Génesis 42

José wirahni balna Egipto yakat uiwi

1Jacob witing dakana Egipto yakat plawar minik duduwi atwak, bahang walanbis balna yakat diyulna: “¿Ais yamta yakat biri biri muhmana kaltalamanah? 2Yayuyulna Egipto yakat laih plawar minik bangki. Manna yakat yawa plawar minik bakanta aiwanauh, kaput laih mayang sangka mawarang.”#Ap.w 7:12.

3Kaput laih José wirahni balna ahal salap kidika Egipto yakat uina, plawar bakanna; 4kaunah Jacob witing walanibis Benjamín, José wirahni kidika laih dawak kiwas dai, kat witing kulna sipki di dutni as kalkalahnin. 5Israel walanibis balna kidika muih ūk uiwak pasningna yakat kawi uinadai, kat Canaán sauni bitik yakat yuhlakna dai bahang.

6José kidika laih Egipto sauni yakat kabamint dai, kat witing yaklauwi plawar di bakanwādai pa bitik kaupak muih uiwakat. Dawak wirahni balna kidika witing muhni yakat uiwi witingna abukwi muhnina kidika sau kat lalakna. 7José witing wirahni balna kidika talwi minitni yakat amangninalana; kaunah witing amangninalawas kapat yamna dai, dawak yulni parasni kau diyulwi dakana:

—¡Manna!, ¿angkaupak aiwamanah?

—Canaán kaupak aiwayangna plawar bakanna atnikna —kaput kalahwadai witingna yaklauwi.

8José yaklauwi wirahni balna yakat amangninalana kaunah, biri laih amangnilalawas dai witing yakat. 9Kaput laih José witing isningkatna dai amana as talna dai kidika witingna yulnina,#Gn 37:5-10. dawak diyulna:

—Manna laih yakpakwi talyang muihni balna mana. Manna talna mānah aiwamana angdika niningyak īsi pa bahna kana atnin adika sauni akat.

10—¡Dikah, dakiwan! —witingna yaklauwi kaput nangnitnalalana—. Yangna, man dima yamyang yangna adika laih plawar bakanna manah aiwanayangna. 11Yangna bitik yangna laih papang aslah yangna. Dawak bik muih yayamni yangna. Wat as bik yangna maldik alahwik pakdik talasyangna.

12—Rahm awaski —atna José yaklauwi—. Manna aiwa talamana angdika niningyak isi pa kawi bahna atnin adika sauni akat.

13Kaunah witingna nangnitlalana:

—Yangna man dima yamyang balna yangna adika laih kalwirah 12 yangna, papang aslah, bahang yangna Canaán yakat yalahdayangna. Dawak wirahkina bin kidika laih papangkina karak watna, dawak ūk kidika laih yangna karak awaski.

14Kaput kaunah, José watwi diyulna:

—¡Yang yulnayang kaput ki! Manna laih yakpakda talyangmana, 15dawak adika karak laihdi taldarang: Fero ayangni kau yaktik yultayang, manna akaupak alahwasmana, wirahmana bin kidika kaiwas karang kat. 16Manna kaupak as alahwa yawa duaitanauh. As balna mana laih silak yakat wattanama. Taldarang rahmpa manna yulnamana kidika, rahm awaslaih, manna yakpakwi talyang muihnimana. ¡Fero ayangni kau yaktik yultayang!

17José yaklauwi silak āwi duwasakdai ma bās witingna bitik, 18kaunah ma bās laihwak diyulna:

—Yang Papang yamanidutayang. Adika yamtanauh, sangmanaka kidika ban manadawarang: 19rahm manna kidika muih yayamni mana kat, manna wirahma as silak yakat datanauh, dawak ūk balna mana kidika laih plawar kidika duyawanang wanaihmana balna kakaswang. 20Usnit kat wirahmana bin kidika duaitanauh, dawak taldarang rahm yulnamana pa. Kaput awaskarang kat dautanama.

Bahang witingna agha atwadai, 21kaunah witingna biri biri yuyulna:

—Rahm palni laih mayang mawirahki nining yakat dutni palni yamna mayang, mayang kaldakas danamayang dai makalki dinit yakat bukwi maiyulwakat witing yakat minikun talna atnin yulni, witing kulnin bukna kidika bik talnamayang dai kaunah. Kidika bahang waradika adika kulnin buknin kidika mayang akat kaina.

22Dawak Rubén yaklauwi diyulna

—Yang manna yakat manayulnayang dutni kalyayamwinih;#Gn 37:21-22. kaunah manna yulki dakas danamana, dawak waralaih dauna kidika yulni masalahki yakat ki.

23Witingna amanglalawas dai José amangninalawa kidika, muih as kau pakwak dakawi kalyulwa kidika. 24José laih witingna yakaupak yaklawi kaidana. Dawak witing nawatwi kaina witingna yakat dawak yuldibauna, Simeón kidika laihwi silp lana as balna kidika talwa bangkat, dawak pakwak sisitna. 25Kidika usnit kat pakwak witingna biknina kidika plawar puwi bahngna, dawak witingna lalahnina balna bik watwi diana, kaunah witingna biknina pasyakat āwi sitnadai, dawak bik pakna ta yakat kaswi kiunin kidika bik diana atnin. Kaput diyamna dai. 26kaput laih witingna biknina balna kidika birininaku yakat ilwi dawi mahka uina.

27Witingna angkat payayahwarang yakat uiwi wawatna, dawak as yaklauwi bikni uluhna biriniku yakat di bayahkuhti, bahang talwak lalahni kidika bikni pasyakat sakdai. 28Kaput laih wirahni balna yakat diyulna:

—¡Talnauh, lalahki watwi nawatwi yayana! ¡Akat sakki bikki pas-akat!

Witingna bitik muihsak dadauna, diyukna dawak biri biri aput yuyulna:

—¿Papang ais maiyamwih mayang akat?

29Witingna Canaán yakat uina kat papangnina yakat bitik kalyuyulna dai witingna yakat ais kalahna kidik, dawak bik aput yuyulna:

30—Egipto yakat muih al as kabamint yakat tunan kawa kidika yul parasni palni yanayulna, dawak bik yanayulna yangna yawanayangna witing sauni kidika maldik paktik talnikna yulni. 31Kaunah yangna kalyulna yangna, yangna laih muih yayamni yangna, dawak wat as bik yangna maldik alahwik paktik talasyangna; 32yangna laih kalwirah 12 yangna dai, dawak papang aslah, as laih yangna karak awaski, dawak bin kidika laih Canaán akat man karak watna. 33Kaput laih witing yaklauwi yanayulna: ‘Adika karak talki manna kidika rahm muih yayamni mana pa. Akat manna wirahmana as datanauh, dawak manna laih plawar buas duyawanauh wanaihmana balna yakat, 34kaunah wirahmana bin kidika duaitanauh. Kaput laih yang rahm kulki manna muih yayamni mana, yakpakwi talyang balna-awas mana, dawak kaput laih wirahmana as adika dating kiwarang, dawak bik manna sip-awanama adika sauni akat pri awaihnamna.’

35Witingna biknina balna kidika uhuhwakat José wirahni balna tatalna biknina pasyakat lalahnina kidika āna dai, witingna dawak papangnina kidika bik muihsak dadauna. 36Kaput dawak Jacob yaklauwi diyulna:

—Manna walakibis balna dis yadatamana. José witing mayang karak awaski, Simeón bik. ¡Dawak waradika laih Benjamín bik yadakyaktanamayah! ¡Dutni yakat bukwa kidika laih yang manah ki!

37Rubén yaklauwi papangni yakat kalyulna:

—Benjamín kidika yang akat yatang maintalkuh, dawak wattik duaitik maki. Yang wattik duaitik matasyang kat, walakibis bu kidika īna karang.

38Kaunah Jacob yaklauwi nangnitlana:

—Yang walakibis manna karak kiwas karang. Manna wirahmana José dauna bahang adika witing manah watwi. Manna yawamana yakat di as dutni kalkalahwarang kat, manna pātmana karang adika muihbarak kulnin bukna karuk dauwarang kidika.

Currently Selected:

Génesis 42: SUMU

Highlight

Copy