2 Kurint 11
11
Pal dawak apostel dauh balna kidika
1¡Yang lawik yul dauh balna yultingkat apis sip wauhnamana karang! Ampat karang bik, sip wauhtanauh. 2Kat manna mamatna antayang kidika laih Papang kaupak kaiwi. Yang lawik pramis manayamnayang marid al aslah karak marid manayakna atnik, Krais karak, dawak witing muhni yakat maisihni dis manaduyawinik dukih yawi sihm yal sirau as baisa al kalpakwas kidika kapat. 3Kaunah yamadutayang, sihm bil witing sinsni sirihni karak Eva#Gn 3:1-5,13. yakat alas kalyulna kapat manna yakat bik alas manayulwarang dawak Krais yakat alas lani dis karak kultamana kidika kaupak naikau alahwanama kidika yulni. 4Manna laih sip wauhtamana muih pini as Jisas yulni yulwinah kiwakat yangna manasumalnayangna kidika karak satuk; dawak manna laih dukih dutamana uman spirit dunamana kidika karak satuk kidika dawak uman yul wisamni yamni as dunaman kidika karak satuk kidika bik dutamana. 5Bahang yamni, yang laih sau kau kaldakasyang kidika apostel dauh balna usnitkauh aina kidika yulni. 6Yang laih yulbautik sip yaktas yang karang bik, di balna amanglatayang yakat laih kaput awasyang; dawak adika dini laih manna yakat namangnakana yangna di balna yamnayangna bitik yakat.
7¿Ais yul wisam yamni minit dis manayulnayang kidika dutni yamnayang katpah, yang laih sau yakat buktik manna kidika ma yakat manadulauna atnik yulni? 8Suts ūk balna yakat laih lalahnina daknayang, witingna yaklau lauwi yana atninna manna dimana yamna atnik yulni. 9Dawak manna pasmangna yakat sakyang dai mani di as dukih yana dai, yang laih muih as bik niningyakat truknin dini as awasyang dai; bahang wanaih balna Macedonia kaupak uiwi kakana kidika balna yaklau dukih yawa dini kidika yayana dai.#Fil 4:15-18. Yang laih manna namangna yakat truknin dini awas atnik kidika traitalnayang dai, dawak yang laih kaput manah yamtik takityakat yawanayang karang ki. 10Yang laih lāih kaldakayang Krais yulni rahm amanglatayang kidika, sihm Acaya sauni bitik yakat yang manah kapat kaldakayang kidika muih as bik yadakyakwas karang kapat. 11¿Ais yulni kaput yul yultayang? ¿Manna yakat dukih yawas kidika yulniyah? ¡Papang laih amanglawi manna yakat rahm manadukih yawa kidika!
12Kaunah yang ais yamtayang kidika takityakat ban yamtik yawaki ki, kidika muihni balna alas yulwi sihm yangna kaldakayangna kapat witingna bik alas yulwi witingna manah kaldakanin wawalwa muihni balna kidika yakat sans dianik awas yulni; 13bahang witingna laih apostel dauh balna dawak bik muih balna yakat alas yulyang balna ki Krais aposnitel balna kapat kalwi. 14Dawak adika dini laih di as wisamni laih awaski, sitan witing palni bik sihm yaringni innisal kapat kalwi; 15kidika bahang witing dini yamyang balna kidika laih sihm la kat kidika yakat tanitdakyang balna kapat kalwi kalalahwi. ¡Kaunah witingna warknina amput yayamwa kat kaput didisna karang!
Pal witing apostel kapat wauhnin wauhna kidika
16Yang wattik manayultayang muih as bik kulnin awaski yang laih tunaki dutni ki; kaunah kaput kukulwakat, yadatanangkat sihm muih tunani dutni yulbauwa kapat yulmanabaukuh, yang bik apis alaskina yaksihni duna atnik, 17adika aput alaskina yaksihni dunik kidika di dauh as karang bik dawak yul balna kidika Dawan yaklau yamni talwas karang bik. 18¡Muih mahni palni witingna silp di yamwi alasninana yaksihni duduwa kat, yang bik alaskina yaksihni dunayang karang! 19Manna laih sins duyang palni mana, kaunah muih tunanina dudutni balna yakat laih dukih sip wauhtamana, 20dawak manataihwi yayamwakat dinina yamtamana kidika balna yakat bik sip wauhtamana, dimana duduwi, alas manayuyulwi, dutni manayayamwi kidik awaskat muhmana yakat manababauwi. 21Yulnik asaldayang karang bik, ¡yangna laih uba palni yududutni yangna dai kaput yamna atnikna!
Kaunah muih ūk balna kidika witingna alas ayangnina nuhni yayamwakat, yang bik alas ayangki nuhni yamnayang karang, adika laih di as dauh karang bik. 22¿Witingna kidika hibru muihni balnayah? Yang bik hibru muihniyang. ¿Israel muihni balnayah? Yang bik Israel muihniyang. ¿Witingna kidika Abraham sulani balnayah? Yang bik Abraham sulani yang. 23¿Witingna kidika Krais dini yamyang balnayah? Witingna karak dawakat yang kauh Krais dini yamyang yang, adika aput yultayang adika sihm muih tunani dutni yulbauwa kapat yultayang karang bik. Yang laih witingna karak yang kauh wark alahwanayang, witingna karak dawakat yang kauh wat mahni silak yaahana,#Ap.w 16:23. witingna karak dawakat yang kauh mahni yawiwisna, dawak yang laih ma mahni daunin yamadangni yakat sakyang dai. 24Wat singka Ju muihni balna yaklauwi wah 39 yawiwisna dai.#Dt 25:3. 25Wat bās pan kau yawiwisna,#Ap.w 16:22. dawak kipala kau laih wat as yababahrna.#Ap.w 14:19. Yang pa ūk kau yawayang kuringni kidika wat bās bulna dai, dawak, was daunik manah pukta as dawak madah as kuma yakat bayaknayang dai. 26Yang pa balna yakat wat mahni yawayang, dawak was, di malyang balna, yang sauki muihni balna#Ap.w 9:23. pasyakat dawak pa ūk muihni balna#Ap.w 14:5. pasyakat bik yamadangni kidika kalpaknayang. Tawan nuhni pasyakat, di dahnin pāni yakat dawak kuma yakat, dawak wirah dauh balna pasyakat bik yamadangni kidika kalpaknayang. 27Wark balna dawak trabil balna kalpaktik bayaknayang; ma mahni bik amas bayaknayang; yuh dawak dikih yāwak bik wauhnayang; ma mahni bik di kastasyang dai; asna dis yulni sanni bik wauhnayang.
28Baisa kidika minityakat adika dawak di ūk yulni balna bik, ma bitik yakat kulwi kalbaunin tikini kidika yang mikityakat yataihwi suts balna bitik kidika yulnina. 29Muih as siknis kalahwarang kat, yang bik siknis alahwayang; muih as kau kalyayamwakat bukwarang kat, yang laih dutni kaldakayang. 30Di as yulni alasna yaksihni dunin kat, yang sip minit bayaktasyang dini balna kidika yulni alasna yaksihni dunayang karang. 31Dawan Jisas papangni Papang, witing ayangni nuhni yamnin ban kaput atnin kidika, amanglawi yang laih yul rahm yultayang kidika. 32Damasco yakat sakyang dai mani, kabamint kayang muihni king Aretas dini yamwadai kidika yaklau tawan nuhni kidika dūrni balna yakat guardia balna danadai, yang yakat yalaihna atninna yulni; 33kaunah muih buas yaklau tawan nuhni daklana kidika winnidar munah di punin dini as karak yahawi yalalakna dai, dawak kaput witingna tingnina kaupak irik lawanayang dai.#Ap.w 9:23-25.
Currently Selected:
2 Kurint 11: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
