YouVersion Logo
Search Icon

AEMAWIRISAS 13

13
Roh Kudus, Barnabasam, Saulusam, kerja a bwemtam aeremtewef
1Barewen. E wun kota Antiokia Yesus basicim barewsi ow, Allah atakam botaw ow aememfesen. Wun ow masirin, atakam mamememtam ow aememfesen. Er Barnabasam, Simeonam, Lukiusam, Menahemam, Saulusam, inima. (E Simeon wun juwas Sosokpic arawen. E Lukius, kota Kirene samat ipic arawen. Bap ara, Menahemam, Herodesam, cem cowkon sur aotemfesen.) 2Bare, e ow Tuhan asicimfes. Aram amos pok amasefes. E ow inimas cowocemampesaw, e Roh Kudus atakam e ow aotawefen. “E Barnabasam, e Saulusam, do kerja bwemtam aeremtewmin. Car e ipic jamnuk, e kerjaas bwem batewemey.” Inim aeefen. 3Bare, e ow amos pok aomasefesen. Aram janim Allah aanimfesen. Aram aban, e ipic jamnuk dam ton atatiwfes, wunam e ipic jamnuk atewosomfesen.
Barnabasam, Saulusam, Siprus ajirfes
4Barewen. Roh Kudus, e Barnabasam, e Saulusam, atewosomefen. E ipic jamnuk masirin, kota Seleukia ajisosfesen. Aram erasan ewnajuwfes, wunam wōw juwas Siprus ajirfesen. 5Bare, ar kota Salamis ajirtayfesen. Salamis ajirtayfes masirin, ar Allah atakam e Yahudi ow sembahyang cem takas aman acacapiomfesen. Aram Yohanes e kerja akac bwem atowomirfesen.
6Ar e wōw ewsowemfes, wunam e poman amerfisfesen. Kota Pafos ajiwar ajartiwfesen. Erasan ara, ar dat epcom ipic juwas Baryesus biamnuk aemamtewfesen. E ipic Yahudi ipic arawen. Aram Allah atakam botaw suw ipic arawen. 7Aramat ipic, e wōw gubernur juwas Sergius Pulus cowkon aemapawirien. E gubernuram bi binip epcom ipic arawen. Bare, e gubernur, e Barnabasam, e Saulusam, ajateefen. Ar Allah atakam jen baji akat arawen. 8Yunani atakam ara, e dat epcom ipic juwas “Elimas” arawen. E Elimas nat, e Barnabasam, Saulusam, atakam asesakayomefen. E gubernur Yesus basicimasin. 9E Saulusam wun juwas Paulus arawen. Bare, Roh Kudus, aramat ipic aomomkurumef arawen. Aramat ipic, e dat epcom ipic manmok aworomsimapomefen. 10Atakamam aotawefen. “Or tot bot ipicam, jursumec ipicam, amcem ara. Oram Iblis atiw ara. Or e tarowatas takas bifan afayomawarmem. Or e Tuhan atakamnak afafasimtawawarmem. 11Jakaperey. Wow ara, Tuhan siksa aemceman. Or masirin, manmok kapi aememcemem. Or isi arke, jopok manmok bwemtiw asan opok arew.” Inim aeefen. Bare. Ar manmok amwinam, jiwicam, aememefen. Ar masirin, banfe bajimom ow, powec apowjarefen. 12E gubernuram inimas aporefen. Aporef masirin, aram Yesus asicimefen. Aram Tuhan atakam junum awutnakut aeefen.
Barnabasin Paulus, e Atakam Akat, Pisidia capinmi kota juwas Antiokia ow aotawfes
13Barewen. Paulusam, e akac aemfes owam, kota Pafos ewnajuwfesen. Aram Pamfilia capinmi kota juwas Perga ajirtayfesen. Bare, Yohanes e ow bakan ajiosef, wunam Yerusalem aofasiosefen. 14E ow masirin, Perga aewsitfes, wunam Pisidia capinmi kota juwas Antiokia ajaremfesen. Ses Ban Jo ara, aram sembahyang cem afiwfes, wunam aneypwikapfesen. 15E sembahyang cem kepala ow, Allah Jirmec Bukuam, Allah Atakam Botaw Bukuam, baca aemfesen. Baca aemfes masirin, ar ow, e Paulusam, e akac aemapfes owam, atakam botawpor, jirmec ajirimfesen. “Awapokom owa. Car atjen awapes ow bow epen, atakam botawey.” Inim aefesen. 16Bare, Paulus asitef, wunam ban manim aemefen. Aram atakam aotawefen.
“Awapokom Israel owa. Awapokom Allah basicim Yahudi opok owa. Atakam jen pajiey. 17Israel ow Allah asicimames. Ametnak ara, e Allaham e darafasutmar aeremtewefen. E owam Mesir capinmi aemapfes, Allah e ow, ow samat awutnakut aemapomefen. Ar masirin, e afakas aporomefen. Aram e ow e Mesir capinmi ajisomosefen. 18E owam pwicakas e cem opok capinmi aemawirisen. Allaham eras tahun empat puluh ajiwar jak desen apepeawirien. 19Ar masirin, Kanaan capinmi samat tujuh ajiwar akumimosomefen. Akumimosomef masirin, ar e capinmi e darafasutmar sey aseyetamefen. 20Ar eras takas tahun empat ratus lima puluh ajiwar aemawirien.”
“Allah eras aemkurumawiri masirin, ar kepala ow e ow atewemtama aeefen. E kepala ow e Allah atakam botaw ipic juwas Semuel aememef jofay ajiwar, tugas aemawirisen. 21E ow masirin, Semuel raja ipic a batewemtam, inim janim aanimfesen. Bare, Allah, Kis atiw juwas Saul, atewemtamefen. E Saul, Benyamin samat ipic arawen. Aram raja ipic tahun empat puluh ajiwar aememawirien. 22Allah nat, e Saul e raja ipic memem akoromnemefen. Akoromnemef masirin, ar Daud e ow araja ipic atewemefen. Aram e Daud atakam aotawefen. ‘Dor e Isai atiw juwas Daud damos ajiemamin. Aramat ipic, e jirmec ajirimceyas ji aekurumcema.’ Allah ainim aeefen. 23Bare, Yesus, Daud urpis ipic ara. Allaham e Yesus Israel bajortew ipic atewemtamefen. Ar Allah atayi e ow aeefas jipu cowok arawen. 24Bap ara, Yesus bwenaw opok aemef, Yohanes atakam e Israel ow takas aotawefen. ‘Car dosa bak mampayemey. Owam car bwi babwimcenes.’ Inim aeefen. 25Bare, Yohanes akerjaas takas bakoromtiw jofay sotop aenawef ara, aramat ipic jonow e ow atowpora aeefen. ‘Cabi binip, do ca ipicam? Dor e manmok afeawirukum ipic arapok. Caram aporey. E ipic dofa asep aenawcema. Aramat ipic tarowat ara. Dor fasi. Inimas dor aramat ipic sandal bwemsurumtewtam asan opok.’ Yohanes inim aea aeefen.”
26“Dojowow akatonokom. Car Abraham urpis ow ara. Caram Allah omar ow ara. Allah, e bajortew atakam, dar atewenamforow. 27Ow, e Allah atakam botaw ow tulis aefes kitab, e Ses Ban Join Ses Ban Join baca aema aemes. E nat, e Yerusalem owam, e akepala owam, e Yesus amsom opok aemfes. Aram e Yesus bacatiw atakam aamsakamfes ara, ar e kitab atakam jipu aemfes. 28Ar Yesus damir baf salah opok aporfes, e nat, aram Yesus bacatiw janim Pilatus aanimfesen. 29E Alkitab, ow e Yesus aomcesas atakam ara. Bare, e ow e Alkitab inim atakam jipu aemkurumfes, ar e Yesus sumu ipic e salib cenes atewnemfesen. Aram aramat ipic ek jip awerem aman atatiwfesen. 30Allah nat, aramat ipic aojaworomsumutumefen. 31Bap ara, wun ow, aramat ipic, Galilea capinmi akac ewsitfes, wunam Yerusalem akac ajarfesen. Yesus aojaworsitef ara, aramat ipic, bar arke e ow bipu afomisa aeefen. Bare, wow e owam inim atemen e Israel ow, aatamames. 32-33Bap ara, Allah, atayi e darafasutmar aeefen. Aram e atayi aeefas jipu cowok aemtamforow. Aramat ipic, Yesus aojaworomsumutumef. Bare, e Masmur kedua atakam:
‘Or dotiw ara. Dor wow oricipic aememamin.’
Allah inim aeefen. Bare, daram inim. Atakam Akat car acacapiomamenom. 34Allah e Yesus aojaworomsumutumef. E Yesusam damir boaf opok aemcema. Allaham inim atakam aotawefen:
‘Dor e Daud atayi aeofas car atetamcimin. Eras akatnakut ara. Eram anakat ara.’
Inim aeefen. 35Wun ayatam inim atakam ara:
‘Or e otarowat ipic dam das of baofameserec, inim bwemji asan opok.’ Inim aeefen. 36Bare, Daud jitemef ara, aramat ipic, e Allah atakam asakamtiwefas jipu aemkurumef, wunam aram damir aafefen. Ow masirin, aramat ipic arafasutmar awerem sotop akayimapomfesen. E adam dasam of aofamesefen. 37E Allah aojaworomsumutumef ipic adam das nat, of bofames opok cowoken. 38-39Dojowow akatonokom. E Yesus aemefas, ow dosa bakokoromosomas ara. Owam eras atakam car acacapiomaman. Allaham e Yesus asicimames ow, ow tarowat ara, inim atakam asakamtiwcema. Aram adosa akokoromosomtamcema. Allah nat, e Musa Jirmecin ji bwe ow adosa bakokoromosomtam opok aemama. Caram inim atakam jen pajiey. 40-41Bare, e ametnak Allah atakam aotawfes ow, inim atakam aotawfesen:
‘E Allah atakam inim afayomamokom owa. Jakaperey. Car wow tetakay aememamokom ara, dor pok cowok aemcimin. Owam e aemceyas atakam car aotawkurumcannew, caram e atakam basicim opokut aemcomokom. Bare, caram eras junum mameey, wunam damir mamdamirafey.’
Inim aefesen. Bare, caram bi binip pimicima. Car e ow e atawfes atakam jipu bwemasin.” Paulus inim aeefen.
42Barewen. E Paulusam, Barnabasam, afisfes ara, e ow janim fak aanimfesen. “E aenawcow Ses Ban Jo, caram inim atakam mamotawcarowey.” Inim aefesen. 43Bare, e sembahyang cem ajarewsiapfes ow, apacaywuosfesen. Apacaywuosfes masirin, Yahudi ow arkeam, agama Yahudi arma afisfes ow arkeam, e Paulusin Barnabas ajamkawifesen. E ipic jamnukam atakam e ow aotawfesen. “Car e Allah atetaman asan akat bakoromtiw arapok.” Inim aefesen.
44E Ses Ban Jo aenawef, bare e kota ow takas, Allah atakam jen baji ajarewsiapfesen. 45Yahudi ow nat, e ow arke aporfes, ar icim awutut afesfesen. Aram e Paulus atakam aomotawfesen. Aram cemew atakam aotawfesen. 46E Paulusin Barnabas nat, jak fak aememfesen. Aram atakam e ow aotawfesen. “Allah car aratakam jen bap takam baji jirmec ajirimef. Ca nat, aratakam aopowmokom ara. Inimas e jiwnenak batamemawar, caras opok aporomtamamokom. Inimas ara, dar car bakan ajioscomom, wunam e Yahudi opok samatpu ajisoscomom. 47Bare, Tuhanam inim jirmec ajirimforow:
‘Dor, car e sereas, atakam e Yahudi opok samat botaw ow atewemamin. Inimas e samatin samatin takas, “Tuhan car bajortew,” inim atakam jen ajicemes.’
Tuhan inim aeforow.” Paulusin Barnabas inim aefesen.
48Barewen. E Yahudi opok samat inim atakam jen ajifes, ar jak akat aememfesen. “Allah atakam akatnakut ara,” inim aefesen. Bare, e Allah jiwnenak batamemawar aereremtawef ow takas, Yesus asicimfesen.
49Owam, e Tuhan atakam e capinmi samatin samatin takas aotawfesen. 50E Yahudi ow nat, e agama mamkawi fak cepes ducuram, e kota ownucuram, atakam aototomerfesen. E ow masirin, wun ow, e Paulusin Barnabas bajurusum, jirmec ajirimfesen. Aram e ipic jamnuk e capinmi aotewerosomfesen. 51Bare, Paulusin Barnabas, e sandal capinmi poros amwin, e ow bipu acucukomosomfesen. Er e ow e pwicakas aefes, baporomtamas ara. Inimas aefes masirin, aram kota Ikonium ajisosfesen. 52Bare, e Yesus mamkawi ow jak akatnakut aememfesen. E Roh Kudusam e ow aomomkurumefen.

Currently Selected:

AEMAWIRISAS 13: LAICNS

Highlight

Share

Copy

None

Want to have your highlights saved across all your devices? Sign up or sign in