YOHANES 15

E pok akan anakat

1“Dor eke akat apecemar os inim awcawor ara. Doricipic masirin, e kebun kerja ipic inim awcawor ara. 2E dor ajamkawimenes ow, e os ef inim awcawor ara. Doricipic, e ef, eke bape opok aporcow, aram asakamosomcema. Aram e ef, eke bape aporcow, aram e pwicak ef kanimnakap arke asesakamosomcema. Eras e ef awut, eke arke bopeas ara. 3Car e dor atakam car aotawfinas ji aefokom. Inimas car akat aememfokom. 4Caram dor cowkon mamatamemapawarcan. Dor masirin, car cowkon aatamemapawarcimin. Os ef, o batap opok aatamemapawarcow, ar eke bwempeap asan opok. Caram dor cowkon batamemapawar opok aemcokom, car akatas bwemem asan opok.”

5“Dor e os o awcawor ara. Car masirin, e os ef inim awcawor ara. Ow dor cowkon aatamemapawarcenes, wunam dor e ow cowkon aatamemapawarcey, e ow, akatas arke aemcemes. Car dor cowkon bemap opok aemcokom, car akatas bwemem asan opok cowok. 6Ow dor cowkon batamemapawar opok aemcenes, ar pwicak ef inim cimin ara. Owam e ef asesakamosomcemes. E ef mairin, sa asacema. Owam e ef atawcemes, wunam jis asapimapomcemes. E ef masirin, jis afaycema. 7Car dor cowkon aatamemapawarcenokom, wunam car doratakam ji aecokom, bare e akat aporcokomas janim Allah manimey. Aramat ipic masirin, eras car aemtamceman. 8Car akatas arke aemcokomam, do mamkawinak ow aememcokomam, bare, ow, e doricipic akatnakut ara, inimas aporcemes.”

9“Doricipic damos dor ajiomaman. Doram inimas cowok damos car ajiomamin. Caram doratakam ji mamatameawarey. Inimas dor damos car aatamjiomawarcimin. 10Dor e doricipic jirmec ji aatameawarmin. Inimas doricipic damos dor aatamjiomawarman. Caram e dojirmec ji aatameawarcokom, doram damos car aatamjiomawarcimin. 11Do jak akat ca batetamtotor, bare akat ara. Caram jak akatnakut memem, akat ara. Inimas ara, dor a atakam car aotawmin. 12Doram, jirmec car ajirimamin. Car damos caramaman mamamey. E dor damos car ajiomaminas inim cimin mamamey. 13Jipic cowok, e ajowow bajortew, inim damir aafcow, ar e ow damos awutnakut ajiomama. Inimas bwem, bare damos bajiomas awutnakut ara. E wun damos bajiomas, bare kanim ara. 14Caram e jirmec car ajirimaminas ji aecokom, bare car dojowow ara. 15Kerja bwemtam ow, e kerja aramat ipic aemamaras amsom opok. Inimas dor, ‘Car dokerja bwemtam ow ara,’ inim baji opok. E nat, dor e doricipic atakam jen ajiofas takas, atakam car aotawfin. Inimas dor, ‘Car dojowow ara,’ inim aemin. 16Car do bweremtew opok. E nat, car do mamkawi ow memem aereremtawtotorfin. Doram car akatas bwem atewosomtotorfin. E aemcokom akatas, e bakari opokas ara. Bare, car do mamkawi ow awapokom ara. Inimas car janim e doricipic aanimcokom, aramat ipic e janim aanimcokomas takas atatamceman. 17Bare, caram damos caramaman mamamey. Dor inim jirmec car ajirimamin.”

Awames capinmi ow bifan afayomcemes

18“Awames capinmi ow bifan car afayomaman epenow. E nat, ow bifan bap dor afayomfenes, wunam bifan asep car afayomfan. Caram inimas binip manim arapok. 19Awames capinmi ow, damos aramaman aamjiomames. Car awames capinmias ajamkawifokom ayaw, a owam damos car ajiomfan. E nat, car awames capinmias mamkawi opok. Inimas a ow bifan car afayomaman. Bare, dor car awames capinmias bakan bajios aereremtawtotorfin. 20E aotawfin atakam binip mamcomomey. ‘Kerja bwemtam ipic awut ara, wunam kerja aramat ipic kanim ara, bare inimas opok.’ Inim aefin. E wun ow dor ajurusumfan. Inimas e owam car ajurusumceman. E wun ow masirin, e doratakam ji aefes. Inimas e owam caratakam ji aecemes. 21Bare, e wun ow e dor atewenamfan ipic amsom opok. E nat, car dor ajamkawimenokom ow ara. E owam inimas aporces, aram car ajurusumceman. 22Dor atakam e ow botaw bwenaw opok ayaw, e owam dosa opok aemapfes. E nat, dor atakam e ow emcaotawof. Inimas ar e dosa aemamesas, bwempacin asan opok. 23E bifan dor afayomamenes ow, bifan e doricipicam afayomames. 24Dor junum bweas e ow bipu aemof. Wun owam e junum bweas bwemem asan opok. Dor e junum bweas bwem opok ayaw, e ow dosa opok aemapfes. E nat, e ow e junum bweas aporfes, wunam bifan doram, doricipicam, afayomfarowos. 25E aemfenesas nat, e ow atowomfes Jirmec surat atakam jipu ara. E atakam ara, ‘Dor pwicakas bwem opok. E nat, ar bifan dor afayomfenes.’ ” Inim aema.

26“Bare e jak fak bemapomtam ipic, e doricipic cowkon awapes. E ipic Roh Kudus ara. Doram e Roh Kudus e cadampu atewnemcimin. Ar doricipic asan ewneycema. E Roh Kudus e atakamnak car amememtamceman. Aramat ipicam doratakam car aotawtamceman. 27Bapnak car dor akac aememfom. Wow ajiwaram car dor akac aememamom. Inimas caram doratakam kawey ow aotawtamcemonokom.”

Currently Selected:

YOHANES 15: LAICNS

Highlight

Copy