Apastil Balna Warknina 6
6
Tingnisut laihyang balna tiaskaubu ahana
1Kidika mani balna yakat, kulyang balna kidika mahni kalwa bahang, grik muihni balna dutni dakakawa kidika yuyulna Hibru muihni balna yakat, yuyulna dai grik yayal tingmak balna kidika ilp yamni diayawaski, ma bitik ilpni diayawa kidika.#6.1 Adika laih yulwi, ju balna pa ūk kaupak aiwa kidika, witingna laih grik manah yuyulwi, palestina kau ju balna bangkidika laih arameo tuni yuyulwi, bahang Ulna Wisamni yakat yulwi kidika laih hibru yulni. 2Apostel balna 12 kidika yaklauwi kulyang balna bitik uduhwi diyuyulna:
—Yamni awaski, mayang Papang yulni yamni sumalda kidika dadi, di ūk balna kidika maintalnin. 3Kaput bahang, wirah balna, manna pasmangna kaupak muih ahal tiaskaubu waltanauh yamni talamana kidika, dawak bik Spirit Holi duduwa balna kidika, kaput laih kidika warkni dianin. 4Yangna laih ban mikitna yultanaki, dawak Papang yulni kidika sumaltanaki.
5Witingna bitik laih yamni tatalna, dawak walwi yayakna Esteban, al as kasak kulnin lani duwadai dawak Spirit Holi bik duwadai, dawak Pilip, Prócoro, Nicanor, Timón, Parmenas dawak Nicolás kauna, Antioquía kaupak witing tatuna kau Ju balna yakat wiryaklana dai kidika. 6Kidika usnitkat apostel balna yakat duwi uina, dawak apostel balna yaklauwi minitna yuyulna minitna yakat tingnina dulauwi.
7Papang yulni balna kidika baisa rawi kiuna, kaput bik laih Jerusalén yakat kulyang balna kidika mahni kalna. Kaput bik laih Ju sumalyang balna kidika bik kasak kulnin yakat wiryaklalana.
Esteban lalaihna
8Esteban kidika, Papang parasni dawak blinisin bik duna, bahang sain balna yamna tawan pasyakat. 9Papang yul sumamalwa ūni as, ayangni laih, muih dini yamyang kidika kaupak pri kalalahna, kidika kaupak muih buas dawak Cirene, Alejandría, Cilicia, dawak Asia kaupak bik kalpakwi Esteban niningkauh yuyulna; 10kaunah sip niningkauh yaklalauwasdai, kat Spirit Holi yaklauwi sins tuhni kidika kalawadai bahang. 11Kaput laih muih as as kau minit lalauna, kidika laih yulna atnin, witingna dakakana, Moses dawak Papang niningkauh yulwak Esteban kidika. 12Kaput yayamwak tawan kidika pini kakalna, muihbararak kidika dawak lā maestro balna kidika bik; kidika yulni laih Esteban niningyakat yaklalauna, dawi laihwi duwi uina kaluduhna tanit nuhni kidika balna muhnina yakat. 13Kidika minit yakat witnis alas muihni balna bik wawalna, aput yulna atnin:
—Adika alni, makatyulnin ūni niningkauh yulwa kidika dawaski dawak lā niningkauh bik. 14Yulwak dakanamayang, Jisas Nazaret kaupak kidika yaklauwi makatyulnin ūni adika daukalpamwarang, dawak bik Moses yaklauwi amput yalahnin lani mayana kidika bik satuk wirlawarang ki.
15Lā muihni balna dawak kidika yakat muih yalahna bangdai kidika bitik Esteban yakat tatalna, muhni kidika yaringni duwadai, insal kapat.
Currently Selected:
Apastil Balna Warknina 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
