Apastil Balna Warknina 5
5
Ananías dawak Safira karakdutni yamna
1Kauna al as dai, ayangni Ananías, yalni laih Safira, witingna sau as duduwadai kat wauhwi bakakanna. 2Adika alni, witing yalni karak yulbauwi kulninna aslah kalahwi, lalah dai kidika apis duduna, dawak sutni kidika apostel balna tingnina yakat ahana. 3Pita yaklauwi kalyulna:
—Ananías, ¿ampat dawak Sitan ismang yakat kawih, dawak mayamwak Spirit Holi yakat alas kalyultamahn, sau bakannaman lalahni apis dunaman kidika? 4¿Sauni kidika man dima dai awasyah? Sau kidika wauhta bakannaman, ¿lalahni kidika man dima dai awasyah? ¿Man ais kulta kaput yamtamahn? Muih ahal yakat alas diyultasman, kaunah Papang yakat alas kalyulnaman.
5Adika dakawi, Ananías dauwi bukna. Dawak muih bitik dakakana kidika muihsak dadauna. 6Dawak wawahma balna aiwi muihni kidika asna kau tulwi dawi, duwi uiwi nununa.
7Awar bās bayakwak Ananías yalni kiwi kana, kauna witing amanglawasdai di kalahna kidika. 8Pita yaklauwi kalyulwi dakana:
—Yayultah, ¿manna sau bakannamana lalahni kidika yayulnamana kaputyah?
Yal kidika yaklauwi nangnitlana:
—Agha, kidika praisni ki.
9Pita kalyulna:
—¿Manna ais yamta yulbauta kulnamna aslah dunamanah, Dawan Spiritni yakat traini talnin? Yakat aiwi, alma uiwi nununa muihni balna kidika, waralaih man bik sihm kaput maduwi uina karang.
10Kidika minitni yakat, Safira dauwi bukna Pita kalni yakat. Bahang wawahma balna uiwi kawi tatalna uman dauna tuskat, dawak duwi uiwi alni yaihnit yakat nununa. 11Dawak suts muihni balna bitik, dawak muih ūk balna dakakana bitik muihsak dadauna.
Sain mahni dawak siknis balna manasdulalauna
12Apostel balna munah sain dawak siknis balna bik mahni dulalauna, muih balna pasyakat; dawak witingna bitik Salomón dūrni nuhni yakat kalududuhwadai. 13Kauna muih ūk balna kidika sip as balna yaihnitna yakat uiwasdai, kaunah muih balna yaklauwi yamni ditatalna. 14Dawak muih balna kidika mahni kalna dai, ahal dawak yayal bik, Dawan yakat kukulna dai kidika. 15Dawak siknis muihni balna kidika, tapas yakat yayakwadai, kalangnin pāni minit yakat ilwi, kidika laih Pita bayakwak, witing wayani manah bik witingna minitna yakat bayakna atnin. 16Kaput bik laih yaihnit kau tawan balna kidika bik muih manas Jerusalén yakat uiwadai siknis muihni balna kidika duwi, spirit maisihni dilaihna balna kidika, bahang kaput laih bitik yamni diyamna dai muihnina kidika.
Apostel balna kidika laihnin wawalwādai
17Sumalyang nuhni dawak saduceos muihni balna kidika aslah bangdai, dawak witingna tutumna, 18dawak apostel balna kidika laihwi silak ahana. 19Kaunah pukta Dawan innisal kaiwi silak ūni dūrni balna kidika apahwi diyakna, dawi diyulna: 20“Yawanauh kalkau, makatyulnin ūni yakat muih bangyakat diyultanauh adika sangnika#Jn 11:25; 14:6; Rom 6:4. wisam.” 21Witingna dakakana kaput, payahlawak makatyulnin ūni yakat uiwi sumamalna.
Kaput laih sumalyang nuhni, witing karak bangdai kidika balna yaklauwi israel muihbararak balna kidika yakat diyuyulna kaluduhna atnin, kaluduhna tanit nuhni kidika balna karak, dawak kaput laih sisihwak uina silak ūni yakat, silak muihni balna kidika duwi uinin. 22Kaunah guardia balna kidika silak ūni yakat uiwi yakwasdadana. Kaput laih yul wisamni kidika duwi uiwi, 23yuyulna:
—Silak ūni dūrni kidika yamni putnasakdai, dawak soldado balna kidika dūr yakat maintalwaraudai, dawak dūr kidika apahtik awiningkat muih as bik disdai pasyakat.
24Kidika dakawi, makatyulnin ūni maintalyang tanituna, dawak sumalyang balna kidika karak biri biri yulwi dakakana, kidika muihni balna angkat uinapa. 25Kidika minitni yakat, muih as kiwi diyulna:
—Silak ānamana muihni balna kidika, makatyulnin ūni yakat sumalwabangki, muih balna yakat.
26Guardia balna taninatuna kidika, guardia balna karak kalpakwi walna uina, kaunah muihnina yakat dutni laih diyayamwasdai, kat muih balna kidika yaklauwi kipala kau dibabahrwarang kidika yamaduduwa bahang. 27Uiwi kawi, duwi uina kaluduhna tanit nuhni kidika balna muhnina yakat, dawak sumalyang nuhni kidika diyulna:
28—Yangna, manna yakat manayulnayangna dai, kidika alni ayangni muih balna yakat sumalnin awas. ¿Bahang manna ais yamnamanah? Jerusalén bitik yakat adika yulni sumalta bahngnamana, dawak kidika lani dauna kidika yangna mikitna yakat ilnin kultamana.#Mt 27:25.
29Pita dawak apostel ūk balna bik yaklau nangnitlalana:
—Papang yakat rispik yamnin kidika laih yangna yamnikna dini muih balna yakat rispik yamtasyangna tanitkauh. 30Yangna muihkinabararak balna Papangnina yaklauwi Jisas kidika dauna kaupak watwi dulauna, manna pan prihni yakat pāta īnamana kidika. 31Papang yaklauwi dulauwi, tingnipalni yakat āna, dawak laihwi yaknin taninatuna āna, kaput laih Israel ninisan kidika Papang yakat nawatwi kiuna atnin, dawak dutni dawak disnin kidika duna atnin. 32Kidika laih yangna witnis, dawak Spirit Holi kidika bik witnis, Papang yaklauwi diana kidika wais witing yulni dakakawa balna yakat.
33Kidika dakawi, kulninna daukalwi inin yayamna. 34Kaunah lā muihni balna pasyakat parisi as sakdai ayangni laih Gamaliel, witing kidika laih lā maestro dai, dawak muih balna kidika risnipik kalalawadai. Witing yaklauwi yulna apostel balna kidika ahni yakat apis yakna atnin. 35Kidika usnit kat lā muihni balna yakat diyulna:
—Israel muihni balna, amungtalnauh, kidika ahalni balna yakat diyamtanama kidika. 36Ismangnakattanauh, ma as kat Teudas witing muih nuhni kaldakawi, muih ahal 400 uduhwi duwi yaklauna dai. Kaunah kidika muihni ipapamna, dawak usnit uiyang balna pini kalruhwi didisna, bahang kaput laih yakat dahnkalna bitik. 37Kidika kaupak usnit kat, muih ayangnina ahana mani yakat, Judas Galilea kaupak kidika bik muih buas uduhna, witing usnit uinin, kaunah kidika ihina, dawak usnit uiyang balna kidika pini kalruruhna. 38Kaunah, adika muihni balna laih manayultayang damuktanang uiwang, dawak uhuswinih. Kat adika dini muih al kulnin karangkat bayakwarang; 39kaunah Papang kaupak karang kat, manna sip minitbayaktas awanama. Amungtalnauh, Papang niningkauh kalbautanama.
Witingna yulwa kidika dakakana. 40Kaput laih apostel balna kidika yuyulwak uina, dawak wiwisna, dawak bik diyuyulna Jisas ayangni kidika watwi yulnin awas, kaput dawak uluhmumukna. 41Apostel balna kidika, lā muihni balna muhnina kaupak alasna kalahwi uina, kat Papang yaklauwi diana dai bahang risnipik as Jisas ayangni yulni wauhnin kidika. 42Ma balna bitik yakat sumamalwadai, dawak Jisas Mesías yulni wisam kidika yuyulwādai, makatyulnin ūni yakat, dawak muih balna ūnina yakat bik.
Currently Selected:
Apastil Balna Warknina 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
