MATIUS 22

Owersey pokbwi baposomtew atakam

(Luk. 14:15-24)

1Bare. Yesus baposomtew atakam e ow aootawef. 2“E Onam Op Pemerintah, bare raja ipic, owersey pokbwi, e atiw aemtamef inim cimin ara. 3Aramat ipic, jirmec e akerja bwemtam ow ajirimefen. ‘Car, e pokbwi akac memen ajateof ow, aynam bwenaw, atakam mamotawey.’ Inim aeefen. E ajateef ow nat, bwenaw pwicaken. 4Aramat ipic masirin, jirmec, wun kerja bwemtam ow aojirimefen. Car inim atakam e ajateof ow mamotawey. Jakaperey. Aramat ipic atakam, ‘E dopokbwi pok emcafafaykurumapomorom. E dosapiam, e wun ajumawiru binatangam, emcaciorom. E pok takas awap. Caram a pokbwi asan aynam enawey.’ Inim eey. Aramat ipic inim aeefen. 5E ajateef ow nat, e atakam jen baji opok cimin aememfesen. Wun ipic e akebun asan ajisosefen. Wun ipic masirin, e apok juw buwumamtat asan ajisosefen. 6E wun ow takas masirin, e aramat ipic kerja bwemtam ow, ban akimomfesen. Ar cemew e ow aatfesen. Wunam acatiwfesen. 7Bare, e raja ipic jak amop apwimapefen. Ar e atentara ow atewosomefen. E tentara ow masirin, e raja ajowow acatiwfes ow, acatiwfesen. Ar e ow akota cem takasam, sos aurumkurumfesen. 8E raja ipic masirin, atakam e akerja ow aotawefen. A pokbwi pok emcafafaykurumapomorom. E nat, e ajateof ow, bare ow pwicak ara. Ar a pokbwi memen, bare awcawor opok ara. 9Inimas car a kota fumi ciram jimasappu mamapeney. E aporcokom ow takas, a pokbwi akac memen mamjateey. Inim aeefen. 10E kerja bwemtam owam e bokot jof takaspu ajisosfesen. Ar e aporfes ow takas atawanimfesen. Ar e ow tarowatam, fasiam, takas atawanimfesen. Bare, e owersey pokbwi cem, jaki ow imwinakap apitapefen. 11E raja ipicam, e jaki ow bi bapor ajisefen. Aram erasan jipic cowok owersey pokbwi pakaian opok aporefen. 12Aramat ipic masirin, ‘Or owersey pokbwi pakaian opok, a cem afiwaperem ucimaram?’ Inim aeefen. E ipic nat, jokon ajiapefen. 13E raja ipic masirin, atakam e akerja bwemtam ow aotawefen. ‘Awap ipic e abanam, e abweyam, manam bajikapomey. Wunam e ipic e jiwicnakut asan iwimey.’ Inim aeefen. Erasan, ow bwec abweccemes. Aram dam jen ajicemes. 14Allah, ow arke ajatema. Aramat ipic nat, ow arke opok aereremtawma.” Yesus inim aeef.

Uang raja batetam akat open?

(Mrk. 12:13-17; Luk. 20:20-26)

15Bare, e Parisi ow ajisosfes. Aram aramat ipic, salah atakam epen bwempor, atakam aamtawfes. 16E Parisi ow, e amamkawi owam, e Herodes atakam mamkawi owam, e Yesuspu atewosomfes. E ow masirin, “Guru. Or jipic tarowat apormom ara. Onam Allah bokotpu atakam atakamnak amememtamcemem. Oram ow e atakam atawmesas omar opok. Oram, ‘Wun ow awut. Wun ow awut opok,’ baji opok ara. 17Onam atakam atawcarowey. E Kaisar, uang a batetam jirmec ajirimforow. Dar a uang a batetam akat open? Eras bwem, e Allah Jirmec bopow open? Or ucim bi binipam?” Inim aefes. 18Yesus nat, e ow e fasias aporef. Ar masirin, “Car pir bwe ow ara. Car aempormenokom ucimaram. 19E Kaisar batetamas uang cowoknakap do poromcan.” Inim aeef. E ow masirin, uang dinar cowok aramat ipic atowocenfes. 20Aramat ipic masirin, “Awap gambar ca biam? Awap asuk wow ca juwasam?” Inim aeef. 21“A Kaisar bi ara. Aram Kaisar juwas ara.” Inim aefes. Yesus masirin, “Bare, car Kaisar pok, Kaisar mamtetamey. Caram, Allah pok, Allah mamtetamey.” Inim aeef. 22Bare, e ow inim atakam jen ajifes, junum aefes. Aram aramat ipic bakan ajifes. Aram ajisosfes.

Ow aojaworsitcemes

(Mrk. 12:18-27; Luk. 20:27-40)

23Bare. E jofayam Saduki ow, aramat ipic ameromfes. E Saduki ow abi binip ara, “Damir aaffes ow bojaworsit opok ara.” Inim bi binip aceceremcemes. Bare, e ow jonow aramat ipic atowporfes. 24“Guru. Musa atakam atawef, ‘Jipic, jiwi bafimat opok damir aafcownew, e arewec, e damir ipic arem baotewetcow. Aram jiwi e arepwec bafimtamcow.’ Inim aeefen. 25Bare, dajowow ipic ower jiwi tujuh ajiwar ara. E betiw ipic cepes atewetef. E nat, aramat ipic jiwi bafimat opok damir aafef. Inimas ar, e arem e abak ipic botewet, bakan ajiamesef. 26E aykun ipicam inim cowok aemef. E wun aykun ipicam inimas cowok aoemef. Bare, e ow tujuh ajiwar takas inimas aemtotorfes. 27Asep ara masirin, e cowocam damir aafef. 28Bare, e ow takas e cowoc ateweta aefes. Inimas ara, e damir aaffes ow aojaworsitces jofay, e ow tujuh ajiwar aman, e cowoc ca ipic arem aememcow? Inim aefes.”

29Yesus masirin, “Car e Alkitab atakam camsom opok. Caram Allah afakas camsom opok. Inimas car bi binip jiwic awamcokom. 30Bare, e damir aaffes ow aojaworsitces jofay, ower ow, cepes botewet opok aemcemes. Cepesam ower bojuwut opok aemcemes. E nat, ar e onam op malaikat inim awcawor aememcemes. 31Allah, damir ow aojaworsitcesas, atakam car aotawfan. Caram e atakam baca emcaemfokom openow. 32Aratakam, ‘Dor Abraham arAllah ara. Doram Ishak arAllah ara. Doram Yakub arAllah ara.’ Inim aefan. Bare, aramat ipic damir ow arAllah opok. Ar tetakay ow arAllah ara. (Inimas e damir aaffes ow aojaworsitcemes apormom ara.)” Yesus inim aeef. 33E ow arke, e aramat ipic atakam atawefas jen ajifes, ar junum aefes.

E awutnak jirmec

(Mrk. 12:28-34; Luk. 10:25-28)

34Bare. Yesus e Saduki ow jokon kami desen emapomef. E Parisi ow inim atakam jen ajifes ara, aram ajarewsiemfes. 35E wun ajarewsiemef Parisi ipic, Allah Jirmec mamememtam ipic ara. Aramat ipic, Yesus bwempor ememef. Inimas ar jonow Yesus atowporef. 36“Guru. E Musa tulis aeapomef Jirmec aman, e awutnak jirmec ucim jirmecaram?” Inim aeef. 37Yesus masirin, “E awutnak jirmec inim ara: ‘Damos awutnakut e oTuhan Allah mamjiomkurumey. Or e ojak epcomam, e obi binip epcomam, damos e aramat ipic mamjiomkurumey.’ 38Bare, e jirmec e awutnak jirmec ara. Aram e pentingnak jirmec ara. 39E wun awut jirmec, a jirmec awcawor ara. E jirmec, ‘Damos e ojowow mamjiomey— or damos orma ajiomamem inim awcawora.’ E wun awut jirmec inim ara. 40E Musa surat aeapomef takasam, e Allah atakam mamtaw ow aeapomfes surat takasam, a jirmec jamnuk jipu ara.” Yesus inim aeef.

E Allah Aeremtewef Ipic

(Mrk. 12:35-37; Luk. 20:41-44)

41E Parisi ow ajarewsiemfes ara, Yesus jonow e ow atowporef. 42“Car, e Allah Aeremtewef Ipic, ucim bi binip aceceremamokom? E aramat ipic ca urpisaram?” Inim aeef. E Parisi ow masirin, “Ar Daud urpis ipic ara.” Inim aefes. 43E Yesus masirin, “Roh Kudus nat, atakam bi binip Daud atetamef. Daud masirin, ‘E Allah Aeremtewef Ipic, Tuhan ara.’ Inim aeef. E Daudam,

44Tuhan, atakam, e doTuhan aotawef:

Or a doban bo jamam emapey— dor e ojewew ow akumimosomkurumcey jofay ajiwara. Inim aeef.

Aramat ipic inim atakam atawef nat, ucim aram?

45Bare, Daud e Allah Aeremtewef Ipic, atakam atawef, ‘Ar doTuhan ara.’ Inim aeef. Inimas ara, e Allah Aeremtewef Ipic, Daud urpis ipic aememef nat, ucimaram?” Yesus inim aeef. 46Bare, e ow Yesus atep bwemjit asan opok cowok. E jofay ajiwar, ow jonom aramat ipic bwemotowpor asan opok cowok. Ar omar aefes.

Currently Selected:

MATIUS 22: LAICNS

Highlight

Copy