Habacuc 2
2
Papang yaklauwi Habacuc yakat niningkana kidika
1Yang yamni talasak awaki,
sihm ma kau kilwi maintalwa sakkapat,
talki ais yayulwarang pa Papang,
dawak dutni dakik yulnayang kidika yulni ais yayulwarangpa.#Sal 5:3; 130:5-6.
2Dawan yaklauwi nangkitlana:
“Sau pis labanna balna kau duta ultah, di namangkaki kidika,
bahang kaput laihwatwas yamni yulwi talna atnin#2.2 Laihwatwas yamni yulwi talna atnin: satuk wirlanin karang kat: yulwi talwarang muihni kidika, sirihni palni yulwa yakat yamna atnin. yulni.
3Baisa mani kaiwi kawas ki,
adika dini talda adika kaiwi kalahna atnin;
kauna kalahwas karang laih awaski, kalahwarangki.
Man laih tahata, ban naiwi kiwarang kapat bik,#Hib 10:37; 2 Pi 3:8-10.
kat kidika mani palni kidika kiwi kawarang ki.
4Ultah, muih dudutni balna kidika laih witingna manah kapat kaldakawi,#2.4 Muih dudutni...kaldakawi: kaput kidika yamni ulna. Hibru kau laih amangladas ki.
kauna muih barangni balna kidika laih sangka karang,
kat Papang yakat barangni balna bahang.”#Rom 1:17; Gal 3:11; Hib 10:38.
Muih taihyang muihni balna ais kalahwarang kidika
5Ahal witingna manah kapat kaldakawa kidika laih
dukih diawi parasni kidika;#2.5 Dukih diawi parasni kidika: kaput kidika yamni ulna. Hibru kau laih amangladas ki.
yak-urupdas wawalwi, dawak ban baisa dukih diawi,
parasni kidika yaklauwi dutni diyamwa karang bik.#2.5 Parasni kidika...karang bik: Hibru kau laih yulwi wain laih damni maiyamwi.
Tinpas wakakahwi sihm sau ū kapat,
isningnalakwaski sihm daunin kapat,
kidika bahang witingna kidika uiwi
sau balna yakat kalbauwi minit bayakwi duna atnin.
6Kauna sau balna dakyakwi duduna kidika balna sarahni diyulwi,
kidika muihni balna yakat, dawak aput unbabauwarang:
“¡Alakaih, man, man dima-awas balna kidika duta
di duyang kaltaman kidika!
¿Mampat kat ban uduhta awamayah
muih ritsni wayaki dunaman kidika?”
7Ismang aitas man kat
didawan balna kidika uiwarang,
kulnam dalani mamawa kidika mauswi sahmumuhwarang,
dawak asna dis madadawarang.
8Muih balna kidika bitik kalpakwi man namang yakat yaklalauwarang,
dima balna kidika dakyakwi duduna karang,
man lawa dakyakta dunaman kaput witingna yakat.
Mayayamwak launa awama dutni yamnaman balna bitik kau,
dawak sauni yakat dutni yamnaman kidika,
kaput bik tawan nunuhni balna yakat,
dawak kidika muihni balna yakat bik, yamnaman yulni.
9¡Alakaih man, di malta uma yakat puta bung danaman kidika,
di yamadangni balna kaiwa kidika kaupak yakmaldinin yulnin!
10Kaput yamta, man ūma kidika asalni manah muknaman,
dawak daukalnam kidika man alas yamnaman,
sau muihni balna manas di daukalnaman yulni.
11Ahnikau daklana kinipala balna kidika,
dawak pan rabutna balna kidika bik
man namangkauh sararahwarang.
12¡Alakaih man, tawanma nunuhni balna dulauta yamtaman kidika,
rahni balna laih dutni yamna kidika kau dungtaman kidika!#Mi 3:10.
13Papang parasni nuhni duwa kidika
yaklauwi warkma kidika dauh yampamwarang ki,
dawak walama yaknaman kidika bik,
kaput bik laih man wark balna yamnaman kidika
kuhpau kau buswi id dana karang.
14Dawak kaput laih, Papang alas amanglanin kidika laih
sau bitik yakat bahngna karang,
sihm was balna kidika kuma yakat kiwi bahngwa kapat.#Is 11:9.
15¡Alakaih man, yaihmatkau muih balna yakat wasak bayahtamana kidika,
wain dawi di dutni karak āta bayahtaman kidika,
witingna wahdis dadawak talkuhti!
16Risnipik nuhni dai kidika, asalma kalahwarang,
kat Dawan yaklauwi sutak as mawak dima ki
dawak mayamwak Papang sainni disman kidika tatalna karang,
dawak ayangma nuhni atnin dai kidika sau yakat bukna karang.#Sal 75:8; Jr 25:15-29; Ez 23:32-34.
17Líbano asangni yakat dutni kalyamnaman kidika
man namang yakat yaklalauna karang,
dawak yakat di balna ita disyamna man kidika yulni bilmalalauwak irama.
Kidika laih dutni yamnaman yulni kaiwarang
kidika sauni yakat dutni yamnaman yulni
tawan nunuhni balna dawak muihni balna niningna yakat.
18¿Ais ilpni as yah pan kau kidika
awaskat simint kau di wayani as yamwi yakwa kidika?
¿Dawak ais as ilpniyah wayani as as
alasmanah lani yakat kiwa kidika?
Wayani kau yamna balna kidika laih yulbabauwas ki;
¿amput kidika yakat sipyah rahm kalkulna atnin,
muih al yaklauwi yamwa kidika?
19¡Alakaih man, pan kau di wayani yamna yakat
sahmuhtah kaltiman kidika,
dawak kipala as yulbauwas yakat lawah kaltiman kidika!
¿Sip karang witingna yul as yakwi manayulna atnin?
¡Dikah, kat witingna laih sangka alas duduwas bahang,
gol dawi lalah kau manah yayamna karang bik!
20Kauna Papang laih ūni holi yakat sakki:
¡dawak witing nining yakat sau muihni balna bitik ap ki!#Sal 11:4; Sof 1:7; Zac 2:13.
Currently Selected:
Habacuc 2: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
