Deuteronomio 20
20
War lani balna
1“Manna waihmanala balna yakat kalbaunin alahwa yawa talnangkat witingna laih aras kilyang balna duduwi dawak kalbaunin kārni balna bik duduwa karangkat, dawak bik kalbauyang muihni balna kidika tanit mahni duduwa karang kat manna karak dawakat, kaunah yamaniduduwinih manna, kat manna laih Papang yakat kulnamna āta dutamana bahang, Egipto kaupak manayakna Papangni yakat. 2Dawak kalbaunin awarni kiwi kawakat, sumalyang kidika yaklauwi kalbaunin kidika tunan dunakarang 3dawak yulwarang: ‘Dakanauh Israel muihni balna, warmani waihmanala niningyakat kalbautanama ki. Kulnamna sau yakat buknin-awaski dawak bik yamadunin-awaski, manayuknin bik awaski, muihsak daunamna bik awaski, 4kat manna Papangmana kidika manna karak bahang; witing kalbauna karang manna waihmanala balna niningna yakat, dawak minit bayaknin kidika manna yakat manana karang.’
5“Usnit kat tunan muihni balna kidika yulbabauwarang, dawak yuyulwarang: ‘Manna pasyakat muih as ū wisam pakna kaunah baisa kidika pasyakat kawas kat, mahka ūni kau kiwang, war yakat kalbauwi dauwarang kat bik witing ūni kidika kawas dauwak muih ūk witing tatuna kawarang. 6Manna pasyakat muih as wain dahna dai kat, kaunah kidika kaupak witing apis bik diwasdai kat, witing mahka ūni yakat kiwang, kidika awaskarang kat war yakat dauwarang kat, muih kidika wain minik balna kidika bahna karang. 7Dawak muih as kat witing yal dunin pramis yamna dai kat, kaunah witing baisa yal kidika duwasdai kat, witing mahka ūni yakat kiwang, kidika-awaskat witing war yakat dauwarang kat yal kidika muih ūk duwarang.’
8“Usnit kat tunan duwa muihni balna kidika watwi kalbauyang muihni balna yakat diyuyulwarang: ‘Muih as yamaduwakat, kulnin dadasni duwas kat, mahka ūni yakat kiwang, kidika awaskat kalbauyang as balna yakat diyamwak yamaduduwarang.’ 9Tunan duyang balna kidika yulbauwi dahn dadawakat, kalbauyang muihni balna uduhna taninatuna kidika tunan kawarang.
10“Manna tawan nunuhni balna kidika yaihnit yakat yawanama kat kalbauna atnin, tatuna laih kulnin aslah lani kidika yultanama kidika muihni balna niningna yakat. 11Kidika tawanni nuhni muihni balna kidika witingna kulnin aslah lani kidika dudang atwarang kat mana dadawak awanama, dawak kaput laih manna kidika muihni dini yamyang kapat manaduduwarang dawak wark pararasni yakat manapapakwarang. 12Kaunah witingna kulnin aslah lani dunin kidika manna karak, witingna dukih diawas karang kat, kaunah nawatkauh laih namangna yakat wār kalbaunin yayamwarang kat, manna tawanni nuhni kidika awaihta dakta niningna yakat kalbautanama. 13Manna Papangmana yaklauwi yamwak, manna tingmana yakat bubukna karang, dawak manna lauwa isparah kau itanama kidika muihni balna bitik. 14Yayal balna, walabis balna, tinglau balna dawak kidika tawanni nuhni pasyakat di balna bangkidika bitik laih manna dimana karang; bahang alasna dutanama Papangmana yaklauwi waihmanala balna tingnina kaupak dakyakwi manawa kidika. 15Kaput manna yamtanama, manna yalahtanama pāni kaupak naikau tawan nunuhni balna bang bang kidika, kidika balna laih adika ninisan balna pasyakat-awas kidika. 16Kaunah kidika ninisan tawannina nunuhni balna kidika Papang yaklauwi manna dimana manawa kidika, sangnika duwa balna kidika asbik danin-awas karang, 17kaunah bitik laih inin karang, Papang kau sakripais yamnin as kapat, hitita, amorreo, cananeo, ferezeo, heveo dawak jebuseo kidika balna bitik, witing yaklauwi yulna kaput, 18kaput laih witingna yaklauwi manna yakat manasumalnin awas, di dutni yamadangni kidika yamnin, witingna di dutni yamadangni yayamwa kapat daninawan dauh kidika yakat, dawak kaput manayayamwak Papangmana nining yakat dutni yamnin- awas.#Dt 13:15-16; Jos 6:17.
19“Manna tawan nuhni as awa dunamna kat awaihta dakta mahni bang-atnamna ki, dawak pananina balna kidika ki kau pipihwinih, kat minik balna kidika manna duta kastanama bahang; baisa minit yakat kidika laih pan manahki, muih bik awaski witingna nanitna daknin manna niningna kauh yamtamana kidika yulni. 20Kaput kaunah, pan minik yakwas balna kidika laih sipki dakna atnin, kat kidika kau duta awaihta daktanama bahang, manna tingmana yakat bubukwarang kat.
Currently Selected:
Deuteronomio 20: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
