Eclesiastés 8
8
1¿Wais kidika sipyah sins duyang muihni kidika karak kallibitnin? ¿Wais amanglawih di balna sinsni lani kidika? Sins tuhni kidika laih muih muhni kidika yaringni yamwi; witing yamwak muih kulnin dadasni kidika wirlawi.
King yulni kat dakanin kidika
2King yaklau yamnin yulwa yakat yamtah, bahang kaput pramis yamnaman Papang muhni yakat. 3Witing muhni kaupak sirihni kalahwinih. Di balna dudutni kidika yakat kawinih, kat witing laih ais yamkih kalawarang kidika yamwarang ki. 4King yulni kidika laih lani parasni duwi dawak muih as bik witing yakat kalyulwi dakawas karang ki witing di yamwa balna kidika yulni.
5Angdika muihni yamnin yulwa yakat yamwarang kidika, di dutni as bik kalkalahwas karang ki, dawak sins duyang muihni kidika laih amanglawi mampat mani dawak amput yamnin kidika bik. 6Rahm kidika laih, minit as sakki dawak amput yamnin kidika bik di balna yamnin kidika, kaunah muih tranibil nuhni kidika laih 7witing amanglawas ki ais kalahwarang kidika, dawak muih as bik diski baisa kau kalyulna atnin.
Muih as bik parasni diski sangka atnin dawak daunin kidika minityak
8Muih as bik parasni diski sangka atnin kidika minityak, laihwatwi duna atnin, dawak muih as bik parasni diski daunin kidika minityak. Muih as bik diski adika kalbaunin kaupak kiri yaklana atnin. Dutni yamyang muihni kidika laih witing dutni kidika yaklau kallaihwi yakwas karang ki.
9Adika dini balna bitik yang talnayang, adika sauni akat di balna yamnin kidika yakat amanglana atnik yulni āwanayang kat dawak muih parasni duwa kidika bik talnayang witing wanaihni balna yakat daukalna atnin.
Di balna as as kidika sinsni lani diski
10Aput bik talnayang muih dudutni balna, holi pāni kaupak naikau kalalahna dai kidika, witingna yakat nunuwa mani kat ayangnina nuhni yayamwi; dawak angdika tawanni nuhni yakat dutni yayamna dai kidika laih, usnit kat muih as bik dikulwi dakakawas ki.#8.10 Aput bik talnayang...dikulwi dakakawas ki: kaput wirlana kidika yamni kapat ki. Hibru kau laih amangladaski. Dawak adika laih sinsni lani diski, 11kat usnit kat la kidika laihwi yamwas dawak dutni yamnin kidika yakat wah kalana atnin yulni, muih kidika laih dutni yamnin manah kulwi. 12¡Kaput kalahwi angdika muihni dutni yamwa kidika dawak tanityak ban dutni yamwi kiwa kidika laih kurih mahni sangka ki! (Yang amanglatayang dai kidika laih angdika muihni balna Papang yakat rispik yayamwa kidika laih, tanitna yakat yamni uiwi; 13dawak nawatkauh dutni yayamwa balna kidika laih tanitna yakat dutni uiwi, dawak sangninaka kidika laih sihm sanni dinit as kapat bayakwi, kat Papang muhni yakat rispik yayamwas kidika yulni.) 14Dawak adika sauni akat laih kaput kalahwi yul as sinsni lani diski kidika muih yayamni balna dalani wawauhwa kidika sihm dudutni balna kapat, dawak muih dudutni balna kidika laih alasna duduwa kidika sihm muih yayamni dai kapat.#Sal 73; Jr 12:1-4; Hab 1:2-4,12-17. ¡Yang lawik yultayang adika dini bik sihm sinsni lani diski!
15Kidika bahang, alasna ilpni yakat yultayang. Dawak muih adika sauni akat yamnin kidika laih di kasnin, dinin dawak alasna dunin kamanah ki, kat witing warkni kaupak laih kidika manah duwi Papang yaklau adika sauni akat sangnika kalana yakat.
16Lan kalahnin, amanglanin dawak lakwi talnin yakat baisa āwanayang mani kat, adika sauni akat di balna yamnin kidika yakat -minit as sakki muih mayang kidika sip awar as bik mahamaski, 17dawak baisa amanglanayang muih kidika sip amanglawas ki Papang yaklau di balna yamwa kidika yakat dawak adika sauni akat di balna kalahwa kidika bik. Baisa kidika dini walwi talwarang bik, sip yakwas karang ki; sins duyang muihni kidika amanglakuh tarang bik, rahm kidika laih sip yakwas dana.
Currently Selected:
Eclesiastés 8: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998