MATIUS 21

Yesus Yerusalem afiwef

(Mrk. 11:1-11; Luk. 19:28-40; Yoh. 12:12-19)

1Bare. Aramat ow Yerusalem sotop amersisiemfes ara, aram kota Betfage ajaremfes. E kota e sikon asan juwas Saitun aemamesef. Yesusam jirmec e amamkawi ipic jamnuk ajirimef. 2“Car e bap ewames cemsanpu mamjarey. E cemsan afiwemcokom cowok, car keledai cum pok epcomam, keledai jiwiam, cowkon, manmok apematamcomokom. Bare, e keledai jamnuk e cum pok mamsurumey, wunam mamtowotnawtamcan. 3Ow atakam car aotawcannew, car masirin, ‘Tuhan e keledai bak ton bajaren. Aramat ipicam e keledai asarimtetamceman.’ Inim mameey.” Yesus inim aeef.

4Bare, eras aemfes ara, er e Allah atakam botaw ipic e atawef atakam jipu bwemas ara:

5“E kota Sion ow inim atakam mamotawey: ‘Jakaperey. E caraja ipic arma batawsicim opok ipic ara. Aram car aenawomaman.

Aramat ipic keledai bak ton acowojarma. E keledai, bare ay keledai ara. Ar pok jec bomat keledai ajiwi ara.’ Inim mameey.”

E Allah atakam botaw ipic inim aeefen. 6Bare, e Yesus mamkawi ipic jamnuk ajisosfes. Ar e aramat ipic jirmec ajirimefas ji aefes. 7Ar e keledaiam, e ay keledaiam, atowocenfes. Aram e abaju mamincop e keledai jamnuk bak ton atometmuwtiwfes. Yesus masirin, e keledai bak ton atometapef. 8Ow arkenakutam e abaju e bokotpu amuwtiwa aefes. Wun owam os o e epcom asesakamnemtotorfes, wunam e os o e epcom e bokotpu amuwtiwa aefes. 9E aramat ipic e bap ajarfes ow arkeam, e fa asoromfes ow arkeam, si asifes. “Daud urpis, dormomo! Tuhan, asan akat, e atewenamamar ipic baomcow! Allah, dormomo!” Inim aefes.

10Bare, aramat ipic Yerusalem ajaremef. Yerusalem ajaremef masirin, e kota ow takas jisuwan ajifes. “A aramat ipic cam?” Inim aefes. 11E ow arke masirin, “Aramat ipic e Allah atakam botaw ipic juwas Yesus ara. Ar e Galilea capinmi kota juwas Nasaret ipic ara.” Inim aefes.

Yesus Allah cem afiwef

(Mrk. 11:15-19; Luk. 19:45-48; Yoh. 2:13-22)

12Bare, Yesus, Allah cem afiwemef. Ar pok juw bumamtaw ow takas aotewerisimkurumef. Aram e uang juw buwumcicirimtaw ow ameja bipar ajimirsasamef. Aram pari juw bumamtaw ow akursiam bipar ajimirsasamef. 13Aram atakam e ow aotawef. “E Alkitab atakam ara, ‘E docem, janim do manim cem aemamescema.’ Inim aema. Ca nat, a cem, osom ow barewsiap asan, aemapomfokom.” Yesus inim aeef.

14E Allah cem aman, manmok kapi owam, afafasijarfes owam, Yesus aenawomfes. Aramat ipicam e ow dam ajaworomtawef. 15E Allah atakam mamtaw tugas ow awutam, e Allah Jirmec mamememtam owam, e Yesus akatnakut aemefas aporfes. Wunam, jiwi e Allah cem aman si asifes. “Daud urpis, dormomo!” Inim aefes. E ow inimasam aporfes. Ar masirin, jak amop apwimapfes. 16E ow masirin, atakam aramat ipic aotawfes. “Ow e jiwi e atakam atawmesas jen ajimemnew?” Inim aefes. Yesus masirin, “Jen ajimin. Bare, e Alkitab atakam, ‘Or jiwi kanimam, aw aanmes jiwiam, or basicimnak amememtamfem.’ Inim aema. Ca nat, e atakam baca bwem opoknew?” Inim aeef. 17Bare, aramat ipic e ow bakan ajief. Aram e kota bakan ajief. Ar masirin, kota Betania ajisosef. Erasanam isi aamsesmep.

Yesus os cowok sa aemapomef

(Mrk. 11:12-14,20-24)

18Ajofay tamnakap ara, aramat ipic e kota Yerusalem bofasi ajaref. Aram amosto aememef. 19Ar masirin, os juwas “arā” e bokotpu pim aporef. Aram e arā ospu aapenef. E arā ospu aapenef masirin, eke opok cowok aporef. Os e cowokin aporef. Aramat ipic masirin, atakam e arā os aotawef. “Or eke bope opok cowoka.” Inim aeef. Bare, e arā os sa asarimsaemef. 20E mamkawi ow inimas aporfes ar junum aefes. “A arā os sa asarimsaemama ucimasaram?” Inim aefes. 21Yesus masirin, “Atakamnak ara, car Allah basicimnak aemcokom, wunam bi binip arke opok aemcokom, caram e arā os aemaminas aemcomokom. E nat, e cowok opok. Caram atakam a sikon aotawcokom, ‘Baysosey. E jicupum bwi orma jupuey,’ inim aecokom, bare e sikon inimas cowok aemcema. 22Car janim Allah aanimcokom, caram, ‘Allah e janim aanimcomas aemtamcemarow,’ inim atakam basicimkurumey. Aramat ipic masirin, e janim aanimcokomas takas atatamceman.” Inim aeef.

Yesus fakas

(Mrk. 11:27-33; Luk. 20:1-8)

23Bare. Aramat ipic e Allah cem afiwef. Aram atakam amememtamef. E atakam mamememtam aman, e Allah atakam mamtaw tugas ow awutam, e Yahudi ownucur owam, aramat ipic aenawomfes. “E aemamemas nat, jirmec ca jirimimfan?” Inim aefes. 24Yesus masirin, atakam e ow aotawef. “Doram jonow ca botowpormin. Car atep ajitcan, doram e aemaminas jirmec ajirimfan ipic, atakam car aotawcimin. 25E Yohanes bwi abwimefas, jirmec ca jirimef? Allah aranew? Asmat ow aranew?” Inim aeef. E ow masirin, eras aramaman atakam aamtawfes. “Dar atakam atawcom, ‘Allah, e Yohanes jirmec ajirimef,’ inim aecom, aramat ipic masirin, ‘Car e ipic basicim opok nat, ucimaram?’ inim aecemarow. 26Da nat, ‘Asmat ow e Yohanes jirmec ajirimef,’ inim aecom, dar e ow arke omar aecomom. E ow arke abi binip ara. ‘E Yohanes, Allah atakam botaw ipic ara,’ inim bi binip aceceremames.” Inim aefes. 27Bare, e ow atep e Yesus ajitfes. “E Yohanes e bwi abwimefas, jirmec ajirimef ipic camnew? Daram namsom opok.” Inim aefes. Aramat ipic masirin, “Bare, doram e aemaminas jirmec ajirimfan ipic, atakam ca botaw opok.”

Ower jiwi jamnuk baposomtew atakam

28“Car ucim bi binip aceceremamokom? Bare, jipic cowok ower jiwi jamnuk arawen. Aramat ipic, e betiw ipic aapenefen. ‘Ata. Or wow e anggur kebun kerja emey.’ Inim aeefen. 29E betiw ipic nat, ‘Do pwicako.’ Inim aeefen. Asep ara masirin, ay binip aceceremefen. Wunam e kebun kerja ajisosefen. 30E aricipic masirin, e aykun ipicam aapenefen. Ar e kebun kerja bwemtam, atakam cowok e aykun ipicam aotawefen. E aykun ipic masirin, ‘Diwi. Bare, akat.’ Inim aeefen. E nat, ar e kebun kerja baysos opokuten. 31E jiwi jamnuk aman, e aricipic atakam ji aeef ipic cam?” Yesus inim aeef. E ow masirin, “E betiw ipic ara.” Inim aefes. Yesus masirin, “Atakamnak ara, e pemerintah uang batawanimtam kerja owam, e werey cepesam, e Allah Pemerintah Asan bap afiwapcemes. Car masirin asep ara. 32Bare, Yohanes car aenawomfan. Ar e bokot anakat car aporomtamfan. Ca nat, e aramat ipic atakam basicim opokut. E nat, e pemerintah uang batawanimtam kerja owam, e werey cepesam, e Yohanes atakam asicimfes. Caram inimas aporfokom. E nat, asep jofayam, car dosa bak bapayem opok aemfokom. Caram aramat ipic atakam basicim opok aemfokom.”

Anggur kebun baposomtew atakam

(Mrk. 12:1-12; Luk. 20:9-19)

33“Caram wun baposomtew atakam jen pajiey. Jipic cowok, capinmi aomomefen. Aram anggur kebun atawapomefen. Aram pagar e kebun fumi abwicirimapomefen. Aram anggur bwi burumwisim asan e kebun akenemefen. Cemam opnakut aeapomefen. Aram e kebun, kebun kerja bwemtam ow aotasimtitamefen. ‘Car e dor anggur kebun kerja aemtamcenokom, dor e wun anggur eke car atatamcimin. E wun masirin, doras ara.’ Inim atayi aeefen. Ar masirin, wun jo capinmi ajisosefen. 34E kebun aramat ipic, e anggur eke bakokomtaw bwi sotop aporef, ar wun kerja bwemtam ow, e kebun kerja bwemtam owpu, atewosomefen. Ar e ow e anggur eke bamertaw atewosomefen. 35E kebun kerja bwemtam ow masirin, e wun kerja bwemtam ow, ban akimomfesen. Ar wun ipic cowok omop aaffesen. Aram wun ipic cowok acatiwfesen. Aram ek, wun ipic cowok, ajimirsasamfesen. 36E kebun aramat ipic masirin, wun kerja bwemtam ow atewosomefen. E bap atewosomef ow, arke opok arawen. E asep atewosomef ow nat, arke inim arawen. E nat, e kebun kerja bwemtam ow, e bap aemfesas cowok, aoemfesen. 37Asep ara masirin, e kebun aramat ipic, e atiw e owpu atewosomefen. ‘E ow, e dotiw, bwemumiris asan opok.’ Inim aeefen. 38E kebun kerja bwemtam ow nat, e atiw aporfesen. Ar masirin, aramaman atakam aamtawfesen. ‘Ewamec ipic, e aricipic pok takas atowomatcow ipic ara. Dey. E ipic bacatiwmoc. E apok takas darma boportowom.’ Inim aefesen. 39Bare, ar e ipic ban akimomfesen. Aram e ipic e kebun aotpepemisimfes, wunam acatiwfesen.

40Inimas ara, e kebun aramat ipic aenawcow, ar e kebun kerja bwemtam ow ucimas emcow?” Yesus inim aeef. 41E ow masirin, “Aramat ipic, e jokmen ow, asan pwicak acajimirtiwcema. Aram e anggur kebun, wun kerja bwemtam ow aootasimtitamcema. Bare e wun kerja bwemtam ow e anggur eke e kebun aramat ipic atatamcemes.” Inim aefes. 42Yesus masirin, “Car e Alkitab atakam baca emcaemfokom openow:

‘E cem bweapom ow, ek cowok pwicak aporfes, wunam e ek aeremtiwfes. E ek nat, cem ek penting awutnakut aemamesef.

Bare, Tuhan eras aemef. Daram e aemefas akat cowok apormom ara.’

E Alkitab inim aema. 43Inimas ara, caram jakaperey. Allah car e aPemerintah Asan bafiw, acuw aatcema. Aramat ipic masirin, wun samat e asan atowomiwcema— e samat, e Allah Pemerintah Asan, kerja bwemtamnak samat ara. [ 44E ek ton aneyjuamesces ow, ananasiamescemes. Wunam e ek, ow aneykamimopcow, ar e ow apetamtiwcema.]” Yesus inim aeef.

45E Allah atakam mamtaw tugas ow awutam, e Parisi owam, e Yesus e baposomtew atakam atawefas, jen ajifes. Jen ajifes masirin, ar aramat ipic aratakam atawef aporfes. 46Aram aramat ipic ban bakimom aemporfes. E nat, ar e ow arke omar aefes. E ow arke abi binip ara, “Aramat ipic, Allah atakam botaw ipic ara,” inim bi binip aceceremfes. E ban bakimompor owam, e ow abi binip aporfes.

Currently Selected:

MATIUS 21: LAICNS

Highlight

Copy