2 Kurint 10
10
Pal witing apostel parasni kidika
1Yang, Pal, manna yakat kalmana dinit buktayang, Krais minikun talnin lani duwa kidika kau, manna pasmangna yakat sakyang laih ap yang dawak manna kaupak naikau yang laih yul manas yultayang yatinama karang bik. 2Bahang yamni, kalmana dinit buktayang, yawik manatalki mani kat, manna lawa yataihwi yayamwinih yul balna yulna atnik muih dauh balna di yayamwa kapat yulni yulkina yayakwa muihni balna kidika yakat, bahang witingna niningna yakat lawinik kidika kultayang. 3Rahm yangna laih muih dauh yangna, kaunah yangna laih adika sauni muihni balna kalbabauwa kapat kalbautasyangna. 4Kalbaunin dini balna duda kidika laih adika sauni kaupak awaski, kaunah kidika balna laih Papang parasni kalbaunin ūni pararasni balna kidika daukalnin sipki. Dawak yulkina balna yayakwa kidika kaput daukalmuktayangna 5dawak Papang yakat amangnilanin awas yulni niningnakauh yaklalauwa balna kidika yakat bik. Muih dauh sinsni lani balna kidika bitik laih Krais tingni dinityakat ātayangna, witing yakat yulni dakana atnin yulni, 6dawak yangna laih kultayangna yul dakakawas muihni balna kidika yakat wah diana atnikna, angdika mani manna yul dakanama mani kat.
7Manna laih muih muhni yakat manah talamana.#10.7 Manna laih muih muhnina yakat manah talamana: wirlana ūk yakat laih aput yulwi: Di as rahm kidika yakat talnauh. Angdika muihni Krais dini kaldakawa kidika, witing amanglana atnin ki yangna bik Krais dini yangna kidika. 8Dawak yangna paraskina kidika kaupak baisa minit laktik yulki karang bik, asaldinik dini as bik diski; bahang Dawan yaklau paraskina yanana tawan dibindauh kidika dulauwi yamna atnin dawak daukalnin laih awas. 9Yang wauhtaya balna ulnayang kidika karak bilmanalauna atnik yamnayang kapat atnin kidika dukih yawas ki. 10Muih as sakki yang wauhtaya balna ulnayang kidika laih dadasni ki dawak bik pararasni ki ti yulwa muihni kidika, kaunah muih dauh yang yakat laih muih as yakat bik taihtik yamtasyang, dawak yulbautayang yakat bik rispik dis yulbautayang. 11Kaunah adika yulwa muihni kidika witing amanglana atnin ki, yul kau yultayangna kaput dawak manna kaupak naikau yangna bik wauhtaya kau ultayangna kaput, sihm kaput awanaki ki manna pasmangna yakat awanaki mani kat.
12Rahm palni yangna laih muih balna witingna alas ayangnina nuhni yayamwa kidika balna karak kallibitnikna laih yamtas yangna. Kaunah witingna laih di dauh kidika yayamwi witingna alas kallakwi kaltatalwa kidika dawak bik biri biri kallibitwi tatalwa kidika. 13Yangna laih alaskinana yaksihni yamtik minit bayaktas awanaki ki. Papang yaklau nikingnakawi wark alahwayangna pāni kidika, dawak witing yaklau yanaduwi kiuna Kurint sauni manna bangmana kat. 14Kidika bahang, yangna di yamnikna dini kidika kaupak baisa minit bayaktik yamtasyangna, adika dini amput kitdaih manna pasmangna yakat muhnilau kau disyangna dai katlaih. Yangna lawik tatuna manna yakat Krais yulni wisamni yamni kidika dutik yawanayangna dai. 15Dawak yangna yamnikna dini kidika kaupak minit bayaktik muih ūk balna wark yayamna kidika karak alaskinana yaksihni yamtasyangna. Nawatkauh, manna pasmangna yakat wark alahwinikna tahatayangna, manna rahm kulnin lani dutanama kidika karak, yangna yamnikna dini kidika pasyakat karang bik. 16Yangna bik baisa pa balna naikau manna yalahtamana kidika tanityakat yawik yul wisam yamni kidika yulnikna kultayangna, kaunah muih ūk balna saunina yakat laih awas, muih ūk balna wark yayamna kidika karak ayangkina yaksihni yamnikna awas yulni.
17Muih as witing manah kapat kaldakanin dukih kalawa kat, Dawan yakat witing manah kapat kaldakawang.#Jr 9:24. 18Kat yamni kalkulna muihni kidika laih witing alas ayangni nuhni yamwa kidika awaski, kaunah Dawan ayangni nuhni yamwa muihni kidika ki.
Currently Selected:
2 Kurint 10: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
