Habacuc 1
1
Dawan dawak prapit karak yulbabauna
1Adika yulni balna kuduh Dawan yaklauwi prapit Habacuc yakat niningkana kidika.
2Papang, ¿mampat kat man yakat ilp yultik sarahtingkat
yadakas awamayah?
¿Mampat kat kulninna dutni anyang balna yayamwa yulni man yakat mayulting
aiwa yalaihta yaktas awamayah?#Job 21; Sal 13:1-2; 73:4-14; Jr 12:1-4; 14:9; Rib 6:10.
3¿Ais yamta nikingkatamahn,
kulnin kaidinin lani kidika nuhni palni, dawak dutni lani bik?
Kulnin anyang dawak bahwi dis yamnin lani kidika ya-awaihdak ki;
pa bitik yakat kalbilnin lani dawak kalbaunin lani manah ki.
4Lā kat yamwas ki,
muih rahmni kidika kalkau atakna ki,
dutni kidika yaklauwi yamni yakat uiwi kiwi
dawak lā kat kidika dutni yaklawi wirwi.
Papang yaklauwi yulwi
5“Manna talnauh muih balna yakat, awaihdak bangkidika;
tala muihsak dautanauh.
Dini kidika yamnik manah ki,
dawak kidika rahm kultas awanama muih as yaklauwi manayulwarang kat kidika dini.#Ap.w 13:41.
6Caldeo muihni balna yakat wār dulauki,#2 Re 24:2.
dawak muhni balna kidika muih dudutni ki,
dawak witingna laih niningh kukulwi,
sau adika sutni nakas kaupak sutni nakas kat kiri awaihwi
witingna sauni awas kidika laihwi duna atnin.
7Kidika balna laih wayakani dawak yamadadangni ki,
la ūk tatalwas ki, kauna witingna lan kamana laih tatalwi.
8Aniras balna kidika nawah balna karak tanit parasni kikiri,
dawak tanit anyang balna ki kauhmak wanilang sunilu balna#1.8 Kauhmak wanilang sunilu balna: grik kau laih kaput ulna. Hibru kau laih amangladas ki. karak dawakat.
Aras kilyang balna kidika mahni kilwi kikiri,
kaput bik naikau tukwi kawi kalbabauwi,
sihm yakalnuh witing kasnin dini minit yakat kiwi bukwi laihwa kapat.
9Witingna taninapas kau di balna kidika laih bitik daukakalwi,
uiwa kidika tapas yakat yamadangni lani manah dahwi uiwi,
dawak muihni laihwi silak ahawa kidika laih mahni ki,
kuma kauhnimak balna karak dawakat.
10King balna yakat sarahni tatalwi,
dawak muih nunuhni balna yakat bik.
Nanit daknin uni yayamna balna yakat talwi niningna kakarana,
kidika niningnayakat sau uhwi banghilwi dai kidika
munah kilwi kawi kalbauwi dakyayakwi.
11Wing wahni kapat aiwi bayayakwi,
witingna dawan tatalwas ki, kauna parasnina duduwa kidika manah tatalwi.”#1.11 Witingna...tatalwi: sara mani kaput uhulna dai. Hibru kau laih amangladas ki.
Habacuc wāk dakawa kidika watwi yulwi
12Dawan, ¿man kidika ban kaput atnin awasman katpah,
yang Papangki holi nining dautas ban kaput#1.12 Dautas ban kaput: hibru kau laih yulwi: daudas mawarang. man kidika?
Dawan, takitdakyang man,
Caldeo balna yakat man lawa parasnina dianaman
kaput laih witingna la kat kidika yamna atnin.
13Man laih maisihni as bik disman, dutni kidika ban dana atnam,
dawak talkih talna atnam;
¿ampadawak muih dudutni balna yakat ap data ditalaman,
ap datamahn muih dudutni balna kidika
yaklauwi muih yayamni yakat ihiwak?#Sal 5:4-6.
14¿Amput dawak muih balna kidika
kuma kau waspa dini balna kapat diyamtamahn,
dawak tinglau balna king dis kapat?
15Caldeo muihni balna nisan ūk balna yakat kawi duduwi
di pamyang sihm waspa dini laihwa kapat:
kuyuhl kau dawak pamwi laihnin dini ūk kau bik laihwa kidika,
usnitkat, bitik uduhwi talwi alasna kalahwi.
16Kidika bahang, di pamyang kidika witing kuyuhlni
dawak waspa dini karhwi laihwa dini kidika dalani talwi,
dawak kidika dini balna yakat sakripais buswi,
dawak walapni bik buswi,
kat kidika dini balna munah kasnin dini yakwi duwa bahang manas palni, dawak bik yamni.
17Kaput laih ¿Caldeo balna kidika
ban waspa dini karhwi lalaihwa di kidika kau ban karhwi mailalaihwarang yah?
¿Ban ihiwarang yah, miniknakun talwas muih balna yakat?
Currently Selected:
Habacuc 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
