AEMAWIRISAS 8

Saulus, Yesus basicim ow ajurusumef

1Saulusam e ow e Stefanus bacatiw akat aporefen. E jofayam, ow e Yerusalem Yesus basicim barewsi ow, awutnakut ajurusumfesen. E Yesus basicim ow masirin, e Yudea capinmiam, e Samaria capinmiam, apacayosfesen. E atakam botaw batewosom ow nat, bapacayos opok arawen. 2Tuhan mamkawi fak owam, e Stefanus awuapomfesen. Aram e Stefanus bwec awutut abwecfesen.

3Saulusam e Yesus basicim barewsi ow, awutnakut ajurusumefen. Ar e cemin cemin afiwa aeefen. Wunam owerowam, cepesam, ajijimomisa aeefen. Aram e ow penjara cem atawima aeefen.

Filipusam, Petrusam, e Atakam Akat e Samaria capinmi ow aotawfes

4E apacayosfes ow nat, e Atakam Akat, e asan takas acacapiomfesen. 5Filipusam Samaria capinmi kota cowok ajisosefen. Ar e ow Kristus atakam aotawefen. 6E ow arke, e Filipus atawef atakam, jen cowok ajifesen. Aram e aemef junum bweas aporfesen. Ar masirin, aratakam jen ajikurumfesen. 7Erasan ow arke, e ajak aman, dat arawen. E datam jen awut ajifes, wunam e ow jak aman awarimfistotorfesen. Japow ow arkeam, jine kamwis ow arkeam, ajaworemfesen. 8Bare, e kota ow jak akatnakut aememfesen.

9Bap ara, jipic juwas Simon e kota aemapawirien. Aram dat epcom ipic arawen. E Samaria ow, e Simon aemawirias aporawiris, wunam junum awut aeawirisen. Aramat ipicam atakam aotawefen. “Dor ow awutut ara.” Inim aeefen. 10E kota ara, e awut ow takasam, e mami ow takasam, aramat ipic aratakam jen ajikurumfesen. E owam, “E allah juwas Fakperkampic a capinmi aneyef. Ar e Simon ara.” Inim aefesen. 11Tareynakut ara, e ipic, e dat epcom junum bweas, e ow aporomtamawirien. Inimas ara, e owam junum awut aeawirisen. Aram aramat ipic atakam jen cowok ajiawirisen. 12Filipus nat, e Allah Pemerintah Atakam Akatam, e Yesus Kristus Atakam Akatam, e ow acacapiomefen. Ow masirin, e Yesus Kristus asicimfes owerowam, cepesam, bwi abwimfesen. 13E Simonam e Yesus Kristus asicimefen. Ow masirin, aramat ipic bwi abwimfesen. Aramat ipic bwi abwief, ar Filipus akac aemapawirisen. Ar e Filipus e junum bweas aemawiri aporawiri, ar junum awutnakut aeawiri.

14Barewen. E Samaria ow, e Allah atakam ji aefesen. E Yerusalem aemapfes atakam botaw batewosom ow, inim atakam jen ajifes, ar Petrusam, Yohanesam, e owpu atiwirimfesen. 15Petrusam, Yohanesam, erasan ajaremfes, er Allah e Roh Kudus e ow batetam janim aanimfesen. 16Bap ara, ow e ow bwi abwimfes, ar Tuhan Yesus juwas cowok ajiemfesen. Inimas e Roh Kudus e ow jak aman bafiwaptotor opoken. 17Bare, e Petrusam, e Yohanesam, ban e ow dam ton atatiwfesen. Atatiwfes masirin, e Roh Kudus e ow jak aman afiwaptotorefen.

18Bare, e atakam botaw batewosom ow, ban e ow dam ton atatiwfes ara, Allah, Roh Kudus e ow atetamefen. Simon inimas aporef masirin, ar uang e Petrusam, e Yohanesam, batetam aememefen. 19Aramat ipicam atakam aotawefen. “Car e fakas do tetamcan. Inimas ara, dor ban, ow dam ton atatiwcey, e Roh Kudus e ow jak aman afiwapcema.” Inim aeefen. 20Petrus masirin, atakam e ipic aotawefen. “Oram bi binip aceceremamem, ‘Dor e Allah atetamcowas, uang baytit ara.’ Inim aemem. Inimas oram, e oruangam, e neraka mamfiwey. 21Or Allah atakam ji bwe opok. Inimas e Allah kerja bwemtam, bare oram arapok. 22E aemamem pwicakas bak mampayemey. Oram janim Tuhan mamanimey. Aramat ipic e bi binip aceceremamem dosa akokoromosomtamceman openow. 23Or icim awutnakut afesmem. Oram dosa atakam ji aekurumamem. Dor inimas apormin.” Petrus inim aeefen. 24E Simon nat, atakam aotawefen. “Car janim Tuhan manimtamcan. E atakam atawmokomas dor bwemasin.” Inim aeefen. 25Bare, e atakam botaw batewosom ipic jamnuk e Tuhan atakam atemen aatamfesen. Aram e Tuhan atakam e ow aotawfesen. Aotawkurumfes masirin, aram Yerusalem aojisosfesen. E bowsec ara, aram e Atakam Akat, Samaria capinmi samat arke aotawfesen.

Filipus, Etiopia ipic bwi abwimef

26Barewen. Tuhan amalaikat, atakam Filipus aotawefen. “Basitey. Bokot bip Yerusalem awames. E bokot cowok e wun bokot bip Gasa awames. Oram e bokot mamjisosey. E bokot, cem opok asan ara.” Inim aeefen. 27Bare, e Filipus asitef wunam ajarefen. E bowsec ara, ar Etiopia capinmi pemerintah ipic awut biamnuk aemamtewefen. E ipic e Etiopia raja cowoc juwas Kandake arakat pok takas manmok batiwtam ipic arawen. Bap ara, e ipic Yerusalem ajisosefen. 28E jofay ara, aramat ipic, arop capinmi bofasi, kereta aman aemapefen. Aram, e Allah atakam botaw ipic juwas Yesaya aeapomef buku baca aemapefen. 29Roh Kudus masirin, atakam Filipus aotawefen. “Or e kereta sotopa. Oram e kereta akac jamjarey.” Inim aeefen. 30Bare, Filipus e keretapu akukuosefen. Aram e pemerintah ipic, e Yesaya aeapomef buku baca bwem, jen ajiefen. Filipus masirin, jonow atowporefen. “E baca aemamemas, o nat, omsom?” Inim aeefen. 31E pemerintah ipic masirin, “Ow dor mamememtam opok aecenes, do nat, nomsom bwememem asan opok. O nat, dey. A capinmi ci jamkunawapey.” Inim aeefen. 32E baca aemapef buku inim atakam ara:

“Ow aramat ipic atowomosfes. Aram ow acatiwces domba jiwi inim cimin atowomosfes. Ow domba jiwi fin basesakamosom aeces, e domba jiwi jokon ajiemcemes. Aramat ipicam inim cimin jokon ajiemef. Ar atakam opok cowok.

33Ow aramat ipic, jipic pwicak inim cimin aomfes. E salah atakam basakamtiw owam, aramat ipic atakam asakamtiwfes. E nat, ar suw atakam asakamtiwfes.

Owam aramat ipic acatiwfes. Bare, e aramat ipic awaniemfes ow, jokmen awutnakut aememfes. Inimas owam e jokmenas, atakam bwemotawkurum asan opok.”

Inim atakam baca aemapefen.

34E pemerintah ipic masirin, atakam Filipus aotawefen. “Atakam botawcan. E Allah atakam botaw ipic, ca ipic atakamam? Arma atakamnew? Kawey ipic atakamnew?” Inim aeefen. 35Filipus masirin, e baca aemef buku, atakam acowomtamefen. Ar e Yesus Atakam Akat, aramat ipic aotawefen. 36Filipusam, e pemerintah ipicam, e kereta aman atatajarfesen. Aram bwi sotop atatajarfesen. E pemerintah ipic masirin, atakam aotawefen. “Bwi awse ara. Dor or bwi do babwim akat ara. Inimas acuw bat ow open?” Inim aeefen. 37Filipus masirin, atakam aotawefen. “O nat, basicim anakatnew, bare or bwi babwim araman.” Inim aeefen. E pemerintah ipic masirin, “Yesus Kristus, Allah atiw ara. Dor aramat ipic asicimamin.” Inim aeefen. 38E pemerintah ipic masirin, e kereta batukap jirmec ajirimefen. Bare, Filipusam, aramat ipicam, e bwi aneysefesen. Filipus masirin, e ipic bwi abwimefen. 39Aram e bwi asowtometfesen. Asowtometfes masirin, Tuhan Roh, e Filipus ajisomosefen. E pemerintah ipicam, e Filipus bi bopor opoken. Aramat ipic nat, jak akat cowok arop aojisosefen. 40Bare, ow, Filipus bi, kota Asdod aporfesen. Aramat ipic masirin, e samatin samatin takas ajarefen. Aram e Atakam Akat acacapiomefen. Bare ar e atakam e kota juwas Kaisarea ajiwar aotawefen.

Currently Selected:

AEMAWIRISAS 8: LAICNS

Highlight

Copy