Deuteronomio 21
21
Muih pini dauna kat amput yamnin kidika
1“Papang yaklauwi sau mawarang kidika, man dima, kidik pasyakat muih as ihina tuskarang kat, kaunah amanglawas karangkat, wais ina pa, 2muihbararak balna kidika yaklauwi kulwi tatalwarang muih dauna kidika kaupak angdik tawanni ulis kat. 3Kaput laih angdika tawanni nuhni kauh ulis kat, kidika muihni bararak balna yaklauwi turuh yal as baisa dinimak yakat pan ahawas kidika satni kat duwi, 4wasbin as buhlakwas ban was duwa kidika satni kat duwi yaklakwi uiwarang kaunah kidika pāni kidik baisa di dahwas pāni atnin karang, dawak kidika pāni yakat turuh yalbin kidika dinimak wirwi bahna karang.
5“Usnitkat libait sumalniyang balna kidika yaihnit yakat uiwarang, kat Papang yaklauwi walwi yakna, witingna tingnina yakat atnin prias balna kidika, kaput laih Papang ayangni yamni yamna atnin yulni. Kalbilnin balna, kalbaunin balna kidika witingna yaklauwi barangni yayamna karang. 6Usnitkat muihbararak balna bitik tingnina susuhna karang turuh yalbin dauna kidika minit yakat, 7dawak aput yuyulna karang: ‘Adika alni mayang idaski, dawak bik taldaski amput ihina kidika. 8Dutni kidika datang diswang Dawan, man tawanma Israel kidika, man lauwa laihta yaknaman, bahang muih dauna kidika yulni witing yakat kalkulwinih.’ Kaput laih kidika muih dauna kidik witing yakat kallaihwas karang, 9dawak manna yamtanama di barangni kidika Papang minikpa yakat, dawak manna pasmangna kaupak kidika dauna pātni kidika yakpamna karang.
War muihni silak yakat bubukwa balna kidika lani
10“Manna waihmanala niningyakat kalbautanang kat, Papang yaklauwi yamwak waihmanala balna kidika manna tingmana yakat bubukwarang kat, 11manna kidika balna pasyakat talnangkat yal nuhni yaksinh as sakkarang kat, witing kidika dukih mawak duta marid alahwama kat, 12ūma yakat duyawanam karang, dawak kalyultangkat basni kidika kahrwarang, dawak tipisnimak kidika bik dakwarang, 13kaput silak yakat bukna mani asnina kana likdai kidika yaknin, dawak al kidika ūni yakat yalahwarang, bahang waiku as witing kaidarang papangni, nanangni kidika yulni. Dawak kidika bayakwak usnitkat sipkarang, Israel muihni kidika yal karak mahka kaldunin; kaput laih al kidika witing alni karang, dawak yal kidika witing yalni karang. 14Kidika usnit kat al kidika yaklauwi yal yakat yamni kaltalwas karang kat, pri kaldana atnin karang; kaunah sip- awas karang muih dini yamnin lani yakat wauhwi bakanpamna atnin lalah minit, kat uman risnipik dispamna bahang.
Walanibis tatuna rahmni balna kidika
15“Muih al as kat yal bu duwarang kat, as yakat dalani talwi kaunah ūk yakat laih dalani talwas karang kat, kaunah witingna yayal kidika bupak walaninabis yayakwa karang kat, dawak walanibis al tatuna kidika yal dalani talwas kidika kaupak yakna karang kat, 16mani as kat kidika al witing walanibis balna bitik pasyakat mahka witingna dinina kidika sahyakwi diawarang mani kat, witing yal dalani talwa walanibis kidika tatuna kapat kulnin-awas karang, kat yal dalani talwas walanibis tatuna yakat dutni kalyamwarang bahang, kat rahm laih witing walanibis kidika tatuna bahang. 17Kidika yal walanibis tatuna kidika amanglana atnin karang, witing walanibis tatuna bahang di balna kidika minitkau bu praisni lakwi kalana karang, kat kidika walanibis laih witing parasni tatuna minik yakna bahang, bahang walanbis tatuna rahmni kidika bitik laih duwi.
Walabis yul dakakawas wah dianin
18“Muih as kat walanibis al as duwarang, yul dakawas kulnin dutni, papangni yul yulwa kidika dakawas, wah wiwiswak bik yul dakawas karang kat, 19papangni balna yaklauwi la muhni yakat duwi uiwarang, tawan muihnibararak balna muhnina yakat, 20dawak diyulwarang: ‘Yangna walakinabis adika laih yul dakawaski dawak bik kulnin dutni ki, yul yultayangna kidika as bik dakawas ki, muih dutni as ki dawak bik wasak diyang as ki.’ 21Dawak kaput laih, tawan ahalni balna bitik yaklauwi kipala kau barhwi ihiwarang. Kaput laih dahn kalna karang manna tawanmana paskau dutni sakkidika, Israel muihni balna kidika yulni dakawi yamaduduwarang.
La ūk balna
22“Muih al as daunin yakat wirlana karang kat, pan as kau sitwi; witing dutni yamna kidika yulni, 23witing muihni nuhni kidika pukta yakat ban kaput payahnin-awas ki, kaunah sihm kidika mani nuna atnin karang, kat kidika laih Papang yaklauwi la tuhna bahang kaput pan yakat sitwi dauna atnin,#Gal 3:13. dawak manna Papangmana sau manawarang kidika manna dimana palni, maisihni yamnamna awaski.
Currently Selected:
Deuteronomio 21: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
