakat Bet-horón tani yakat, uiwi kiuna kaput laih baisa amorreo balna yak ihiwadai Azeca dawak Maceda kat. 11Bet-horón asangni yaklakkiwa yakat amorreo balna Israel balna kaupak kalahwi kikirak, Dawan yaklauwi kipala nuhni as minitna yakat dawak kiuna, yakat kau amorreo balna dadauna Israel kau ihina karak.
12Dawan yaklauwi Israel balna tingnina yakat amorreo balna ana mani, Josué yulbauna dai Dawan yakat tawan muhni tani yakat dawak aput yulna:
“Ma, Gabaón yak wattah;
waiku, Ajalón sauni langni yakat wattah.”
13Dawak ma dawi waiku laih wawatna
tawan yaklauwi waihnila yakat biriwi kalyamna kat.
Kaput yulwi La kat wauhnitaya ulna yakat.#2 Sam 1:18. Ma kidika makau kisang yakat watna, ma as praisni laih watna dai. 14Kaput ma bik disdai muhni lau kau dawak usnit yakat bik kidika mani kalahna kaput Dawan muih as yulwak kaldakana kidi, dawak Dawan laih Israel balna yulnina kalbauwadai.
15Usnit yakat Josué dawak Israel balna karak mahka nawatwi Gilgal ūni labanni yakat uiwa dai; 16dawak king balna singka kidika kiri Maceda yak pa sulihni bangni as kau kawi yakmamaldana. 17Kaunah usnit yak kidika pāni sulihni kidika yayakna dai, kaput laih Josué yakat kalyuyulna dai. 18Bahang Josué yaklauwi aput laih adar diana dai: “Manna kipala kau piramta pāni sulihni yakat puttanauh dawak tani kawa palni yakat tahanin muihni as atanauh witing main talna atnin. 19Kaput kaunah manna akat wawatwinih waihla usnit yak yawanauh dawak dangnit kaupak ustanauh. Datanang kat nawat tawannina yak uinin awaski, kat Papangmana Dawan yaklauwi manna tingmana yak ana ki.”
20Usnit yakat Josué dawak Israel balna yaklauwi amorreo balna niningna yak minit bayayakwadai; dawak witingna yak mahni palni ihina amorreo balna sangka yaklana bang dai kidika watwi pāni wawalwadai. 21Kaunah Israel tawanni balna sangka dawak yamni nawatwi uina dai Maceda ūni lababanni yakat. Yakat kuduh Josué sak dai. Dawak muih as bik Israel balna niningna yakat dutni yuyulwas dai.
22Bahang Josué yulwa dai: “Pa sulihni kidika apahtanauh dawak king balna singka kidika yaktanauh.” 23Kaput yayamwa dai Israel balna dawak pa sulihni kaupak Jerusalén Hebrón, Jarmut, Laquis dawak Eglón kingni balna yayakwa dai. 24Josué muhni tani yak duwi aina mani witing yaklauwi Israel ahalni bitik yak di yulna, dawak kalbauyang tunan balna yakat di yulwa dai witing karak bang dai yakat: “Yaihkit yakat aiwanauh adika kingni balna dininamak yak kalmana kau taihtanauh.” Kaput witingna yayamna, 25dawak Josué yaklauwi di yulna: “Manna yama duduwinih kulnamna bik sauyak lalakwinih, nawatkauh laih kulnamna dadasni yamtanauh dawak Dawan bik kaput yamwarangki manna waihmanala balna bitik karak.”
26Usnit yakat Josué yaklauwi king balna dai kidika ina dawak sihwak kat pan yak sitwi murihilna masan kat. 27Ma kidika mahka kakiwa sak kat Josué yaklauwi sihna dai pan balna kaupak laknin dawak pa sulihni kau yakmamaldana dai pāni balna yak uiwi ana atnin, kidika usnit yak pāni sulihni balna kung kidika kipala nunuhni kau putna dai, warmani kat ban bangki kinipala balna.
Kalbauwi minit bayayakna ūk kidika
28Sihm kidika mani Josué Maceda tawanni kawi duna dawak bitik palni bahwi disna dawak yaka tawanni kau yalalahwa balna bitik kau isparah baini kau ihina, dawak muih as bik sangka di dadawas dai. Jericó kau yamna dai kapat Maceda kingni yakat bik yamna.
29Yakaupak, Josué dawak Israel balna karak Libna tawanni yakat uiwi kakawadai. 30Dawan yaklauwi sihm sat adika tawanni dawak kingni bik tingnina yak ana. Muih asbik sihm sangka dadawas dai, sihm sat Libna kingni kau dawak Jericó kingni kau yayamwa dai.
31Usnit yakat Josué dawak Israel balna karak Libna yak uina dawak Laquis yak bayaknin dawak watwi kalahwi uina tawan nining yak. 32Kidika kaupak ma bu yak wat Dawan yaklauwi Laquis tawanni tingnina yak diana dawak sihm sat Libna kau yayamna dai kapat isparah kau muih bitik ihina dawak yakat tinglau bang dai bitik kau. 33Horam, Gezer kingni, witing wārni kalbauyang balna bitik kalpakwi Laquis tanit dakna atnin kaunah Josué yaklawi minit bayakna dawak muih as bik sangka di dawas dai.
34Laquis kau yamna usnit Josué dawak Israel balna kalpakwi Eglón tawanni yak uina dawak nining yak watwi kalbabauna. 35Sihm kidika mani kawi duduna dawak isparah baini kau kidika muihni balna kawi bitik ihina, dawak bitik didisna sihm Laquis kau yayamna dai kapat.
36Eglón kaupak bayakwi uina Hebrón tawanni yakat,#Jos 15:13; Jue 1:10. dawak witingna yak kalbabauna. 37Witingna kawi duduna mani yakat, dawak bitik palni daukalpapamna, dawi kingni dawak tingnilau balna dawak bik muih balna bitik kau isparah kau ihina dawi yaihnit kau tawanni balna bik sihm Eglón kau yamwadai kaput.
38Kidika kaupak Josué dawak Israel balna karak Debir#Jos 15:15; Jue 1:11. tawanni nining yak uina dawak yakarak yak kalbabauna dai, 39kidika kingni yak isparah baini kau ihina dawak bik tawanni yaihnit kau tawan libitni bitik yakat. Debir tawanni muihni as kat bik sangka watwas dana, bitik kau minit bayakwi ihina sihm sat Hebrón dawak Libna kingni kau yayamna dai kapat yayamna.
40Kaput laih Josué yaklauwi bitik dakyakna. Asangpas, Néguev, walang balna dawak asang dihuni kau kingni kakawa balna bitik minitna bayakna.#Jue 1:9. Bitik palni iwi dismukna dai; di as bik watwas dai dawak muih as bik sangka dawasdai, Dawan dawak Israel Papangnina yaklau amput yamnin kalyulna dai kidika kaput. 41-42Wat aslah kingni balna minitna bayakwadai dawak sauni bitik kawi duna Cades-barnea dawak Gaza dawak Gosén sauni pīsni bitik kaupak Gabaón tawanni kat, kat Dawan Israel Papangni laih, Israel balna yulnina kalbauwa dai. 43kidika usnit yakat Josué nawatwi Gilgal ūni labanni yakat kiuna Israel balna bitik kau.
Currently Selected:
Josué 10: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
