Eclesiastés 7
7
Nunuhni dikulna muihni balna yakat yuldibaunin kidika
1Tanit yamni ki ayangni mayak dulauwa kidika#Pro 22:1.
dawak kahnin dini walapni kidika karak dawakat.
Tanit yamni ki dauwa mani kidika
dawak batahnwa mani kidika karak dawakat.
2Tanit yamni ki muih nunuwa yakat kiunin kidika
kiwi alasna dunin kidika karak dawakat;
bahang daunin kidika laih muih balna bitik manina witni ki,
dawak sangka balna kidika laih isningnakatnin dai.
3Tanit yamni kaidinin kidika dawak karinin karak dawakat,
bahang sipki dutni kalyamnin kulnin parasni niningyakat
kaunah isning yakat laih yamni kalyamwi.
4Sins duyang kidika laih daunin yakat kulwi,
kaunah tapdadas kidika laih, kiwi alasna dunin yakat kulwi.
5Tanit yamni ki sins duyang balna yaklauwi bibilwa yulni kidika dakana atnin
tapdadas balna yaklauwi ayangni nuhni yayamwa kidika karak dawakat.
6Tapdadas balna kakara kidika laih
sihm wakal balna kuh buswakat#7.6 Kuh buswakat: Y.y. suba dinit yakat. parasni yulwa kapat ki,
dawak kidika bik dauh manahki.
7Dutni yamnin kidika laih sins duyang muihni yakat dutni kalyamwi,
dawak tani dunin kidika laih lani balna kidika daukalwi.
8Tanit yamni ki yul as kidika dahn yamna atnin
dawak tunan bahnin karak dawakat.
Tanit yamni ki kulnin laihwatnin lani kidika dunin
dawak kulnin dadasni dunin karak dawakat.
9Datang kulnin daukalnin kidika yaklau maduwi kiunin awaski,#Jm 1:19. kat kulnin daukalnin kidika laih tapdadas balna dinina.
10Man wat as bik yulwi dakanah ais yulni ma balna bayakna yakat laih yamni daih, kat kidika laih sins sirihni duyang yulwi dakana yulni awaski.
11Sins tuhni kidika laih yamni palni ki, adika sauni akat yalalahwa balna kidika niningna yakat, baisa kidika minityak dipahni as karak libitna karang bik. 12Kat sins tuhni kidika laih tingni dinityak āwi duwi sihm lalah kaput, kaunah sins tuhni kidika laih sipki sins nuhni duyang yakat sangnika kalana atnin.
13Papang yaklau di balna yamna yakat yamni talah: ¿wais yaklau barangwarangyah witing yaklau kawaini yamna kidika? 14Tamatyak yamni yawama mani kat, kidika yamni kau alasna dutah; kaunah dutni yawama mani kat, kulta talah di balna bitik laih Papang dini balna, dawak muih kidika laih amanglawas ki di balna baisa kaiwi kalahwas dini kidika.
15Adika balna bitik talnayang sangkika dauh palni akat: muih yayamni balna dadauwa kidika minikun talnin lani duduwa karang bik, dawak dutni yamyang balna kidika dutni yayamwa karang bik kurih mahni sangka ki.
16Yamni kidika kaupak bayaknin awaski,
dawak ridi kidika kaupak bik bayaknin awaski.
¿Ais yulni kaldaukalninyah mayang alas?
17Dutni kidika kaupak bayaknin awaski,
dawak mutu kaupak bik bayaknin awaski.
¿Ais yulni dauninyah baisa kau?
18Tanit yamni kidika laih adika dini yamnin laihnin ki,
matingki kaupak danin awas.
Angdika muihni Papang yakat rispik yamwa kidika laih
adika dini balna kaupak yamni kalahna karang.
19Sins tuhni kidika sins duyang yakat parasni baisa kalawi,
kabamint kayang balna salap kidika tawan nuhni aslah yakat karak dawakat.
20Kaput bik, sau akat muih as bik diski barangni manah di balna bitik kidika yamni yamna atnin dutni as bik yamwas.#1 Jn 1:8-10.
21Yul balna yuyulwa bitik kidika dakawinih, dawak kaput laih dima yamyang kidika yaklau man yakat dutni mayulwak dakas awama. 22Man bik yamni amanglataman karang bik, ma mahni muih ūk balna yakat dutni yulnaman.
Sins tuhni dunin walwa kidika
23Adika bitik kidika sins tuhni karak laihtik talnayang, bahang sins duyang kalnin kulnayang dai; kaunah yang kaupak naikau dai. 24¡Di balna bitik kidika yang kaupak naikau manah ki! ¡Uba palni tuhni ki sip muih as bik amanglanin dini awaski!
25Bahang sins lani balna walwi yaknin yakat āwanayang dai, dawak bik lan alahwanayang dai dawak witni kat sins lani nunuhni balna yaknayang dai. Dawak amanglanayang dai tapdadas atnin laih dutni kidika, dawak sins dis atnin kidika bik.
26Di as yaknayang kidika laih tapahlni ki daunin kidika karak dawakat: muih yal laihnin dini āwa kidika laih isningkau dawak tingni balna kau maiwakaihwa kidika. Angdika muihni Papang talnin kat yamwa kidika laih kidika yalni kaupak kiri yaklana karang, kaunah dutni yamyang kidika laih laihnin dini balna yakat bukna karang.#Pro 5; 7.
27Di balna yaknik traitalayang kidika yakat, yang, sumalyang muihni yang adika, adika dini yaknayang: 28¡yang rahm waltayang dini kidika karak laih baisa kalpaktasyang! Muih ahal tausin as paskaupak as yaknayang, kaunah muih yayal balna laih as bik yaktasyang yayal balna bitik paskaupak. 29Adika manah yaknayang: Papang laih muih kidika yamni yamna,#Gn 1:26-31. kaunah sihm muihni kidika yaklau muih sangnika kidika dadasni yamna.
Currently Selected:
Eclesiastés 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998