Génesis 44
44
José sunitak
1Kidika usnit kat, José yaklauwi ūni maintalyang yakat pakna:
—Adika ahalni balna biknina kidika plawar puta buhngdata witingna ampus duwi uinin sip kidika kat, dawak witingna lalahnina kidika biknina kungnimak yakat āta sittah. 2Dawak yang sukitak lalah kau yamna kidika laih wirahnina bin bikni yakat āta sittah, witing plawar bakanna lalahni kidika karak libitta.
Ūni maintalyang kidika yamna dai José kalyulna kaput. 3Mahka payahlawak José yaklauwi wirahni balna kidika damukwak uina birininaku balna karak. 4Tawan nuhni kaupak baisa naikau uiwas kat, José witing ūni maintalyang yakat kalyulna:
—Kidika ahalni balna yakat uita yawah, dawak uita kuihma kat diyulma: ‘¿Ais yamta yamni kidika dutni kau minitlauna manah? ¿Ais yamta lalah sunitak kidika malnamanah#44.4 ¿Ais yamta lalah sunitak kidika malnamanah...?: grik kau ulna kidika kaput yulwi. Hibru kau laih ulwas ki adika yulni. 5yang dakiwan witing kidika kau di diwi dawak bik kidika kau di kaikalahwas balna yakwi yulwa kidika?#44.5 Kidika laih muih bitik kaput yayamwadai, sutak kau was buhngsak dawi, di kaiwi kalahwas balna kidika yulna atnin. ¡Uba dutni yamnamana!’
6Ūni maintalyang muihni kidika uiwi kiwi kiuna kat sihm yulni balna kidika diyulna, 7dawak witingna yaklauwi nangnitlalana:
—¿Ais yamta man yangna akat kaput yanayultamahn? ¡Yangna sip kidika dini yamtas awanaki! 8Canaán kaupak yangna nawattik aiwanayangna bikkina kungnimak yakat lalah ahana kidika duaitik kalana atnikna, ¿bahang amput yangna man damawan ūni yakat lalah pa, kidika awaskat gol pa yangna maltanakiyah? 9¡Dauna karang man dima yamyang balna adika wais yakat kalyakna karang kat sunitak kidika, dawak yangna bik dima yamyang alahwanaki!
10Kaput dawak ūni maintalyang dai kidika yulna:
—Manna yultamana kaput yamna karang, kaunah angdika muihni sutak duna kidika manah laih yang diki yamyang kalwarang; dawak as balna kidika laih pātdis kalalahwarang.
11Witingna bitik biknina sau yakat lakwi ululuhna. 12Ū maintalyang kidika bitik walwi talna, tatuna kidika wirahnina barakni kaupak walna wirahnina bin kat, dawak sunitak kidika laih wirahnina bin Benjamín bikni pasyakat sakdai. 13Kaput laih witingna praknina iswi bibisna dalani kulninna yakat kukulwa kidika yulni. Usnitkat witingna dinina kidika birininaku minit yakat ilwi dawi nawatwi tawan nuhni yakat uina. 14Judá dawak wirahni balna karak José ūni yakat uiwi kakawa kat, José kidika baisa ūni yakat sakdai, kalahwi kiwas. Dawak kaput laih witingna limbabahwi muhnina kidika sau kat lalakna dai, 15dawak José yaklauwi witingna yakat diyulna:
—¿Ais yamnamanah? ¿Manna amanglatasmanah al as yang apāt kidika di malnikau bik yakwi yulwa kidika?
16Judá yaklauwi nangnitlana:
—¿Ais sipyah man yakat nangmatlana atnin? ¿Yangna dutni yamtasyangna kidika amput sipyah namangkanin? Papang yaklauwi dutni yamnayangna kat yanayakna. Akat man yanalaihnaman; man dima yamyang yangna, sutak duna dai kidika karak.
17Kaunah José yulna:
—Kaput laih awaski. Angdika muihni sutak duna kidika muihni manah laih yang diki yamyang kalwarang ki. As balna mana laih ismangnalak papangmana ūni yakat nawatta yawanauh. Muih as bik manauswas karang.
Judá laih Benjamín yulnikalni dinit yakat bukwi yulwi
18Kaput dawak Judá witing José yaihnit yakat kiwi kalyulna:
—Yang man kalma dinit yakat buktik yultayang, yadatangkat yang yul as mayulkuh malnikau man yakat manah. Plisma kulnam daukalwinih yang nikingkauh, man laih sihm Fero witing kapat man. 19Man lawa yanayulta dakanaman, yangna papangkina dutayangna pa, kidika awaskat wirahkina ūk dutayangna pa, 20dawak yangna mayulnayangna papangkina kidika muih barak palni ki, dawak wirahkina bin as baisa wahmabin palni bik as dutayangna, bahang kidika laih papangkina muihbarak kalwak kauh batahndana. Dawak bik mayulnayangna papangkina kidika uba dalani talwi walanbis yakat, kidika manah watna nanang aslah kaupak, kat wirahni ūk dai kidika laih dauna. 21Kaput laih man lawa yanayulnaman duaina atnikna kat man talkuh atnaman bahang. 22Yang mayulnayangna muihbin kidika sip papangni dawas ki, dawarang kat papangni kidika laih dauwarang. 23Kaunah man yanayulnaman, muih albin kidika kaiwas, man sip yanadutas awama aiwining kat.
24“Yangna papangkina yakat yawik adika dini balna bitik kalyulnayangna, man yulnaman kidika. 25Kaput laih papangkina yanapakna: ‘Watta yawa plawar apis bakanta aiwanauh’; 26kaunah yangna kalyulna yangna: ‘Yangna sip yawas yangna, kaunah wirahkina bin kidika yangna karak kiwarang laih yawanaki; kat witing kidika yangna karak kiwas kat, kidika alni yangna akat sip yanaduwas karang yawining kat.’ 27Dawak papangkina yana yulna: ‘Manna amanglatamana yang yalki walabis bu yana dai; 28as laih yang yaihkit kaupak kiuna, dawak kidika kaupak yang talasyang. Yang yamni amanglatayang asangpas dini anyang as yaklauwi īna. 29Yang walakibis as yaka bik yang yaihkit kaupak yakta duyawanang witing yakat di as kalkalahwarang kat, manna pātmana karang adika muihbarak kulnin bukna karuk dauwarang kat.’
30“Kaput bahang kidika albin laih papangki sangnika karak aslah palni libitna ki, alnibin kidika yangna karak nawatwi kiwas karang kat, 31papangkina laih dauwarang, walanibis talwas kidika yulni. Kaput laih yangna pātkina karang, yangna papangkina muihbarak kidika kulnin bukna kau dauwarang kat. 32Yang lawik papangki yakat kalyulnayang, yang tingki yakat karang muih albin kidika, dawak bik kalyulnayang: ‘Wattik nawattik duaimatasyang kat, man namang yakat pāt duyang awaki sangkika bitik yakat.’ 33Kidika bahang man kalma dinit yakat buktik yultayang, datangkat man dima yamyang alahwakuh, muih al bin kidika pāni yakat. Datang kat witing kidika wirahni balna karak kiwang. 34Amput dawak ¿yangna nawattik yawakiyah papangki yaihnit yakat, muih al bin kidika yang karak kiwas kat? Papangki dutni wauhwarang kidika talkih yawas ki.
Currently Selected:
Génesis 44: SUMU
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998